الحلقة 24 :
إياد؛ نتمنالك حياة سعيدة
حطيت يدي على قلبي .. دموعي نزلوا أقوى .. حييت بخطواتو و هو يبعد .. تلفت .. لقيتو يمشي .. مقدرتش نطلع ... رحت نجري .. بكل قوتي .. حتى تخبطت فيه من التالي ..لفيت يديا عليه من التالي نحكي و نبكي ..
ريان؛ منجمش نكون فرحاانة.. متأكدة .. منقدرش نكون على حسابك .. و على حساب روحي ..
جا يفك يديا ..كبست عليه أكثر
ريان؛ صح اللي جمعنا من الاول كانو غير المشاكل .. و اللي صرالي مش قليل .. مي نتا كنت الشي المليح فكامل الشي الخايب .. حابة نعيش حياتي بلا خوف ايه مي مش بلا بيك إياد ..كي هكا نعيش بالخوف معاك و قابلة .. متأكدة عمرك ما تخمم تأذيني .. نحبك تفهم نحببببك إياد الهاشمي
~~~~~~~ الحاضر ~~~~~~
لحظات و جبد روحو .. غزرلي ندرا كيف .. باس جبهتي و خرج بلا ما يزيد كلمة .. خذيت نفس .. حسيتو كان مقطوع...و واش اللي قاعد يصرالي .. أن أنا بديت نحبو !!! .. هزيت براسي لالا .. حاسة نفس حكاية إياد تتعاود مع منار .. هزيت يدي حطيتها عالبلاصة اللي كان حاط راسو فيها .. فشلت.. قلبي كان يخبطلوا .. مش. ولف نعرف روحي .. أحاسيسي الملخبطة .. دوكا أنا جيت ننتفم منهم ولا من روحي .. واش راني نديييير .. طحت مع الزجاج للرض .. حطيت راسي بين رجليا .. كل مرة نخرج خاسرة فلعبتهم .. كل مرة نوقع!!!!.. علاه يا قلبي بليتني علاه !!!!
...........................................
* الحوار بالإيطالية
كيارا؛ عاود عاود ؟؟ شكون ؟؟؟ إيااااد !!!
-وي مدام
كيارا؛ دخلووووو واش ؤاك تستنااااا ...
خرج .. حللوا الباب تاع المزرعة دخل .. واقفة فالباب لافة الشال عليها ..تستنا فطوموبيلتو تلحق .. حبس قدامها .. نزل يغزرلها .. مع وصل عندها نحا النواظر .. تبسمت
كيارا؛ إياااد .. كاين أحلا من هكا مفآجأة ..
تبسم نحا النواظر و عنفها .. لفت يديها عليها
إياد؛ ليك وحشة
كيارا؛ مش قدي.. هكا تغيبها .. كل ما نعيطوا مشغول ..
إياد جيتك برجليا ههه
كيارا؛ ههه ادخل دوك نتفاهمو .. داخلة و تجبد فيه من ذراعو يضحكو
.................................
#قصرالهاشمي:
صوت ضحكاتهم معبي الدنيا ..
مريم؛ هههههه ماي أصلا كبرت فالتشوحيت .. ميليق عليها والو
وصال؛ لا و عاملة حفلة بش تفرض روحها فالطبقة الأستقراطية
مريم؛ هههه هاذي مشكلة المخلوعات .. خطينا منهم قوليلي ..وكتاه ناويين العرس
نزلت راسها بحيرة .. تلعب على صوابعها
مريم؛ مزال برك يتصرف معاك ببرود ؟
وصال؛ مقلقتني علاقتو مع شريكتهم الجديدة فالخدمة ..
مريم؛ آ اللي صرالها حادث
وصال؛ تقنعك نتي أنو قاعدة فدارو على جال كان هو السبة في اللي صرا ؟؟
مريم؛ وصال منار و تعرفيه كون جا معينوش يخطبك .. ميوافقش من لول .. و زيد تعرفوا بعش من يامات الجامعة .. يتسما مش جديدة عليك عقليتو ..
وصال؛ منعرف هادو شهور يا طاطا .. ميسقسي ما يحوس .. غير انا اللي نروحلوا و نعيطلوا .. ساعات نقول نفكها و نتهنا
مريم؛ يا ويييلي منك .. دوكا هكا تخممي .. بنات المجتمع الراقي .. متمنيين ولو شوفة برك .. نتي خاتمو بيدك و مفرطة .. اديها نصيحة مني .. الراجل بعمرو يقنع بمرا وحدة .. و لكن طول عمرو مرجوعو لأصلوا للمرا اللي بجنبوا و معاه .. يعني تقدري تقولي تتعد المواصفات و الأشكال .. و يبقا القالب هو الأصل
طلعت راسها غزرتلها متعجبة من تخمامها .. مرا ملامحها قوية .. فالخمسينات ..كلشي عندها لازم يكون مريڨل منظم .. و يناسب المستوى الراقي .. زينها عربي أصيل ..جمالها مش ناقص على وحدة ثلاثينية .. تدقق فالملاحظة على أبسط التفاصيل .. يمكن هذا الشي اللي خلاها تتأقلم مع واحد كيما توفيق الهاشمي .. نجمت تفرض روحها .. و متبقتش تحت عقدة الزوجة الثانية .. و تكون من مرت الأب لسيدة القصر و وحدة من أهم سيدات الطبقة الأرستقراطية ..
مريم؛ ههه من غير ما تخممي ولد كرشي و ميخرجش عن طوعي .. كون جا إياد نشك
وصال؛ ياخي تعتبري إياد كيما ولدك
رشفت من كاس القهوة
مريم؛ ايه .. مي الأصل يبقى أصل حتى لو. تناسيناه حنا .. على كل حال دوك نجس حكاية ريان هاذي .. و نحكيو
وقفت وصال
وصال؛ أوكي طاطا أنا نروح دوكا .. نخليك بالسلامة
سلمت عليها وخرجت .. . تلفت مريم تغزر للبعيد ..هزت يدها شاورت لواحد من الرجال ..قدم عندها
مريم؛ واش تحركات إياد فإيطاليا
هو؛ المخبر قال مكانش حاجة غريبة .. خدمة سهرة و برك ..
مريم؛ تقدر تروح
أنت تقرأ
العميلة 306 (باللهجة جزائرية )
Hành độngالعودة بكرونيك جديدة 💥 ستيل مافيا تعرفوني مع الأكشن 🤷🏻😂.. المهم باش نخليكم تدمنوها 😎.. و من دوك أصحاب القلوب الضعيفة متقراوش .. اختصارا قسحوا قلبكم باش تنجموا تعيشوا أحداثي 💥.. الاحداث تبدا تبانلكم بالشوي .. نحب ماكس تفاعل .. الكل تكونوا حاض...
