اهو فصلين في يوم واحد اهو عشان الفتره اللي جايه مشغوله جدا بس هحاول مااتأخرش
يلا نبدأ
.
.
.
قفلت مع منة وقعت افكر
بيغير من ايه ؟ وابتسمت امتى اصلا ولمين
ده شكله معقد وهيطلع عقده عليا
بس اتبسطت اوى انه خد الدبلة اللى عجبتنى انا
ونمت بقي وانا عمالة بحلم بيه
(بحلم بيك انا بحلم بيك تيراراراااااا)
وصحيت تانى يوم السبت وورانا كلية
كلمت منة
- السلام عليكم
لقيتها بترد عليا بصوت نايم
- وعليكم السلام
- ايه يا مونى انتى لسه نايمة ولا ايه يا حبى ؟
- اه والله يا لولو دانا نايمة بعد الفجر
- ليه خير باباكى كويس؟
- بقي احسن شوية الحمد لله
- ياحبيبتي شفاه الله وعافاه يارب
- تسلميلي يارب
- يعنى مش هتنزلى الكلية؟
- لا مش قادرة خالص معلش روحى انتى وانا ابقي انقل منك المحاضرة
- ماشي يا حبي روحى كملى نوم سلام
- سلام
يييييييه هروح الكلية لوحدى
افرض قابلته هعمل ايه؟
لا انا هكشر في وشه واعامله وحش علشان يبقي يشك فيا تانى
قال ايه ماضحكش للبياعين
اه خلاص قررت انا هوريه
نزلت من البيت روحت الكلية
ومشيت كنت هخبط في حد لقيته هو
اعتذر ودخل المدرج ولا كانه يعرفنى
طب ومشاعرى واحاسيسى؟
وانقلب السحر على الساااااحر
بقي كده يعنى؟ انت اللى بتطنشنى كمان؟
وبعدين ده ايه اللى جايبه هنا اصلا؟
ايه الغباء ده!! دكتور في الكلية وداخل مدرج
اكيد يعنى عنده محاضرة
شايفين البت عمالة تتمرقع عليه ازاى ؟
ادخل اجيبها من شعرها دلوقتى؟
اه ليه حق يعمل نفسه مايعرفنيش
علشان المزة ماتطيرش من ايده
اصلا اصلا انا احلى منها
دى عاملة شبه عصاية الغلية
لا دى عاملة شبه المقشة
معصعصة وطويلة وناكشة شعرها
طااااخ
ايه ده؟ مين اللى قفل الباب؟
تلاقيه قال لحد يقفله مش عايزنى اتفرج
استغفر الله العظيم يارب
مش بقولكم الراجل ده هيجننى
انا اسمع عن مجنون ليلي
انا بقي هعمل الجزء التانى منه
مجنونة محمد الله يسامحك يا محمد
لا بس هو اكيد عنده انفصام في الشخصية
الصبح بيبقي حد وبالليل حد تانى خالص
يالهوى يا علياء ليطلع بجد
واطلع مرة اتخطبت لراجل عنيه زايغة
وتانى مرة اتخطبت لمجنون
مش بعيد بفقرى ده
بس ماااااشي يا محمد انا بقي هعاملك بمعاملتك
لا معاملته ايه؟ دانا هعاملك اوحش كمان بمراحل
لما تجيلي البيت بس انا هوريك
اوعوا تقولوا انى بوء عالفاضي
طب اعمل ايه يعنى؟
بضعف قدامه وقدام كلامه
لا بس المرة دى غير وهتشوفوا
رحت على محاضرتى وخلصت
وطبعا ماكنتش مركزة خالص بكتب ولا كانى موجودة
بالظبط الة كاتبة , عاجبك كده يا سي محمد؟
شكل الامتياز طار والتعيين طار وكله بسببك
لسه ساعة عالسيكشن ييييييييه حبكت المعيد يغير ميعاده
اما اروح اقعد عالكافيتيريا شوية
لقيت مصطفي جوز منة جاى عليا
- السلام عليكم ازيك يا علياء
- وعليكم السلام الحمد لله ازيك انت؟
- الحمد لله ها ؟ نزلتوا اشتريتوا الشبكة؟
- اه نزلنا امبارح
- طيب وكله تمام؟
- الحمد لله
- ربنا يسعدكم يارب , محمد طيب والله وابن حلال يا علياء خلى بالك منه
- بتوصينى انا؟ وصيه هو عليا
- ههههههههه ليه عمل ايه؟
- لا ابدا مافيش
(هو بيعمل حاجة؟ يا راجل ده ملااااااااك)
- مممممممم طيب براحتك يا ستى
عامة انا عايزك تعتبرينى اخوكى
واى شئ تحتاجيه اطلبيه على طول
او حتى قولى لمنة وهيا تقوللى
- انت اخويا فعلا يا مصطفي ربنا يكرمك يارب وافرح بيكم انت ومنة
- ياااااااارب وبسرعة بقي
- هههههههههههه حتى انت مستعجل؟ بكرة نقعد عالحيطة ونسمع الزيطة
- ياستى انا راضي بس اتجوزها بس
وادى محمد جه اهو استاذن انا بقي
وماتنسيش اى حاجة تحتاجيها اطلبيها منى على طول
- ماتحرمش منك يارب مع السلامة
- مع السلامة
- خير مصطفي كان عايز ايه؟
- مافيش يا دكتور حضرتك عايز حاجة؟
(اه بقي ولا هو بمزاجك تيجى تكلمنى وبمزاجك تعمل نفسك ماتعرفنيش)
- مالك يا علياء؟
- ماليش يا دكتور
- بقي كده؟
- عن اذنك يا دكتور علشان عندى سيكشن
- علياء اظن عيب ابقي بكلمك وتسيبينى وتمشي
- مش قصدى طبعا يا دكتور بس علشان السيكشن
- السيكشن لسه بدرى عليه يا علياء
(وانت ايش عرفك بقي ان شاء الله! بتراقبنى؟ ومراقب جدولى ؟ يا خيبة لحسن في الاخر يطلع قاتل متسلسل, متسلسل ايه بس شكل الروايات اللى كنت بقراها لحست نافوخى)
- ماشي يا علياء براحتك عالعموم احب اقولك انا دلوقتى سايبك براحتك لكن بعد كتب الكتاب هيبقي لينا كلام تانى بفكرك بس ان مصطفي غريب عنك مش محرم علشان تقفوا تتكلموا سوى لوحدكم
- والله؟ والبنت اللى كانت واقفة تتمرقع معاك من شوية محرم صح؟ العموم شكرا عالنصيحة يا دكتور عن اذنك امشي ولا لسه فيه حاجة؟
- لحظة معلش بنت مين؟
- معرفش والله اهى بنت وخلاص
لقيته بيبتسم
(بيبتسم على ايه ده كمان؟
تلاقيه افتكرها
اه بقي ماااااااشي )
- عن اذنك يا دكتور
- استنى بس يا علياء هو ماينفعش نقدم كتب الكتاب؟ نخليه الخميس ده
- والله حضرتك اتفقت مع بابا ماليش دعوة
- يعنى لو قولت لبابا وافق انتى موافقة؟
- ايه؟ لا طبعا مش هلحق وبعدين انت مش حجزت القاعة
- اه بس يعنى ممكن احاول اغير الميعاد بس خلاص براحتك واتفضلى لو عايزة بس برده لينا كلام تانى بعد كتب الكتاب
(بلا تانى بلا تالت بقي ده حتى اتلخبط بعد ما جبت سيرتها قال عايز يقدم كتب الكتاب قال )
- بتقولى ايه؟
- ها؟ مابقولش
- طيب مش عايزك تزعلى واحسنى الظن وان شاء الله بعد كتب الكتاب نبقي نقعد مع بعض نفهم كل حاجة ونتفاهم
- ان شاء الله
ومشيت قبل ما ابرطم بحاجة تانية ويسمعنى
قال احسنى الظن قال وهو ما احسنش الظن ليه
احرام على بلابله الدوح حلال للطير من كل جنس؟
ده بيت شعر خدناه في الثانوى مالكوش دعوة بيه
بكلم نفسي انتوا ايه دخلكم بينى وبين نفسي اصلا؟
بصوا انا بتخانق دلوقتى مع دبان وشي
اشوفكم بقي البارت اللى جاى احسن
وماتنسوش الفوت والكومنتات
