الهاربه

الفصل الأول

《1》

كانت ليلى والعه المكنسه الكهربائيه و تنظف في الدار ماتسمعش في شي .. شوي و طفتها سمعت صوت امها حليمه و هي تعيط .. مشت تجري لمكان الصوت ، القت مرت خوها سلوى تهزب في امها ..
سلوى بصوت عالي : هااادي اخر و اول مره تقولي لي وجدي يجيبلك خضره ولا دوا ..ياسر نصرفو عليكم امشو اخدمو ع روسكم يا عاله انتي و بنتك..

جت ليلى تجري دفت مرت خوها..
ليلى بصوت حاد: تعلي صوتك على ماما يا قليلة الادب يا حيوانه.. الفلوس فلوس خوي وخليه يصرف علينا انتي ماليكش علاقه..
حليمه:خلاص يا ليلى خلاص يابنيتي خليها توا يجي خوك يقلبها فوق روسنا..
سلوى : تدفيني يا حمارة ياحشره يا بنت الكلبه..
ليلى : تقولي علي ماما كلبه ..والله اني قاتلتك..

هجمت ليلى على مرت خوها و ضربتها بكل قوتها.. على خشت وجدي خوها .. القى اخته تضرب في مرته و وجدي ما يتحملش في زوجته حاااجه .. مسك ليلى من شعرها و نزل فيها ضرب عنيف .. جت أمه بتفك بنته من يده ..دفها بكل قوته .. زي ما متعود يدف امه و يهين فيها ..لانه وجدي باختصار عاق و دلدول لمرته و اللي تقوله عليه يديرا.. بعد كمل من ضرب اخته مشى لداره اللي عايش فيها هوا و مرته سلوى ..
سلوى واقفه تشبح لي ليلى و هي طايحه و تبكي ..شبحتلها شبحة هزوه و قالتلها..
سلوى: ايوااه هادي جزاة كل حد يفكر يمسني ولوو بورده يا كلبات انتي و امك...
طلعت سلوى و لحقت راجلها ..

حاولت ليلى توقف عشان تبي تلحقها و تضربها ..بس الالم الجسدي اللي كانت تحس بيه خلاها تقعد في مكانها ..جتها امها تزحف من الم الطيحه اللي طاحتها لما ولدها دفها .. حضنت بنتها و قعدت تبكي ..
ليلى بصوت موجوع: والله اني موريتها هالتافهه هكي تقول عليك .. وهذا الطرطور ولدك عار الذكوره التافه زوج مرته امتى يموت بسس نفتكو منه .. قاعد غير يضرب فينا ..وماعندنا منو يوقفه عند حده لا خال ينشد ولا عم يدور الله يرحمك يا بابا بس..
حليمه تمسح في دموعها: فكينا منها يابنتي ربي ينتقم منها تبي الربح يابنتي معاد تكلميها حتى لقيتيها تهزب فيا عادي يابنتي .. ماتعدلي عليهم يابنتي تربحي..
ليلى: موت اللي ترفعه الحيوان ان شاء الله نفتكو منه ..
حليمه: هذا خوك يابنتي مهما كان ..ماتدعي عليه ..خوك سندك..
ليلى: سندي ههههه ضحكتيني ..مزال تدافعي عليه بعد اللي دايره فيك و فيا ..هذا عاق ..بوي مات مجلوط من عمايله ..يوريني فيه يوم اسود..
حليمه: ربي يهديه يابنتي ربي يهديه..

ليلى بنت شخصيتها قويه ماتحبش تتنازل عن حقها او حق امها عمرها 24سنه خريجة لغه انجليزيه ..ليلى بوها متوفي من فتره ..
و امها حليمه مرا طيبه على حالها موسعه بالها على مرت ولدها لانها تخاف من ولدها وجدي ماتبيه يضرب أخته ليلى ..
أماوجدي عمره 28 سنه ..متزوج و يسكن في دار مع اهله ...وجدي ظالم و ماعنداش الروح مع زوجته ومايرفضلها طلب ..
زوجته سلوى عمرها19 سنه صغيره بس خبيثه و ملعبه وجدي على اصابعها .. سلوى ماتحبش ليلى تغار منها و تكرهها و لما يجي عريس ممتاز لي ليلى ماتخليش في وجدي يوافق ، لانها حاسده منها تبيها تتزوج اي حد مش كويس... هدفها اتجلي ليلى و امها باش يفضالها الحوش ..
........................
بعد خشت سلوى لدارهم...
سلوى قعمزت جنب وجدي تمسحله على راسه..
سلوى: حبي جودتي ..هدي اعصابك ياعمري..
وجدي: مش قادر ياسلوى ..انتي تعرفيني مانتحملش فيك دقة الابره يابال تضربك هالحقيره ليلى..
سلوى: يااا دلبي اني اللي مايتحملو فيا شي ..
وجدي: المره الجايه بنقتلها راه..
سلوى: ما اعتقدش فيه مره جايه..
وجدي: كيف ؟ مافهمتش؟
سلوى: خووي وسام اللي عايش في لندن يدور عن عروس .. حندله على ليلى اختك..
وجدي: سلمها ياربي مطيب قلبها ..بعد اللي داراته فيك ..مزال بتجيبيلها خوك..
سلوى: ايه بسلامتي قلبي ابيض حليييب .. و بعدين ع الاقل نفتكو منها و يفضالنا الحوش خير من الدار اللي عايشين فيها..
وجدي: ايح ..نسيتي امي ..
سلوى: امك عزوز كبيره قداش بتعيش ..
وجدي: زعما يجي يوم و نعيشو بروحنا و ناخدو راحتنا و نديرو اللي نبوه زي ماوعدتيني..
سلوى: وهلبا حاجات يا حبي ..غير يفضالنا الحوش و تشوف ...😉
وجدي: باهي تو نقول لامي تخبر ليلى عن العريس و ان شاء الله تواافق..
سلوى: شنو شنووو.. توافق غصبا عنها .. انت الراااجل اللي كلمتك تمشي عليهم انت اللي تؤمر و تنهي .. تعطيها علم بس ..وتقوللها انك عطيت فيها كلمه لخوي و بس ..وتاخده بلا تفكير...
وجدي بتفكير:حااضر ياعمري ..صح..اني الراجل و الكلمه كلمتي صح صدقتي ...