روحت البيت طبعا لقيت منة بتكلمنى رديت
- لولوووو ازيك يا بت
- سيبي لولو في حالها
- ليه بس مالك يا حبي؟
- كده يا منة ؟ دى عملة تعمليها انتى تتجوزى وانا اتدبس في رخامة الله يسامحك
- هههههههههههه عمل ايه بس انتى اللى حطاه في دماغك ده ذوق واخلاق
- ذوق واخلاق؟؟ النمرة غلط يا عماد, وهكون حطاه في دماغى ليه ياختى ان شاء الله دا هو اللى حاططنى في دماغه زى ما اكون مرات ابوه
- هههههههه طب اهدى واحكيلي
- حكيتلها طبعا على كلللل حاجة من طقطق لسلام عليكم
- لقيتلكم صاحبتنا مقتووووووولة ضحك
- اتهدى يا بت بتضحكى على ايه؟؟
- وهيا مستمرة عادى
- هقفل وربنا انتى حرة
- ههههههههه لا خلاص هههههههههههه
- لا والله؟ لا ماهو باين انا غلطانة اصلا انى بكلمك
- هههههههههه خلاص خلاص ماتزعليش يا لولو بس روحى بقي بدرى بكرة واهو على راى المثل امشي عدل يحتار عدوك فيك
- مثل؟؟ بقيتى بيئة اوى يا منة ياعينى عليك يا مصطفي الواد اتخدع فيكى
- نعم نعم ياختى؟؟ ليه ان شاء الله؟
- مش بقول بيئة
- كده يا علياء؟؟
- لا طبعا يا حبي انا بهزر
- ماشي ماشي عفونا عنكى
- ههههههههههه ماشي يا وزة انا هقفل بقي احسن همووووووت وانام
- ماشي يا حبيبتي تصبحى على خير وحب وفرحة من القلب
- ههههههههههه حيلك حيلك انا مش مصطفي , وانتى من اهل الجنة يا حبي
بصراحة مش عارفة هكمل الاسبوع ده ازاى من غير منة
ونمت من بدررررى كنت مقتولة من التعب
تانى يوم صحيت من بدرى لبست ونزلت علشان الحق الاتوبيس
والغريبة بقي لسه بطلع لقيت د/رخامة في وشي
(ايه ده! مش معاه عربية ايه اللى جايبه معانا ده!! ياربى حتى الشوية اللى كنت هرتاح منه فيها اللهم لا اعترااااض)
طلعت وقولت السلام عليكم
ودخلت اقعد لقيت عم احمد قاعد في كرسي واللى جمبه فاضي وواحد تانى قاعد في كرسي برده فضلت متنحة شوية اعمل ايه؟؟ لقيت عم احمد نده للراجل اللى جمبه وقاله تعالى يا حسن اقعد جمبي خلى الانسة علياء تقعد براحتها
وراح حسن ده يقعد جمب عم احمد بس عم احمد قاله ادخل انت جوه وبقي هو اللى قاعد ناحيتى
(ذووووق عم احمد ده والله حبيبي حبيبي)
رحت اقعد بقي وقعدت عالكرسي اللى عالطرف علشان ماحدش يجى يقعد جمبي
لقيت دكتور رخامة جاي واقف يكلم حسن واصلا المكان اللى بين الكرسي بتاعى والكرسي اللى جمبه مش واسع ( يخربيتك ده انت شكلك هتطلع متحرش انت كمان ولا ايه وانا اللي كنت فاكراك محترم سبحان الله اللى تفتكره نينجا يطلع ترتر )
وهو بيتكلم لقيته خبط فيا (يالهوييييييييييييي كان عندي شك بقى يقين , عامل نفسه محترم ومتدين وهو ماشي يتحرش ببنات الناس)
لقيته رجع لورا ووشه احمر جدا (يوغتي كميلة اتكسفتي يا بيضا ال يعني الواد محترم(
- انا متأسف جدا يا انسة...
- عادي يا دكتور محصلش حاجة
- ازاي يعني محصلش حاجة
- ها.؟ (يخربيت البجاحة مش عاجبك كمان اني عملت نفسي مش أخدة بالي(
- طبعا حصل ..وكمان الطريقة اللي حضرت قاعدة بيها غير لائقة
- (غير لائقة انت فاكر نفسك بتشرح فالمدرج) دكتور انا مسمحلكش انا محترمة جدا ومش هسمح لحد ايا كان يقول عني اني بتصرف بطريقة غير لائقة ...وفعلا حصل بس الغلط كان من حضرتك مش من عندي المفروض تخلي بالك حضرتك مش شايفني قاعدة هنا ؟؟والمفروض..
كمل كلامه كأنه مش سامعني اصلا
- ازاي تقعدي على الطرف كده انتي مش شايفة ان المكان ضيق واللي رايح واللي جاي ممكن يخبط فيكي.
- يعني حضرتك تخبط فيا وانا اللي اطلع غلطانة كمان
- قلت لحضرتك اني اسف ... وكلامي مش معناه ان انتي مش محترمة بالعكس ...كل اللي اقصده انك تخلي بالك من تصرفاتك.. وياريت اول ما نوصل تيجي على مكتبي علشان افهمك شغلك الجديد.. بعد اذنك
وسابني ومشي من غير ما ارد عليه ولا اهزقه ... انا متعودتش حد يبهدلني كده وكمان هو اللي غلطان... الحمد لله ان محدش كان سامع غير عم احمد اللي كان متابع الحوار اللي بيبنا هو هزقني صحيح بس بتحضر مش ان بابليك..
اول ما وصلنا المصنع قولت مش هعبره شغل ايه اصلا وجديد ايه هروح اقعد مع عم احمد اكمل الي كنت شغاله فيه امبارح
مفيش خمس دقايق لقيته طب علينا زي القضا المستعجل
- انا مش قولتلك تجيلي؟
- ورايا شغل بخلصه
- سيبي اللي فايدك يا علياء وتعالي معايا(علياء؟؟ اول مرة يعنى يناديلي باسمى اتجرا عليا اوى الراجل ده)
واثناء مانا بكلم نفسي لقيته لف ورجع وبيقول
- وياريت تجيبي شنطتك واوراقك
- (اوراقي ؟؟هو قرر انه يمشيني ولا ايه... احسن والله حتى ارتاح منه هشوفه فالدراسة والاجازة كمان) حاضر يا دكتور
مشيت معاه وانا مش عارفة مصيري لقيته رايح مكتبه دخلت وراه وانا متوجسة خيفة(شايفين اللغة العربية الفصحى معلمة انا وربنا (
دخل قعد على المكتب وقالي اتفضلي يا دكتورة
)دكتورة!!!!!!! يا سبحان الله من شوية كنت علياء ربنا يستر في اللى جاى)
- بصي يا علياء انتي ليكي مستقبل هايل جدا ... حتى لو مدخلتيش الكارير فالجامعة فاي مصنع او شركة كبيرة تتمني يكون عندها حد بالقدرات والاحتمالات المبشرة دي
- (قدرات واحتمالات مبشرة؟؟ ايموشن قرفان من الكلام) انا مش شايفة فيا حاجة زيادة عن زمايلي يا دكتور بس عموما شكرا على زوقك
- انا مش بجاملك ... انا مش بجامل حد وانتى اكتر حد عارف كده خصوصا اني عنفتك فاكتر من موقف زي النهاردة مثلا... انا بحب المثالية
- بمناسبة النهاردة يا دكتور انا حابة اقول لحضرتك
- متقوليش حاجة الموضوع خلاص انتهى و انا مش بحب ادي المواقف اكتر من حقها... وبعدين انا اكيد مش جايبك هنا علشان اشكر فقدراتك
- اكيد... بس انا برده مافهمتش حضرتك عايز ايه
- المفروض انك كنتي تقضي معظم التدريب مع عم احمد تتدربي على الشغل بتاع العمال علشان تبقي جبتي الموضوع من اوله خالص وتبقي زي ما بيقولوا كده شاربة الشغل... بس انا شايف انه حرام لان انتي وكمان منة من الناس اللي قدراتها زي ما قولت عالية جدا وعلشان كده هتتنقلي تشتغلي مع المهندسين الكيميائيين اللي معانا فالمصنع
- هتنقل لوحدي؟
- لا طبعا انتي ومنة بس لما تبدأ تشتغل
- تمام يا دكتور
واتصل بواحدة فالتليفون قالها باشمهندسة جميلة ياريت تيجيلي المكتب
قفل معاها وفضل يتكلم شوية عن الالتزام والاخلاص فاي حاجة نعملها ... والشغل ده لازم اعتبره رقم واحد فحياتي لان على اد ما اديله هيديني... وان الاخلاق جزء لا يتجزء من الشخصية واني لازم اراعي تصرفاتي علشان محدش يفهمني غلط او اخلي نفسي موضع شبهات وطبعا خلال الكلام ده كله مسمحليش اعقب عليه خالص الكلمة الاولي والاخيرة ليه وكمان الوسطى ما شاء الله كل اما اجى افتح بؤي يشاورلى بايده يوقفنى ويكمل
الحمد لله بشمهندسة جميلة جت... هي بصراحة اسم على مسمى زي القمر انا كبنت تنحت لما شفتها هو بجد في جمال كده ما بالك بقى الولاد بيعملوا ايه لما يشوفوها
حبيت اشوف هو هيبصلها ازاي فضول يعني.... لقيته كأنه مش شايفها اصلا مع انها وشها نور اكتر من ما كان وعنيها بتلمع لما بتبصله زي ما عنين فاتن حمامة بتلمع لما بتشوف صالح سليم فالباب المفتوح ...
قالها
- زي ما عرفتك امبارح يا بشمهندسة دي علياء اللي هتدرب معاكم... ياريت تاخديها توريها المكتب اللي هتشتغل فيه وتعلميها الشغل
- انت تؤمر يا محمد
- وابتسمتله ابتسامة عريضة اوي كده (سبحان الله مع انها امورة وسنانها كأنها بتعمل اعلان معجون سنان بس بردو محسيتهاش ... ضحكتي احلى)
مشيت معاها لغاية ما وصلنا المكتب
لقيت 5 مكاتب جمب بعض ليهم باب ازاز من برة مكتب قاعدة عليه بشمهندشة عسولة كده اول ما شفتها حبيتها علطول هي خمرية وقصيرة ورفيعة خالص وتحس وشها اخد وضعية الابتسام علطول,
ومكتب لبشمهندسة فرجينيا جميلة الجميلات(جميلة)
ومكتب تاني لبشمهندس خالد (توم كروز المصنع ولا توم كروز ايه قولوا براد بيت واحد تقيل كده فنفسه وشايف نفسه اوي بس بصراحة معاه حق الواد يستاهل مووووووووز)
وشاورتلي على المكتب اللي تحت التكييف وقالتلي ده هيبقى ليكي انتي وصاحبتك اسمها ايه منى ولا منة مش مهم,
والمكتب الاخير ده بتاع بشمهندس يحيي بس ده هتلاقيه غالبا فى الكانتين
وفضلت بقى ست جميلة تعلمني الشغل وهي مبسوطة اوي مش عارفة ليه ,
وفضلت تسألني عن دكتور زفت رخامة وهي فاكرة ان هي اللي بتوقعني فالكلام وانا اللي عمالة اجرجرها وهي بتدلق زي الجردل, المهم طلع دكتور رخامة كان دفعتها وكيوت وطلع صغير عنده 28 سنة بس مش عارفة لحق يعمل ماجستير ودكتوراه امتى اكيد علشان سافر عقبالنا يارب, وطلع كمان كان خاطب البنت اللي كانت التانية فدفعته وكان قصة حبهم حديث المدينة كلها مش الجامعة بس, وهو سافر اول ما اتخرج علطول لانه كان شغال مع دكتور اجنبي اصلا فى مشروع تخرجه , وبعد ما سافر بكام شهر ظبطلها شغل هناك معاه وكان هينزل اجازة يتجوزوا وياخدها ويسافر وبشمهندسة جميلة متعرفش حصل ايه بعد كده, بس انا عارفة انه مش متجوز , هموت بقى واعرف ايه اللي حصل لانها كمان قالتلي انه كان كيوت وبيموت فالهزار والرحلات , شكله اتصدم يا عيني
لما قلت لبشمهندسة جميلة انه مش متجوز فرحت اوي الظاهر كده انها كانت بتحبه (بتحبي فيه ايه يا منيلة)
فنص الكلام واحنا بنضحك ونقهقه لقينالكم عم براد بيت بيزعق ويقول مش هينفع الشغل كده يا بشمهندس لو حابين تحكوا اتفضلوا روحوا حتة تانية,( الهي تتشك فبطنك يا بعيد هي ناقصاك انت كمان رخامة سايبلى حد من ريحته هنا)
.
.
.
إلى اللقاء في الحلقة الجاية
ماتسوش الفوت والكومنت
