هيام

مشهد من "الجزء الثاني"

بديت اكبر واحس نفسي نضجت ووعيت على الدنيا،ملامج جسمي بدت تطلع بوضوح اكثر من قبل

ملابسي صارت عباره عن دشداشات عريضه في سبيل ماخلي عمي غسان يباوع عليه

جنا صغار اني واخواني كعدنا الصبحيه اندور على امنا مثل الطير الي يدور على العش مالته

جان جوابهم "امكم راحت للسماء" جان كلما يصير دنيا ليل نطلع اني واخواني نسوي دائره

نباوع للسماء ونحجي ويا امنا احنا ومبتسمين منتظرين تجي امنا

جان شي يتحرك بالسماء كلنا نفرح وواحد يشبك الثاني من الفرحه

_ولج زهره اجتي امنا باوعيهه بالسماء شلون تتحرك
_ولكم اجتي اجتي امنا اجت هلا هلا

كل مانطلع بره بالحديقه بليل نشوف هذا الشي الي يتحرك بس يكمل طريقه بتجاه واحد

جان السؤال بداخل الكل "ليش ميتقربلنا

بعدهه كبرنا ودرسنا اكثر عرفنه ان الانتظرانه ساعات وايام جانت مجرد طياره

اجتنا خيبة امل جبيره خاف جان عدنا امل من عودة امنا بس لا من هذا الموقف صار عدنا صفر

الكلام الجان ينحجي على امي اكدلنا ان هي فعلا تكرهنه ومتحبنه ومتريدنه وهي قتلت بابا

بس جان بنفس الوقت يراودنه السؤال بداخلنا كلنا " ليش هيج سوت بينا"

اخواني احمد وعباس يوميه يدزهم عمي غسان للسوك يبعون كلنيس،سبح، ترب

وميدخلون البيت اذا ميحطون بيده من كل واحد 15 الف

مرات اكعد افكر معقوله يبيعون هلكد ويجيبون هاي الفلوس لو يبوكوها، جنت متاكده من شكي

ان هم جانوا يبوكون ،راقبتهم لكيتهم يبوكون من جيب عمي من ينام ومن يرجعون ينطوهيا

وعمي عباله فلوسه تكثر وهو ميدري اخواني كاعدين يجمعون فلوسهم يم رقيه،

والفلوس الي ياخذهن من عدهم هي فلوسه وحلاله بالاصل

اما اني ورقيه كل وحده لازمه شغله،رقيه تسوي جنط واطرزهن بالنمنم وادزهن بيد الولد يبيعوهن

مرات يجن نسوان كبار بالعمر يردون من رقيه ادوس ضهرهن لان هي توم

اما اني تعلمت اضرب ابر من خلال جوارينا التجي يمنا العصريه علمتني تعلمتهه بسهوله

مرات اسوي كبه وكباب وحلويات احطهن بماعون سفري واجمدهن ونكتب على الباب

"يوجد لدينا كبه بنوعيتين ،كباب من لحم غنم وايضا تتوفر حلويات حسب الطلب والذوق"

جنا ناخذ الفلوس منا نصهن النا ونصهن لعمي وعمتي واذا دروا عدنا فلوس هواي

ياخذوهن ميبقلون بحجة بعدكم صغار من تكبرون جمعوهن عدكم