وأنا في المترو بلعب في الموبايل
بنتين قاعدين قدامي بيتريقوا علي شعري بشكل رخم وصوتهم عالي وواصلي يعني مش هاممهم اني حته اسمع يعني منتهي قله الذوق
رفعت عيني عشان اهزقهم
لقيتهم بنتين بعبايات سودا متبهدله وبشره شقيانه نقص الفيتامينات واضح جدا عليهم رغم المكياج التقيل وشعرهم ظاهر رغم الحجاب اللي ملوش لازمه
افتكرت موقف زمان مع بنت عمي إيمان الله يرحمها
إيمان كانت جميله جدا شكلا واتخرجت من الجامعه واشتغلت علي طول في ماسبيرو واتعرفت علي مخرج شاب وسيم واتجوزوا عن حب
قريبتنا جت تباركلها علي جوازها وإيمان عملت قهوه من غير وش فقريبتنا ضحكت واتريقت عليها وقامت هي عملت القهوه مظبوطه بوش وفضلت تتريق علي إيمان
الغريب ان بابا وقف مع قريبتنا الرخمه وفضل يمدح في قهوتها واحنا كلنا مستغربين لأن بابا دايما بيدافع عنا كلنا ضد اي حد اشمعنا هنا وقف ودافع عنها
وبعد ما قريبتنا مشيت بابا اعترف انه تعمد يدافع عن وش القهوه لأن البنت كان جمالها للاسف أقل ومتعثره جدا في تعليمها وحفظها وحش جدا في العلاقات
وبابا قال كلمه حكمه هي معندهاش غير وش القهوه تفرح بيه متستكتروش عليها الفرحه حتي ولو علي حاجه هايفه
انا افتكرت الموقف ده في المترو وبدأت اتعاطف مع البنتين اللي ظاهر ان الدنيا طحناهم وشقيانين
وبدل ما اتخانق وقمت وقربت منها وقولتهلها انتي فعلا شعرك جميل جدا
البنتين ارتبكوا جدا لأن رد الفعل مكنش متوقع خالص وضحكوا وواحده فيهم حاولت تعتذرلي فأنا قولتلها شعري كيرلي عشان خارج من رأسي يرقص من الأفكار اللي شايفها جوه وانا سيباه يرقص براحته مش عاوزه انكد عليه 😂
البنتين ضحكوا واتقلبت من مشاعر الخناق لضحكه لطيفه 😁
أنت تقرأ
قصص...وعبر
Ficção Geralقصص .. حكايات .. رواياات .. خيالية أو واقعية .. مؤلفة أو موضوعة .. منقولة أو حصرية لايهم ذلك لكن دور ع المغزى☆ احيانا سنقابل انفسنا بين هذه السطور هل سنتمكن من مواجهتها ومواجهة الحقيقة؟ يقولون ان مواجهة انفسنا اشد من مواجهة عدو عتيد. مواجهة الحقيقة...
