هيام

الحلقه العاشره "الاخيره"

راحوا الجهال للمدرسه وبديت انظف ولشلعان الكلب بس هو ياصبح صبح عليه زين وحلو ساعتين من خروج عادل سمعنا طبه قويه وكأنه صوت قنبله وانفجرت بس مادري كلبي نغزني كلش الان اندكت علينا الباب بكل قوه حيدر ابن جيرانه عماد
_ خاله الحكوا الهيكل مال البيت وكع على زلمتكم

مجرد ماسمعت هاي الكلمات اختل توازني شنو شديصير يا زلمه منهم رديت ليوره حطيت عباتي وركضت وره الولد الناس تباوع الجوراين تباوع وهذا الي يكول "هاي حرمة بيت عادل شعدهه طالعه مفرعه" ماهتميت لأي شي بس اريد اوصل للمكان وصلت شلون ماجان والكه العالم مغطيه الجثه بطانيه اريد امشي للجثه ماكدر كلت بكلبي "ربي ماريد هم وحزن بعد تعبت " مشيت بخطوات مرتبكه متردده من ان ارفع البطانيه واشوف منو، اجتني قوه لا اراديه من سمعت صوت جهالي ورايه رحت كبل شلت البطانيه من جهة الراس نرعبت كمزت من مكاني هي كمزه وهي شهكه باعلى صوتي منظر مانساه الوجه ازرك الحلك مفتوح والدم يسيل منه والعيون مفتوحه رايحه على جهه الثانيه كلت بصوت عالي " يبو يبو راح زلمتنا" اباوع الناس كل واحد يكول شكل "انا لله وانا اليه راجعون" والثاني يكول " اصبري بنيتي هي هاي سنة الحياة زلمتج راح لدار حقه ادعيله بالغفران" اباوع لجهالي مطشرين كل واحد ماخذ طرف من جثة عادل ويهز بيهه بكل مايملك قوه في سبيل يكعد ومايفارق الحياة

_ يمه حبابه كعدي ابونا
_ يمه جاوبي شبيج ابونا راح راح
_ بابا بابا اكعد لتروح ماشبعنا منك

حاولت انطق بكلمه او بحرف او بأي شي احس الساني ثكل مر عليه شريط حياتي وتذكرت كل شي صار كدامي " عروسة بغداد" " اخذي الخبز وروحي" " شكرا مريتي " مواقفه وكلامه كله مر كدامي وكأنه كاعده اعيشهن اليوم، معقوله تركني معقوله عافني بوسط اهله منو اليه شنو مصيري من بعده عيونهن ثكلن طفن وحيدهن صحيت اني ومتمدده بلكاع بالهول وجهالي داير مدايري يبجون اول ماصحت كمت حضنتهم رئسا اجت عليه عمتي تصيح

_ يبو يبو يبو ولكم راح ابني راح ضناي انتي اخذتي كله من وراج ام السحوره
_ عمه اوكفي شعليه اني هو هذا يومه
_ ولج مفروض يومج قبل يومه بت الفكر بت الوصخ سايبه اهلج شمروج علينا وراحوا
_عمه تركيني تركي شعري
_ولج اليوم اطلع بروحج للسماء مثل ماطلعت روح ابني ولج ابني اليوم شاف العالم الثاني وانتي هنا كاعده تتنفسين اخ ولج اليوم موتج على ايدي
_وخري حبابه والله معليه والله معليه

اخذتني للصاله كدام النسوان بالصاله ذبتني بنصهن وكلتلهن بعلو صوتهه:هاي كتالة ابني دارنهه زين،باوعت عليهن كل وحده كامت على حيلهه الي يكلك حيوانات مفترسه وشافن فريستهن كدامهن وحده وره الخ تقربتلي مانسى هذا الموقف ابد، وحده صعدت على رجليه وتضرب بيهن بكل قوتهه اما الثانيه الي لازمه شعري تتفن بي بكل شراسه بالمكص تكص خصله خصله، طفن عيوني على اخر شي وحده ركعتني بخشبه على راسي صحيت بين كوم مال كواني وفراشات وبجق لزمت راسي حسيته راح ينفجر صوت مو طبيعي براسي نزلت ايدي لكيتهه كله دم كمت مفزوعه استنجد بربي واصيح باعلى صوتي " ربي بحق ضلع مولاتي فاطمة الزهراء الهي مروتك طلعني منهم ،ربي انت اعلم بيه ممسويه شي والله"كمت دكيت الباب بكل قوتي