برنامج #كاتبك_معانا
إعداد و تقديم : ريان
حلقة : 8
.
مسأكم خير يا حلوين و صح فطوركم يارب ، الايام تجري زي البرق و اليوم وصلنا ل تامن حلقة و ان شاء الله مكملين لو ربي اعطانا عمر ، ضيفي او الكاتب يلي معاي اليوم ممكن فيه ناس ما تعرفاش لانه لا ليه صفحة و لا معجبين بس رغم صغر سنه الا انه عظمة في كتابة الروايات ، كاتب تحسه اجاثا كريستي النسخة الرجالية ، قصص عميقة جدا ،بوليسية و اجتماعية بس عنده سرد خيالي ، رواياته للان راسخة في دهن كل من قراها لان كانها مشاهد تمر قدام عينك و منهم انا
.
ضيفي هو الكاتب : أحمد عبدالله ، طبعا عدد كبير منكم ما يعرفوش من هو بس احمد عبدالله هو كاتب روايات في الواتباد و صاحب رواية حب بين دفاتر المرض و بنات نور و ضمير شرف و عدالة ام
.
طبعا اللقاء كان عبر مكالمة هاتفية و مش رسايل
.
نعرفكم بيه / الاسم : احمد عبدالله / العمر : ( مجهول ) /
بداياته كانت في عام 2018 و كتب رواية " حب بين دفاتر المرض " يلي حصلت علي المرتبة الرابعة في مسابقة المبدعين العرب بنتفلكس
.
هذي المعلومات يلي نعرفها بس حنعرفوا اكتر في الحلقة
ريان : الو احمد نبدا
احمد :تقدري تبدي
.
ريان : احمد عبدالله كاتب محترف او هاوي ؟
احمد : اكتب بأحتراف و لكني هاوي
.
ريان : 3 سنوات في مجال الكتابة و عندك 4 روايات فقط ليش ؟
احمد : اولا الفايدة مش في العدد الفايدة ان رواياتك تكون في مستوي كبير و تانيا اني من الناس يلي نكتب بعدين انزل و هذا يخليني ننسجم مع القصة لدرجة اني مرات نقعد في رواية 3 شهور و هذا يلي صار في رواية حب بين دفاتر المرض مع انها 15 حلقة فقط و لكن عميقة جدا
بس للعلم ان عندي اكتر من قصة كاتبها علي ورق بس للان مزال ما كتبتهمش
.
ريان : ليش احمد عبدالله ما عنداش صفحة او بروفايل في الفيس ؟
احمد : سوال وجهيه ، اولا لاني لو فتحت صفحة حنكون دائما نكتب و انا مش من النوع هذا انا زي ما قتلك ناخد وقتي و مرات حتي رواية وحدة في السنة و تانيا عندي مشاغل الحق زي قرايتي و شغلي في منضمات المجتمع المدني فا صعب اني نوفق ، بس عندي بروفايل علي تطبيق الواتباد
.
ريان : ليش ما تبينش عمرك ؟
احمد : لان مرات يأتر علي تقبل الناس لرواياتي
( احمد خايف ان الناس تعرف عمره و تقول ان رواياته اكبر من عمره فا يفضل ان ما يوضحش ) ( للعلم عمره مش كبير )
.
ريان : شن الرواية يلي تعتبرها اقوي رواية ليك ؟
احمد : الناس تقول ضمير شرف لانها بوليسية سياسية ، بس انا رائي حب بين دفاتر المرض و للان شخصية دكتورة نور سالم التواتي في مخيلتي
.
ريان : ليش احمد عبدالله مش كاتب روايات رومانسية ؟
احمد : لا انا اكتب روايات اجتماعية و بوليسية سياسية بس لازم جرعة الحب ، اصلا رواية بنات نور تقريبا تتكلم عن الحب بس دائما يختلف كتابة الحب من كاتب او كاتبة
.
ريان : متلك الاعلي في الكتابة ؟
احمد : اكيد ليا متل اعلي في الكتابة و هي اجاثا كريستي و كذلك نوال السعدواي مع اني ضدها دينيآ بعتبارها ملحدة بس انسانة ليها نظرية كبيرة و حصل ليا الشرف اني قابلتها قبل هكي و عاشق لفلسفتها
.
ريان : احمد عبدالله مش واخد حقه ؟
احمد : ما نقدرش نقول علي نفسي مش واخد حقي لكن المفروض صفحات فيها متابعين اكبر دعمت رواياتي مع اني تواصلت معاهم بس للاسف تجاهلوني ، و الشكر اكيد لصفحة MBC LIBYA يلي تدعم في روايتي
.
ريان : تهتم بلانتقادات ؟
احمد : الحمد الله انا الكاتب الليبي الوحيد يلي كل الرسايل تجي إيجابية و مافيش سلبي ابدا
.
ريان : ليش دائما رواياتك تتمحور علي شخصية وحدة ؟
احمد : ايه هذا صح بس انا نكون نتكلم علي صار مع البطل او البطلة و نهتم بكل التفاصيل ونعطي كل شي حقه و اصلا الروايات البوليسية لازم تكون متمحورة علي احدات الجريمة او الحادتة بس ، لكن عندي رواية بنات نور اجتماعية و تكلمت علي اكتر من قصة و كل بنت عطيت قصتها حقها
.
ريان : شن تخصصك ؟ و طموحك ؟
احمد : بأذن الله علوم سياسية ، و طموحي زيادة علي اللزوم الحق بس ان شاء نوصله
.
ريان : فيه حد من عيلتك ما يعرفش انك كاتب ؟
احمد : لا كلهم يعرفوا ، و من زمان نحب نكتب و بوي من القارئين لرواياتي
.
ريان : المستوي التعليمي تأتر بعد الكتابة و الشهرة ؟
احمد : مستحيل ، نقدر نوفق الحمدالله
.
ريان : افضل فنان و فنانة عند احمد ؟
احمد : اندريا بوتشلي ، و اليسا ، ممكن لان نفس نسق الاغاني
.
ريان : ما جديد احمد عبدالله ؟
احمد : جديدي رواية رح تكون قوية شوي رح نتكلم علي موضوع حساس رح نتكلم عن الخطايا السبعة و رح ندخل في العالم المحققين شوي و رح يكون اسمها " جريمة هزت الجماهيرية " و تتكلم في سنة 2006 و حتنزل 15 يوم رمضان علي صفحتكم و اعلانها رح ينزل في الايام القادمة
.
ريان : اكتر رواية كتبتها و تأترت بلنهاية ؟
احمد :كل رواياتي تأتر في نهايتها و كلهم تقريبا بكيت فيهم بس لو حابة نختار رح نختار عدالة ام ،
.
ريان : من الكاتب الليبي يلي تحب تقراله ؟
احمد : للاسف مافيش الحق لاني ما نقراش في روايات حاليا
.
ريان : تتوقع ان رواياتك تاخد حقها في المراحل الجاية ؟
احمد : نتمني تاخد حقها و كذلك نتمني ان وحدة من الصفحات الليبية تنزل من رواياتي خلي توصل لعدد اكبر من الناس و متاكد انهم حيعجبوا الناس
.
ريان : احمد انسان هادي او يحب اللمة ؟
احمد : لا انسان كتير الكلام و يحب اللمة بس فيه اوقات تحتاج هدوء
.
ريان : طقوسك في رمضان ؟
احمد : طقوسي زي اي شخص في رمضان صلاء و نوم و مسلسلات
.
ريان : من اين مخيلة احمد ؟
احمد : خيالي واسع الحق و ممكن من كتر ما قريت لاجاثا و نوال نقدر نربط الاحدات بكل سهولة
.
ريان : افضل اكلة بنسبة ليك ؟
احمد : اي شي طعمه حلو ناكله الحق ، ما عنديش اكله معينة
.
ريان : كلمة لصفحة MBC LIBYA ?
احمد : الصفحة هادي نكن ليها كل الاحترام و التقدير اولا لان اولي الصفحات يلي دعمتني و نزلت رواياتي و تانيا لان مبدول فيها شغل هايل و واضح الحق
.
ريان : شكرا ليك احمد و استمتعت جدا بلحديت معك
احمد : العفوا ريان حتي انا استمتعت و الله
.
بهذا نكونوا وصلنا لنهاية حلقتنا ، الحقيقة استمعت جدا جدا بلحديت معاه لانه مبدع بمعني الكلمة ، و انا وحدة من القارئين ليه ، نتمني ان رواياته تاخد حقها لانها تستاهل و نتمني ان يواصل ابداعه اكتر و اكتر ❤️
نتمني انكم تقروا رواياته هي موجودة في صفحته بلواتباد
.
نتلاقوا حبايبي غدوا مع كاتب جديد ،، و رح تكون لكاتبة لينا المنفي و يلي جاي احلا بهلبة
.
باي باي
أنت تقرأ
كاتبك معانا ( كل كتاب ليبيا )
RomanceMBC LIBYA 🇱🇾 تقدم برنامج #كاتبك_معانا .. مع الادمن #ريان برنامج حواري كل يوم سيكون معنا كاتب او كاتبة و سنساله اسئلة لم تخطر علي البال ، لنتعرف اكتر عليه و علي شخصيته ، و سيتم طرح الحلقات كل ليلة في رمضان . يتكون البرنامج من 20 حلقة ، 20 كاتب...
