على اخر النهار لقيت تليفونى بيرن
اكيد البت منة
- غريبة ده رقم غريب
- السلام عليكم
- وعليكم السلام ازيك يا لولو عاملة ايه؟
- لولو!! مين معايا؟
- انا باشمهندسة جميلة كنت زميلتك في المصنع
(جميلة؟ غريبة جابت رقمى منين وعايزة ايه دى كمان)
- اهاااااا ازي حضرتك يا باشمهندسة
- انا كويسة يا حبيبتي ازيك انتى يا لولو
(لولو تانى خير اللهم اجعله خير )
- تمام الحمد لله
- امال انتى اختفيتى فاجاة من المصنع ومابقاش حد يشوفك يعنى دانا من زمان كنت خدت رقمك من صاحبتك وعايزة اكلم
(ايوة يعنى وايه اللى منعك؟)
- فيكى الخير يا باشمهندسة
- لا ازاى يا حبيبتي داحنا كنا زمايل برده
(بطلى رغى يا ولية وادخلى في المطلوب)
- احم هو الباشمهندس محمد لسه بيدرسلكم في الكلية؟
- دكتور محمد؟ لا مش بيدرسلى الترم ده
- ممممممم يعنى مش بتشوفيه خالص؟
- اكيد يعنى ساعات بشوفه
- بجد؟ طب هو عامل ايه اصله مابقاش بيجى المصنع خالص ولما سألت قالوا اخد اجازة
- معرفش والله
- غريبة اصله كان حتى وهو في الكلية بينظم وقته ويجى برده المصنع عالاقل يومين في الاسبوع
- اه الله اعلم بقي
- طيب لو شوفتيه ابقي سلميلي عليه
(اجيبها من شعرها الولية دى؟ اقولها اننا اتخطبنا؟ لا بس احنا لسه ماتخطبناش يوووووووه اعمل فيها ايه بس هو خلاص الحياء مات للدرجة دى ؟ )
- روحتى فين يا لولو؟
- ماروحتش في حتة معاكى اهو
- اصل بصي هقولك سر بس علشان انتى حبيبتي وبثق فيكى اصل احنا يعنى انا ومحمد
(محمد حاف كده؟ يا حلاوة يا حلااااااوة )
- يعنى تقدرى تقولى اننا معجبين ببعض وكده
- والله؟
- اه بس ده سر وهو بقي علشان بيخاف من ربنا فمارضاش ناخد ارقام بعض
- هو اللى قالك كده؟
- لا اكيد لا يعنى بس انا فهمت من كلامه كده
- اهااااا فهمتى من كلامه
- طب معلش يا لولو يا حبيبتي ماما بتنده هقفل دلوقتى مش عايزة حاجة؟
- ها؟ لا شكرا
- ماشي يا لولو سلام
- مع السلامة
حاسة ان حد ادانى الم على وشي
انا اكيد بحلم حد يفوقنى
انا قولت لبابا يقوله اه
اكيد لو قولتله يقوله لا تانى هيزعقلى
بس محمد ؟ ازاى يعمل كده ؟
بس ما هشام قبله برده كنت فاكراه كويس
لا بس محمد مختلف ده بيخاف من ربنا
هو انا بحبه؟
اكيد لا يعنى مالحقتش
- يا علياء مالك يابنتى سرحانة في ايه تليفونك نازل رن ما تردى
- ها؟
- هههههههههههه انتى لحقتى؟ اللى اخد عقلك دى منة ردى
دخلت الاوضة وفتحت
- ايه يا هانم انتى لحقتى هتنشغلى عنى من دلوقتى؟
وانا بقي اتفتحت في العياط
- علياء مالك فيكى ايه؟
- اهئ اهئئئئئئئئئئئ
- علياء بالله عليكى ماتخضينى انتى كويسة؟ وعيلتك كويسة؟
- انا عايزة اسيبه يا منة مش عايزااااااه عااااااااااااااا
- تسيبي مين؟
- محمدد مش عايزاه بكرهه
- يابنتى هو انتى لحقتى اصلا؟ فهمينى ايه اللى حصل؟ مانا سايباكى الصبح في الكلية
- بيحبها يا منة بيحبها
- هيا مين دى؟
- جميلة اهئئئئئئئئئئئئئئئئئ
- جميلة مين؟
- مننننننننة اقفلى مش ناقصة
- طب اهدى بس هو لو بيحب تانى ايه اللى يخليه يخطبك انتى تلاقي اللى اسمها جميلة دى بتوقع بينكم
- هيا ماتعرفش اصلا واكيد يعنى ماجبتش الكلام من دماغها
- طب هيا مين بالظبط وقالتلك ايه؟
- المهندسة جميلة بتاعة المصنع وقالت انهم معجبين ببعض, انا كل مرة يقع نصيبى في حد كده عااااااااااا
- يابنتى اهدى بقي بصي انا شايفة انك تستفهمى منه الاول , ان بعض الظن اثم
- بقولك قالتلى انهم معجبين ببعض
- ماهو بالعقل كده ماحدش ضربه على ايده علشان يتقدملك واهى كانت متلقحة قدامه في المصنع ماخطبهاش ليه؟
- معرفش معرفش ومش عايزة اعرف انا اصلا بكرهه ومش عايزاه
- بطلى هبل يا علياء واقعدى معاه وافهمي منه حتى قولى لباباكى يطلب مقابلة كمان قبل الرد
- ما خلااااااص قولتله يوافق وقاللى هيخليه يجى الخميس
- ممممممم طب مش انتى صليتى استخارة يبقي خلاص سيبيها على الله
- ونعم بالله اهئ اهئ
- طيب انا هقفل دلوقتى وانتى قومى صلى ركعتين كده واسستهدى بالله
- ونعم بالله ماشي سلام
- في رعاية الله يا حبيبتي
- في رعاية الله
قمت اتوضيت وصليت ركعتين والغريبة انى نمتش على سجادة الصلاة ماحستش بنفسي وصحيت الفجر صليت وقمت نمت عالسرير
صحيت تانى يوم ومصطفي ورحت الكلية حضرت السيكشن وخلصنا وطبعا ماركزتش في اى حاجة
لقيت مصطفي جه وبيقول لمنة
- لسه عندكم حاجة؟
- اه محاضرة بس كمان ساعة
- طيب تعالوا نقعد في الكافيتيريا
- انا: لا انا هروح المدرج عما الدكتور يجى
- منة: يابنتى لسه بدرى يالا هنفطر ونرجع
وزقتنى ورحنا الكافيتريا وقعدت معاهم سرحانة وكل شوية منة تكلمنى
وفاجأة سمعت صوته ببص لقيته جاى بيسلم على مصطفي
بصتله بكل حقد وغل وكره في قلبي ولفيت وشي سمعت مصطفي بيعزمه يفطر معانا وهو رفض ومشي
مصطفي:طب استنى عايزك
وراح وراه
- بقي بالذمة ينفع اللى عملتيه ده؟ احرجتى الراجل
- احسن مش طايقة اشوف وشه
- عيب يابنتى ده خلاص هيبقي خطيبك
- اهئ اهئ اعمل ايه يعنى عايزانى اعرف انهم كانوا معجبين ببعض واسكت؟
- لا طبعا انا قولتلك اساليه
- لما يبقي يجى الخميس بقي ان شاء الله
- ان شاء الله طب كلى بقي انتى ماكلتيش
- ماليش نفس قومى نروح المدرج
- حاضر حاضر
ومصطفي خلص وجه يوصلنا وصلونى الاول
بعدها بيجى نص ساعة لقيت منة بتتصل
- ايه يابنتى انتى لحقتى؟
- علياء انتى مش قولتى باباكى كلم د\محمد
- اه هو قال هيكلمه
- ماكلموش يابنتى ولما شافك انهاردة وهببتى اللى هببتيه فكرك بترفضيه يعنى وقرر هيبعد عنك خالص وزعلان جدا
- مين اللى قالك؟
- مصطفي لما راح وراه حكاله
- لا اله الا الله
- هتعملى ايه؟
- هعمل ايه في ايه؟
- هتصلحى الموقف ازاى ؟ على فكرة مصطفي زعلان منك هو كمان علشان احرجتيه قدام صاحبه وقاللى لو رافضة كانت حتى تقوللى وانا اوصله الرفض بطريقة كويسة
- يابنتى مانتى عارفة اللى فيها انا فكرت بابا قاله
- واهو طلع ماقالوش شوفي بقي هتعملى ايه؟
- معرفش معرفش
- علياء انا هسالك سؤال وتجاوبينى بصراحة انتى بتحبيه ولا لا؟
- مش عارفة يا منة انا كنت فاكرة انى بكرهه بس لما جميلة كلمتنى كنت عايزة اقتلها وكان نفسي اقولها محمد ده بتاعى انا وبس تعرفي ساعة هشام خدت القرار انى اسيبه ويمكن اه زعلت واتاثرت بس كنت على اتم الاستعداد انى اسيبه لكن محمد مش عارفة حاسة انى نفسي يطلع مظلوم ونكمل ونتجوز ونعيش في تبات ونبات
- هييييييح وتقوليلي مش عارفة , انه الحب يا اختاه
- تفتكرى؟
- افتكر ايه انا متأكدة ياختى
- طب هنعمل ايه؟
- هنعمل؟؟ حلوة نون الجمع دى انتى تغلطى لوحدك ونصلح سوى
- يخص عليكى يا مونى هو مش انا وانتى واحد برده
- ههههههههههه بتثبتينى يعنى
- حاجة زى كده اتصرفي بقي
- يا حلاااااوة كمان بقت اتصرف حاضر هتصرف, بصي انتى تخلى باباكى يرد عليه وهو لما يجى لو سألك اعتذرى وقوليله
- لا طبعا علشان يقوللى كنتى غيرانة
- مانتى غيرانة فعلا
- يووووووه مش بهزر يا منة
- طب خلاص ابقي قولى كنتى تعبانة ولا اى حجة
- ماشي هروح دلوقتى اكلم بابا
- هههههههه ماشي يا ست المستعجلة سلاام
- سلام
ورحت لبابا لقيته في الانتريه
- بابااااا
- يا نعم عاملة دوشة ليه؟
- وحشتنى قولت اجى اسال عليك
- هههههه قولى يا بكاشة عايزة ايه من الاخر؟
- احم , مش بقول وحشتنى الله هو انت مش بابا ؟ يعنى توحشنى وكده
- ماشي هههههههههههه
فضلنا ساكتين شوية
- احم بالحق هو انت كلمت د\محمد؟
- تصدقي فكرتينى ناولينى التليفون
(اعمل فيك ايه بس يا بابا ! )
- اتفضل
- بيقول مغلق
- مغلق؟ اه تلاقيها شبكة ولا فصل شحن
- اه ممكن ,طيب انا هقوم احضر السفرة مع ماما
- ماشي يا حبيبتى
خلصنا الغدا وكلمت منة
- السلام عليكم
- منننننننة فونه مقفول يا منة
- مين ده؟؟
- يخربيت رخامتك محمد يابنتى ركزى
- طب مايمكن فصل شحن ولا شبكة
- طب خلى مصطفي يكلمه كده
- يقوله ايه؟
- لا يسال عادى يشوف اصلا هيرن ولا لا ممكن يكون عامل لبابا بلوك
- لا ماعتقدش مش اخلاقه ابدا
- المهم خليه يكلمه
- حااااضر
- وردى عليا بسرعة
- حاااااااضر
وبعد حبة منى اتصلت
- هو ده اللى بسرعة يا منة؟
- والله بسرعة اهو
- طب انطقي
- مقفول برده
- يا الله اعمل ايه؟
- خلاص روحى اعتذريله بكرة في الكلية
- يييييه لسه هستنى لبكرة
- هههههههههه معلش ياختى الحب ولع في الدرة
- ياباااى عليكى غلسة اقفلي سلام
- استنى بس
- لا سلام
- هههههههههه ماشي سلام
والحمد لله جه تانى يوم باعجوبة ونزلنا بدرى ولقيته ماشي في الطرقة جريت عليه
- لو سمحت يا دكتور ممكن ثانية
- اسف عندى محاضرة عن اذنك
ورجعت لمنة اجر اذيال الخيبة
- عاجبك كده يا منة؟
- ايه قالك ايه؟
- قاللى عنده محاضرة ومشي ولا عبرنى
- معلش هو زعلان برده
- يا سلام!! ماهو لو سمعنى كنت هعتذرله
- ههههههههه طيب لما يخلص نجيله تانى
- ييييييه هستنى كمان ساعتين ؟
- ههههههههههههه اه علشان تبقي تفكرى تانى قبل ماتزعليه
- والله انتى فايقة ورايقة
- هههههههههه طب بينا عالكافيتيريا
- لا تعالى نقعد في المدرج ده ( وشاورت على مدرج قدام مكتبه) علشان لو خلص بدرى نشوفه
وعدت الساعتين وماجاش
- ييووووووه يا منة راح فين؟ ما ميعاد المحاضرة خلص اهو
- عادى يابنتى يمكن حد مش فاهم حاجة فبيشرحله
- اهو جه اهووو قومى بسرعة هيدخل المكتب
وجريت عالمكتب ولسه جاية ادخل خبطت في واحدة
- اسفة يا
باشمهندسة جميلة؟؟؟!!!
يا ترى جميلة بتعمل ايه في الكلية عند محمد؟
ده اللى هنعرفه حالا عشان في جزء تاني هنزله دلوقتي
ماتنسوش الفوت وكومنتاتكوا الجميله
