-بس بس
رفع رأسه يشوف الصوت دا جاى منين - ادخلي جوا يا ماما
- انا مش ماما انا يمنى
- طب ادخلي جوا يا يمنى
- لأ مش هدخل
سكت و بص قدامه تاني
- بس بس
- عاوزة ايه يا شطورة
- ماتقوليش يا شطورة
- عاوزة ايه يا قمورة
- ماتقوليش يا قمورة
- عاوزة ايه يا بت
- ايوه كدا
نفخ خدوده بزهق مني و بص قدامه تاني
- بس بس
ماردش
- بس بس
بردو مش بيرد
- عمو الظابط
- ايه ؟!! ... عمو ايه ؟!!
- عمو الظابط ..
- عمو مين ؟!!
- عمو انت يحبيبي
- ياااربي انا كان مالي و مال الاطفال
- انا مش طفلة أنا يمنى و عندي عشرين سنة و نص و في كلية تمريض و عزباء و تصلح للزواج
ضحك .. يا حلاوة طلع حلو فعلا طب لما احبك دلوقتي يعني .. بص فوق تاني - انتِ عاوزة ايه ؟
- قلبظ بجنية
رفع حاجبه اليمين مش بحب الناس اللي بترفع حواجبهم اليمين عشان مش بعرف اعملها - هنهزر !؟
- لأ و الله انا فعلا عاوزة اشتري قلبظ من عمو السوبر ماركت اللي على اول الشارع دا
-ادخلي جوا مافيش خروج بعد الساعة ٥
- دا السوبر ماركت على اول الشارع
- و لو و لو ممنوع منعا باتا الخروج من باب الشقة إلا في حالة الطوارئ .... كإنهيار المبنى أو إن المبنى ينهار
المرة دي انا اللي ضحكت ...برطمانات العسل يا حكومة
- طب شوف هنزل السبت و انت هاته و حطه فيه ... مش الشرطة في خدمة الشعب
رفع حاجبه اليمين تانى - لأ و الشعار دلوقتي بقا الشرطة و الشعب في خدمة الوطن يلا على جوا بقا
-هو انا كنت واقفة في بلكونتكم
يعني كدا مش هشتري قلبظ و لا شيبسي و لا كادبوري حتى
- اثبت مكانك
اتسمرت مكاني فعلا ... النور بتاع الشارع كان هادي مايبينش ملامح اللي قدامك يدوب تشوف الطريق بالعافية
-لفي وشك
عملت زى ما قال ... ياااااختتتتتتي دا معاه مسدس بجد .... حاول يدقق في ملامحي و بعدها نزل المسدس .. الله مسدس .. ممكن اجربه .. تجربي ايه اخرسي دا أنتِ هتتنفخي دلوقتي
