العميلة 306 (باللهجة جزائرية )

الحلقة 36

الحلقة 36 :
خرج من الدوش .. درت روحي راقدة .. حسيت بيه كي تكا قدامي .. و تنهد .. تلفت غزرلي .. و مبعد زاد تنهد ..
منار؛ خوفتيني كثر من ال****** اللي راهم يخربوا ورانا .. علابالي كثرت الدوزة ليوم .. و ساعات نتنارڤا و نزيد عليها .. مي كون مجيتش نحبك .. منديرش هكا .. الله غالب منحملش فيك شوكة .. وين يا يضربوني بيك .. ساعات نلوم روحي اللي دخلتك للجوجمة تاع حياتي .. بالاك دوك راكي عايشة كالم حياتك مستقرة .. دوك كل خطوة فيها ريسك .. زدت جبتك هنا .. علابالي معجبتكش هدرة مريم .. بصح هكا برك نقدر نحميك .. منتصورش و ميجيش في راسي نوض نهار و تكوني مكانش في حياتي .. صح منيش كامل . و متملك بالزايد بصح .. نحبك لدرجة ميتوقعهاش مخك اليابس هذا .. 
تنهد .. و تلفت ليا .. خاطر حسيت بأنفاسو في وجهي
منار؛ تهبلي كي  تكوني راقدة .. راح نموت بالعيا يومين مرقدتش .. بصح حاب نبقى نشوف معاك حتى للصباح ..
حط يدو على خدي يعدي فيها و يرجع في شعري للتالي .. قدم طبع بوست على جبهتي .. وجبد حكم يدي .. و رقد .. لحظات قليلة .. و كلمات كانت راح تكون نورمال خلاص بالنسبة ليا .. بصح أنا توجعت هنا .. في عوض ما لازم نفرح ..كل طفلة تحلم تلقا واحد يحبها هكا ..يهدرلها هكا .. بصح أنا لالا .. يمكن لأنو أنا أكثر وحدة جربت وجيعة أنك تحب واحد من قلبك .. و يجبد بيك فآخر لحظة .. محبيتش نوصل نستغل منار بش نطيحوا هو و عايلتوا .. رغم كل شي منيش استغلالية لهاد الدرجة .. نعرف منار داخل فالتخلويض كيفهم .. بصح نحسوا مش كيفهم .. هاذ الحاجة مخوفتني أكثر لأنو .. الشي اللي راني نحس بيه ملازمش يكون .. و منحبش يوصل النهار وين نختار بين عقلي و قلبي .. ولكان عملت الغلطة لولا مرة ثانية .. رايحة نكون وقعت ورقة غبائي بيدي ..
بقيت بين أفكاري .. نحاول نلقا طريقي لين غطست فالنوم .....
....................
إياد؛ يتسما مش نتا اللي بعثت الطرد !!!
كيفن؛ لا مش أنا .. على خاطر موصلت لوالو الشي الأكيد انو السلطة الإيطالية فالسجلات حطت بلي مكاين حتى خسائر بشرية .. يتسما مزالها حية
إياد؛ و بالتقرير هذا تأكدت بلي خرجت حية .. الأهم دوك نعرف وين ..غير كيارا اللي علابالها متأكد .. كيفن افرزني
كيفن؛ شوف إياد هي صح خطيبتي و كلش بصح علابالك بلي حكايات الهاكر هي آخر واحد نخمم نخرب فيها
إياد؛ كيفن مناش رايحين نضروها.. الطفلة اللي راني نحس عليها راني حياتي اك فاهم وش معناها حياتي .. هادي سنين و انا ميت و دوك كي عرفت بلي راهي حية عاودت حييت .. وش بانتلك نتا بلي خليتها فنص النار برضايتي .. انو تزوجت وراها برضايتي .. انو كملت نعيش برضايتي .. بانتلك بلي راني عايش .. نظن نتا و فارس اكثر وحايد شافوا حالتي من غيرها هي .. للدوك نمشي بالدوا .. وليت بسيكو كيفن .. اك تفهم وش معنى تحب طفلة لدرجة تولي بسيكو من غيرها .. وليت منقدرش نقعد مع فاميلتي .. كاره بابا .. علاه منعيشش في دزاير كيما منار مثلا .. مخصنا والو ثم .. وش يجيبني الطليان وين علابالي بلي راني فأكبر ريسك هنا .. و نظن تعرف اكثر مني قدام من واحد طالب راسي .. هكاك و باقي هنا .. مزلت حابس فلحظة اني  كنت راح نكمل حياتي معانا هنا .  مزالني فديك الدقيقة .. و هاداك العالم اللي كانت فيه .. و دوك كي جاتني فرصة صدقني .. مش راح نكون المضحي كيما كل مرة .. و ميهمنيش العواقب و ريان اللي خسرتها هاداك العام .. محال نزيد نخسرها ..غير نتا تلقاها .. قبل منهبط لدزاير لازم نعرف ويني .. و ادي وش تحب
كيفن؛اعطيني ساعتين نلقاهالك دوك نبيراطي تيليفون كيارا
#يسرى_أمجوج
#العميلة306
لبنات منيش نكتب مش على جال تفاعل ميهمنيش اصلا جيست مكانش عندي افكار مليحة برك