عشق الشيخ ملكني

part:34

اشلونكم حبابي 😍 اعرف طولت عليكم وحقكم ازعلون بس عوضتكم اليوم البارت كلش طويل حضروا نفسكم وحبشكلاتكم واستمتعوا 😉

لا تنسوني حبايبي بالفوت 👈⭐ والتعليق على الفقرات 👈💬 قبل ما تبدأون بالقراءة استمتعوا بالبارت 💜

اعذروا اي اخطاء املائية ما انتبهت عليها 😘

رزان:
كنت اريد انام ودگ تليفون كيان جاوبه بسرعة من خلال الكلام انصدمت بالأخير قبل ليسد التليفون باوعت عليه بصدمة وهو شفته عصبي كلش باوع علي وعيونه حمر وعروق رگبة بينت مسح على شعري وسد التليفون اني گلتله:
_صدگ الحچيته يعني متأكد؟
هو اتنهد وگال:
_علاء ميجيب معلومات غلط ابد وباجر ايدزلي التسجيلات الصوتية مال الرجال الگتلج شفته ايراقب المزرعة ونتأكد اذا كلامه صح او لا؟
اني گلتله:
_ان شاء الله حبيبي لا تتعصب وخلينا انام باجر تنحل.
هو باس راسي ورجعني على صدره حتى انام وگال:
_ان شاء الله حبيبتي.
اني من التعب ما فكرت بشي ونمت رأسا ثاني يوم گعدني كيان الساعة 6:30ص وهو كان لابس الزي العسكري مالته ومجهز جنطته اني الدمعة بطرف عيني گلتله بعد ما اشرت على جنطته:
_هاي شنو؟ راح تلتحق اليوم؟
هو اجة باس راسي وگلي وهو يضحك:
_هاي شنو؟ راح تبجين؟ ما اريد بجي لا عمري مو اليوم باجر التحق ولبست الزي لأنه راح اروح للمركز اشوف منو هذا الرجال الغريب وشنو سالفته يلا گومي اتجهزي حتى نتريگ سوة واوصلج للجامعة.
اني بسته بخده وگلتله:
_تمام.
واخذت ملابس الدوام وركض للحمام ابدل واغسل كملت وطلعت لگيته گاعد على التخم بالغرفة ويتصفح تليفونه واني انشف بشعري هو شافني وابتسم بادلته مشطت بسرعة بس ايدي راحت تعبني ومكيجت خفيف ولفيت الشال ولبست (تكرمون) حذاء كعب وسط مو كلش عالي لانه يتعبني ونزلنا الكل كان گاعد على السفرة والبنات ايحطن الماعين على السفرة ساعدتهن وگعدنا نتريگ مرام كلش تعبانة وجها اصفر وعمر ميت خوف عليها خطية وكيان هم كلنا متوترين وخايفين عليها من الولادة وحسن ونغم ايگولون ما بيها شي حالتها شي طبيعي لانه گلبها ضعيف والحمل يتعبها بس يحتاجلها راحة ، هند گالت لكيان بهمس:
_شيخ تگدر اتوصلني لجامعتي الخط ميجي اليوم وعمر خايف على مرام وما اريده ايعوفها ومحمد طالع لشغله.
كيان ابتسملها وگال:
_اني اوصلج وارجعج لا تشغلين بالج.
بعد اشوية گاللنا كيان:
_يلا اذا كملتن خلي انروح.
اني وهند رحنا غسلنا ودعنا الكل ورحنا للسيارة كيان طلع قبلنا صعدت اني بصفه وهند ليورة وصل هند اول شي لانه جامعتها اقرب من جامعتي وبعدين وصلني گدام باب الجامعة وقبل لا انزل بسته بخده وگلتله:
_حبيبي دير بالك على نفسك ولا تتعصب وتأذي روحك وگلي شيصير وياك تمام؟
هو باس ايدي وگال:
_طلباتج اوامر يا گليبي يلا روحي ولا تتحركين هواي وديري بالج على نفسج اني ارجع اخذج انتظريني جوة من اطلعون اخابرج واطلعيلي تمام؟
اني ابتسمتله وگلته:
_تمام حبيبي باي.
هو گال:
_باي عمري.