سويد

٢٢

امي صفية ممكن تكون فكرت إني ميت طالما انا لي هسي ما جيت وبما انو اخر مرة شافتي كنت مضروب طلقة وواقع في الارض واكتر من سته رجال موجهين اسلحتهم علي وحتي مؤتمن بما انو شاف المشهد ده برضو فاكيد مفتكر اني ميت ، بس الحمدلله انو كان معاي علي الاقل قدر يطلع اولادي وأمي 

بس حتي انا ما متأكد اذاوصلهم بخير أو لا ، كل السنين دي كنت بتمني اني بس اعرف اذا هم بخير أو لا 

اليوم داك بعد وصلت دليدا المستشفي واطمنت عليها وعرفت اجمل خبر في حياتي رجعت البيت شلت الاوراق من دولاب دليدا ومشيت لابوي اديتو الاوراق ، ابوي رغم انو كان عارف وانا حكيت ليهو الحاصل مما عرفت في بورتسودان من أرهيت بموضوع كامل بس كان بتمني انو الحصل ده يكون مجرد حلم ، خيال ، او حتي كذبة بس للاسف دي الحقيقة اتصل علي مؤتمن قال ليهو تجيب سعاد وتجي 

طبعا كانت صدمة لي سعاد انو ابوي ما مات قربت تجن وحاولت كتير مع ابوي عشان يسامحها بس رفض ورمي عليها يمين الطلاق وده كان ارحم عقاب ليها مع انو ما كان كافي بالنسبة لابوي بس كان كافي بالنسبة لي انا لانها مهما عملت هي الربتني بغض النظر عن انها ربتني عشان مصلحتها ودعتهم وطلعت بعد كلمت ابوي اني ما شي ارجع اولادي وامي 

حاولت اتواصل مع أرهيت بس تلفونها كان ما بجمع معاي ورسلت ليها رسالة ردت لي عليها وقالت نحن جاهزين 

كانت خطتنا بسيطة جدا في انو نوقع كامل في شر اعماله بي خطة مننا وهي انو امش ليهو وأوقع علي عقد الشراكة وأستلم امي واولادي ، مع اني ماكنت ح اوقع وكان ح يجي ضابط الانتربول بالأدلة الوصلها ليهو مؤتمن ويقبض كامل 

بس كانت الصدمه لي لما دخلت ولقيت الضابط مرمي قدامي ومربط دي كانت الحاجة الوحيدة المعتمدين عليها عشان نطلع كلنا بي سلام ، في اللحظة دي عرفت انو مستحيل نطلع كلنا ولازم اتصرف علي الاقل امي والاولاد يطلعو من هنا 

ومن غير ما افكر قلت لكامل ما ح اوقع الا يطلعو من هنا وفي اللحظة دي حصل الماكنت متوقعو ولا حتي حاسب ليهو حساب انو كامل مسك أرهيت عليهو وخت المسدس في راسها وقال لي 

_مافي زول ح يطلع من هنا لا اولادك ولا أمك ولا حتي أرهيت قبل ماتوقع 

_انت شنو ما بشر ما عندك انسانية ، ذنبها شنو أرهيت 

_هههههههه ذنبها انا بعرفو كويس دي ما حاجة بتخصك انت ، بتخصني انا وهي ، ح توقع ولا افرتك دماغها هنا وبعدها افرتك دماغ امك 

_كامل ماتتهور ماتعمل ليها حاجة انا بوقع بس خلي امي واولادي يطلعو من هنا 

بس امي فجأه طلعت مسدس من تحت توبها وضربت أرهيت ما عارف كيف لقت مسدس ولا حتي كيف قدرت تستعملو وانا من الصدمة شلت المسدس ووجهتو لي كامل وجريت اتجاه امي وطلعتها هي والاولاد وصلتهم برة لمؤتمن عشان يطلعو من هنا وارجع اشوف أرهيت الحاصل ليها شنو واعمل المستحيل عشان اسعفها بس لما حسيت بالطلقة في رجلي ماقدرت اتحرك