انا مش مجنونه

الحلقه السابعه عشر

- عاجبك كده؟ اهو مشي
- لقيته بيبصلى بابتسامة ومنشكح اوى
- بتضحك على ايه يا دكتور(قولتله يا دكتور بقي يمكن يرجع لوقاره )
- قاللى يالا بس
- يالا فين؟
- يالا اركبي اوصلك
- فضلت ساكتة
- يابنتى يالا انتى باباكى موصينى عليكى يعنى انتى امانة في رقبتى وانتى اساسا فهمتى غلط انا لو كان عندى شك 1% في اخلاقك ماكنتش جبتك تشتغلى معايا ولا سمحتلك تركبي العربية من اساسه
- على فكرة بقي انا فعلاً عمري ما اركب لوحدي عربية واحد غريب ده مبدأ عندي، ومعرفش اصلا ازاى وافقت اركب معاك حاسة كانى كنت منومة مغنطيسيا ومافقتش غير عالموشح الاخلاقي بتاع حضرتك
- وانا معترفة بغلطتى

اينعم حضرتك دكتوري ومسئول عني بس بردو حضرتك راجل وكمان صغير فالسن وماكنش يصح اركب معاك تحت اي ظرف من الظروف
وانا اللى غلطانة علشان سمحت لحد يشكك في اخلاقى
- برده رجعنا لنفس الحوار؟ قولتلك انا مابشككش في اخلاقك وانتى ركبتى معايا علشان كنتى مضطرة وانا اعتقد يعنى احسن الحلول ولا كنتى عايزة تركبي مع يحيي؟؟
ولا الراجل اللى وقفتيه وانتى معلوماتك عنه صفر علشان بس كنت بنصحك وخايف عليكى
(ارتبكت بصراحة انا ايه اللى كنت ههببه ده؟ الراجل ليه حق يقول اكتر من كده)
- بس على فكرة بقي انا اصلا كنت هاخد رقم العربية واكلم ماما اقولها عالرقم
- ايوة وبعدين؟ بماغك الناشفة دى
افرض خطفك وقتلك ؟ مامتك هتعمل ايه بالرقم ؟ ولا افرضي اساسا انها مش عربيته وسارقها
- لا ماعتقدش ده شكله راجل محترم
وقعد يضحححححححححك ويكركر
- خير؟ حضرتك بتضحك علي ايه؟
- بضحك عليكى بصراحة هههههههههههههه
- والله؟ وانا بضحك اوى كده؟
- هههههههههههههه بصراحة اه حلوة شكله راجل محترم دى وهما المجرمين بيبقي شكلهم ايه؟ شكلك غاوية افلام عربي قديمة
- يا سلام! ماهوو حضرتك بردى غريب عنى ومعلوماتى عنك صفر برده
- هههههههههه طيب يا ستى عايزة تعرفي ايه عنى
- ولا حاجة انا هعوز اعرف ايه يعنى هو انا هناسبك ؟؟!
- هههههههههههههه ماشي
الراجل ده هيجننى هيجننىىىىىىىى
وقضينا باقي الطريق في صمت وفضلت افكر في كل كلمة قالها
فاجاة لقيته وقف وبيقوللى
- انزلى يالا وصلنا
- ها؟ ببص حواليا لقيتنى قدام عمارتنا
(ايه ده؟ وهو عرف بيتنا منين؟ يا مصيبتى مش معقول اكون مسطولة لدرجة انه سالنى وجاوبت وانا مش حاسة )
- ايه عايزة تروخى حتة تانية ولا ايه؟
- ها؟ لا بس اصل هو انت يعنى اقصد حضرتك ازاى وكل ده طبعا وانا مذبهلة ومفنجلة عويناتى
- اها قصدك بيتكم يعنى ابدا اختى ساكنة في العمارة اللى قدامكم دى وكنت بشوفك على طول
- اهااااااااااا طويب
ونزلت وانا مازلت مذبهلة بلهاء وسمعته وهو عمال يضحك
(مستفز الراجل ده لاقصي حد)
وطلعت البيت وقررت في نفسي قرار
لا مصنع بعد اليوم
بلا قلة قيمة وتهزيق بقي
وطبعا كلمت منة وقعدنا نلوكلوك وحاولت تخلينى ارجع في رايي بس انا مصممة
منة استسلمت خلاص وقالتلى
- خلاص ماتزعليش حيث كده بقي تعالى ننزل نكمل باقي حاجتى
- ههههههههه شوفوا البت المستغلة ماشي يا اوختى عونيا يا قمرى
- تسلملى عنيكى يارب عقبال ما اتعبلك
- ههههههههههه لا ياختى تبت الى الله انا مايهونش عليا اتعبك ابدا فناوية اريحك للابد
- ههههههههه بس يا هبلة والله بكرة تقعى وتقولى منة قالت
- يا باااى عليكى اقفلى يا منة بدل ما اقفل علي ايدك واعملك عاهة مستديمة وانتى عروسة على وش جواز ليرجع الواد في رايه ويرجعك تقعدى في ارابيزنا
- ماتقووليش عليه واد
- هههههههههههههه بالذمة سيبتى كل الكلام ومسكتى في واد يا حونينة ماشي ياختى الاستاذ الدكتور رئيس القسم سعادة البيه مصطفي باشا حلو كده؟
- هههههههههههههه طب اقفلي بقي علشان بيتصل
- ندلة طوووول عمرك , سلام وقفلت بسرعة قبل ماتقفل هيا في وشي ماهو مش كل مرة بقي هاهاهاهاااااا ضحكات شريرة متقطعة
روحت كالعادة نمت واحب اقولكم ان انا غير كل الناس
الناس تروح تنام علشان تريح دماغها من التفكير
انا بقي اول مابنام دماغى تشتغل وتجيلي كل الافكار اللى في الدنيا
يا غبية يا عليااااااااااااء (ده انا بصوت بعد ماصحيت من النوم)
كنت صممت اركب وره زيه زى اى تاكسي ونزلت رميتله الفلوس في وشه وجريت عالبيت
يخربيت ام الغباء ومخى اللى مابيشتغلش غير وانا نايمة ده
ياباااااااااى عارفين احساس اللى يتشاكل وبعدها يفتكر كلام اجمد؟
عااااااااااااااااااااا انا عايزة اعادة ماليش دعووووة
حرام حرام حرام اهئ اهئ اهئئئئئئئئئئئئئ
انتحر يعنى وارمى نفسي يعنى من فوق السرير ولا اعمل ايه انا؟؟
ورجعنا من تانى لمشاوير منة علشان نجيب شوية حاجات بس كنت على اد فرحتى بمنة الا ان كلام رخامة بيرن في ودانى
هو انا وحشة اوى كده؟
بس فعلا انا عملت حاجات كتير غلط بس والله يعنى مثلا يحيي اتحرجت احرجه لما كان بيكلمنى وبعدين كان بيحكيلي عن حبيبته وكده وانا حتى نصحته يتقدملها على طول يعنى عمل خير اهو
يييييييييه يارب سامحنى يارب
بس هو اصلا حتى لو كان عايز ينصحنى يعنى ده بالذمة اسلوب ؟
ده حتى الكلمة الطيبة صدقة
- يا لولو يا علاااااا انتى يابنتى
- ها؟؟ ايه يابت حخضتنينى
- خضيتك ايه بس بقالى ساعة بنده روحتى فين؟
- روحت مشوار وجاية
- هىهىهى خفيفة يا بت ها ايه رايك الفستان الاولانى احلى اكيد؟
- اه يابنتى وبطلى وسوسة بقي
- ههههههههههههه الله خايفة اوى اطلع مش حلوة
- لا ماتخافيش هتبقي احلى عروسة ان شاء الله واصلا يابنتى مصطفي مش هيشوفك غير بعد كتب الكتاب يعنى هيكون اتدبس سعادتك وهنقوله البضاعة لا ترد ولا تستبدل
- بقي كده؟ انا بضاعة يا جذمة
- ههههههههههههه خلاص خلاص اهدى يا عم الحاج
- حاج في عينك
وفضلنا نناكف في بعض شوية وكملنا مشاوير وبعدين روحنا
وكالعادة زى كل يوم روحت مقتولة من التعب نمت
- واخيرا جه الخميس وطبعا استاذنت بابا وروحت لمنة من بدرى اللى كانت ملبوخة على عينها ومتوترة حاولت اهديها واهزر وكده
- يالا بقي يابنتى افطرى
- لالالا انا مش قادرة حاسة انى هرجع
- يا فضيحتى؟؟ وانا اقول استعجلتوا على كتب الكتاب ليه؟ اتاريكم عايزين تداروا عالفضيحة انطقي يا بت انتى في الشهر الكام؟ انطقى ردى ردى هاااااااا؟ طبعا مش قادرة تردى اوشي ورى من الناس فين
- هههههههههههههه يابت اتهدى بقي قتلتينى ضحك
- طب يالا بقي انا ميتة من الجوع انتى بخيلة ولا ايه؟
- هههههههههه قولى كده بقي انتى جاية تخلصى عالاكل اللى في بيتنا مش جاية تساعدينى
- اه بصراحة طنط مامتك عليها طبق شكشوكة لا يعلى عليه
- هههههههههههه ماشي ياختى بالهنا
- الله يهنيكى وكلى بقي وانتى ساكتة مش عارفة اركز
- ههههههههههه تركزى؟ محسسانى انك بتعملى عملية
- برده نازلة لوك لوك مش عارفة اكل منك
- هههههههههه بت ماتيجى تاكلينى احسن دانتى قضيتى على طبق البيض كله
- بس بقي وانا اقول نفسي اتصدت ليه يا ستير يارب انا قايمة
والحمد لله منة فكت شوية وقعدنا نهزر ونضحك مع طنط مامتها اللى كانت عسلية بصراحة وقعدت تحكيلنا عن ايام فرحها
انتوا عارفين يا بنات عمكم عبده (اللى هو بابا منة ) لما شافنى بقي وعجبته وفضل ورايا فترة وبعدين لما جه يتقدم وحبة وبابا الله يرحمه قال لماما اندهى حورية
وماما تقوللى هتدخلى انتى بالشربات ولا هتفضحينا وتدلقيه؟
قولتلها بقلب جامد لا عيب عليكى دانا حورية على واحدة ونص
ودخلت بالصينية وقدمت للى قاعدين بالدور بابا وبعدين عبده وببص لماما بقي اللى هو شايفة بنتك؟ قمت متكعبلة دالقة العصير عليه وعلى امه وابوه وغرقت نفسي
كان حتة يوم
ولا يوم كتب الكتاب الماذون بيكتب اسمى من البطاقة حبيبة لقيتلكم عبده وقف ويقولهم لا مش دى العروسة انا عايز حورية انتوا لخبطتوا البطايق ولا ايه
وابويا يسكت فيه عشان يفهمه وهو مش مدى فرصة لحد
فكرتونى بالذى مضي يا ولاد
- ايوة بقي يا طنط يا رومانسية انتى , انا ماكنتش اعرف ان الناس بتتجوز عن حب زمان كنت مفكرة بقي الجو بتاع العريس مايشوفش العروسة غير بعد الدخلة والجو ده
- هههههههههههه هو فيه زى حب زمان ؟
- وعلى كده لسه بتحبوا بعض اوى كده زى زمان؟
- طبعا يابنتى هو بس الحب الاول بيبقي شديد كده وطايش حب شباب بقي بس بعد الجواز وبعد فترة يبدا الطيش يروح لكن الحب مايقلش ابدا يابنتى يمكن بس يتحول لنوع تانى من الالفة والطيش يتبدل باحاسيس تانية زى الراحة والامان يعنى ماترتاحيش غير معاه وجمبه مهما كان بينكم مشاكل وتحسي ان ليكى سند وحماية وضهر وامان تحسي انك لقيتى نصك التانى ولو يوم روحتى عند اهلك تبقي مش طايقة وهتموتى وترجعى بيتك على راي المثل القط مايحبش غير خناقه
يوه يا ولاد الوقت خدنا هقوم احضرلكم الاكل عشان تنزلوا الكوافير
- هييييييييح تصدقي يا بت يا منة امك حببتنى في الجواز
- هههههههههههههه امى برده؟ انتى اصلا شكلك بتحبي على نفسك اما نشوف السرحان الكتير ده وراه ايه يا جميل افضالك بس وانا هوصل لقرارك
- قرارى؟ بالذمة انتى عروسة انتى ؟
- هههههههههه اه عروسة ونص عالعموم خير ربنا يارب يرزقك الزوج الصالح اللى يعوضك خير بس برده هعرف
ولقينا طنط بتنده علشان نروح نتغدى
واتغدينا ونزلنا الكوافير وبعدين فضلت مع منة لحد قبل ماتخلص بحاجة بسيطة وروحت جرى البس انا كمان ورجعتلها بسرعة
ومنة عملت حركة حلوة اوى بسطتنى منها خلت باباها يجى ياخدها مش مصطفي ولبست كاب عالفستان علشان مافيش راجل يشوفها بالمكياج غيره اول ما يكتب الكتاب
وطبعا القاعة منفصلة ودى بسطتنى من مصطفي وحسيت اد ايه هو راجل
وروحنا واتكتب الكتاب وطلع علشان ياخدها وقبل جبينها
(الحتة دى بالذات كان لازم فيها فصحى علشان تحسوا بمعناها امال اقول باس راسها ؟ماتنفعش خالص ضيعت رومانسية اللقطة )
وانا روحت اسلم عليها قبل ما تمشي وعنيا دمعت حسيت انها بنتى اللى بسلمها لجوزها, يمكن مانعرفش بعض من زمان بس الحب مش بعدد السنين ابدا فيه ناس كده اللى ربنا بيحبهم فيحبب فيهم خلقه
اهى منة دى من النوع ده
وطبعا كانت هتعيط الهبلة قولتلها بطلى يابت المكياج هيسيح ومصطفي يرجع في كلامه وقولنا البضاعة لا ترد ولا تستبدل ضحكت وضربتنى ضربة خفيفة وبعدين شدتنى لحضنها
قولتلها يالا بقي بيتك بيتك هش يابت روحى لجوزك ولبستها الكاب ونزلوا وانا وراها لحد ماركبت العربية مع جوزها وفضلت واقفة لحد ما العربية مشيت
يا خبررر انا نسيت ارن لبابا يجى ياخدنى
كلمته بسرعة وطلعت القاعة تانى وقفت مع طنط مامت منة بتسلم عالناس نفر نفرررر
وبابا رنلى سلمت على طنط ونزلت جرررررى عالسلم
لقيته لسه ماجاش ولقيت صوت من ورايا
مابتجيش المصنع ليه؟
اتخضيت حتة خضة ولفيت لقيته د\رخامة ولابس بدلة الظاهر انه كان في الفرح
ايه الغباء ده ماهو صاحب مصطفي اكيد كان في الفرح!! غباء مستحكم بعيد عنكم
- ماردتيش يعنى مابتجيش المصنع ليه؟ وواقفة لوحدك في الشارع متاخر ليه؟
- حضرتك جاى تكمل موشح التهزيق؟ انا مستنية بابا رنلى فنزلت فكرته تحت
ولمحت بابا بالعربية وانا بتكلم
- اهو جه اهو
وماشية بسرعة سمعته بيقول اسف
الله اعلم بقي هو قال كده فعلا ولا تخاريف
وبابا جه عليا
- كده يا بابا انت مش رنتلى من بدرى ؟
- اه والله يا حبيبتى كنت خلاص داخل عالقاعة لقيت عسكرى مرور واقف وبياخد الرخص من الناس وده اللى عطلنى
- ازي حضرتك يا حج
- الله يسلمك يابنى
- انا د\محمد دكتور علياء في الكلية اللى كنت كلمتك
سبتهم ورحت قعدت في العربية بس بصراحة الفضول كان هيموتنى كنت عايزة اعرف بيقولوا ايه؟

ياترى قالوا ايه ده اللى هنعرفه الحلقة اللى جاية
اعملولي فوت وكومنت عشان تفرحوني يا قمامير ❤❤