قصص...وعبر

قصة أحدهم

فيه حاجة غريبة لاحظتها في الـ 3 -4 سنين اللي فاتت !!
مفيش مرة يجيلي فيها رزق غير ولازم يقف ويتعلّق !! ابقى خلاص بيني وبينه خطوة .. بس لازم يحصل أي حاجة توقف وتجمّد الموضوع !!
رغم إني ببقى واخد بالأسباب 100% وعامل شغل حلو جدا وكل حاجة ماشية زي الفل .. بس برضه لازم الدنيا تقف ! لا الشغلانة راحت ولا جت !! هي متعلقة كدة وخلاص لأسباب غير مفهومة !!
في الأول كنت بفضل أحرُك وافرك كتير وراه من غير فايدة .. وبعدين اكتشفت حاجة غريبة جدا !! أول ما أيأس من نفسي وشطارتي وقدرتي في إتمام وجلب الرزق ده - بلاقي نفسي بلجأ لربنا سبحانه وتعالى بانكسار وعجز شديد عشان يجيبلي الرزق ده بنفسه !!
برجع أظبط مواعيد صلاة الجماعة وانزل المسجد بدري !
أدعي جامد وأتضرع إلى الله إنه ييسر الأمور ويقرب البعيد ويفتح الأبواب المغلقة !
أركز جامد جدا في الاستغفار والصلاة على النبي صلى الله عليه وسلم وقول "لا حول ولا قوة إلا بالله" وجميع الاذكار الخاصة بالرزق والفرج !
بحاول بصفة عامة أراجع علاقتي مع ربنا وأظبط الأداء وأعالج التقصير قدر المستطاع!
ساعتها بس ، أول لما أتبرأ من حولي وقوتي وشطارتي في الشغل ، وأول لما أقر لله سبحانه وتعالى وحده بفضله في جلب الرزق ده ابتداءا ووصوله إليّ انتهاءا ، أول ما أقدم عجزي وضعفي وافتقاري = ألاقي المواضيع مشيت ، والمية بدأت ترجع لمجاريها ، والرزق يجيلي تاني لحد عندي بفضل الله سبحانه وتعالى ومنه وكرمه !!
وهكذا بقا في كل رزق يجيلي على مدار الكام سنة الأخيرة دي !!
في الحقيقة الأول كنت بتضايق إن حالي دايما واقف ومفيش حاجة بتجيلي بسهولة !
بس لما حكيت لأمي الموضوع ده قالتلي "احمد ربنا" !! ربنا بيـربـيك عشان تفضل دايما محتاجله !!
فيه ناس في منتهى الغفلة - لا بترد الفضل لله ، ولا بتشكره على نعمه ، ولا ربنا في حسابتهم أساسا - ورغم كدة ربنا بيبعتلهم رزقهم لحد عندهم ، لإنهم خلاص مش فارقين معاه !!
وفيه ناس ربنا بيربيها عشان تفضل في كل خطوة محتاجة إليه !!
والله ياخواننا هي دي !!
"الاحتياج" إلى الله نعمة كبيرة جدا تستحق الشكر والله !!
والاستغناء عن الله ونسيان فضله دي مصيبة يجب الاستعاذة منها !!
وانا بنصح أي حد حياته دايما عطلانه كدة - رغم إنه بالورقة والقلم واخد بجميع الأسباب - راجع علاقتك مع ربنا سبحانه وتعالى وشوف انت مقصر في ايه !! واظبط حتة الاستعانة والتوكل دي في قلبك بإن ربك وحده هو الرزاق !! مش بشطارتك والله !! ممكن جدا يكون ده سبب وقف حالك !!
ونعوذ بالله من حال قارون : "إنما أوتيته على علمٍ عندي" !!
وربنا ما يحرمنا من الاحتياج إليه أبدا يارب العالمين ..
...
اللهم أعزنا بالتذلل إليك
وأغننا بالافتقار إليك
ولا تكلنا إلى أنفسنا طرفة عين أبدا يارب العالمين .. امين