برنامج #كاتبك_معانا
إعداد و تقديم : ريان
حلقة : 10
.
مسأكم خير يا حلوين و صح فطوركم يارب ، الايام تجري زي البرق و مكملين معاكم و مزال الاحلي ما جاش
اليوم ضيفي كاتب شاب ليه روايات إجتماعية من الطراز الاول ، صاحب صفحة روايات ليبيه ، يتميز بلمواضيع الدسمة في طرح افكاره و اغلب رواياته يناقش فيها مشاكل المجتمع
ضيفي هو الكاتب #محمود_محمد
خليني نعرفكم علي الحاجات يلي يعرفوها محبين محمود و بعدين نخشو في الحلقة
الاسم : محمود محمد / مواليد : 1996
اول رواية : سجنت دون سبب
مؤسس صفحة روايات ليبيه 150 الف متابع
نبدا الحلقة
.
ريان : نبدا محمود
محمود : تمام
.
ريان : اول رواية ليك ؟
محمود : اول روايه ليا ف 2017 وكانت قصتي شخصيا اسمها سجنت دون سبب ، والسبب الي خلاني نكتبها كنت نبي نفضفض لي حد اونحكيله ع الي صارلي
.
ريان : المعروف ان محمود محمد لا يملك اي صفحة او قروب بأسمه ؟ ما عدا البروفايل الخاص بيه ؟
محمود : انا صاحب صفحة روايات ليبيه و قروب روايات ليبيه ، والله انا نقدر نسمي الصفحه والقروبات بسمي ، لاكن انا اصلا مانعتبرش ف تفسي كاتب
.
ريان : ليش مش كاتب ؟
محمود : وانا بطلت نكتب روايات ،
.
ريان : ما سبب توقيف الكتابة ؟
محمود : الشهرة ، الازعاج ، المسؤولية
.
ريان : تعتبر نفسك كاتب او هاوي ؟
محمود : هاوي
.
ريان : تخصصك و طموحك ؟
محمود : تخصصي طب اسنان ، طموحي نفتح عياده اسنان
.
ريان : متل محمود الاعلي في الكتابة ؟
محمود : عمري ماقريت روايه لحد فلهادا ماعنديش حد يكون مثلي الاعلي ، بس ، لو حنختار حد مثل ليا حتكون. زهور جمال الدين
.
ريان : افضل رواية كتبتها ؟
محمود : اغتصبو انوثتي
.
ريان : هل انت سبب شهرة بعض الكتاب ؟
محمود : اي
.
ريان : هل متل ما دعمت مواهب ؟ شخص دعمك في حياتك ؟
محمود : اي مروان فرج
.
ريان : افضل كاتبة في نظر محمود ؟
محمود : بنت او شب
ريان : الاتنين
محمود : زهور و معاذ الحمري
.
ريان : هل يوجد احد من عائلتك لا يعرف انك كاتب ؟
محمود : لا كلهم عارفين
.
ريان : ممكن تغير رايك ؟ في موضوع كتابة الروايات ؟
محمود : قصدك اني نرجع
ريان : نعم
محمود : ممكن لاكن لو رجعت حنكتب قصص الصحابه والتابعين ب طرقتي الخاصه
ريان : الصحابة و التابعين ؟
محمود : صحابه رسول الله ، والتابعين من بعدهم من الصالحين
.
ريان : ماذا تعني الكتابة لمحمود ؟
محمود : موهبه دمرها الاطفال
ريان : ما معني ؟
محمود : دمرتها الاطفال بالمعني الليبي كل من هب ودب قعد كاتب واغلب روايتهم +18 ضيعو هيبه الكتابه
.
ريان : تهتم بلنقد ؟ او لا ؟
محمود : اكيد لولا النقد راهو ماطورناش من كتاباتنا ، واي كاتب مايهمتش بالنقد ويطور من كتابته مش حينجح
.
ريان : محمود محمد ؟ يعتبر نفسه من اشهر الكتاب الليبين ؟
محمود : في وقت من الاوقات كنت من اشهر الكتاب وليش اشهر الكتاب
.
ريان : روايات محمود محمد ضعيفة السرد ؟
( اتهام من احد القارئين لرواياتك )
محمود : بالعكس انا من اقوي الكتاب من ناحيه السرد وهدا مش كلامي
.
ريان : اذا لماذا رواياتك الاقل تفاعل في صفحة روايات ليبية ؟
محمود : ع سبه اعاده ، رواياتي مانزلهمش اول مره ف البوم
.
ريان : هل دخولك لمجال الكتابة سببه ؟ استغلال وقت الفراغ / الشهرة / حب الكتابة ؟
محمود : حب الكتابة
.
ريان : عندك روايات حقيقية او كله من وحي خيال محمود ؟
محمود : كلها حقيقه ولا روايه كاتبها من وحي الخيال ممكن روايه وحده فقط
.
ريان : لا تدعم الكتاب الشباب و تدعم الكاتبات ؟
محمود : من قال هكي ، بلعكس ، محمد مالك و مروان فرج و غيرهم
.
ريان : ( سوال ممكن ما تجاوبش عليه ) اين الحب في حياة محمود ؟
محمود : الحب بيني وبين اصدقائي
.
ريان :طقوسك في ايام رمضان ؟
محمود : عمل الصبح ، بعد الفطور نكسد ع النت ، بعدها قران و تراويح و نرقد
.
ريان : افضل اكلة بلنسبة ليك ؟
محمود : حوت
.
ريان : كلمة لصفحة MBC LIBYA 🇱🇾 و كيف تشوف فيها كا صفحة ؟
محمود : صفحه اول مره نشوفها الحق ، لاكن شكلها جديدة ، بس ك بدايه موفقين واسلوبكم راقي ومميز
.
ريان ؛ تتوقع MBC LIBYA 🇱🇾 تتفوق علي روايات ليبية ؟ بما انها منصة كاملة ؟
محمود : كل صفحه ليها مسار معين ، نقدرش نقارن ،
.
ريان : نبصر عليك ، شكرا استاذ محمود علي اسلوبك الراقي ❤️ استمتعت جدا بلقاء
الحق اني نعرفك من زمان بس زدت عرفتك اكتر الان و يلي عرفته انك شخص موهوب و لازم انك تكمل في هذا المجال ❤️❤️
محمود : العفو وانا استمتعت بي لقائكم
.
بهذا نكونوا وصلنا لنهاية حلقتنا الحق تمنيت ان يكون اصرار محمود اكبر و يكمل في مجال الكتابة لانه موهوب و يستاهل كل خير ، نتمني ان ربي يوفقه في حياته و يحقق كل طموحاته
.
نتلاقوا حبايب قلبي مع الكاتبة الكيوت #ميرو_الشريف خليكم معانا و لقاء جميل جدا و مزال النادر ما جاش
.
باي باي ❤️
أنت تقرأ
كاتبك معانا ( كل كتاب ليبيا )
RomanceMBC LIBYA 🇱🇾 تقدم برنامج #كاتبك_معانا .. مع الادمن #ريان برنامج حواري كل يوم سيكون معنا كاتب او كاتبة و سنساله اسئلة لم تخطر علي البال ، لنتعرف اكتر عليه و علي شخصيته ، و سيتم طرح الحلقات كل ليلة في رمضان . يتكون البرنامج من 20 حلقة ، 20 كاتب...
