الغريبة ان الست دي دخلت بكل هدوء من غير تستأذن حتي، استغربت جدا الصراحه من الطريقه بصيت لها و استنيتها تتكلم بس برضو لقيتها ساكته ، قررت اكسر الهدوء و ابدا انا الكلام
- حضرتك مين؟
= الاستعباط هيشتغل بقي؟!
- انا فعلا مش فاهمه حضرتك بتتكلمي عن ايه ياريت تتكلمي بوضوح
= الموضوع واضح زي الشمس ياحبيبتي
الصبر بتاعي كله خلص حرفيا و كنت هتعصب عليها جامد بس اللي منعني ان احنا في مكان عام ، حاولت اهدي و اوطي صوتي و اتكلمت في هدوء
- لو هو واضح كدا يبقي ياريت حضرتك تتكلمي لاني معنديش وقت اضيعه
= طبعا !!! مانتي مضيعه وقتك كله مع البيه
خلاص هي كدا خلصت كل رصيد الصبر اللي عندي و مبقتش قادره استحمل اكتر من كدا
- هو مين دا يا استاذه !؟ انا فعلا يومي طويل و مش ناقصه نقاشات ملهاش لازمه ، لو مش هتقولي حاجه عدله همشي احسن
- انتي تعرفي عمر منين ياهدي؟!!
غيرت اتجاهي و بدات ابصلها ، بانت علي وشي علامات الالم لما افتكرته و سمعت اسمه اتوترت جدا جدا
= مفيش بيني و بين عمر اي حاجه و انا مسمحش لحضرتك تتدخلي في خصوصياتي
- اه طبعا مفيش بينكم حاجه.... دا بأمارة الصور دي؟!
ادتني الموبايل و ورتني الرسايل اللي هو لسه باعتهالي و المحادثات القديمه وشي احمر جدا و بدات افتكر كل حاجه، الالم زي الجرح بالظبط، مع الوقت لما بتدوس عليه مش بيوجع، بس لسه معلم جونا ، و مين فينا الوقت نساه !! مين فينا مش فاكر كل تفصيله حصلت كأنها امبارح ؟! مين فينا قدر يرجع جزء من روحه اللي اتطفت ، بيقولوا ان الوقت بينسي ، بس للاسف احنا اللي مبننساش....احنا بنتناسي، كام مره بعدنا عن اللي بنحبه عشان بيأذينا و برضو مرتحناش !!! عدي وقت كتير اوي و انا معرفش اي حاجه عن عمر ، واضح ان الست دي مراته، مكنتش اعرف ان هييجي وقت و معرفش عنه اي حاجه غير انه لسه عايش ، بس في النهاية خلاص كل مشاعري ناحيته ماتت، مش ندمانه اني سيبته دا كان احسن قرار اخدته في حياتي ، ساعتها كان في صراع بين قلبي و عقلي، و دا اصعب صراع ممكن تقابله في حياتك، لانه بيكون بين اللي احنا عايزينه و بين اللي احنا محتاجينه، كان عقلي دايما شايف انه شخص مناسب و بيحبني و ان انا محتاجاه ، بس قلبي شايف انه مش بيحبني ، عمر كان دايما شايفني تافهة لدرجة اني بقيت اخاف احكي وكأنه مش من حقي اتكلم، و هو الحب ايه غير انه يعمل الحاجه الصح في الوقت الصح ؟! ، لو كان عندي ميتينج مهم و متوتره جدا و مبلغاه كان بيتطمن عليا بعدها بيومين، لو مثلا عندي خبر حلو و عايزه اشاركه فرحتي كان بيستني لحد مافرحتي تروح و بعدها يكلمني ، في الحقيقه القلب هو اللي بيغلب دايما و فعلا غلب ، لما تحس ان في حاجه متغيره يبقي في حاجه متغيره فعلا، لو حسيت ان الشخص دا بقي عنده غيرك و مبقاش عايزك يبقي دا برضو حقيقي، مادام الشخص دا وصلك للمرحله دي يبقي اعرف ان في حاجه غلط، كدا كدا كان هيسيبني لو مكنتش سيبته، قلبي مغلطش!!
- عمر كان خطيبي بس احنا علاقتنا انتهت فملوش لزوم الكلام دا
= غبيه انا يعني؟ امال هو كلمك ليه؟
- حضرتك تحلي مشاكلك مع جوزك انا مليش دعوه متلومينيش و متكلمينيش بالطريقه دي عشان مزعلكيش
= و انا ايه اللي يضمنلي انك مش بتكلميه حاليا؟
- انا مش متضطره اثبت و للمرة التانيه بطلب منك تمشي و تحلي مشاكلك مع جوزك ، و هستاذن انا بقي و حضرتك كملي خناق مع نفسك
= لا و علي ايه استأذن انا ، بس بلاش اللعب مع الكبار ياحلوه ، سلام
مزعلنيش حواراها معايا علي قد مازعلني نظرات كل الناس ليا ، نظراتهم ليا كانت اكني خرابة بيوت، كلهم فاكرين اني سرقت جوزها ، في مجتمعنا عموما مبنتاكدش من اي معلومه قبل مابننشرها حتي لو اللي قدامنا مظلوم فعلا !! ، خدت شنطتي و اتجهت ناحية الباب بسرعه ، ايدي كانت بتترعش جامد جدا و كنت متوترة اوي حاولت اوقف اي تاكسي ياخدني بس للاسف ملقتش خالص ، حسام طلب مني انه يوصلني و الصراحه مكنتش قادره افكر و كنت محتاجه امشي من المكان بسرعه، وافقت رغم اني من عيلة محافظة جدا و عند اهلي دا مينفعش، فضلت ساكتة فتره كبيره يمكن عشان الموقف المحرج اللي اتعرضتله من شويه، حسام كان بيحاول يكسر الهدوء اللي كنت فيه ، يمكن كان بيحاول يخليني متحرجش اكتر
- كنت عايز اسال حضرتك تعرفي هند السويفي منين؟
= مين هند السويفي؟
- الست اللي كانت جوا
= صدقني انا اول مره اشوفها ، حتي انا لسه عارفه اسمها منك
- اصل امي قبل ماتتوفي كانت بتشتغل عندهم في البيت بس سابت الشغل فجأه قبل ماتتوفي بمدة
= دي معلومه مهمه اوي في القضيه، احنا كدا محتاجين نعرف اكتر عن الاسباب اللي خليتها تسيب الشغل
- بتحبيه؟
To be continued...
فولو عشان البارت الجديد يوصلكوا🖤🌸
أنت تقرأ
Black & White
Romance- شايفني حلوه؟ = احلي من اي حاجه - يعني مش عايزني اتغير ؟ = مفيش حد في الدنيا يستاهل ان احنا نغير من نفسنا و من طبيعتنا عشانه ، خصوصا لو قابلين طبيعتنا و حبينها زي ماهي ، و خصوصا كمان لو طبيعتنا دي كانت حلوه و كل الناس شايفاها حلوه !! و انا شايفك ح...
