رحاب: كنك 😳
رحمه: تبكي . ماكني شي مضايقه
رحاب:وهي تقعمز جنب رحمه . من شنو مضايقه احكيلي
رحمه: تبكي وخنقتها العبره
رحاب: احكيلي كنك في شي صار بينك وبين مهلهل
رحمه: انظني خلاص يارحاب لاعد في مهلهل لاشي
رحاب: شن صار
رحمه: لنا كم اسبوع نحكوش مع بعضنا انرن عليه وندزلا في مسجات مايحكيش امعايا وفيتني بكل
لعند اليوم سكنتلا رن عليا وحكا امعايا قتلا وينك وكنك اديرلي هكي
قالي يا رحمه نحلفلك بشنو اني انا حبيتك ومانضحكش عليك
بس فكرت واااجد ولقيت قصة ارتباطي بيك فاشله ومستحيلا وحنتعبو في حياتنا وهلي وهلك حيرفضونا ومش حنكونو لبعضنا
فالقيت احسن حل ننفصلو من توا خير مانتعبو بعديين ونتعلقو بعضنا اكثر
صاح حنتألمو بس مع الوقت تو ننسو وتو يجيك نصيبك وتنسيني
فهذا احسن حل لان انا وانتي مش لبعضنا وسمحيني واااجد وتمنالك الخير
وسكر عليا وقعدت انرن عليه دار فونا مقفل ومسحني من فيس ودارلي تأمين ع فايبر
واختفاء مره وحده
رحاب: اششش خلاص باهي معش تبكي وتقهري روحك
قتلك من الاول يا رحمه ردي بالك اتحبيه وفوتيه لان علاقتكم واضحا صعبه بكل ومعقدا لان خايفه ايصيرلك الموقف هذا وصار الي خايفا منا
رحمه: وشن ذنبي انا كان حبيتا هذا قلب مش في يدي
حبيتا وكبدت عليه ومع ان عارفا ان صعب ارتباطنا وعارفا ان حنتعذب بس ماهمنيش شي الا انكون معاه ونسمع صوتا وكلاما
صعبه والله صعبه واااعره اتحبي ومايصير شي من حبك
بذات هو صعبها عليا لما قالي انحبك بس مش في يدي وهلي وهلا رافضين ومستحيل يوافقو
رحاب: كانت في يدك يارحمه وكنتي عارفا هلي يرفضو حاجه زي هذي وهو هلا رافضين مع ان قتيلي حاول امعاهم
كنتي اتفكري بعقلك مش بقلبك وتباعدي عليه لان في اوقات لازم الانسان يحسبها بعقلا ويحكم عقلا
بس انتي حكمتي قلبك وشوفي شن صار
حتتعبي توا وتبيلك وقت عشان تنسي بس اكيييد حيجي يوم وتنسي وان شاء الله ايجيك ولد حلال يعوضك خيير وينسيك مهلهل
رحمه: اااااه ليش الحب هكي واااعر وليش الي يحب لازم يتعذب ويتعب
ليش مش اول ناس انحبوهم هما الي نأخذوهم
ليش لازم ننكسرو وينكسرن اقلوبنا ونبكو ونتألمو وبعدها يصير منا
ليش كل الي نعرفهم في حياتي صحباتي عيال سيدي بنات خالاتي الي حبو كلهم ماخذوش الي حبوهم وتعذبو اول مره
رحاب: لان دنيا هكي لازم اتعلمك وتعطيك درووس في الحياه عشان اي غلط واي شي درتيه المره الاوله تصلحيه في ثانيه
علشان لازم تعرفي ان الحب الاول كان فيهش خير لكي وان الخير في تاني عشان تعرفي ان الحياه ماتوقفش ع حد وان مهما صار فالحياه مستمره بالشخص هذا وبلاه
عشان تعرفي ان كل شي نصيب في دنيا هذي ومش اي حاجه يبيه الانسان يأخذها مرات بختا ونصيبا في حاجه غيرها
عشان تعرفي ان الحياه فيها الحلو والمر ولازم اتعيشيها كيف ماتعطيك وترضي بيها
عشان تعرفي قيمة الحاجه الي كانت عندك ومره تانيه تعرفي كيف اتحافظي عليها عشان تعرفي ان كل شي فيه خييير لكي اكيد ربك ايديرا والي مافيهش خييير حيبعدا عليك
واكييد لا انتي فيك خير في مهلهل ولا مهلهل فيه خيير لكي والي ربكم بعدكم اكييد انتم الاثنين دسلكم الاحسن وحيعوضكم خيير
بس ماتيأسيش يارحمه ديما خلي عندك امل في الله
ربي كريم يأخذ شي ويعطيك شي احسن من الي خذاه ممكن توا مش حتفهمي كلامي هذا لان عرفتها صعبا عليك بس بعديين حتعرفي وتقولي الحمد الله
بعد يجيك نصيب كويس ينسيك مهلهل وكل شي فات في حياتك
رحمه: انا انحب مره اخره هذا وجهي خلاص معش لابنحب ولا بنكبد لاشي
رحاب: غير تو اتقولي هكي لانك مقهوره وتعبانه ومنكسره بس مع الايام وشهور تو تهدي وتبدي تنسي وقلبك هذا اكييد يجيه يوم ينبض من جديد لشخص يكون من نصيبك ويستاهلك
رحمه: عليك دنيا شينه ليش اتفرق في الي يحبو بعضهم ليش ماتخليش فيهم يكونو لبعضهم
رحاب: انك قلتيها دنيا يعني مش ديمتلنا لازم انتعذبو فيها ونتألمو وننجرحو وننباعو وننخانو عشان نعرفو انها دنيا فانيه مش حدومالنا وماديم فيها الا وجه ربك
وبعديين اقرب مثال قدامك خليه وخوذي منا عبرتك هو يوسف شفتيه كيف كان يحب اميره صاح ومن قال ان يوسف في يوم حيزوج ويحب مراتا وينسا اميره
شفتي دنيا كيف
في ثانيه تغيير كل شي وحب يوسف وكره اميره مع ان انقولو مستحيل بس هذي دنيا
رحمه: فعلا دنيا غرورا
رحاب: اكييد ومجبورين انعيشوها كيف ماهيا تبي ونرضو بنصيبنا والي كاتبا لنا ربي
لان فيش حد يأخذ الا الي مقسومتلا لو كان شن ايدير الي مكتوب ع جبين لازم اتشوفا العين
رحمه: اااه قلبي انحس فيه يوجع فيا يعني خلاص من اليوم معش نبي نسمع صوتا ومعش نبي نوض ع مسجاتا وكلاما ليا يعني انتهاء كل شي ومجبوره اني نبدأ ننساه ونعيش بلاه
رحاب: وجعتها رحمه. الله غالب ربي يصبرك ياخيتي وخلاص
رحمه: تنهدت . ان شاء الله ياااارب
رحاب: خلاص نبحتيلي رقبتي وانا ننصح من بدري ونقولك خلاص
رحمه: هههههه بارده
رحاب: سخنيني وغمزتلها
رحمه: بحتت في رحاب بنص عين. بتبدي في حناطة معتصم انتي
رحاب: ههههههه مش عارف العيل هذا ليش ديما يضحك مش متخيلا شكلا وهو جدي بكل اتحسيه يليق عليه الضحك خيير صاح ويضحك غصبن عنك سوا تبي ولا لا
رحمه: من الي تحكي ع معتصم انتي
رحاب: اها عليش
رحمه: الي نعرفا ديما انتي ومعتصم عرايك في بعضكم مش متحبيهش ومش من نوعك المفضل
رحاب: يعني لازم لما نحكي عليه انكون انحبا يعني
رحمه: تو من الي قالك اتحبيه انا كلامي واضح قتلك يعني مش من نوعك مفضل وماتحبيهش لذاتا هكي تصرفاتا وحركاتا يعني مش زرطتيه مش قصدي بيه الحب الي في بالك
رحاب: اها نحسابك تقصدي هكي
رحمه: لالا نقصدش هكي بس شكلك انتي اتفكري هكي
وسكتت رحمه هيييييي 😳قصدك اتحبي معتصم
رحاب: ضربتها ع كتفها . تي نحب عينك كنك انهبلتي انتي
انا حكيتلك عادي عليه وبعدين انا معتصم هذا مستحيل ينزيلي من زور يعني بس عجبني ان واخذ الحياه بسطا مش مصعبها بس هكي
رحمه: اها فعلا معتصم ضرب الحياه بعرض الحائط وصدق هكي الانسان مفروض يكون لايحب لايكبد بيش مايتعبش
رحاب: ردينا للنكد اخره عدا
رحمه: خلاص ها سكتت باهي
رحاب: تاكلي شكولاطه
رحمه: والنبي حولي انتي وشكلاطتك منيش عارفا عليك عشق جنون للشكلاطه
رحاب: ههههه مش تعشقي شكلاطه خيرلك من تعشقي البشر
رحمه: ههههه والله صدقتي .باهي هيتي
أنت تقرأ
{الحب الاعمى} الجزء الاول منقولة
Misterio / Suspensoقصة ليبية تتكلم عن الحب الوفاء الصداقة الاخوة الخيانة الكذب قصة طويلة جميلة مأخودة من أحدات حقيقة لم تكتب عبثا او لتسلية فقط بل كتبتها الكاتبة بكل احساس ومن واقعنا فالنقراها ونتمعن في أحداثها ونأخد ماه رائع وجميل منها وأنا أنقلها كما كتبتها الكاتب...
