برنامج #كاتبك_معانا
إعداد و تقديم : ريان
حلقة : 2
.
مسأكم خير يا حلوين و صح فطوركم يارب
اهلا بيكم في تاني حلقات برنامج #كاتبك_معانا اولا حابة نشكركم علي إعجابكم بلحلقة الاولي و تعليقاتكم الجميلة جدا و ان شاء الله كل حلقات البرنامج تعجبكم المهم تابعوا الصفحة عشان يوصلكم كل جديد
.
اليوم ضيف حلقتي كاتب شاب صغير في عمر بس موهبته كبيرة جدا الحق نادرآ ما تشوف شاب يقدر يوصف معاناة المراة في المجتمع الذكوري و يحس بيها هذا يلي شفناه في رواياته فا كل رواية ليه فيها موضوع مختلف و حكمة توصل للقاري
.
رغم صغر سنه الا انه يعتبر اكتر كاتب ليبي معروف
عدد متابعينه 11 الف متابع تقريبا و ليه شعبيه كبيرة و معجبين بروايته لانها تتميز بلسلاسة و اتقان الحوار .
حصل علي جائزة افضل كاتب ليبي في عام 2019 و هذا ضمن الاستفتاء يلي اجرته صفحتنا في بداية سنة 2020
.
ضيفي هو الكاتب الشاب #محمد_مالك ، سالته اسئلة كتيرة و لاول مرة تنسأل .
بس حنبدا بأشياء يعرفوها معجبين محمد و فيه ناس ما تعرفهاش .
.
محمد مالك / مواليد 2003 /
طالب تانية تانوي / يحلم بمجال لطب /
اول رواية ليه كانت بعنوان اصدقاء التانوية و فشلت فشل ذريع /
متله الاعلي الكاتب الحاصل علي نوبل للادب " نجيب محفوظ " و " اجاثا كريستي "
يعتبر محمد مالك ان افضل رواية ايه هيا " ظلمني ابي " لان صاحبة القصة يعرفها شخصيآ
.
هذه الاسئلة بعض محبين محمد يعرفوها حاولت اني نسأل محمد اسئلة لاول مرة تسأل ؟
نبدا الحلقة ❤️
ريان : اهلا بيك محمد لما تكون جاهز قولي
محمد : جاهز
ريان : تمام نبدا الحلقة
.
ريان السوال الاول : ما الذي جعل محمد مالك كاتب محترف ؟ هل حب للكاتبة او بحتآ علي شهرة وًاستغلال وقت الفراغ ؟
محمد : حب للكتابة اول رواية ليا تحت عنوان اصدقاء الثانوية تقريبا قبل سنتين وشوية كتبتها بكل حب وشغف رغم انه كنت نفتقر للقوة فالسرد والحبكة بس كملتها ونشرتها وتفاعلها كان ضعيف وتلقيت نقد كبير من الناس بس الشئ هاده موقفش حبي للكتابة واستمريت والحمد الله ❤
.
ريان : المستوي التعليمي تأتر بعد الكتابة و الشهرة ؟
محمد : لا الحمد الله اوقات الدراسة محددة صح عانيت من بعض الضغظ بين كتابة الحلقات بشكل منتظم والدراسة بس قدرت نتوفق والحمد الله ❤
.
ريان : شخص يحب اللمة او يفضل الوحدة ؟
محمد : نحب اللمة ونفضل الوحدة ! لان الكتابة تبي هدوء وراحة بال ❤
وفنفس الوقت مفيش احلي من لمة العيلة معا بعض
.
ريان : بخيل او مبدر ؟
محمد : الحق الي عندي ديما نصرف فيه ميقعدوش بكل 😁، بس مش لدرجة تبدير !
.
ريان : محمد ، يأمن بلصداقة ؟او لا يوجد في هذا الزمن ؟
محمد : يوجد صداقة في كل زمن بس اعرف كيف تختار الشخص الصح ❤👌
.
ريان : تأمن بلصدف او الحظ ؟ او كذبة صدقها المغفلين ؟
محمد : نؤمن بالقدر ! وان كل شئ مقرر من الله تعالي ❤
.
ريان : بما انك رائد للقصص الاجتماعية و الرومانسية ؟
فما هي القصة التي أترت في محمد مالك ؟
محمد : القصة الوحيدة للحظة هادي اثرث فيا رواية ظلمني ابي وخصوصا بكاء شخصية الرئيسية ( مروة ) وهيا تحكي في الي صار ! ❤
.
ريان : من اخر كاتب شاب قريتله و لفت نضرك ؟
محمد : عبدو البهلول تقريبا اسمه لو مش غالط ومداير شغل حلو وياريت الناس تعطيه فرصة وتقراله ❤
.
ريان : فيه حد من عيلتك ما يعرفش انك كاتب مشهور ؟
محمد : الكل يعرف وداعم معنوي كبير ليا خصوصا امي وبوي ❤
.
ريان : افضل فنان و فنانة عند مالك ؟
محمد : افضل فنان عالمي توم هادري يعجبوني أعماله
وفنانة المغنية sia نحب نفتح اغانيها ونكتب مرات ❤
.
ريان : مروان من النوع يلي يبكي او دمعته عزيزة ؟
محمد : لا في موقف ثاتر في الانسان ومرات يبكي علي حسب الموقف ❤
.
ريان : شن طقوس محمد مالك في يوم رمضان ؟ بمعني ماذا يفعل ؟
محمد : تقريبا نفس اي شاب ليبي 😅
بس بعد المغرب نكتب !
والفجر مخصص لقراءة القران الكريم ❤
.
ريان : اول حاجة لازم في سفرة رمضان بنسبة لمحمد ؟
محمد : اني مش النوع الي لازم شئ محدد وضروري يكون موجود بالسفرة
يعني الي نلقاه ناكله والحمد الله ❤
.
ريان : كلمة لصفحة MBC LIBYA وكيف تشوف فيها كا صفحة ؟
محمد : الحق صفحة متميزة وأفكارها جميلة ومدايرين جهد كبير جدأ ربي يوفقكم ان شاء الله ❤
.
ريان : كل سنة و انت بألف خير و رمضانك مبروك
محمد : وانتي بالف خير وينعاد عليكم بسعادة وصحة ان شاء الله ❤
.
بهذا نكونوا وصلنا لنهاية لقائنا مع محمد مالك ، الحقيقة اسلوب و احترام ما شاء الله و نتمناله النجاح و التقدم الدائم لانه شاب طموح و يستاهل و نتوقع ان رح يوصل لمكانة حلوة في هذا المجال
.
نتلاقوا حبايبي غدوا في حلقة جديدة و كاتب جديد و رح تكون الكاتبة #ميلو_حسن و حوار شيق و نتمني ان الحلقة عجبتكم .
.
باي باي
أنت تقرأ
كاتبك معانا ( كل كتاب ليبيا )
RomansMBC LIBYA 🇱🇾 تقدم برنامج #كاتبك_معانا .. مع الادمن #ريان برنامج حواري كل يوم سيكون معنا كاتب او كاتبة و سنساله اسئلة لم تخطر علي البال ، لنتعرف اكتر عليه و علي شخصيته ، و سيتم طرح الحلقات كل ليلة في رمضان . يتكون البرنامج من 20 حلقة ، 20 كاتب...
