انا مش مجنونه

الحلقه الرابعه عشر

حاولت متأخرش وانزله بسرعه + شكرا لكل اللي كتبولي كومنتات فرحتني جدا ماكنتش متخيله انها هتعجبكوا كده
يلا نبدأ البارت وماتنسوش الفوت والكومنتات بتاعتكوا الجميله
نبدأ الحلقه
⬇️⬇️⬇️⬇️⬇️⬇️⬇️⬇️⬇️⬇️⬇️⬇️⬇️⬇️⬇️⬇️
.
.
.
.
روحت البيت اتغديت ونمت شوية صحيت بالليل
لقيت بابا بيندهلى تعالى يا لولو عايزك في موضوع
- ياعيون لولو
- هههههههههه يا بكاشة انا برده
- اه طبعا يا حاج عيب عليك دانت اللى في القلب يا معلم
- معلم؟ بالذمة دى واحدة دخلت كلية
- ايوة بقي نفس الاسطوانة بتاعة ماما (ادخل في الموضوع بقي ادخل عليا بالتقيييييل)
- انتى تعرفي حد اسمه د\ محمد رفعت؟
- ايوة يا بابا ده دكتور عندى في الكلية ليه خير؟(استعباط بقي)
- مافيش اصله كلمنى
- (ايوة يا بابا وبعدين انا كده هتشل) ايوة وعايز ايه؟
- ابدا يابنتى كلمنى على مصنع هو مشرف فيه او حاجة زى كده مش فاكر بالظبط قاللى ايه وكان بيطلب منى يعنى انك تروحى تتدربي هناك
- ها؟؟
- مالك يابنتى تنحتى كده ليه؟
- هو خد منى رقمك عشان كده؟
- اه امال فاكراه عايز ايه؟
- ها؟ لا ابدا , كمل حضرتك قولتله ايه؟
- قولتله هفكر وارد عليه
- وراي حضرتك ايه؟
- بصراحة انا قبل ما اتكلم معاه اكيد كنت هرفض بس كلامه اقنعنى وقال ان ده خبرة ليكى وانه كمان هيعتبر تدريب صيفي في مجالك وممكن كمان يساعدك في مشروع التخرج وهيرفع من مستواكى في الكيميا وانا طول عمرى اسمعك تشتكى منها وكمان اللى طمنى انه قال انه هياخد باله منك وان منة زميلتك كمان هتروح المصنع , بس انتى عارفة انى عمرى ما هغصبك على حاجة انتى ايه رايك يا بنتى؟
- بصراحة يا بابا هيا منة كانت اقترحت عليا الموضوع بس قولتلها ان حضرتك اكيد هترفض عشان المصنع بره الب وكده حتى لو تدريب عشان عارفة حضرتك كويس بس فعلا كنت حابة اروح معاها
- خلاص يابنتى بس برده صلى استخارة وردى عليا احنا مش مستعجلين هو قال التدريب هيبتدى عالاحد اللى جاى ان شاء الله
- حاضر يا بابتى يا جميل انت
- هههههههههههه يابنتى بطلى بكش بقي
- بكش ايه بس دى محبة يا عم
- يا عم؟ طب روحى الله يسهلك
- ههههههههههه ليه بشحت انا
- يابنتى روحى شوفي مامتك بتعمل ايه وساعديها بلاش غلباوية
- حاضر حاااضر
كملت اليوم عادى بس قبل ما انام صليت استخارة وصحيت الصبح عادى مش حاسة بحاجة فاتكلت على الله وقولت اكلم البت منة افرحها
اتصلت بمنة
- صباح الخير يا لولو
- اسمها السلام عليكم
- السلام عليكم
- هههههههههه وعليكم السلام عندى ليكى خبر بمليون جنيه
- خير؟
- هاجى معاكى التدريب في المصنع
- بجد؟
- اه والله
- يا حبيبي يا صاصا
- نعم نعم ياختى؟ وايه اللى دخل صاصا اقصد مصطفي في الموضوع
- ماهو اللى قاللى هيتصرف ويقنع باباكى
- ازاى ده رخامة هو اللى كلم بابا
- يابت لمى نفسك ده د\محمد ده عسلية كفاية انه صاحب صاصتى
- صاصتك وعسلية؟ طب وربنا اقول لمصطفي انك بتعاكسي صاحبه
- هههههههههه مش هيصدقك اطلعى منها
- دلوقتى اطلع منها ولما تزعلوا مع بعض تجيلي اصالحكم ندلة بصحيح
- ههههههههه خلاص بقي يا لولو المهم انك هتكونى معايا استنى صاصا عالويت
- طب انا... حطتنى عالويت التييييت
- ايوة يا لولو قاللى ان هو قاله هيتصرف فهو اللى حلها
- مين قالك ايه عن مين؟
- مالك يابنتى ماتفتحى مخك ده شوية , اصلا د\ محمد اللى كان قايل لمصطفي عالتدريب ليا وليكى عشان احنا الاوائل وكده فكان بيسال مصطفي هنعمل ايه قاله ان باباكى مش موافق وانا مش هروح من غيرك ف د\ محمد اللى انتى مش طايقاه قال لمصطفي هيتصرف بس كده ياستى واهو اتصرف
بصراحة انا شايفة انه ذوق جدا
- تانى مرة تعاكسيه قدامى ومصطفي الغلبان نايم على ودانه الا صحيح هو مصطفي اصلا موافق انك تروحى المصنع ازاى ؟
- هههههههههه ماهو هيجى معانا يابنتى د\محمد هيشغله معاه , صح كنت عايزة اقولك خبر حلو
- خبر حلو ايه خيييير
- انا هكتب كتابى الخميس اللى جاى لا اللى بعده
- نعم؟؟ والله؟ وسعادتك كنتى مستنية اتصل عشان تقوليلي الكلام ده؟
- لا والله يابنتى هو قال لبابا بس بابا كان رافض تماما فكرة كتب الكتاب الا مع الفرح بس صاصا قعد يقنع فيه لحد امبارح متاخر لما بابا وافق واخيييييييرا وطبعا الوقت كان متاخر فمعرفتش اكلمك وصحيت على مكالمتك الصبح
- ممممممم ماشي يا ستى عفونا عنكى ولولولولولىىىى الف مليون مبروك يا حبي
- الله يبارك فيكى وعقبالك يارب
- هههههههههه لا ياختى انا حرمت وقاعدة على قلبك ومستربعة
- ههههههههههههه بكرة يجيلك اللى يوقعك على بوزك وتغيري رايك يا اوختى
- بوزك واوختى؟؟ بيئة بيييييئة اتخدع فيكى مصطفي ياعينى
- هههههههههههههه عاجباه ياختى
- هههههههههه ماشي ياختى ربنا يهنى سعيد بسعيدة او منة بمصطفي المهم هتعملى ايه في القاعة والفستان وكده؟
- هنعمله في المسجد بس بالنوسبة للفستان بقي عايزاكى تفضيلي نفسك عشان ننزل
- بالنوسبة؟ ما علينا قشطة هتنزلى امتى ؟
- انهاردة على 5 كده فاضية؟
- لو مليانة افضالك يا وزتى
- بغض النظر عن الالش بس ماشي هعدى عليكى
- واقعدى بقي قضيها ماسكات وكده , صح والتدريب يابت المفروض تقعدى في البيت عشان وشك مايبقاش مرهق
- اها مانا اتفقت مع مصطفي على كده واستاذن د\محمد بس قاله انك انتى لازم تروحى من الاول
- يييييييييييه هروح لوحدى؟
- معلش يا لولو والله غصبن عنى انا قولت لمصطفي انه يقوله انا وانتى بس د\محمد قال ان لازم حد يشيل الشغل من المتدربين لان مافيش غيرى انا وانتى
- كمان هشيل شغلك؟ ده ايه الصحوبية اللى جاية عليا بخسارة دى
- بقي كده يا لولو؟
- ههههههههه لا بهزر ياختى مابتهزرش يا رمضان المهم هقفل بقي ناو عشان ماما بتنده ورنيلي لما تيجى تلبسي مش عايزة حاجة يا عرورة؟
- عرورة؟ لا ياختى شكرا سلام
- سلااموز
ورحت ساعدت ماما واتغديت ولما منة رنت لبست ونزلنا وعدى الاسبوع في مشاوير لحاجات منة من فستان وكوافير وو
وجه يوم الاحد الصبح ماما بتصحينى
- يا عليا قومى بقي الساعة بقت 7
- 7؟ يالهوى يا ماما ده المصنع 8 انتى لسه جاية تصحينى؟
- يابنتى وربنا غلبت فيكى والمنبه يرن ومافيش فايدة
قمت جررررى خدت دش عالسريع ولبست ونزلت ركبت تاكسي اللى خد منى 30 جنيه عشان المصنع بره البلد ماهو انا اللى استاهل ضرب الجذمة حد قاللى افوت الباص بتاع المصنع مهمومة ومحتارة
واخيرا وصلت للمصنع
للاسف عما وصلت كانت الساعة بقت 8 ونص
لقيت عالبوابة راجل عجوز
- انتى رايحة فين يابنتى
- انا جاية اتدرب هنا
- طب الساعة بقت 8 ونص اجرى قبل ما التفتيش يعدى انا المفروض اخد منك البطاقة اشوفها بس اجرى انتى عشان تلحقي
- ربنا يخليك يا عمو
- محسوبك عم عبده
- ربنا يخليك يا عم عبده
وجرييت لجوه يا مصيبتى كل ده مصنع
ودخلت من الباب لقيت ناس جوه روحت سالتهم
- سلام عليكم لو سمحت انا متدربة جديدة المفروض اروح فين؟
- اطلعى الدور التانى فيه مكتب الباشمهندس محمد اساليه
ولسه هقوله شكرا لقيت صوت من ورايا
بلف لقيته د\رخامة
- اتفضلى ورايا وطلعنا الدور التانى لقيته بيقوللى
الساعة كام معاكى؟ وكل ده وهو ماشي ومدينى ضهره
- معاييش ساعة
- بصي في الموبايل
- احم الساعة 9 الا ربع
- وميعاد سعادتك الساعة كام
- الساعة 8 بس اصل
- مافيش بس يا اما تلتزمى يا اما هتتطردى
- اتطرد؟
- ايوة تتطردى ده شغل مافيهوش مجال للدلع انتى هنا زيك زى اى حد شغال ونده لواحد اسمه عم احمد
- عم احمد دى المتدربة الجديدة فهمها شغلها ولو فيه منها اى تقصير بلغنى
- حاضر يا ابنى تعالى ورايا يابنتى
بصوا بقي مانا يا اما هقتله يا اما هقتللللله قال دلع قال
بدات شغل وكان كل شوية رخامة يعدى يسال عم احمد
- ها يا عم احمد عاملة معاك ايه؟ (عاملة دى على اساس ان ماليش اسم)
- لا عاااال ومخها نضيف
- طب بلغنى لو فيه اى حاجة
- ماشي يا ابنى
- لا حول ولا قوة الا بالله اللهم طولك يا روح
- بتقولى حاجة يابنتى؟
- ها؟ لا مابقولش الا هو د\محمد على طول كده؟
- على طول ايه؟
- يعنى على طول مدى الوش الخشب للناس
- ههههههههه محمد؟ ده انا ماشوفتش في طيابته ولا في وشه البشوش
- بشوش؟ لا ماهو واضح
- ماتزعليش منه يا بنتى هو بس في الشغل مابيعرفش ابوه يحب يفصل الشغل عن الهزار
وكملت شغل وعم احمد بصراحة الله يصلحهاله كان بيشرحلى براحة خالص ومش بيتقل عليا في الشغل الظاهر انى صعبت عليه وحبة ولقيته بيقوللى
- يالا يا بنتى
- ايه هو الشغل خلص؟
- هههههههههه لا خلص ايه الساعة لسه 12 ميعاد الراحة يالا عشان تاكليلك لقمة
- مممم طب هو فيه كانتين هنا؟
- ايه؟
- كانتين يعنى حتة اشترى منها اكل او حاجة حلوة او كده لانى نزلت متاخر ومالحقتش اعمل سندوتشات
- لا هو احنا عندنا بس اسماعيل اللى هنا بيعمل شاى بس تعالى انا معايا اكل ماتخافيش
- لا ربنا يكرمك يارب يا عم احمد شكرا انا لما اروح بقي هبقي اكل
- يابنتى انا زى ابوكى انتى محروجة منى ولا ايه تعالى بس وابقي ياستى هاتيلي اكل معاكى بكرة اصلا انا عمتك ام احمد بتعملى اكل بالهبل ولو رجعتلها بحاجة منه تزعقلي شبه العيال

- هههههههههه ربنا يخليهالك يارب

- يااارب يالا بقي الراحة هتخلص ولسه ماكلناش

- ماشي يالا

- وخدنى وقعدنى على ترابيزة وقاللى استنى لما اجيب شاى
- لالا استنى انا بقي هجيب الشاى
- ماشي يابنتى هو هناك اهو وشاورلى عليه وكان زى كشك صغير جوه الاستراحة
- رحت اجيب الشاى وقولتله لو سمحت عايزة اتنين شاى
- ايه ده؟ هو المصنع بقي بيجيب ناس حلوين كده؟
- احترم نفسك يا اسماعيل وانتى روحى وانا هجيبلك الشاى (ده كان رخامة)
- لا شكرا انا هجيب لنفسي

بصلى حتة بصة قمت جارية روحت ناحية عم احمد
- امال الشاى فين يابنتى؟
لسه جاية انطق لقيته بيقوله الشاى اهو يا عم احمد
- تسلم يا هندسة تعبت نفسك
- تعبك راحة يا عم احمد وبيبصلى بصة تخوف خالص (وده ماله ده!)
ومشي (يادى اليعععع صديت نفسي يا راجل)
ولقيت الوواد بتاع كشك الشاى جه قعد معانا وبيقوللى انتى اسمك ايه يا قمر
عملت نفسي هندية وماردتش
ساكت ليه يا جميل ومالك مابتاكليش حلو ليه؟
لسه هفتح بؤى واديه الموشح التمام لقيت عم احمد بيقوله مالكش دعوة بيها يا اسماعيل
وهو انا عملت حاجة يا عم احمد انا بقول نتعرف مش احنا زمايل في مصنع واحد ولا ايه؟
ولقيت رخامة بيقول البريك خلص يالا عالشغل
والحمد لله اترحمت من اسماعيل ده كمان وروحت كملت اليوم عادى ورخامة ماجاش تانى الحمد لله
وخلص الشغل وخدنى عم احمد عشان نروح الباص لقيت رخامة ماشي ناحية عربيته وركب
جريت وقولتله اتفضل حق الشاى وكان في ايدى 5 جنيه
بصلى احتقار وقاللى روحى عشان تلحقي الباص وتيجى بكرة في الميعاد ومشي بالعربية وسابنى
سيبونى علييييييييييه هاكله بسنانى انا باغلي
امووووت واعرف هو ماله ومالى اكنش مرات ابوه وانا مش عارفة مستفاجأة
بصوا اشوفكم بقي الحلقة الجاية بس ادعو بس ماكنش قتلته
شكلها هتبقي اجازة فل قال يطردنى قال ايش حال ان هو اللى مكلم ابويا عشان اجى اتدرب هنا
.
.
.
استنوا استنوا انتوا فاكرين اني هقولكوا سلام ولا ايه
لاء طبعا
اقلب كده هتلاقي حلقه تاني ⬇️
اعملوا فوت وكومنتات علي الحلقتين بقي ده انا مقصرتش ❤