Black & White

الجزء الخامس

- نزلني يا استاذ بعد اذنك
= ارجوكي متفهمينيش غلط
- انا قولت ان مفيش بيني و بينه حاجه، و معني سؤالك انك كدا شايفني كدابه !!
= يا هدي انااا صدقي...
-هدي؟!!! انا مسميش هدي انا اسمي أستاذة هدي ، حضرتك اتعديت حدودك معايا و مش من حقك تسالني سؤال زي دا و اتفضل نزلني بقي
= طب تسمحيلي اوصلك و اوعدك مش هتكلم طول الطريق؟ لأنك مش هتلاقي اي عربيات دلوقتي
- لا مسمحلكش و اتفضل نزلني
وقف العربية و نزلني ، كلامه فعلا كان صح و مكانش في ولا عربية، الدنيا بدأت تضلم و انا كنت مكسوفه اوي من اللي حصل و محتاجه حد يسمعني، اول حد جه في دماغي " منال " ،
الوحيده اللي مهما اتخانقت معاها كدا كدا بنرجع لان احنا ملناش غير بعض ، كل خناقة بتنتهي اول ماحد فينا بيشوف حزن في عين التاني ، مخفتش ساعتها تسيبني و انا تايهة و مش عارفه اتصرف، لان اهم حاجة في علاقتنا هي " الامان " يعني لو في اسوء حالاتي و بطلب منها تمشي متمشيش عشان هي عارفه انه غصب عني و انه مش من قلبي، لو بعيط و كل الناس شايفاني تحضنني عشان متخليش حد يشوفني ضعيفة ، عشان كدا انا مش خايفه اتصل بيها دلوقتي ، مش خايفه تسيبني مهما حصل
- لسه جاية تفتكري ؟
= بجد انا اسفة اوي انتي عارفه اني عمري مابيبقي قصدي اضايقك
- يابنتي انا بهزر مش زعلانه بس مال صوتك انتي كويسه؟
= انا في الشارع لوحدي
- فين و انا هجيلك؟
ربع ساعه و لقيت منال قدامي حكيتلها كل حاجه عشان عارفه انها الوحيدة اللي عمرها ماهتفهمني غلط ،
- ياهدي انتي معملتيش حاجة غلط ، انتي فضلتي متمالكة اعصابك و صبرتي معاها رغم انك ملكيش دعوة باللي بتقوله اصلا
= يامنال انتي مشوفتيش الناس كانت بتبصلي ازاي ، نظراتهم قتلتني
- فهماكي صدقيني و عارفه انها حاجة تضايق
= طب انا تعبانه مش قادره ياريت نمشي و بكره نتقابل في الشغل
- طب متاكده انك كويسه؟
= تعبانه بس عشان اليوم طويل
اصرت متسيبنيش ، فضلت معايا حوالي ساعه ، مسابتنيش غير و انا بضحك، وصلتني البيت و قبل ما انام وقفت في البلاكونه شويه ، فضلت ابص للسما كتير اكني بشكيلها همي ، لاحظت ان النجوم مش في السما بس ، في ناس كتير في حياتنا عاملين زي النجوم بالظبط ، هما النور اللي في حياتنا و مش بس كدا ، هما السبب في اننا عايشين ، حقيقي معرفش منغيرها كنت هعمل ايه، خرجت من اوضتي عشان اجيب حاجه و فجاه سمعت صوت من اوضة بابا و ماما
- يعني ايه يعني؟
= يعني زي ماسمعتي ياسعاد
- و احنا هنعيش ازاي دلوقتي؟
- هحاول اتصرف و اشوف اي شركة تانيه
- انت مفكرتش في هدي و في البيت قبل ماتاخد القرارات دي؟
- انتي عارفه ان انا احسنلي اموت شريف ولا ان لقمة حرام تدخل بيتي