سويد

المقدمة

صراع الهوية والعادات والتقاليد مابين الحب والوعود

انا منو واهلي منو جيت من وين وكيف والوصلني هنا شنو اسئلة بسيطة من حق اي انسان طبيعي يعرف ردها صراع بين شخصين في الماضي والحاضر شخص بيسأل الاسئلة دي وهو صاحي من غيبوبه بعد حادث مرور وهو فاقد للذاكرة في الوقت الحاضر

وشخص في الماضي سأل الاسئلة دي علي مدي عشرة سنين من عمرو لانو فجأةصحي من النوم ولقي نفسو في بلد غير بلدو وناس غيرهم وحتي اللغة مختلفة ممكن في شبه في السحنات بس ده ما وطنو

ومن هنا بدت المعاناة للشخصيتين ديل حياتهم مرتبطة بي هويتهم باصلهم وفصلهم بالعادات والتقاليد المرهقة الممكن تفصل عادي بين اي اتنين بحبو بعض الحب تضحية ومرات بتكون تضحية كبيرة شديد لدرجة اننا ممكن نغش عشان نرتاح او عشان نحقق حلم او عشان نوفي بوعد

اغلب شبابنا السوداني بلقي نفسوا مقيد بالتقاليد والعادات بالذات في موضوع الارتباط والزواج في فئات من مجتمعنا من صغار بقولوا فلان لفلانة بت عمو وبكبروا علي كده في فترة بنسوا فيها الكلام ده والواحد او الواحده بعيش سنو وبعيش الحب بس بفوق بالصدمه لما يجي يكلم اهلوا انو عايز يتزوج هنا بتكون القشة القصمت ظهر البعير لما يذكروه انو خاطبين ليه بت عمو انو ده فرض يثور يكورك يكسر ومافي اي زول بسمعوا وهي جملة واحده من ابوه " جاي انت بعد كبرتك وربيتك وقريتك تكسر كلمتي تنزلها الارض لا والله " في البتنازل ويكسر قلب الحبيبة وفي البرفض وبحاول يوصل لحل وسط وبين هنا وهناك تبدا المعاناة

( دليدا ) ومعاناة الوطن معاناة الهوية كان عمرها خمسة سنين لما صحت في يوم وامها بتقول ليها

_يلا دليدا انت سفر في الليلة في الليل

_ماما انا وين تسافر

_تسافر حق بابا السودان انت مافي قعاد هنا هنا في موت في معتقل في خدمة عسكرية انت لازم تسافر سودان لبابا بس

_أدي " امي" انا معاك بقعد

_لا دليدا يلا كنخيد سودان " ح نسافر السودان"

ام دليدا اتفقت مع واحد مقابل مبلغ يوصلهم السودان من واحد من اقاليم الحبشة كان المبلغ الدفعتو مبلغ كبير جدا علي مر السنين الفاتت ماكن عندها هم غير انها تلموا عشان تنقذ بتها من الجحيم ده ماكان هاميها اي شي غير انها توصل بتها لابوها

الاتزوجتو بعد معناة وطلعت منو بالبت دي وشوية  دهب ولو كانت عارفة انو مستقرها ح يكون هنا او انها ح تكون حامل ما كانت رجعت لبلدها بس شائت الظروف انو ده يحصل

( حاجة سعاد ) أم بمعني الكلمة الطيبة والحنية وضعفها ناحية ولدها البخليها تقيف في وش زوجها العمرها ماتنت ليهو كلمة بس كمان ده كبدتها زي مابتقول مامهم ابوه واعمامو عايزين شنو المهم عندها ولدها عايز شنو وهي بتقدر تعمل عشانو شنو الفكره بالنسبة ليها ماكانت تحدي الفكره كانت سعادة ولدها والحاجه الهو عايزها ولو ح يخليها تخسر زوجها وبيتها وعندها كلمة دايما بتقولها ولدي حشاشة قلبي وكبدتي البزعلو كانو بهرد كبدتي

( زوجها ) راجل طول بعرض كلمتوا مسموعة من كبير لصغير حتي اولاد اخوانه واخواته كبير العايلة وكل الشغل عندو عز وجاه وزول بحب القبيلة جدا واهم عنصر عندو انو القبيلة ما تتمازج ولا تنصهر مع قبايل تاني لا اولاد ولا بنات كلو مضروب ببعضوا في خلاط واحد وقدح واحد من صغار خاطبين فلان لفلانة والكلام منتهي

(سيد احمد) الولد الوحيد ليهو الجابو بعد معاناة وانتظار وعايزو طبعا نسخة منو بما انو الوريث الشرعي الوحيد ليه وللعائلة ومن صغير خاطب ليه بت عمو ثريا قراه احسن جامعة واتخرج مهندس ميكانيكي وواصل بعد التخرج في ميكانيكا محركات السفن واستقر في بورتسودان بعد اشتغل في اكبر شركة اجنبية لصيانة السفن

(بيت العم) ثريا زولة بسيطة جدا درست اقتصاد جامعة الخرطوم خلصت وقعدت في البيت بما انو مامحتاجه تشتغل ده رائ ابوها طبعا مع انو طموحها انها تعمل ماجستير بس اهو ردخت وقعدت وكل البيت طبعا منتظر زواجها هي وسيد احمد
بس الماعارفنو انها بتحب ود عمها التاني مؤتمن وهو كمان بحبها بس واحد فيهم قادر يعمل حاجه للتاني ماف او حتي يصرح بس بي حبو