كاتبك معانا ( كل كتاب ليبيا )

حلقة 21🔥 الختام 🔥 نادرة ❤️

برنامج #كاتبك_معانا
إعداد و تقديم : ريان
حلقة : 21 ....." الختام "
.
اهلا بيكم  صح فطوركم حبايب قلبي لاخر مرة ، كل عام و انتم بألف الف خير ،و ينعاد عليكم بلصحة و السلامة ، طبعا الحلقة هاذي هلبا ناس يستنوا فيها لان الضيفة يلي معانا اليوم مجهولة الهوية او بمعني اصح ما حدش يعرف عليها حاجة
ضيفتي كاتبة كبيرة و الاقوي في السرد و تقريبآ الاعلي مشاهدة علي تطبيق الواتباد ، رواياتها مش روايات رواياتها تحف فنية ، كل رواية ليها سر كبير و تحس انك داخل الرواية و عايش فيها
رواياتها حققت ملايين المشاهدة ، رغم ان عددهم لا يتجاوز ال 6 روايات فقط بس كل رواية عالم مختلف عن الاخر
.
ضيفتي الكاتبة يلي تقريبآ كل الناس اجمعت علي انها افضل كاتبة في العالم العربي ،،،ضيفتي ✨ نادرة ✨
.
خليني نعرفكم عن الكاتبة نادرة تعريف بسيط قبل الحلقة
الاسم : نادرة أحمد
العمر : ( فضلت عدم الاجابة )و ردت ب "متوسطة العمر"
الحالة الاجتماعية : عروس جديدة
عدد الاعمال المعروضة : 6 اعمال و عمل غير مكتمل " طعنة غدر "
اكتر الاعمال نجاحآ  "ولدتني عاهرة " 3 مليون قاري تقريبآ
.
نبدا الحلقة
ريان : اهلا بيك نادرة
نادرة : اهلاً بيك عزيزتي ♥️🌺
.
ريان : نبدا
نادرة : معاك
.
ريان : هل اسمك نادرة او هذا اسم الشهرة فقط ؟ الاجابة لو حابة نعم و لا ؟
نادرة : أسمي نادره و أسم الشهرة no name♥️🌺
.
ريان : عمر الكاتبة نادرة و لو مش حابة ممكن تقولي كبيرة او متوسطة او صغيرة ؟
نادرة : بس متوسطه ممكن تليق بي أكثر ♥️🌺
.
ريان : اشهر كاتبة في ليبيا و لكن اقل كاتبة في عدد الروايات ؟ لماذا ؟ و ماسبب قلة روايات نادرة ؟
نادرة : لا أبداً أنا مش أشهر كاتبه في ليبيا في كاتبات غيري لديهم قاعده اكبر مني و عدد الروايات بالنسبه ليا مش مهم نهائي و انا ما ندورش في الكم بقدر المحتوى
ف قصة عدد الروايات قليل هو صح قليل بس كل روايه ليها صدى و اسم و رساله  و هذا يكفي
بعد كل روايه نكتبها نحط جمهوري في كفة القارئ الناضج المثقف
و نقعد نسأل نفسي شن الأستفاده الي بياخدها مني القارئ ؟
شن الرقي النفسي الي بنقدمهوله ؟
شن الوعي الحسي الي بيرتقي بيه القارئ ؟
و هادي أمور تجعلني نتريث في النشر و الكتابه
.
ريان : تخصص او شغل نادرة ؟
نادرة : لا ما نشتغلش بس تخصصي لغه انجليزيه
.
ريان : نادرة كاتبة البطلة الواحدة ؟
بطلة واحدة في اكتر من 3 روايات ما سر حبك للممثلة الكويتية نور الغندور ؟
نادرة : جميله 🤪🤷🏻‍♀️ نحب جمالها و جذابه نور طبعاً في الوقت نفسه نحب صورة الروايه تكون لشخص واحد ما تكونش تحمل شخصيات كثيره
.
ريان : بداياتك في الكتابة كانت ؟
نادرة : تقريباً سنة 2009
.
ريان : اول رواية ؟
نادرة : اول روايه كانت ازقة المدينه القديمه
تأثرت بقصة فتيات هربوا من منازلهم و أقاموا في الحاره و و و و . بس مش منشوره الروايه طبعاً
.
ريان : قصص نادرة حقيقية او لا ؟
نادرة : لا طبعآ حتى في صفحتي في الواتباد كتبت كل رواياتي من وحي الخيال
.
ريان : من اين خيال نادرة ؟ في الروايات ؟
نادرة : منّه من الله عز و جل بس لب الخيال هو التفاصيل و انا انسانه نحب التفاصيل جداً
.
ريان : احب رواية لقلب نادرة ؟ من كتاباتها ؟
نادرة : كلهم قراب لي قلبي بس ولدتني عاهرة محفوره في داخلي
.
ريان : افضل كاتبة او كاتب عند نادرة ؟ عالميآ او عربيآ ؟
نادرة : فرانس كافكا .. اجاثا كريستي .. نجيب محفوظ و هلبا غيرهم
.
ريان : نادرة امراة عملية او ربة منزل ؟
نادرة : ربت بيت بأمتياز 🙈
.
ريان : الحالة الاجتماعية ؟
نادرة : متزوجه
.
ريان : مبدرة او بخيلة ؟
نادرة : كريمه افضل من مبدره ، و ما نحبش البخل و ما نقدرش نتحمل انسان (ة) بخيل
.
ريان : هل في حد من عيلتك ما يعرفش انك كاتبة ؟
نادرة : ما فيش حد يعرف نهائي ، و أعتقد إن لا تستوفي فيا شروط الكتابه و بالتالي كلمة كاتبه كبيره عليا
.
ريان : افضل فنان و فنانة  عند نادرة ؟
نادرة : السؤال هذا يبي إجابه طويله 🤪 لأني أملك أذن موسيقيه و من عشاق الفن الموسيقي ، لكن إحساس اليسا نحسه في داخلي و يوصلني جدا و توني بريكستون و سيلنديون و غيرهم
.
ريان : لو حنختاري بطل من ابطالك يطلع في حياتك في الحقيقة من حيكون ؟
نادرة : رمّاح بطل رواية حرب الجينات ♥️🌺 " الرواية الجديدة "
.
ريان : ليش نادرة ما عندهاش قروب او اكونت خاص بيها ؟
نادرة : كان عندي أكاونت خاص بيا و لقيت روحي بنخش في فتنه بين الكاتبات و هكر و و و ، فضلت الانعزال حقيقةً لأني أعتقد ان ما يهم القاري هو الروايه مش نادره
.
ريان : افضل كاتبة ليبية حاليا ؟
نادرة : سؤال عميق يبي عدة شروط تتوفر في الكاتبه انا ما نقدرش نجاوبك عليه ،
ريان : باهي من يلي تشرفي فيها واكلة الجو حاليآ ؟
نادرة : انا ما نتابعش فيهم اصلاً باش نعرف منو واكل الجو ع قولتك 😉
لكن خلينا نقولوا ان كل كاتبه استقطبت فئه معينه من المجتمع سواء أكانت عمريه او ثقافيه
.
ريان : تأمن نادرة بلصداقة الحقيقية و هل موجودة في حياتها الان ؟
نادرة : لا الصداقه الحقيقيه ما صادفتنيش للاسف 💔 الشي الي خلاني نصادق نفسي و ندعمني و نحبني و نحضني و نشاورني
ممكن لأني قليلة اختلاط بالناس و ما نحبش نكرر تجاربي
.
ريان : يمكن تسمي اغلي صديق ليك ؟ حاليا ؟
نادرة : أصدقاءي حالياً كلهم علاقه سطحيه شوي يعني ما فيهمش من يعرف اني انا كاتبة روايات هما يحبوهم و يقولولي اقري لي نادره
بس للأمانه ممكن نقول ان والدتي ربي يحفظها هي الصديقه و هي اغلى شي على قلبي
.
ريان : نادرة من النوع يلي تبكي او دمعتك عزيزة ؟
نادرة : يبكيني الفقد 💔 جداً يبكيني و ننهار
بس الامور الروتينيه لا ما تأثرش فيا نهائي
.
ريان : نادرة من النوع يلي تندم او يلي صار صار؟
نادرة : اووووووف انا و الندم قصة ارتباط روحي . و نعارك نفسي مليون مره . نندم دبل انا
.
ريان : طقوسك في ايام رمضان ؟
نادرة : انوض بكري طبعاً و نهتم بشغل البيت و بعدها نستعد لمعركة المطبخ 😅 نكمل بكري و نفتح واتباد نقرا او نفتح نت او نكلم اهلي و صاحباتي و بعد صلاة العشاء نوووووووووم
.
ريان : الاكلة المفضلة ليك ؟
نادرة : أكلتي المفضله ارز بالخلطه 😋
.
ريان : مسلسلك المفضل ؟
نادرة : ما نتفرجش ع التلفزيون نهائي للاسف
.
ريان : رواياتك الجديدة ؟ اسمها ؟ علي شن حتحكي ؟ اي شي عليها ؟
نادرة : روايتي الجديده اسمها حرب الجينات ، البطل شاب ، الروايه فيها احداث أمنيه دقيقه جدا و تزامن دقيق و تبي تركيز و حبكه دراميه
ريان : امتي حتنزل ؟
نادرة : مزال ، لين نكملها
.
ريان : ممكن سوال علي كاتبة معينة او تفضلي لا ؟
نادرة : لا عادي أسالي
ريان : هل توافقي علي ان اروي الطاهر المسلاتي الاقوي و الانجح بين كاتبات ليبيا ؟
نادرة : ليش هو احنا كاتبات ؟ الكتابه ليها شروط ، اولهم اتقان الفصحى ،بس خلي نقولك شي ، انا للأمانه ما عمري قريت لها شي ، لكن المرشح انه يكون الاقوى و الانجح هو معاد الحمري الي حقق طموحه و طبع رواياته و انطلق للوطن العربي ، مقياس النجاح و القوى شن هو ؟ عدد المتابعين او اللايكات ؟
ريان : التفاعل القوي و المتابعين الكبير
اروي اليوم تملك اكبر قاعدة جماهيرية و رواية الاعلي قراءة في مصر و في هذه اللحظة تترجم بلعراقي ؟ هل هذا في نضرك مقياس للنجاح
نادرة : هادي المعلومات منك نعرفها ، خليني نقول انه اول درجات النجاح ، النجاح الحقيقي هو كتابة روايه ليبيه بالفصحى منقحه عن الأخطاء و انتشرت عربياً ، و ربي يوفق اروى و كل كاتبه موهوبه تعزف ع وتر خاص بيها سواء أكان اجتماعي او بوليسي او درامي او عاطفي المهم احنا نكتبوا و الاجيال تقرا ♥️🌺
.
ريان : كلمة منك للناس يلي تعشق رواياتك ؟
نادرة : يتملكني أحساس في داخلي أن كل من ترك تعليق في صفحاتي او كتب كلمة طيبه عليا ان في توافق روحي بيني و بين كل قراءي ♥️🌺 و حتى لو تأخرت في كتابة روايه فهذا لأني نبي نكون قد المسؤوليه الي اعطيتوهالي
نحس أنكم مني و أنتو أكبر داعم ليا من بعد الله عز و جل ♥️🌺
.
ريان : حابة ان نسالك سوال معين ؟
نادرة : لا بس حابه نضيف شي
ريان : تفضلي ضيفي اشياء مش شي
نادرة : للأمانه انا ما عمري قريت روايه ليبيه او نعرف كاتبه ليبيه ، لكن أحببت أحساس الفنانه جومان فريد ، و حبيت عفوية زهور جمال الدين ، ف نتمنى يكون لينا عمل جماعي نكونوا بيه ملحمة ليبيه تستحق النهوض بالمواهب الليبيه
ريان : ان شاء الله ❤️
.
ريان : كلمة ل MBC LIBYA 🇱🇾 ?
نادرة : مشكورين على وسعة بالكم معاي 🤪 و ع مجهوداتكم للرقي بينا احنا ك هاويات كتابه و شكراً لنشر فن القراءة بين شبابنا و شكر ليك ريونه ♥️🌺
.
ريان : شكرا يا روحي ، استمتعت بلقاءك اكيد ، نتمنالك نجاح فوق النجاح يلي انتي فيه يارب و كل عام و انتي بالف الف خير
نادرة : الشرف ليا و الله 🌸🌸 استمتعت بالحديث معاك ، و انتي بألف خير و صحه و سلامة ♥️🌺
.
بهذا نكونوا وصلنا لنهاية البرنامج ، يلي تعلقت بيه و انتم حبيتوه ، طبعا زعلانة هلبا ، اني معش بنشوفكم بس رح نتلاقوا اكيد في رمضان الجاي و مع كتاب جدد ، نشكر اكيد MBC LIBYA 🇱🇾 علي انهم وتقوا في فكرتي و دعموني ماديآ و معنويآ و اشكر مؤسس الصفحة ، شكرا ليكم حبايب قلبي ، و كل عام و انتم بألف خير و ينعاد عليكم و علي بلادنا الحبيبة بلبركة يارب .... كانت معاكم ،، ريان منصور ❤️
.
باي باي 👋🏻 🥺🤭❤️✨