سويد

٢٦

_وانتي ساكته كده قبلانه بالكلام ده 

_واعمل شنو لو دخلت قسم قلت ابلغ ساي واطاتي مابتصبح علي ، بس انا قادرة علي ولدي وماسكاهو بالفقرا اااااي وبي ايات الله وانتي عارفة شيوخي بس انا بقيت مازوله سفر خلاص تعبت وهو لقي فرصتو بعد ابوهو فات 

_هو منو 

_ولدي الموكوس ده وانا بالي مشغول علي البنيات ديل بودوهم في الدرب الماياهو وكمان المره دي فيهن السودانيات كتار خلاص

_سجمنا سودانيات يعني هن 

_يازوله هن صوماليات وحبشيات وسودانيات ومورتانيات وكلهن جايات للهجره لاوربا 

_الله يكضب الشينه والله حاسه كلامك ده كضب كضب 

_كان مامصدقاني ده مفتاح الباب بتاع النص خشي براحه شوفيهن هن زاتن مابحسن بيك بشربهن المنوم 

_خلاص بشوفهن بس نحنا لازم نطلعهن من هنا 

_سبحان الله مغيير الاحوال دي انتي البتقولي كده ياسعاد 

_اي صاح انا زوله وغلطت قبل كده لكن كمان مابرضي في لحم الزي ياكلوهو كلاب السكك

_اي والله كلامك صحي 

_عشان كده انا لازم اتصرف

_هووووي ياسعاد الخلام ده كلام خطير انا ماعندي معاك شغله

_يازوله خليك انتي في حالك بس وانا بعرف اتصرف ، انا كدي بمش الاسكندريه كم يوم وبجيك بوريك البحصل شنو ، واديني المفتاح ده 

اها شلت المفتاح وفتحت الباب ودخلت لقيتهن ليك زي ماقالت مردومات ونايمات زي المخدرنهن ما واعيات بالدنيا فيها شنو ولا البحصل ليهن شنو لي قدام ومن غير ما اشعر حسيت بدموعي جرن واتذكرت اي حاجه انا عملتها ووصلتني للحال الانا فيهو ده كان اكون قاعدة في بيتي مع حاج محمد وولدي بنينا ليهو جمبنا معاهو مرتو وأولادو مافي في الدنيا دي زي انو يكون عندك بيت مقفول عليك وناس همها توفر ليك كل سبل الراحة ، وياهن ديل طلعن عشان حياة غير حياتهن عشان القرش والحياة الكريمة عشان يأكلوا ويعلموا ويعالجوا بس شوف مصيرهن مكومات زي الحيوانات من غير رحمة وشفقة وبكره بعد بكره يبقن بنات ليل وعاهرات والمابترضي بي كده تموت من الجوع والمرض وبعد ده كلو ما يخلوها حتي بعد تموت يبيعوها اسبيرات بشرية يستفيدو منها هم اااااااااه يابناتي الله ينجيكن 

ولي لحظة حسيت اني سمعت حركه باب بقفل مشيت لي قدام لقيت غرفتين واحده مقفوله ومضلمه والتانيه نورها فاتح ومقفوله بس كان فيها ضل زول واقف كان باين انو راجل لزيت الباب مافتح شكلو الصوت السمعتو ده كان هو لما قفل الباب ، اتسحبت براحه وقفلت الباب 

قلت اصبح الواطه وامش لي مؤتمن اشاورو ويوريني اعمل شنو بس 

_بس شنو