وقفنا الحلقة اللي فاتت عند لما الواد الملزق جاي عايز يكلمني ومنشكح اوي اني لوحدي
انا كنت بقى على اخري من سي زفت هشام ده ومش مستحملة حد
وطلعت كل زعابيبي مكنش ناقص الا اني ابصق عليه بس عموما هو يستاهل, اصلا عيل مستفز , قلتله يعني ايه كويس انك قاعدة لوحدك وعايز اتكلم معاكي هو انت مين اصلا ؟! وبكمل لقيت الظريف بيقوللى زياد انا زياد وبيمد ايده يسلم (لا يا واااااد اهو ده اللى ناقص)
اهلا وسهلا , ايه المطلوب مني يعني
قالي مالك اجريسف معايا كده ليه؟ كل الموضوع اني معجب بيكي وباخلاقك وكنت حابب نتكلم شوية نتعرف اكتر على بعض
قلتله انا متأسفة جدا بس انا مبكلمش ولاد وبعد اذنك بقى
لسه جاية امشي لقيت الواد بيقولي اومال فلتة ده ايه؟؟ مش ولاد؟! ولا هو بيندرج عندك تحت فصيلة ايه؟
(كل اللي جه فتفكيري اني اد ايه اتغيرت واتخليت عن مبادئي وسمحت لواحد زي ده انه يشكك فسلوكي)
قلتله بالرغم انى مش ملزمة انى افسر لواح زيك تصرفاتى بس احب افهمك ان هشام قريب واحدة معانا فالدفعة وشرحلنا مادة كنا هنسقط فيها
وياريت تخليك فنفسك بعد كده
ومشيت وانا مش طايقة نفسي حتى المحاضرة قلت مش حاضراها
تاني يوم رحت الكلية وكل اللي يشوفني يقولي مالك اننتي تعبانة ولا ايه
معرفش ايه اللي حصلي جالي اكتئاب رهيب وكرهت نفسي
المشكلة اني اتزفت وعلقت نفسي بهشام
بس ولا يهمني انا هاجي على نفسي ومش ممكن اسمح لحد يهين كرامتي ولا ان حد يمسك عليا غلطة وارجع بقي علياء القديمة اللى عمر ماحد قدر يتكلم عنها كلمة واحدة
مش عارفة ليه اغنية اليسا "بعد النهارده ازاي انا عن نفسي هرضى ارجع لحد قدر يمد ايديه عليا"
هو اينعم محدش مد ايديه عليا ولا حد يقدر بس حاسة اني فيوم واحد خدت قلمين جامدين اوي علشان يفوقوني
واحد من هشام وده وجعني اوي وجع قلبي قبل ما يوجع كرامتي والتاني من زياد وده خلاني حاسة اني خنت ثقة اهلي فيا.
مش هطول عليكم فحكاية الفرافير دي انا قررت ان محدش اهم مني ولازم اهتم بدراستي بقى شوية
بقيت بحضر كل محاضراتي حتى بتاعة 8 و9 الصبح
الله عليا لما بحب اجتهد
وفالوقت اللي حسيت اني خلاص نسيت هشام او اوهمت نفسي اني نسيته لقيته جاي بعد ما عدا تلت شهور وخلاص كنا قربنا نخلص امتحانات وعايز يتكلم معايا
بس طبعا ولاعبرته انا مصدقت اني رجعت لنفسي القديمة ومشيت ولا عبرته
بس طول الليل فاليوم ده اعدت افكرو اتخيل كان عايز يقولي ايه واتخيل رد فعلي ايه
كنت فخيالي شوية بهزقه واقوله انت فاكر نفسك مين علشان تكلمني كده
وشوية اعيط وادخل فحضنه واقوله انا اتعلقت بيك اوي( ده طبعا بس افلام شاروخان باشا بتجيب للواحد تخلف عاطفي)
كان نفسي ساعتها اكلم منة اسألها رأيها ايه اصلا وحشني كلامي معاها, معرفش ليه حاسها متغيرة معايا هي كمان كأني ناقصة يعني
عموما انا مش محتاجة رأيها اصلا انا خلاص قررت انه لو حاول يكلمني تاني هرد عليه بمنتهى البرود واتعامل كأن مافيش حاجة خالص
بس شافني فالامتحان اللي كان عليا بعدها ولف وشه الناحية التانية وكأنه متضايق انه شافني
فاخر امتحان بقى مكنتش متوقعة اني اشوفه لانه خلص امتحاناته قبلى بيومين (وده مش معناه اني كنت ببص على جدوله خااالص على فكرة اوعوا تفهمونى غلط , احنا بس بنحب نعرف مين خلص امتحانات الاول علشان نحقد عليهم,علوم بقى وكده هع هع هع)
وانا خارجة من الامتحان وطبعا كنت تقريبا اخر واحدة تخرج من اللجنة (مش قلتلكم بهتم بدروسي من كتر العلم اللي عايزة احطه فالورقة مش عارفة ابدأ منين وقاعدة مبلمة ادام الورقة)
المهم بلاش احاديث جانبية ونركز فصلب الموضوع
جه حضرته يسلم عليا (كأن شيئا لم يكن بصوت نجاة)
قالي ازيك ياعلياء (دلوقتي بقيت علياء مش من كام شهر كنت استاذة وعاملي فيها قاسم امين وانا بنت الشاطئ)
قلتله الله يسلمك يا استاذ هشام خير فيه حاجة؟!
قالي علياء ارجوكي متعمليش فيا كده
(انا بردو اللي معملش كده؟!!!!!!!!!!)
معملش ايه يا استاذهشام مش فاهمة حاجة؟
فضل يتكلم كتير اوي وانا مش فاهمة ولا كلمة ,اصله كان امور اوي وبقالي كتير مش شفته, (انشفي شوية يا لولو امال لو كان عمر الشريف كنتي عملتي ايه)
فنص كلامه كده سمعت اسم زياد
قلتله زياد!!!!!!!!!
قالي ايوة هو اللي جالي وقالي ابعد عنك لانكم مرتبطين وان انتوا اتشاكلتوا بسببي فحبيت اني اعفييكي من الاحراج وابعد علشان مسببليكيش مشاكل مع حبيبك , كفاية انك كنتي حابة تساعديني وده جه فوق دماغك
حبيبي؟!حبييبي مين وزياد مين؟ّ!انت ايه اللي انت بتقوله ده؟
زياد مش انتوا برده ماأنتمين؟
(يانهاااار اسود منتنين؟؟ هيا حصلت؟) في سرى طبعا
طالما انك مصدق اني مرتبطة بزياد ده جاي دلوقتي تكلمني ليه
وشه احمر وارتبك وقالي انا كنت جاي عايز اطمن اني مسببتلكيش مشاكل لاني ملاحظ انك مش بتقفي مع زياد ده من ساعة ما هو اتكلم معايا
قولت في عقل بالى (لا يا راااجل دا على اساس انى كنت بقف معاه قبل كده؟ عبيط ده ولا ايه؟)
طيب اطمن انا كويسة , خلاص كده ضمير حضرتك ارتاح؟؟ ممكن امشي بقى؟؟
قالي اطمنت ازاي يعني؟ عموما انا اسف لو كلامي معاكي هيضايقك مش هحاول اكلمك تاني
قلتله هو انت بتستعبط ولا بتستهبل؟
اتخض اول ما قلتله كده مكنش متخيل اني ممكن اشتمه انا اه لساني طويل بس مشتموش قبل كده
وبعدها قالي بتقولي ايه يا علياء وهو بيبتسم ووشه احمر وبمنتهى السهوكة كده (اسمي طلع حلو اوي)
لاااا ركزى يا علياء ركزى يابنتى الواد بيتكلم عن سمعتك
قلتله اسفة مش قصدي بس انت بجد حارق دمي بقالك 3 شهور , انا مش بحب اني اتعامل مع حد كويس والاقيه فالاخر يعاملني وحش بدون اى سبب
قالي ارجوكي حاولي تفهمي موقفي, انا كنت بمر بظروف صعبة جدا وانتي لما قربتي مني حسيت اني بحبك وانك ممكن تكوني بتبادليني نفس المشاعر, بس كلام زياد فوقني وعرفني ان انتي كنتي مشفقة عليا مش اكتر علشان كده انا كان لازم ابعد قبل ما اتعلق بيكي اكتر من كده, مكنتش حمل اي وجع تاني
(الواد ثبتني تثبيتة صعبة اوي وبعدين حد يقول للبنت اللي معجب بيها مشفقة ده انت قديم اوي) قلتله طيب انت عايزني اعمل ايه دلوقتي؟؟
قالي بصراحة انا خليت احمد اخو منة يسأل منة عن حكايتك انتي وزياد ده بس من غير ما يعرفها ان انا اللي بسأل , فقالها ان مصطفى صاحبنا هو اللي بيسأل عنك , وهي قالت انكم مرتبطين وبتحبوا بعض وانا لاحظت انكم مابتتكلموش مع بعض وخايف يكون الموضوع ده بسببي وانى اكون عملتلك مشاكل معاه
انا استغربت هي ليه مقلتليش ده غير انها غيرت معاملتها معايا الفترة الاخيرة , وازاى اصلا تكذب وتقوله انتى مرتبطة بزياد؟!(هبقى افكر بعدين هو انا فايه ولا فايه)
قلتله لا ماتخافش انا ولا مرتبطة ولا نيلة ولا اصلا بطيقه الواد ده
قاللى بجد؟؟
قولتله انا مابكذبش وبعد اذنك بقي انا لازم امشي
قالي طب ثوانى لحظة بس انا مش قصدى اكذبك والله بس .... بس انا ......قصدى يعنى ..
(هنقضيها بسبسة بقي هيا القطة اكلت لسانه ولا ايه؟؟ )
لقيته خد نفس طويييييل وقاللى
انا معجب بيكي يا علياء وخايف اقول بحبك متصدقنيش (يخربيت سهوكتك يا منيل امال فلتة ايه بقى وهباب ايه انت كده هشام روميو مش فلتة) واتصدمت لما عرفت انك مرتبطة
اتلخبطت ووشي جاب الوان واتوترت وقلتله ايه اللي انتي بتقوله ده احترم نفسك وسيبته ومشيت وانا فالطريق اتكعبلت فكل حاجة جت فسكتي وكنت هقع حوالي 100مرة بس مبصتش ورايا ولا مرة بس كنت حاسة انه واقف بيضحك عليا
روحت البيت وكنت عايزة اقول لماما زي مانا متعودة احكيلها كل حاجة بس اول مرة ابقى خايفة كده ومحروجة كمان ,بس مينفعش مقولهاش
ناديتلها بالليل وكأني بدور على حاجة مش لاقياها فالدولاب وزي كل الامهات المصرية قالتلي طيب ولو جت جبتهالك قلتلها تعالي بس
لما دخلت قالتلي ما البلوزة فايدك اهي يا علياء انتي خلاص اتعميتي
انا: بس يا ماما هتفضحينا انا عايزة اكلمك بس مش عايزة بابا يسمع
ماما: خير ايه اللي حصل شكلك كده عملتي مصيبة
انا: ايه ده يا ماما انت كنت معانا ولا ايه
ماما: متنجزي يا علياء وبلاش هزار بدل ما اندهلك باباكي
انا: ايه يا ماما شغل العيال دي امشي بقى مش عايزة منك حاجة وبعد كده هنحرف ومش هعرفك علشان حضرتك مش فاضية تستحملي هزار بنتك
انا كنت عمالة اقلش واهزر علشان مش عارفة اقولها ايه
اول مرة اتحط فموقف زي ده انا طول عمري جد جدا
ماما: خلاص يا لولو انجزي لحسن ورايا حاجات كتير اعملها
انا: فاكرة يا ماما زميلي اللي كنت بحكيلك عنه؟(ايموشن واحد بيتفادى الضربة)
مامتي الخبيثة: لا يا علياء مش واخدة بالي المهم ماله يا حبيبتي
انا: ولا حاجة يا ماما عايزنا نتجوز عرفي وانا حبيت اعرفك علشان انتي عارفة مبحبش اعمل حاجة من وراكي
ماما وهي مصدومة: ايه يا علياء قلة الادب دي من امتى وانتي بتهزري كده؟
انا وانا مكسوفة من نفسي: ايه يا ماما متستحمليني شوية محروجة ومش عارفة اقول ايه فبضحك معاكي
ماما بنفاذ صبر: محروجة من ايه يا علياء انتي كده قلقتيني
انا بصوت هادي رقيق وديع: هشام فلته يا ماما اللي كان شرحلنا انا ومنة الكيميا وبسببه نجحنا قالي النهارده انه معجب بيا بس انا والله قلتله احترم نفسك وسيبته ومشيت
انا بردو بس بصوت مشاكس: وانا قررت اننا نأنتم وحبيت اديلك خبر الواد مز وادامه مستقبل باهر ده هيشتغل فالكلية وهيبقى داكتوور اد الدنيا قلتي ايه يا مامتي يا حبيبتي , اتوكل على الله واصاحبه؟ وجريييييت عالسرير ومسكت المخدة اتحامى فيها
اه انا لولو صحيح بس شجاعة اوووووووووى
ماما:ها؟! انتي بتتكلمي جد يا علياء ؟
انا: لا طبعا يا ماما انا مش بتاعة الكلام ده بس هو قالي انه معجب بيا وانا محروجة بقى ومش عارفة اتصرف ازاي
مامتي الكميلة بمنتهى الحكمة: علياء يا حبيبتي انا عايزاكي تركزي فمذاكرتك ومتعلقيش نفسك بحد واللي ليكي نصيب فيه هتشوفيه بس كل حاجة فى وقتها
وافقت على كلام ماما علشان اسكتها بس مكنتش مقتنعة بيه هي فاكراني فتالتة اعدادي ولا ايه وبعدين جاية بعد ايه تقوليلي متتعلقيش بيه مانا خلاص اتعلقت واللي كان كان , وبعدين انا بصراحة مش شايفة ان الحب حرام لأن ربنا هو اللي بيحطه فقلبنا مش كده ولا ايه؟
فكلمت منة مع اني مكنتش عايزة اكلمها بس كان لازم اسألها هي ليه مقلتليش ان اخوها سألها عليا وليه كذبت عليه وقالتله انى مرتبطة ؟
اكيد عايزين تعرفوا منة قالت ايه؟
الحلقة الجاية بقي وعليكم خير
.
.
قبل مااقفل البارت عايزه اشكر كل الناس اللي بتفرحني بكلامها الحلو واللي دعمتني اسفه اني بتأخر في التنزيل بس لأن اخويا ٣ ثانوي وبذاكرله ادعوله بالنجاح
ماتنسوش الفوت والكومنت الجميل
.
.
.
اشوفكم الحلقه الجايه
ماتنسوش الفوت والكومنتات الجميله
سلاااااام
