زهره..
خسران روح وخاصتا ترتبط بيك من دم، شي صعب وابدا مو سهل
احمد الانسان الخلوق الطيب مصيره مات بهاي الطريقه
معقوله مكتوب النا بالحياة منعا باتا العيش واحنا كاملين كعائله
ركضت رقيه صعبه على احمد متأمله ان تنقذه من الموت
بس ياريت تدري ان لكل انسان مكتوب اله يوم يموت بي
يروح بعيد عن هذا العالم، مثل ماراح بعيد ابويه عادل
مچنت شاهده على لحظة وفاته بس جنت شاهده على وكعته يم العامود
ممدد وعلى صدره صورة سيد الصدر، حلكه مفتوح ويسيل منه الدم ببطئ
وجهه منطي للونين لون ابيض مطعم بزراك فاتح اتفحص جسمه
اتلمس جسمه من كل مكان احجي ويا، بس أي رد من عنده ماكو
احط اذني يم كلبه اريد اسمعه ينبض بس ماكو نبض
كأنها الساعه ادق دقاته الاخيره ..
اتلمس قدم رجليه اتوسل بي بدموع مهمومه ان يكعد من هاي النومه
كاعده احاجي ،كاعده اكله احمد كوم هاي النومه مو الك
بس ماكان أي رد، بعدوني من عنده بقوه او بالاحرى شالني شيل امير
لان ماقبلت ادخل واعوف احمد وحده ممدد
ردت اشبكه وانام بصفه
حتى لو نومتي الاخيره قابله المهم اشبع من حضنه الدافئ
دخلت جوه حسيت بخنكه مو طبيعيه معقوله احمد مات
حطيت شال على راسي من رقيه، ردت اروح وياهم بس محد قبل ورقيه
راحت وياهم بدون متسمع أي كلمه مني،عاينت على البيت لكيت
صورته معلكه على حايط المحجر، الحايط كان لون سمائي بلون نقاوة السماء
بي كم بقعه على لون بيجي معناهه وجود رطوبه بالحايط
بورك الحايط مرفوع شويه من عدة جهات معناهه الحايط صارله فتره طويله
من مصبوغ ويحتاجله اعادة تدوير ،كانت صورة احمد مبني عليهه عش عنكبوت
رحت اقتربت علمود انزلهه،لكيت خيوط العنكبوت خيط داخل بخيط
كأنما كاعدن يحمن احمد من اي تلوث خارجي، بعدتهن بأيدي
مشه على ايدي العنكبوت وكأنما كاعد يبلغني اوخر ايدي منا
نكثت ايدي على سريع وخرت العنكبوت وكع بالكاع دست عليه
باصبعي وكلت بكلبي هذا مصير كل واحد بعد يقتربلي
مديت ايدي على الصوره اخذتهه ضميتهه على صدري
خرعني ابو بريص ينفخ نفخات عاليه رئسا شرد
راح بعيد عني
أنت تقرأ
هيام
ChickLitدخلني للغرفه شمرني على الجربايه تفل عليه وجر حزامه وبكل قوته يضرب بيه وعيوني تتبع الحزام وين يتوجه واحط ايدي علمود ميوجعني، مو عادل هذا غير شخص مو انسان حيوان كل ضربه يضربه اليه اموت اشوف الموت واني عايشه اسمع عمتي وحماتي يضربون بزهره وعباس بحجة...
