سويد

١٧

الصدمة كانت كبيرة لينا شديد بي 

وفاة ابوي ديدي ما زحت مني لحظة بس وقفت كتير ولازم ترجع البيت ركبتها تاكسي ورجعت اما "سعاد" انهارت ووقعت في الارض في اللحظة دي رفعتها ودخلتها غرفة وجبت ليها ممرضة وقلت ليها عندها ضغط وسكري وتليف في الكبد وزوجها مات عملت ليها اللازم 

كانت منهارة شديد بس ما قدرت أحن عليها ابدا رغم انها ربتني لكن دايما كنت بتذكر مواقف ليها بتلغي مني اي احساس جميل 

ناداني الدكتور وطلع زي ما اتوقعنا انو في ادوية غير الادوية البستخدمها وهي السبب في الحصل مع ابوي ابقي ماف غير سعاد هي العملت كده لانها ليها اسبوع ما فارقتو واصلا ده المتوقعنو كنا انها تحاول تتخلص منو بس هي ناسية انو ابوي ماعندو حاجة وانو سجل اي شي عندو لبناتو ولي ولزوجاتو التانيات يعني ما ح تستفيد حاجة من موتو معقول بس عشان تنتقم منو تقتلو بالله ابن ادم ده ضعيف للدرجة دي وممكن ما يكون عندو ضمير لدرجة الموت ؟! انت يا سيد احمد البتسأل السؤال ده ما انت اكتر واحد عارف ممكن الضعف يوصل لي وين والمشي ورا الشيطان ممكن يعمل شنو 

#فلاش_باك_بورتسودان2007

في يوم كنت قاعد في البيتش معاي مؤتمن جات أرهيت قالت لي عايزاك براك مؤتمن مشي خلانا 

_مالك في شنو قلقتي بي 

_عايزاك تشوف الصورة دي 

_طيب ، امممممم ده منو زي البعرفو

_لا مابتعرفو ، بس ممكن تكون شفتو هنا في بورتسودان 

_ممكن بس الوش مألوف 

_ايوه بالظبط 

_ده منو يعني وجبتي لي الصورة لشنو 

_يلا ده الزول الأنا بفتش فيهو 

_وانا ح استفيد شنو 

_الزول ده أنا مراقباهو لي سته شهور وزي ما انا اتوقعت جا الكافي بتاعي بي رجلينو 

_طيب وانتي ح تستفيدي شنو من جيتو 

_ح اتستفيد انو اجرجرو لي ويعجب بي ويكون في بينا علاقه واكون قريبة منو وامسك عليهو حاجة اقدر اضغط عليهو بيها يوريني اختي وين 

_طيب ياحلوة انتي تفتكري ح تقدري تعملي ده علي اساس انو ما ح يكون عامل حساب 

_عشان تقدر تجيب زول تحت رجلك لازم تعرف نقطة ضعفو 

_وانتي عرفتيها 

_اي طبعا 

_وشنو هي 

_البنات الصغار 

_يخسسسس ده شنو القرف ده 

_اي قرف واي شي بس هو كده بحب البنات الصغار من كان شاب في العشرينات اي واحدة تعجبو يا عرسها يا ساقها معاه واختفت