الراجل اللى ماسك زرار الكهربا ده
بطل لعب يا عم مابنلعبش شد الكوبس احنا
مش كل شوية تقطع النور
فاجاة بفتح عنيا لقيت الرؤية منغنشة
- بقي ينفع كده يا علياء تخضى جوزك يوم كتب كتابكم؟
- انتى كويسة ياحبيبتى؟
- اه يابنى ماتخافش كويسة هيا بس تلاقيها علشان ماكلتش حاجة من الصبح ماتتخضش ده دلع بنات يعوض عليك ربنا بقي اتدبست , اما اقوم اجيبلكم العشا
- (شوفوا يا اخواتى الست امى دى وربنا لولا ماقدارة انطق ماكنتش سكتلها ابدا يالا المسامح كريم)
- عليا ردى عليا
- هو ايه اللى حصل؟
- مش عارف بصراحة اقولك ايه ؟ كل ده علشان بوست راسك؟
- ها؟ هو انت بجد....
- هههههههههههه فكرتى نفسك بتحلمى ولا ايه؟ تحبي اعيدها ؟ على فكرة دى سنة عن الرسول صلى الله عليه وسلم
- عليه الصلاة والسلام
- طيب حيث كده بقي نعيد السنة واهو كله بثوابه
- محمد!
- ههههههههههه خلاص خلاص انا اصلا حرمت اجى جمبك
وماما دخلت بالاكل وقالت الاكل اهو هسيبكم بقي براحتكم
- ماما خليكى
- لا اتعشى انتى وجوزك ياحبيبتي وانا هشوف بابا وشوية وجاية
(ست الحبايب يا حنانة انتى واضح ان الارايل بقت تجيب الفضائيات )
- افتحى بؤك يالا
- انت هتعمل ايه؟
- انتى هتفضلى خايفة منى كتير؟ يابنتى وربنا انا جوزك تحبي تشوفي القسيمة؟
- لا بس انا هاكل لوحدى
- بقي كده؟ مش عايزانى اخد ثواب؟
فضلت ساكتة (اقوله ايه ده؟ الراجل اخلاقه باظت خالص بعد ماكان دكتور محترم ملو هدومه)
- طيب خلاص انا همشي دلوقتى
- تروح فين؟
- اروح بيتنا
- مش هتتعشي؟
- لا ماليش نفس
- لا طبعا ماينفعش
- عادى يعنى انا اصلا مابحبش اكل لوحدى فغالبا بفوت العشا
- طب مانت مش لوحدك
- انتى شايفة كده؟
- اه مانا معاك اهو
- يعنى عايزانى اقعد؟
- يعنى اللى يريحك
- لا انا هعمل اللى يريحك انتى
- طيب اقعد
- ماشي بس بشرط انا اللى اكلك بايدى
- خلاص امشي
- لا بقي هقعد هو لعب عيال؟
- اه انا اصلا طفلة عندك اعتراض؟
- لا طبعا انتى طفلتى وحبيبتي ومراتى وكل حاجة
- احم
- كلى يالا افتحى
فتحت بؤى وقعد ياكلنى وانا في نص هدومى
- على فكرة انت مش بتاكل
- اعمل ايه اصلى يتيم وماليش اللى يأكلنى
- هو انت يتيم خالص؟
- ههههههههههه ازاى خالص ؟
- يعنى باباك ومامتك الاتنين؟
- ايوة
- اسفة
- ههههههههههه على ايه؟ اوعى تكونى انتى اللى عملتى الحادثة بيهم
- اكيد لا يعنى
- مانا عارف المهم بقي انى يتيم ومش لاقي حد ياكلنى وغلبان وجعان وماكلتش من الصبح
(شكله عايزنى اديله الاكل في بؤه ولا ايه؟ طب اعمل ايه؟)
- احم طب كل ما الاكل اهو
- طب ناولينى حتة كده
- اهو ومسكت بايدى صباع كفتة وبديهوله لقيته قرب وشه وكلها ببؤه
- لا بقي مش لاعبة كل انت
- خلاص مش هاكل
- لا كل علشان خاطرى
- طب هاتى حتة كمان
واكلته في بؤه وانا بدعى ماما ماتدخلش علينا لاتفضح
بس صعب عليا خالص
طلع يتيم يا حرااام
اوعوا تفكروا غلط ده يتيم يعنى ثواب
- علياء
- نعم
- انا عايزة اسالك سؤال بس بصراحة خايف من الاجابة
- اتفضل اسال
- هو انتى لسه فيه اى مشاعر من ناحيتك لهشام؟
- بصراحة اه
لقيت وشه اتغير وبص في الارض
- فيه مشاعر كراهية واحتقار
(ايوة مانا لازم اطلع عليه القديم والجديد ايشي جميلة وايشي البت الممرقعة )
- بجد؟ ولا علشان خايفة تزعلينى؟
- لا انا مابحبش الكدب ولا المجاملة
- طيب فيه اى مشاعر من ناحيتك تجاهى؟
- احم هو الاول كان فيه مشاعر استرخام
- احم احم واضح انك مابتحبيش الكدب فعلا ولا المجاملة طيب ودلوقتى؟
- دلوقتى مابقتش استرخمك زى زمان
- ههههههههههه بقيتى تسترخمينى اكتر؟
- لا قصدى الاسترخام راح
- طيب مافيش مشاعر من نوع تانى؟
(يييييييييه اقوله ايه ده؟)
- طب خلاص انا حابب انك لما تقوليها تكونى حساها بجد
(يوووووووووووه هو انت فاكر الموضوع سهل يعنى ؟ اوفت اوووووووفت )
- طيب هستأذن انا بقي
- هتمشي خلاص؟
- اه الساعة بقت 11 ماينفعش اتاخر اكتر من كده
- يااااه 11؟ الساعة بتجرى
- اعمل ايه ربنا يسامحهم الناس اللى اغمى عليهم وضيعوا عليا الوقت وسيبوا اعصابي , انا لو قطعت الخلف يبقي انتى السبب
(شايفين قلة ادبه؟ الراجل اتهبل بس معذور برده يتيم فماحدش رباه, بقولكم ايه انا اشتمه براحتى لكن ماحدش يشتمه غيري ده جوزى حبيبي لموا نفسكم)
- هتسرحى منى كده كتير؟ده انا حتى ماشي
- لا معاك خلى بالك من نفسك , لا اله الا الله
- محمد رسول الله
وهو ماشي سمعت ماما بره عمالة تقوله اقعد وبات هنا الوقت اتاخر
يبات فين؟ يا خرااااااااشى ! اكيد عزومة مراكبية
ومالها عمالة تتقل في العزومة كده
وسمعت الباب اتقفل ولقيت ماما جت عليا
- يالهوى عليكى يا علياء بقي حد يغمى عليه يوم كتب كتابه؟
ولقيتها نزلت ضححححححححك
بس محمد جوزك ده محتاج كورس تقوية اعصاب عاللى عمله
خلى بالك من نفسك شوية الراجل مش حمل صدمات
- يا سلام وهو يعنى كان بايدى ؟ بقولك ايه يا ماما ساعدينى اغير كده احسن مش قادرة
- الحمد لله ان الفستان مش بجيبونة كان كل شئ انفضحن وبانن
وماما فعلا ساعدتنى وغسلت وشي وصليت ركعتين لله ونمت
والحمد لله نمت كويس من غير كوابيس هااااااااااااح
وصحيت الصبح لقيت الموبايل عليه كذا رسالة
الاولى من رقم غريب مكتوب فيها تصبحى على خير يا احلى زوجة في العالم كله (اكيد ده محمد بقي ماهو هو الوحيد اللى انا مراته) غريبة جاب رقمى منين؟
والتانية من منة اول ماتصحى رنيلي عايزة اعرف كل حاجة بالتفاصيل المملة
والتالتة من محمد برده صباح الخير على عيونك الحلوين لما تصحى رنيلي
والرابعة صباحية مباركة يا عروستى اتاخرتى عليا اوى كل ده نوم؟
والخامسة والاخيرة برده من محمد وحشتينى بقي اول ماتصحى رنيلي او اصحى بقي كفاية كده نوم
طب ارنله ولا اعمل ايه؟
انا استعبط واعمل انى ماعرفتش الرقم
لا بس هيقول عليا غبية ماهو بيقوللى عروستى وحاجات كده
بس اتحرج ارنله
اهو بيتصل اهو سبحان الله عرف منين انى صحيت؟
اعوذ بالله من الشيطان الرجيم شكله مخاوى عفاريت
كحححححح كح (اييييييه بسلك زورى مش لسه صاحية بقي وكده الله!)
- السلام عليكم
- وعليكم السلام
- صحيتك؟
- لا كنت صاحية
- اومال مارنتيش ليه؟
- لسه صاحية يادوب كنت بقرا الرسايل
- طيب افطرى ورنيلي
- ماشي
- هترنيلي؟
- ان شاء الله
- ماشي اوعى تنسي بقي
- ان شاء الله
- سلام يا حبيبتي
- مع السلامة
(كل شوية حبيبتي حبيبتي لا وقبل كتب الكتاب كان عامل نفسه محترم وخجول)
وروحت فطرت وبعدها رنتله كنسل واتصل
(احب انا الراجل الجنتل )
- سلام عليكم
- وعليكم السلام فطرتى؟
- اها وانت؟
- الحمد لله فطرت من بدرى , ماما قالتلك انى معزوم انهاردة عندكم عالغدا؟
- لا ماقالتش انا غالبا بعرف اخبار بيتنا منك
- اكيد نست تقولك
- اكيد
- طيب مش عايزة حاجة اجيبهالك وانا جاى؟
- لا عايزة سلامتك
- بتكلم بجد مش عزومة
- ههههههههههه طب حيث كده بقي هات لبشة قصب وانت جاى
- بجد؟
- هههههههههه لا اكيد بهزر
- ماشي انا هنزل دلوقتى اصلى الجمعة واطلع البس واجيلكم
- ماشي
- مع السلامة
- سلااام
وقفلت بقي معاه وقمت صليت الضهر وكلمت منة اللى ماصدقت كانها راديو واتفتح وهاتك يا اسئلة وانا اجاوب طبعا
- هههههههههههههههههههه حرام عليكى اغمى عليكى؟ دى ليلة تاريخية ده هيفضل يذلك بيها طوووووووول العمر
- تصدقي انا غلطانة انى بحكيلك ومحمد اصلا حبيبي ومش هيذلنى ولا حاجة
- الله الله ماحنا بنعرف نقول حبيبي وكلام حلو اهو امال قدامه بتبقي اكلة سد الحنك ليه
- ايوة مانتى متعودة على قللة الادب
- ههههههههههههه يابنتى وربنا جوزك حلال حلاااااااال
- اعمل ايه كل ما اجى افتح بؤى وانطق ماقدرش
- طيب حاولى الراجل حرام مفكرك مابتحبيهوش
- حاضر هحاول ربنا ييسر ان شاء الله
- والله محسسانى انك داخلة الحرب
- بقولك ايه؟ روحى غلسى على مصطفي وانا هروح اساعد ماما في الاكل
- ههههههههههههه مصطفي بيصلى الجمعة بس ماشي روحى وارفعى راسنا في الطبيخ ليقول جوزناه مقلب
- انا مقلب؟ اهو انتى اللى مقلب واقفلى بقي سلام
- سلامووووووووز
قال انا مقلب قال هو يلاقي فين في حلاوتى ولا دمى الخفيف ده لو لف الكون مايلاقيش منى اتنين
دانا اروح وازودله كمان الشطة في الاكل علشان يحرم يعمل اللى عمله امبارح
ونشوف بقي حصل ايه في المقابلة البارت اللى جاي اللي هنزله حالا برضوا
