قصص...وعبر

عند أم ترتر

أم ترتر مخلفتش ترتر ولا حاجة أم ترتر عندها إسماعيل وإبراهيم ونبوية وهي نفوسة الشهيرة ب"أم ترتر"كانت ساكنة في حواري كرموز بالأسكندرية واسم ترتر ده أطلق عليها لأنها كانت  ست عايقة وبتلبس جلاليب ومنديل بترتر كتير علشان كده سموها أم ترتر وجوزها المعلم علوان أبو إسماعيل كان "عربجي حنطور" وكان معروف عنها لامؤاخذة أنها ست لسانها طويل ومفترية وفي فرش الملاية مالهاش مثيل اصلها كانت ماشية بمبدء الشرشوحة ست جيرانها وأم ترتر كانت ست بيت شاطرة ساكنة في بيت دور واحد منه بيت وعربخانه للحصان وعربية المعلم علوان جوزها وكانت عاملة فوق السطح مزرعة فراخ وبط والبيوت إللي حواليها دورين وتلاتة فكانت الفراخ والبط بتوع الجيران بيقع علي سطح بيت ام ترتر واللي كان بتضيع لها فرخة أو بطة وتسأل الجيران عليها يردوا عليها  بصوت واطي "عند أم ترتر"يعني ربنا يعوض عليكي علشان أم ترتر لو سمعت تخلي فردة الشبشب أعلي منهم لأنها كانت ريا وسكينة الفراخ😂😂😂
فكانوا بيتقوا شرها وطلع المثل الشعبي ده"عند أم ترتر"اللي بيدل علي استحالة أنك تلاقي إللي بتدور عليه رغم أنك عارف ومتأكد مين إللي خده...