وصلنا الكافيه ولقيناه برده فتحلنا الباب
اه بقي بيحاول يحسن اموره مايعرفش اللى هيجراله
ودخلنا الكافيه وجه الجرسون
- تشربوا ايه؟
ماما طلبت شاى هيا وخالتو ومامته
ولقيت مامته بتسالنى
- تشربي ايه يا عروسة؟
- شكرا يا طنط (قال عروسة قال!عرسة تقر.. ولا حرام الست مالهاش ذنب )
- شكرا ايه بس قولى ماتتسكفيش
- لا مش عايزة حاجة شكرا (اصلى بصراحة ناوية اشرب من دم ابنك هعهعهع)
- هيا بتحب شويبس بالخوخ (ودى طبعا كانت ماما)
- خلاص هاتلنا اتنين شويبس بالخوخ (وده طبعا كان عريس الغفلة ومن هنا نستنتج عيب رقم واحد مالوش شخصية واوعواااااا تقولوا انى كمان ماطلبتش يبقي ماليش شخصية لانى اكيد مكسوفة يعنى حتى لو ناوية اطفشه عادى يعنى بؤحرج برده الله !)
- طيب ماتاخدها يا احمد وتروحوا تقعدوا لوحدكم شوية تتكلموا (طبعا دى مامت العريس)
- اتفضلى معايا
بصيت لماما على اساس تنقذنى اروح فين؟ لوحدنا فين؟ لقيت ماما بتهزر راسها وخالتو بتقول
- روحى يا لولو واحنا قاعدين جمبكم اهو
عيلتنا ركبت ارايل وبقت تجيب الفضائياااات او لالااااا والله على راي المثل الرجالة ماتت في الحرب
طبعا اتدبست وقمت من سكات
( حلووو اوى خلينى استفرد بيه بقي تعالى في حضن ماما يا حبيبييييييي دانت هتشوف ايام سووووودة هاهاها ضحكات شريرة متقطعة)
و رحنا على ترابيزة قريبة منهم و برده شدلى الكرسي
خلاص بقي بلاش الاوفر اللى هو فيه ده ! محسسنى اننا في فيلم عربي قديم
- ازيك يا علياء
(الله الله ابتدينا علياء حاف كده؟)
- الله يسلمك يا استاذ احمد وتقلت اوى على كلمة استاذ (طبعا عرفت اسمه من امه لما ندهت)
- ما بلاش استاذ دى خليها احمد على طول زى مابقولك علياء على طول(مافيش دم خاالص نيلة ايه دى )
- لا معلش الالقاب محفوظة
- احم
(ايوة ياخويا اتنحنح اتنحنح انت لسه شوفت حاجة)
- انتى في كلية ايه؟(يا سلااااام على اساس انك ماتعرفش ولا جاى تتقدم لاى واحدة عشوائى من غير ماتعرف عنها حاجة )
- علوم
- بس ايه اللى دخلك علوم انا اسمع انها صعبة
- زى ماحضرتك دخلت هندسة بالظبط كله قدر ومكتوب
- ونعم بالله وعلى كده انتى ناوية تشتغلى بعد ماتتخرجى؟
- طبعا ان شاء الله اصلا الشغل هيبقي عندى اولوية
- حتى بعد الجواز؟
- ايوة طبعا هيا الاوليات بتختلف بعد الجواز ولا ايه؟
- لا مش قصدى الفكرة انك ممكن البيت يحتاجك اكتر فتعيدى ترتيب اولوياتك
- ااه هو حضرتك بقي عايزنا نرجع لايام زمان اظن الست تعبت كتير جدا علشان تاخد جزء من حقوقها وابسط حقوقها انها تشتغل
- ايوة بس لو هتقصر مع بيتها وجوزها ومافيش داعى للشغل يبقي بلاش طالما جوزها مكفيها وطلباتها مجابة
- ده على اساس انى بشتغل علشان الفلوس؟ لا طبعا انا بشتغل علشان يبقي ليا شخصية مستقلة واحقق ذاتى ويبقي ليا كيان خاص
- وهيا شخصية الست مش من شخصية جوزها برده؟
- يا سلاااام طب ما الراجل يقعد هو والست اللى تشتغل الستات ونقول شخصية الراجل من شخصية مراته , واصلا حاليا الستات وصلوا لمناصب عالية جدا واثبتت كفاءة اعلى من الرجالة وممكن تاخد مرتب اكبر كمان
- بس برده القوامة ...(بصراحة طنشته وقعدت ابص لماما واشاورلها نمشي بقي علشان زهقت )
- ايه ماما بتنده ؟
- لا انا اللى بندهلها علشان نمشي بقي اتاخرنا
- احم طيب اتفضلى انا اسف ماكنتش اقصد ازعجك
- لا عادى ولا يهمك (قولتهاله بمنتهي الرخامة) وخدنا وصلنا لحد البيت وطلعنا ولسه بقفل الباب
لقيت ماما بدات بالموشح
- انتى اعمل فيكى ايييييييه؟ خلتينى في نص هدومى حرام عليكى
وانا طبعا مافتحتش بؤى بكلمة
ساكتة ليه ماتنطقي! طبعا مش لاقية كلام تقوليه
مانا لو اتكلمت هتدينى موشح اكتر انى قليلة الادب وبرد
لقيت بابا اتدخل (حبيبي بابا ده وجه في الوقت المناسب)
- خير بس يا ام علياء ايه اللى حصل؟
- اسال بنتك المؤدبة المتربية انا خلاص تعبت وهشيل ايدى من كل حاجة تخصكم
ودخلت الاوضة قفلت عليها
- فيه ايه يا لولو مزعلة ماما ليه؟
حكتله طبعا على كل حاجة
- يا بابا ده شكله من بتوع سي السيد والست مالهاش غير بيتها انا لو اتعينت معيدة لا يمكن اسيب التعيين لاى سبب من الاسباب
- بصي يا حبيبة بابا انا معاكى في كل اللى قولتيه بس انتى فعلا كنتى قليلة الذوق معاه وماينفعش كده احرجتى ماما
- ماهو انا لو ماكنتش عملت كده ماكنش هيطفش وماما كانت هتدبسنى فيه
- ايه هتدبسك دى؟ عيب يا علياء دى ماما وتتمنالك احسن حاجة في الدنيا وقولى بقي انك كنتى عايزة تطفشيه
- يا بابا انتوا عايزين تخلصوا منى؟ للدرجة دى مضايقاكم؟ انا مش عايزة اتجوز انا مبسوطة معاكم هنا
- نخلص منك؟ ليه يا علياء هو احنا عندنا غيرك؟ انا داخل اوضتى احسن هتعليلي الضغط وانا مش ناقص
ييييييييييه حتى بابا كمان زعل اعمل ايه بس ياربي
ولقيت منة بتتصل وعايزة تعرف كل حاجة بالتفاصيل حكتلها طبعا
- ايه يا بت الرخامة دى؟ ده نظام تطفيش
- اه رخامة وده اللى عندى واه بطفشه فيها حاجة؟
- لا يا لولو اهدى بس مالك؟
- مالى؟ شايفانى بتشقلب قدامك؟ هبلة انا ولا ايه؟
- لا يا حبيبتي دانتى ست العاقلين المهم هتروحى الكلية السبت ان شاء الله؟
- لا مش رايحة الزفتة ؟
- ليه بس؟ يابنتى فاتك محاضرات كتير كده
- هو كده وخلاص والمحاضرات هبقي اخدها منك مش كفاية بيجيبونا الكلية السبت وباقي الكليات اجازة دى بقت حاجة تقرف
- ماشي هدى اعصابك
مانا هادية اهو شايفانى بشد في شعرى؟
طيب طيب خلاص سلام
- سلام
(بصوا انا لما بتعصب ببقي اغلس خلق الله بصراحة )
تانى يوم صحيت لقيت ماما وبابا مخاصمنى حاولت اقضي معظم اليوم نوم علشان ماحتكش بيهم
يوم السبت صحيت لقيت ماما برده لسه مابتكلمنيش اموت واعرف انا اللى بنتها ولا سي احمد ده ؟
وبابا مش موجود اكيد نزل الشغل قولت مابدهاش بقي انزل الكلية احسن
وكلمت منة
- السلام عليكم , ايوة يا مونى
- وعليكم السلام وطالما قولتى مونى تبقي بقيتى احسن
- هههههههههه احسن من ايه بالظبط؟ عامة بقولك انتى نزلتى الكلية؟
- اه انا في السكة اهو انا وصاصا
- طيب انا جاية استنينى
- اوكيشن هستناكى في مكتب صاصا
- ماشي ياختى يابخت اللى كان المعيد جوزه
- هههههههههههههه اهو قرك ده اللى هيجيببنا لوره
- لا يابنتى ده مش حسد ده حقد سلام بقي علشان الحق البس
- سلااااام
لبست ونزلت من غير فطار وماما ولا عبرتنى( ماكنش العشا يا امى قال ست الحبايب قال )
ركبت تاكسي و روحت الكلية يالا اهو موت وخراب ديار
روحت عند المكتب بتاع مصطفي وباقي المعيدين بتوع كيميا
- السلام عليكم
- وعليكم السلام
ودخلت لقيت رخامة في وشي (ده ايه الحظ ده ياربي دانا لو بدور عليه مش هشوفه كتير كده)
- يالا يا منة
- طب ادخلى يا علياء
- خلاص خليكى وانا هروح الكافتيريا اجيب حاجة اكلها سلام
- استنى بس
طبعا مشيت ومادتهاش فرصة
لقيت حد بينده عليا ببص لقيته رخامة
علياء استنى بس ثوانى بعد اذنك
مشيت برده ولا عبرته (عاااارفة من غير ماتقولوا عيب وقلة ذوق وانه دكتور عندى بس انا بصراحة مش ناقصة حرقة دم والله احسن انا اصلا مش هملك نفسي لو قاللى كلمتين تانيين احتمال امد ايدى عليه واجيب لنفسي مصيبة )
روحت الكافتيريا جبت ساندوتش وباكل لقيت منة بتتصل
- بقي بالذمة دى عمايل تعمليها؟
- وعليكم السلام ورحمة الله وبركاته
- ماشي يا علياء انتى فين؟
- في الكافتيريا
- طب المحاضرة هتبتدى مش ناوية تحضرى سعادتك؟
- لا جاية اهو
- وعنت باقي الساندوتش في الشنطة (حتى اللقمة الواحد مش عارف يتهنى بيها )
- دخلت المدرج ولسه منة جاية تتكلم الدكتور دخل وبعد عشروميت الف ساعة المحاضرة خلصت الحمد لله
وخرجنا ولسه منة جاية تفتح بؤها لقينا مصطفي جاى قمت انا استاذنت علشان امشي
- استنى يا علياء هخلص بس السيكشن و نوصلك في طريقنا (ده كان مصطفي)
- لا معلش انا هركب تاكسي في السريع علشان مستعجلة يالا سلام عليكم
- على فكرة لينا كلام مع بعض وعليكم السلام (دى طبعا منة )
ركبت ميكروباص بقي ماهى مش شغلانة
وروحت البيت لقيتهم اتغدوا وسابونى قمت مطلعة باقي السانكوتش كلته ونمت لحد تانى يوم ماحدش فكر يصحينى اصلى حتى ولاااااااااا حد عبرنى
تانى يوم صحيت والحمد لله مش عليا محاضرات
لقيت ماما محضرالى الفطار شكلها رضت عنى قولت بقي احاول استسمحها شوية وقعدت اتدلع عليها
- يا ماما بقي علشان خاطرى سامحينى دانتى اللية والروح الجوانية
- عايزانى اسامحك يبقي تقابلي العريس انهاردة كويس
(يالهووى هو لسه ماطفش؟ )
- حاضر يا ماما اللى تشوفيه
- ايوة كده دى علياء بنتى اللى بحبها
(اه بتحبنى لله في لله زى مانتوا شايفين الحب ولع في الدرة )
المهم جه الميعاد وماما دخلت قالتلى يالا يا علياء
وكنت طبعا لابسة ومتشيكة وخرجت وانا ببص في الارض
وسمعته عمال يتكلم مع بابا
غريبة هو صوته مالوف كده ليه؟
ايه الهبل ده؟ ما اكيد علشان اتكلمت معاه قبل كده
بس حساه برده متغير
وكل ده وانا طبعا شغالة عالوضع الصامت وببص في الارض
لقيت بابا بيقول انا قاعد هناك يا علياء واسيبكم تتكلموا مع بعض شوية عن اذنك يا دكتور انت طبعا في بيتك
دكتور؟ ايه الهبل ده ؟ هما مش قالوا مهندس ؟
- ازيك يا علياء
ولسه برفع طرف عينى كده وجاية ارد السلام
- دكتور محمد؟؟
اشوفكم بقي البارت اللى جاى ان شاء الله
ماتنسوش الفوت وكومنتاتكوا الحلوه
سلاااااام
