- عارفة مين اللى جه وانتى مغمى عليكى؟
- مين؟
- خالتك جت وماكنتش عايزة تمشي قبل ماتتطمن عليكى بس روحت علشان تطبخ لجوزها وهتيجى تانى بالليل
- ان شاء الله وحشتنى والله هيا والبت هناء هيا ماجتش معاها؟
- لا ماجتش قالت انها في الجمعية
- يالهوووى تانى؟هيا البت دى مابتحرمش
- ههههههههههه لا يا حبيبتي ى راحت جمعية تانية
- بلا تانية بلا تالتة البت دى مش هتيجى الا لما يتقبض عليها
- (وعلشان الزهايمر وكده عارفاكم اكيد نسيتم هناء دى بنت خالتى اللى كانت دلتنى على جمعية عباد الرحمن وخدت هشام ورحنا لقينا البوكس اخدهم )
- مش هتقوليلي بقي يا لولو ايه اللى حصل خلاكى منهارة كده؟
- ااااه يا ماما اااااااااه هشام رجع من السفر وبيقول عمته ماتت وعايز يرجعلى وشوية حاجات كده
- وانتى لسه عايزاه يا لولو؟
- لا طبعا عايزة مين يا ماما ؟ انا نفسي يبعد عنى ويسيبنى في حالى بقي
- طيب برده مافهمتش ايه اللى مزعلك هشام ويغور في داهية انتى مالك بقي؟
- ماهو انا لما روحت اعتذر للدكتور بتاعى زى ما بابا قاللى قوم اييييييه من حظى الفريييييد بجد انه يكون رجع من انجلترا لا وايييييه من حسن حظى برده الا متناهى انه يكون رايح يودى امانة للدكتور بتاعى وطبعا استمرار للحظ الحلو يكون الدكتور مش موجود وانا كنت قاعدة مستنياه في مكتبه ومنة تشاء الاقدار جوزها يكلمها فتروحله وتسيبنى لوحدى
وفي الختام يدخل علينا الدكتور في نفس ذات اللحظة اللى هشام الله لا يسامحه بيمسك فيها ايدى فالدكتور يفكرنا متواعدين بقي في مكتبه والكتور ده اصلا رخم رخامة السنين والتنين ومعروف انه عدو الحبيبة فقام مدينى كلمتين في جنابي هو شكله فاكر انى مش محترمة وكمان بعد اللى حصل اتاكد من كده
المهم انا بقي ماسكتلوش واديته كلمتين انا كمان وخرجت كملت على سي هشام باشا وجيت
يمكن اكتر حاجة ريحتنى الالم اللى اديته لهشام طلعت فيه كل غلى
وده ملخص لحظى الراااااااااائع فوق الوصف يعنى يا محاااااسن الصدف
- لا حول ولا قوة الا بالله معلش يا بنتى على راي المثل قليل الحظ يلاقي العضم في الكرشة
- عضم وكرشة؟؟ ايه يا ماما الامثال دى؟ لا وانا اللى بتريق عالبت منة
- بتتريقي على امك يا علياء؟
- لا يا ماما لا عاش ولا كان
- طب استنى بقي لما اجيب الاكل
- انتى مصممة؟
- اه انتى مش شايفة وشك عامل ازاى؟
ومشيت
امال يعنى بيقولوا القرد في عين امه غزال مش باين يعنى
ييييييييه حتى انا بقيت اقول امثال الله يسامحك يا منة شكلك طلعتى مرض معدى
ماما جت وحرام قعدت تأكلنى بنفسها وبعدين سمعت صوت موبايلي بيرن
- خدى يابنتى ردى على منة صاحبتك اتصلت كتير اوى وكل ماتتصل اقولها لسه مافاقتش خدى طمنيها عما اروح اودى الصينية
- السلام عليكم
- وعليكم السلام علياء انتى كويسة ؟وايه اللى حصل يابنتى ؟ اسيبك 5 دقايق الدنيا تتقلب وايه اللى رجع هشام؟
- براحة عليا وهرد على سؤال سؤال انا الحمد لله كويسة وهقولك ملخص الحوار علشان مش قادرة اتكلم انتى سبتينى من هنا هشام دخل عليا من هنا ومسك ايديا من هنا لقتلك رخامة في وشي وافتكرنا بقي بنتقابل قال يعنى يوم ما احب اقابل هروح اقابل في مكتبه ضاقت بيا الدنيا مالقتش غير مكتبه
- يالهووى وبعدين؟
- مافيش هشام قال عايز يرجعلى فرخامة قاله انى خطيبته
- خطيبته؟؟ ايوة بقي كان قلبي حاسس
- حاسس بايه؟
- ها؟ لا ولا حاجة كملى
- المهم هشام مشي من هنا لقتلك رخامة ادانى موشح واننا متواعدين ووو
- بتهزرى
- ودى حاجة يتهزر فيها برده؟
- ازااااى ؟ مش قال انك خطيبته ييعنى اظن لو فاكر انكم متواعدين ماكنش قال كده لان ساعتها كنتى هتكذبيه
- والله ياختى ما اعرف انا بقي ماستحملتش واديته بره الكلمتين اللى فيهم النصيب والله حتى ما فاكرة قولت ايه كانى ماكنتش في وعيي
- ياعينى عليكى يا علياء وهشام ده كمان منه لله بس د\محمد ازاى يقول كده؟ انا حاسة انى مابقتش فاهمة حاجة
- مش انا بقولك يابنتى مابيطقنيش بس اسكتى يا مونى اديت لهشام حتة كف خماسي الابعاد على وشه الواد اتصدم
- هههههههههههههه اتاريه كان واقف مكانه مبلم بس كده انده عليكى تمشي ولا تعبرينى؟
- ههههههههههه ده اللى همك في كل الحوار ؟ اصلا ولا حسيت بيكى ماشية كلام رخامة عمال يتكرر في دماغى انا مش عارفة ليه مش نازلاله من زور ده حتى الوحيد اللى بحاول اتجنبه ولا عمرى غلست عليه زى مابعمل مع باقي الدكاترة
- والله انا كنت فاكرة علشان.... بس ازاى ...يعنى لو هو فعلا...
- منة يا حبيبتي مالك يا ماما انتى لحقتى تتجنني ؟من ساعة ماتجوزتى وانتى مخك اتلحس امال لما تخلفيلك عيلين هتعملى ايه؟
- هههههههههههههه بقي فيكى اللى فيكى وبرده مافيش فايدة عمالة تغلسي
- يابنتى الغلاسة فينا بس ربنا هادينا
- لا ماهو واضح , المهم انتى بقيتى كويسة؟
- اه تمام الحمد لله
- طب خلى بالك من نفسك وريحى دلوقتى وانا هكلمك على بالليل تانى اتطمن عليكى
- ماشي يا مونى الله يخليكى
- وعايزة اعرف بقي الحوار بالتفاصييييييل المملة
- هههههههههههه قولى كده بقي شوفوا البت انا قولت برده مش معقول هتكلمينى لله في لله قال تتطمنى قال
- ههههههههههه الله يا لولو مش لازم اعرف
- ماشي ياختى يالا سلام
- سلاااااام
وقفلت معاها ونممممممت
ايوة نمت حد ليه عندى حاجة؟ اول مرة كان مغمن عليا يعنى ماتتحسبش
وبعين مش هما برده بيقولوا في الاعادة افاادة
- لولوووو
- مممممممم
- يا لولو اصحى بقي كل ده نوم
- مممممممم
- يا لولو يالا خالتك جت بره
- قوليلها نايمة
- عيب يا بنتى قومى ربنا يهديكى ماهى جت الصبح ومشي
- حااضر حاضر 5 دقايق بس
- لا يالا مافيش ولا دقيقة قومى اغسلى وشك كده وفوقي علشان خالتك عايزاكى في موضوع مهم
قمت قعدت عالسرير وسالتها
- موضوع ايه؟
- ههههههههه دلوقتى صحيتى؟ اخلصى يالا وانتى تعرفي انا خارجة اقعد معاها اياكى تنامى تانى
- حااضر حاضر قمت اهو
وغسلت وشي واتسرحت وغيرت هدومى مانا كنت نايمة بيهم بقي وطلعت لخالتو
- خالتووووو وحشتينى وحشتينى وحشتيييينى
- يا بكاشة مانا لو كنت وحشتك كنتى تيجى تسالى عليا مش كده ولا ايه؟
- والله يا خالتو انتى عارفة كلية علوم بقي وقرفها على طول مشغولة (قال يعنى بذاكر بقي وكده هعهعهع بس هقول ايه يعنى الست عندها حق برده)
- ايوة يا ست البنات عارفة ربنا ينجحك يا بنتى يارب
- يااااااااااارب ادعيلي على طول بالله عليكى يا خالتو
- بدعيلك من غغير ماتقولى يا حبيبة خالتك
امك حكتلى على هشام الواطى
- اه يا خالتو شوفتى ؟
- ماتزعليش يا لولو انا جايبالك الحل اللى يخلصنا منه
- ازاى؟
- جايبالك عريس انما ايه نقاااااوة بلا هشام بلا زفت
- عريس ايه بس ياخالتو انا والله بعد هشام خلاص حرممممت وتبت الى الله
- حرمتى ايه بس ده عريس لقطة يابنتى ومهندس ااااد الدنيا شافك مرة نازلة من عندى ومن ساعتها هيتجنن عليكى ونازل زن زن فوق دماغى
- اااه شافنى؟ وعجبته البضاعة بقي وكده وبعدين اصلا شافنى امتى انا من زمان ماجتلكيش
- بضاعة ايه يا بت واهو ياختى شافك اخر مرة كنتى عندى بس انا فاتحت ابوكى قال لسه صغيرة وقدامها بدرى على ماتخلص كلية ومش عايز يعطلك وكفاية موضوع هشام
قال يعنى انا مش خالتك وخايفة على مصلحتك
- وبابا اشمعنى وافق دلوقتى يعنى؟
لقيتها بتبص لماما
فماما ردت وقالتلى
- اصل انا حكتله على حوار انهاردة وقولتله فرصة يابنتى واهو نقطع لسان كل اللى يجى يتكلم عنك نص كلمة
- نقطع لسانه بانى اتخطب؟ ده اللى هو ازاى مافهمتش ؟
خالتو ردت هيا
- اه طبعا لما يعرفوا ان ليكى راجل يتخاف منه مش هينطقوا بنص كلمة
- راجل؟ انا ليا راجل الحمد لله ابويا لسه عايش ربنا يخليهولى
- يابنتى خالتك قصدها
- مامااا لو سمحت اقفلوا عالموضوع ده ومن الاخر انا مش ناوية ولا اتخطب ولا اتجوز مدى الحياة انا هوهب حياتى للعلم
- يعنى ايه يعنى؟؟ انتى تقابليه وبعدين تتكلمى
- انا مش هقابل حد وبالله عليكم بقي تسيبونى في حالى
- بنت ! الظاهر انى دلعتك زيادة عن اللزوم هيا كلمة واحدة هتقابليه يعنى هتقابليه
ولسه جاية افتح بؤى وانطق لقيتها لفت لخالتى
- قولى للعريس هنقابله يوم الخميس ان شاء الله يا ام هناء
- ماشي يا ختى انا هقوم بقي علشان ما اتاخرش وابقي سلميلي على ابو علياء
- سلاام وسلميلي على ابو هناء وهناء كتير اوى وابقي خليها تعدى عليا وحشتنى البت المفعوصة
- ماشي يالا مع السلامة
- مع السلامة
وقفلت البيت وانا روحت على اوضتى حبة ولقيت حد بيخبط
- ادخل
- بنوتى حبيبتي عاملة ايه؟
- تمام الحمد لله شوفت يا بابا خالتو وماما عايزين يعملوا ايه؟
- ايه؟
- جايبنلى عريس وماما ما صدقت كأنها عايزة تخلص منى
- عيب يا علياء نقول على ماما كده وبعدين انتى عارفة انى عمرى ما هغصبك على حاجة صح ولا لا؟
- ايوة
- طيب يابنتى ماما بس نفسها تتطمن عليكى علشان لو جرالنا حاجة يكون ليكى ضهر وحماية تتسندى عليه من بعدنا
- بعد الشريا بابا ماتقولش كده تانى
- يابنتى كلنا هنموت واحنا يعنى هنخلل
- طيب ويعنى اللى هتخطبله ده تضمنوا منين انه يكون كويس ؟ مايمكن يطلع زى هشام
- جرى ايه يا لولو انتى اتعقدتى من تجربة واحدة في حياتك امال الناس اللى بتتخطب مرتين وتلاتة واربعة يعملوا ايه؟
- يا بابا انا بجد زهقت انا اضمن منين انه يكون كويس اذا كان هشام اللى كانت كل الناس بتشكر في اخلاقه طلع كده
- احنا مانضمنش يا حبيبتي علشان كده فيه حاجة اسمها صلاة استخارة نصلى وربنا بقي اللي بيسر اللى فيه الخير واظن انتى جربتى ساعة هشام وشوفتى ربنا ظهره ازاى على حقيقته
- ونعم بالله
- يبقي نسيب الموضوع على الله وقابليه بس شوفي هترتاحى ولا لا وصلى استخارة وربنا يارب يكتبلك اللى فيه الخير يابنتى
- يارب يا بابا يارب
لقيت تليفونى رن
- طيب اسيبك بقي تردى عالتليفون
- لا عادى يا بابا دى منة خليك
- لا ياحبيبتي انا اصلا خارج اتفرج عالماتش
- ماشي يا بابا
وخرج وقفل وراه الباب
وانا كلمت منة اللى استجوبتنى وماقفلتش معايا غير لما عرفت كل حاجة بالحرف وكمان حكتلها على موضوع العريس ورايها من راي بابا
وقعدت غايبة من الكلية الكام يوم دول بس بصراحة هقولكم سرررر اووعوا تفكروا انى قررت اسمع الكلام
اصلا مش حابة فكرة ان واحد يشوفنى فقال ايه اعجب بيا وعايز يتقدم
صحيح انا امورة واتحب لله في لله ومعجبينى كتير
بس انا عايزة حد يعجب بيا قلبا مش قالبا منظر وخلاص ماهو بكرة يشوف اللى احلى منى ويعجب بيها برده
انا بقي هعمل خطة شريرة انا اروح اطفشه ازاى؟ لسه ماقررتش بس المهم النية موجودة
وجه الخميس وماما طبعا عمالة اوامر اعملى ماسكات واعملى واعملى والبسي ده وده
والعريس سعادته هيجى ياخدنا بالعربية يودينا الكافيه ولبست واتشيكت ونازلة انا وماما وركبت الوش الخشب وقررت اوريله انى حلوة منظر بس عالفاضي لما نشوف بقي انا ولا هو
ولسه نازلة لقيت رخامة في وشي واضح انه كان عند اخته او طالعلها
ولقيته واقف يبص عليا
طنشته ولقيت عريس الغفلة بيفتحلنا الباب
خالتو ركبت وبعدين ماما وبعدين انا
يا ترى ايه اللى هيحصل في المقابلة؟
ده اللى هنعرفه الحلقة اللى جاية ان شاء الله
كده احنا وصلنا لنص الروايه
هحاول متأخرش
اتمني الحلقه تعجبكوا ماتنسوش الفوت والكومنتات الحلوه بتاعتكوا
الناس اللي بتقرأ من غير فوت دول انا زعلانه منهم
طب انا بحاول افرحكم فرحوني انتوا كمان
بحبكوا جدا
اشوفكوا الحلقه اللي جايه
ماتنسوش الفوت وكومنتاتكوا الجميله
سلاااااام
