عشق الشيخ ملكني

part:25

اشلونكم حبايبي البارت طويل حضروا حبشكلاتكم واستعدوا للبارت قراءة ممتعة 😎

لا تنسوني بالفوت 👈⭐ و التعليق على الفقرات 👈💬 قبل متقرأون البارت 😘

هند:
كلش انهارينا وانقهرنا وادمرت سعادتنا مع رزان خطية ما كملت سعادتها وبيوم فرحها صارت الكارثة وتوفة ابوها وامها من دخلت بغيبوبة كلنا گلنا رزان مراح تتحمل بس صدمتنا كانت هي سند اخوتها صحيح مرات تنهار بس اتلم نفسها بسرعة وتسند خواتها الي فرفحن من البچي احنا كلنا انجمعنا ابيت جدي وعلى مدار 3 ايام النسوان والمعازيم طابة طالعة اني وفاتن ومرام وفاطمة اخت سالم گمنا بالفاتحة وبالضيافة تحت ارشادات امي وخالتي ام كيان ورزان مرات اتساعدنا من تختنگ من لمة النسوان هي من لبست اسود خالتي انقهرت عليها هي عروس والمفروض هاي ايامها غدرها الزمن كأنه ايگللها لتفرحين بعدج مشايفة مني شيء.
وجود حبيبي منهار وتعبان هو دائما مع الشباب بالچادر وبالمضيف نادرا ما اشوفة بالحديقة يگعد هو وعمر من يردون يبتعدون عن الهوسة اعرف عمر من يختنگ يگعد بالحديقة ويجوز سحب جود وياه حتى يتنفس ، ثاني يوم الفاتحة رزان اجت للمطبخ وگالتلي بصوت مبحوح من البچي وهي تطيني مفاتيح بيتها:
_هند حبابة احتاج اتجيبيلي ملابس غير ذن العندي ما اگدر اروح واعوف البنات.
اني اخذت المفاتيح وگلتلها:
_ماشي اني اجيبهن روحي انتي ارتاحي ما اتأخر عليج.
هي ابتسمتلي بتعب ورجعت للأستقبال يم النسوان واني لبست عباتي وطلعت من الباب الخلفي بعد ما گالت للبنات وامي واخذت كرم ابن حسن عمره 11 سنة وطلعت بس عمر شافني واجاني وصاح علي وگلي :
_وين مولية ارجعي للبيت متشوفين الولد والزلم تارسين المنطقة؟.
اني گلتله:
_رزان احتاجت ملابس من بيتها ودزتني اجيبهن گلت لأمي وگالتلي روحي واخذي كرم وياج.
هو باوع علي من فوگ ليجوة وگال:
_امشي بسرعة ونزلي راسج ولا تتأخرين كرم ابقى وياها مو تروح وتعوفها افتهمت؟
كرم گله:
_اكيد لتخاف.
ورحنا للبيت وهو يراقبني رغم البيت بس اعبور الشارع بس لأنه الجادر والشباب گدام البيت مال جدي صارت الطلعة والطبة صعبة فتت للبيت وكرم ضل بالحديقة مقبل ايفوت واني رحت لغرفة رزان وكيان فتحتها وكانت مثل ما عفناها اني والبنات لأنه احنا رتبناها وحطينا الفرشة وعطرناها وبعدنا محد داخللها كلش انقهرت من اذكرت رزان ، بداخل الغرفة اكو غرفة ثانية هي غرفة الملابس كلش جبيرة بس مو بكبر غرفتهم وما شاء الله انترست ملابس رزان ومجوهراتها وغراضها وبس نص منها ملابس كيان وغراضه هم هواي بس رزان اكثر كانت اكو جنطة بيها ملابس محرم مال رزان ما فرغناها وبقت بمكانها رحت فتحتها كانت بيها ملابس هواي ما اخذتهن كلهن بس 10 قطع وحطيتهن بجنطة اصغر وسديتها وطلعت وسديت غرفتهم ونزلت جاي اطلع من البيت بس سمعت صوت بالمطبخ عفت الجنطة ورحت اشوف شنو هذا الصوت من وصلت للمطبخ شفت ظل واحد طويل جاي ايغسل على السينك(مغسلة المطبخ) اني گلت:
_منو انت وشلون دخلت للبيت.
وهذا الكلام واني لازمة السچينة (سكين) واگفة وراه مباشرتاً هو التفت علي اني غمضت عيوني وردت اطعنه بس هو لزم ايدي وگلي:
_انتي شسوين هنا وشلون دخلتي؟
هذا صوت اعرفة كلش زين وشلون لا هذا صوت حبيبي فتحت تك عين وشفته يباوع علي بهدوء وبرود ومبين تعبان وجهه امبلل وبداية شعره هم وايده اني وگعت السچينه من ايدي من منظره كتلة رجولة واثارة واگفة گدامي 😍 محجيت شيء وضليت صافنة عليه هو عاف ايدي وضل يتقرب علي اشوية اشوية واني ارجع ليورة لحد ما ظهري اصطدم بطاولة البار الملحقة بالمطبخ والي اطل على الصالة الرئيسية وهو حط ايده من الجهتين شل حركتي حتى ما اهرب وگلي برود:
_ما جاوبتيني.
وهذا كله وهو يباوع بعيوني اني بعدني صافنة بملامحة وبقطرات المي التنزل على وجهه بسلاسة غرت منهن ودلغمت (خنزرت) بدون وعي هو ملامحة ما ادغيرت بس مد ايده واخذ الخاولي المعلگ يم راسي ومسح وجهه على كيف وبعده ايباوع بعيوني واني صافنة بي بعد فترة حسيت على نفسي ونزلت عيني وگلتله:
_رزان دزتني اجيبلها ملابس واطتني مفاتيح البيت.
هو سألني:
_اشلونها والبنات اشلونهن صارلهن شيء؟
اني گلتله كلشي وگلتله رزان ساندتهن واتخفف عليهن وهي تنهار مرات بس اتلم نفسها علمود خواتها هو همهملي بتفهم وطلع مي من الثلاجة وشربه واني جاي اطلع من المطبخ بس انصدمت بي حضني من ورة وظهري صار على صدرة واخذ نفس من عطري وگال:
_خليج هيج شوية.
اني جمدت مكاني لا اگدر ادفعة ولا اگدر اتنفس وهو قريب مني لهاي الدرجة اشوية وگال:
_اتنفسي راح تختنگين.
اتنفست بهدوء وهو دفن وجهه بكتفي وحضني اكثر وگال بهمس:
_احبج هند افهميني.
اني انصدمت ومحچيت بعد 10 دقايق مسمعتله صوت وانفاسه ثگيله گلتله بهدوء:
_جود بيك شيء؟
هو محچة اني گلتله مرة ثانية:
_جود جاوبني.
وخرت ايده والتفتت عليه هو باوعلي بخمول اشوية واتخربط وگع بالگاع اني انصدمت اشوية وگلت واني اتفحصه:
_جود افتح عيونك جوووود.
قست حرارته كانت مرتفعة نار گلت:
_انت جاي تشتعل ياربي شسوي شسوي.
اذكرت كرم رحت ركضتله هو شافني مخروعة انصدم وگلتله:
_روح صيح عمر بس لا اتخرعه واتلم العالم بس گله هند اتريدك بالبيت خلي يجي بسرعة.
هو محچة شيء وركض ايصيح عمر اني رجعت لجود وبعده على وگعته ومايصحة رغم رشيت عليه مي طبطبت على خده شممته عطر ماكو ما يجاوب وياي اشوية ودخل عمر مفزوع وصاح:
_هند وينج.
اني گلتله:
_بالمطبخ عمر تعال بسرعة.
هو اجة وشاف جود بالگاع وگال:
_هاي اشصاير هنا شكو احچي؟
اني گلتله:
_حرارته مرتفعة كلش ونبضه ضعيف وانفاسه شبه مگطوعة خابر حسن خلي يجي بسرعة وانت شيله للحمام خلي انحطه بمي بارد بلكت تنزل حرارته.
هو خابر حسن وگلة يجي لبيت كيان بسرعة وهو مطول 10 دقايق واجة وعمر شال جود للحمام (تكرمون) مال غرفة الضيوف اني كنت تارسة البانيوم مي بارد عمر من دخل هو وجود گلي:
_اطلعي برة ومن يجي حسن فهمي وخلي يجي هنا.
اني طلعت وفهمت حسن حالة جود هو طلع مرة ثانية ايجيب جنطته من سيارته 5 دقايق ورجع وفات للغرفة فحص جود وعلگله مغذي واطاه ابرة تخفض حرارته وابرة ثانية لتنضيم ضربات القلب لا تستغربون اشلون اعرف درسنا اوليات الأسعاف بأول سنة الي بالجامعة يعني العام وعرفت حسن شنو استخدم وليش.
(صحيح مگلتلكم اني نجحت بأمتياز 😎 عوفوكم مني وخلونا بحالة جود)
الكاتبة:(زين من استوعبتي كان ما خلصنا من كلامج لبعد سنة 😂)
هند:(جاي اتظلميني اصلا وين تسمعيلي حس اشو عاقلة وفقيرة مو صح؟ انتم احكموا الكاتبة تظلمني 😢) .