الكاتبه تقى محمد
#بين_رماد_داعش
بقلم رسل
#بارت٢٥الأخيرررررر
منو ذولة الصورهم ع الحياطين..
سألني المـايعرف بديرتي شصار..
بجيت وكتله ذوله وجوهنا البيض..
وبواجينه وحزنه ووحشت الدار..
وراهم فرغت من الضحكة البيوت..
على فكد وجوه غابت عن الأنظار..
عاين عالصور ياهو العليه موت..
ومنو بيهم بوجه مبين انضار..
تره وليداتنه بالموت حلوين..
ومن الجفن حكها العاشكة تغار..
دفناهم رغم كل الخصل سود..
وعطر بيها الجناسي بحقل الاعمار..
على الحيطان بيها وجوهم روح..
وقطعهم عبره تكسر وجه الحجار..
صورهم جا مشت لولا البسامير..
وجا كل صورة منهم راحت الدار..
راحوا لكن على البال يبقون..
لحـد يوم القيامة ترابهم حار..
-الشاعر ايهاب المالكي
الجو حار بالغرفة بس صوت البنكه الي تفتر فاتحه الكنتور وكاعده اعزل بي اتنهدت بغصة والم وعضيت شفتي بقوة من شفت ملابسه على حطتهن اخذت قميصة واني اقربه من خشمي تنفست بقايا عطره بقوة واني اشهك معقولة هذا هو معقولة بعد مااشوف وجهه الحلو ولا صوته وحتى كلمة بويه نحرمت منها هاي الكلمة الي بفترة من حياتي ادمنتها شلون اصبر ياربي انت اعرف بحالي وانت وحدك الي تعرف انو صبري وقوتي الها حدود وانتهت طفرت وذبيت الي بيدي بعد ما سمعت صوت ادم يبجي كمت واخذته بحضني واني اسكت بي انطيته الممه وكعدت العب بشعرة واهمس اله بصوتي الحزين:
يلا تنام يلا تنام
واهديلك طير الحمام
روح يا حمام لا تطول
رفرف على الغالي تينام
ياحمام المدينة سلم على نبينا
بالجنة نشوفوا يارب
يفخر ويباهي فينا
ابتسمت من اتذكرت عمتي تكول امهات اخر زمن يلولن لأطفالهن على طيور الجنة شوي وشفته غفه بسته براسه اباوع عليه اخ ياربي شكد يشبه ابوه نفس لون العيون بياضه وشعره الاشقر بس ادم حبيبي عنده غمازة كل ما ياخذني الشوق العلي اخلي ادم بحضني واحجي ويا واخلي راسي بركبته اتخيل ريحة علي بي واشمه بقوة علي الي بصعوبة اتقبلوا اهله خبر استشهاده من اكعد يمهم ويذكروا ويتبعون اسمه بالرحمة اموت قهر لليوم ماصدكت ولا اريد اصدك انو مات وبعد ما اشوفه شنو ذنبي اني الي تعلقت بي وحبيته ادم حبيبي شنو ذنبه ماعنده اب وهو العذاب الاكبر هو الي نحرم من الحياة بعمر الورد وماخلوا يتهنا بأبنه دائماً اكول لو موجود ويانا جان هسه شنو ردة فعلة من يشوف ادم هو جود ومتخبل علي مو نوب ابنه ومن لحمه و دمه بعدني على كعدتي ورجعت بيا الذاكرة لذاك اليوم الاسود الي دمرني و خفه ضحكة هذا البيت ....
'' ومابين فصل الخريف وفصل الشتاء
هنالك فصل اسميهُ فصل البكاء
تكون به النفس اقرب من اي وقتٍ مضى للسماء '' لـ نزار قباني....
مجتمعين بالصالة جهال كرار يمي العب بيهم فجأة طلع خبر انو الجيش العراقي حرر المعتقلين الي بالانبار وصلاح الدين والحويجة اباوع على كرار الي الفرحة ملت وجهه وهو يكول رحمتك ربي واخيراً يمة فرحي حرروهم يعني علي راح يرجع يعني راح نكحل عيونا بشوفة الغالي ومن ثاني يوم طشت الاخبار واغلب الاهالي راحت تشوف معتقليهم ومن ضمنهم كرار وسامال الي طلعوا وكلهم امل انو يرجعون وعلي وياهم بس مو كل شيء نريده يصير صار الي محد محسب احسابه صار الي كسرنا وصدمنا الي خلا الحياة تنطفي بعيوني....
