العميلة 306 (باللهجة جزائرية )

الحلقة 33

الحلقة 33 :
هزيت المراية .. . مكانتش عندي الجرأة نغزر لروحي .. حطت يدها على كتافي.. غزرتلها .. تبسمت و هزتلي براسها .. تاع شوفي .. تنهدت ..
كيارا؛ هيا ريان
طلعتها غزرت لروحي .. ملامحي تبدلت كامل .  شكل وجهي.. شواربي .. خشمي ..  تنهدت .. ملامح ريان معادتش موجودة خلاص ..
ريان؛ تبدلت
الطبيب؛ النتيجة كانت رايعة بالعادة الناس يبقاو بتشوهات للأبد مزالت برك كدمة على الكتف ..
كيارا؛ مرسي يعطيكم الصحة
خرجوا تلفتت ليا
ريان؛ حكيتي معاه ؟! قلتيلوا ؟؟
كيارا؛ إياد.!!.. مهوش يبان من 3 أسابيع .. مام تيليفونو طافي ..
ريان؛ ههه أكيد كملت خدمتوا هنا و هبط لدزاير ..
كيارا؛ وش تقصدي !
ريان؛ مشفيتيش بلي تحط فالأخبار يقص فالخيط تاع مشروعهم الجديد في وهران !
كيارا؛ او !!!
ريان؛ متنسايش نتي وعدتيني
كيارا؛ ريان بالاك كانت كاينة سبة انو يعني يديك يطلب منك الزواج و مبعد
ريان؛ ههه علاه سكتي كملي .. مبعد يروح و يخليني نتحرق .. كون مجاتش مفتعلة .. ميروحش.. و لا مكمل حياتو و يدير مشاريع .. لانو ببساطة تأكد بلي تحرقت .. و أسرارهم الوسخة هو و باباه.. مش رايحة تخرج
كيارا؛ نظن هذا خير تقدري تكملي حياتك بلا ما يبقاو وراك
ريان؛ غلط.. دوكا نكمل حياتي .. بصح نقلب المعايير
كيارا؛ ريان ؟
ريان؛ دوك نولي أنا وراهم
~~~~~~~~~~~~~~~~~~~~~~~~~~~~~~~~~~~~~
باقية نغزرلوا و هو يتهز و يتنفض .. بين عينيا الطرد اللي تبعث و غشوا تاع دوك .. بلعت ريقي ..
ريان؛ واش اللي علاه
منار؛ معلابالكش !
ريان؛ مناااار احكي نورمال ملخر بلا ألغاز.. و نحي يديك منحبش نكون محصورة ..
عدا يدو على لحيتوا ..
منار؛ متحبيش تكوني محصورة قلتي ؟.. على هاذي تلفتي الرجال !!
ريان؛ وش من رجال
منار؛ رياااااان
للحظة خممت الرجال اللي حاطهم يعسوني ؟
ريان؛ دوكا على هاذي مداير هاذ الجوجمة كامل  .. نظن هاذي مسؤوليتي انو نحمي روحي  .. و كيما قلتلك بطبيعتي نقلق وقت نحس روحي محصورة ..
غزرلي ندرا كيف .. عض شفتوا بغزول ..و ڨحرلي
منار؛ آخر مرة قريب متي .. مش نتي اللي كنتي تتوجعي كنت أنا .. أنا راني مسافر .. و خايف يقدم ليك واحد من ******** ... في بالك مضيق عليك !!... خايف يا ديني خايف علييييك .. يعيطولي يقولولي ضيعناها !!!... نبقا نطلع  و نهبط .. خايف كشما صرالك .. نعيطلك متهزيش .. واش حابة مني بالضبط فهميني و راح نتصرف على هاذ الأساس ..
..........................
ريم؛ اووووه حبيت الجو هنا ..
نور؛ اممم شباب
ريم؛ زوج كوكتال
غزرلها ندرا كيف خلاها تستغرب و تلفت يريڨل فالكيسان ..
ريم؛ شبيه هذا
نور؛ حابة نشطح هيا
ريم؛ مش قادرة دوك نسناپي
رجعت شعرها للتالي .. و بدات تتمايل مع الموسيقى .. بزاف ضغوطات نحتاجوا نفرغوها .. و حنا ضايعين في غناية .. بزاف حوايج يصراولنا ميتفسروش.. مكانش كلمات يوصفوهم ..
دور الغناية .. و قدم للكارو .. يتكيف في قارو .. يغزرولهم ملفوق كيفاش يشطحوا .. تنهد ..للحظات لمح خيالها .. باقي يثبت لكان هي تاع الصباح اللي زادت  فسدتلوا نهاروا .. تلفت كي عيطتلها ريم .. هز حاجبوا
جاكي؛ الله يبارك نبدا نهاري بيها و نختموا بيها .. تلفت دور غناية خلاف و نزل
ريم؛ ههههه مقود نتا والله
جاكي؛ اهيه قلتيلي هبطتي من الترك
نور؛ علاش عيطتيلي
ريم؛ آ نور ههه .. شو في هادا جاكي ..
نور؛ ايه و مبعد ؟؟
ڨحرتلها و مدتلها تيليفون ..
ريم؛ عندك تيليفون من الخدمة
حكمتوا عليها و مشات .. باقية تبعد من الغاشي .. تيليفون يصوني تعرف بلي أي تأخير ممكن يكلفها عواقب مش مليحة .. مع خرجت للكولواغ .. تدعثرت رجلها ..طاح تيليفون من يدها .. مع طاح عفس عليه ..  زرب جبد رجلوا .
نور؛ لالااالاااااااااااااا
هزت راسها جات عينها في عينوا .. طلعت حاجبها مشوكية..
............................
إيطاليا 
كيفن؛ ههه إياد نعرف بلي حنا عشرة و كلش بصح اللي راك تطلب فيه حاجة مستحيلة
إياد؛ كيفن FBI و اخترقتها .. قتلك تتقفا أثر مقدرتش
كيفن؛ مجاتش في تقفي أثر .. الطفلة اللي راك تحكي عليها مختفية من سنين .. يعني ديجا قادرة تكون ميتة ..و سامحني باباك كي يدفن واحد .. الجن لكحل ميعاودش يلقاه ..
إياد؛ نظن عندي خيط تقدر تبدا منو
كيفن؛ هات تراه ...
...................
بلاصة مظلمة .. طاولة مستديرة .. لابسين كوستيمات كوحل .. الصمت سايد البلاصة ..قفل البيسي .. وطلع راسو غزرلهم .. نزلوا ريسانهم كامل ..
- لحق الوقت اللي يتنفذ فيه رايي .. الريسان هادوا كامل لازم يتحطوا قدامي ..
منار الهاشمي .. إياد الهاشمي .. توفيق الهاشمي .. صهيب ريادي .. و الأهم من هاذوا كامل .. ريان ..نحبها حية ..
-أمرك ..
-باسم المنظمة ..باسم الخط القاتل .. عندكم كل النفوذيات بش .. تصفيوهم .. 24 ساعة تكفي .. جهيدة هذا المرة منحبش اخطاء
جهيدة؛ امرك