-بتمطر يا يمنى
-ايوه و بعدين يعني
-هو ايه اللي وبعدين هننزل طبعا
-ننزل فين يا ندى طب خافي على طولك ع الاقل
-بس يا قصيرة
بجد المطر كان تحفة نزار قباني كان بيهمس
"جَاء المَطر يا حَبِيبَة المَطر"
ايوه حبيبة المطر بحب ريحته و صوته من اجمل اصوات العالم ندى بتقول إن صوتي بردو حلو خاصة في سورة (ق) لولا اني صايمة كنت مديت ايدي زى ما بعمل و شربت مياة المطر دايما بستغرب من قصص الحب اللي بتبدأ تحت المطر بس الفرحة اللي ببقى فيها بتخليني اتمناه
-دعيتي بإيه؟
-هيكون بإيه يعني اني اتجوز طبعا
-يلا يا ندى من هنا مش عاوزة اعرفك تاني
ندى دي من اجمل الشخصيات اللي عرفتها في حياتي كلها بجد اينعم ربنا خد من عقلها و حط في طولها بس جدعة و صاحبه ماتتعوضش
-يمناااااااااا
-ايه سرعتيني
-جالي عريس
-اعملي ماسك خيار و هو يروح لوحده
-هو انا بقولك جالي دمل بقول عريس عرررريس
-بس بس انا غلطانه اني بصاحب الاشكال دي خمسمية مرة اقول عيش سنجل موت بصحتك
-كام مرة يا قلبي
-خمسمية
-تمام احنا فعلا لازم نقطع علاقتنا ببعض
شفاهم انا يعني ايه الحلو في الموضوع افتكرت حاجة كنت كاتبها في مرة
"و رَجُلًا يَضَعْهَا بِقَلْبِهِ يُقْسِم أنّهَا وكَفَى"
هو ممكن الاقي اللي يحطني في قلبه و يقسم بجد و لا دي مجرد طموحات بس انا واثقة في ربنا انا محافظة على قلبي عشان الاقي اللي محافظ على قلبه ليا
-اوعي تقولي انك هتتخطبي بجد
-اه
- و تقعدي بقا تتكلمي في الفون بعد ١٢ بالليل و كدا
-هييييييح و لحد ٣ الفجر كمان و هيبقى معايا دبلة بقا
-و هتحوليني بيها
-و دوني على بيت جوزي قرة عيني
انا مش رافضة فكرة الجواز نفسها انا مرعوبة منها بجد مش بحب اجازف طول عمري بحب امشي استريت ليه اتحط في موضع احتمال اللي هو يا اما فشلت او فلحت مش ضامنه يكون ازاى خايفة ادعي و خايفة مدعيش اللي بشوفه قدامي مش قليل و الله بيبقوا ملايكة في فترة الخطوبة و إذ فجأة بيتحولوا بعد الجواز فترة الخطوبة اكتر فترة خداعة كل واحد بيحب يبين مميزاته للي قدامه و بتختفي العيوب "إنما هي المواقف، تُبدي ما يُخفوه !"
