كانت أول مرة أحس اني جميلة في عين حد فعلا بس الفستان كان لونه أبيض ، و أنا مبحبش الأبيض بحب الأسود أكتر دا غير إن الفستان واسع جدا و أنا بحب الحاجات الضيقة ، بصيتله و قولتله بصوت مبحوح " بس دا واسع اوي و أبيض و أنا مبحبش الأبيض "
مسك الفستان و قال لي " بالعكس اللون الأببض أحلي حاجة فيه، خشي قيسيه "
رديت عليه بحزم " أنا مش هينفع اقيسه دلوقتي ورايا ميعاد مهم مينفعش اتأخر "
بصلي بصة ساعتها مفهمتهاش ، حاولت أغير النوضوع و إتجهت ناحية ساعة كان شكلها حلو جدا ، طلبت من الراجل اللي في المحل يوريهالي ، كان لونها دهبي و شكلها غالي و نفس النوع اللي أبويا بيحبه ، اشتريتها و إستعجلت حسام لإني اتأخرت علي العيد ميلاد جدا
فضلنا طول الطريق محدش فينا سامع غير صوت كلاكسات العربيات ، حسام كان بيهز رجله جامد جدا بشكل ملحوظ ، أول مرة اشوف حد بيعمل الحركة دي زيي ، بس غريبة !! انا بعملها لما بتضايق بس هو ايه اللي مضايقه دلوقتي ؟ كنت بفكر في طريقة اسأله بيها بس هو سبقني و إتكلم " شكله حد عزيز عليكي جدا " حسيت إنه بيلمح لحاجة بس مفهمتهاش ، قلتله بكل عفوية " أيوه جدا "
- انتي رايحة عيد ميلاده دلوقتي؟
= ايوه
- طب العنوان فين ؟
وصفتله العنوان و طلعت البيت لقيت بابا و ماما مجهزين كل حاجة و مستنيين ، كنت متأخرة عن ميعادي حوالي ساعة ، بصولي بلوم و اتأسفت ليهم كتير جدا عن التأخير ، كان يوم حلو و إتصورنا صور كتير اوي و زي ما انا متعودة نزلت لبابا صورته علي الفيس و كان لابس الساعة في إيده ، كان يوم طويل صعب بس منكرش إنه حلو و مش وحش، نمت متأخر و كنت في شغلي في ميعادي ، لقيت كومنت من أكونت غريب ! هو !! دا أكونت حسام ، بيقول لي كل سنة و انتم طيبين ، بس في حاجة غريبة ! حسام اصلا مش عندي في الأصدقاء ، معقولة يكون دخل الأكونت بتاعي مخصوص؟ كنت لسة هرد عليه و بعدين لقيته بيتصل ، طلب مني يقابلني بس المرادي مجابش سيرة الشغل ، اترددت كتير و مكنتش عارفة اوافق ولا لأ بس في الآخر قلت ليه لأ؟ شغلي النهاردة هيخلص بدري و مش ورايا حاجة ، وافقت و قررنا نتقابل في نفس الكافيه اللي علي طول بنتقابل فيه ، فضلت طول الشغل بحاول أفكر هو عايز يقابلني ليه؟ بس كان جوايا فرحة مش مفهومة و ملهاش أي مصدر ، أخيرا جت اللحظة اللي مستنياها من الصبح و شغلي خلص ، منكرش توتري ساعتها بس فرحتي برضو ملحوظة ، وصلت الكافيه لقيته مستنيني ، كان باين علي وشه علامات الخوف و التردد ، دخلت و قعدت و قلت بصوت مبحوح " مساء الخير "
= مساء النور
كلمني عن القضية بس برضو كنت حسة ان في حاجة هو عايز يقولها بس مش عارف ، فضلت مستنية و فضلنا نتكلم بس كان في كيس علي يمينه لونه أبيض كان كل شوية يمسكه و يسيبه ، حسيت اني فضولية الصراحة بس مقدرتش امسك نفسي أكتر من كدا و قلتله " هو إيه اللي في إيدك دا ؟ "
إيده بدأت تترعش و حاول يتكلم بس معرفش ، حسيت إني اتماديت أوي لما قررت اسال عن حاجة متخصنيش، فضل ساكت شوية فإتكسفت و حسيت إني مكانش ينفع أقول اللي قولته ، وشي إحمر و قولتله بصوت مبحوح " واضح اني عكيت ، بستأذنك ثواني " إتجهت للحمام الملجأ الوحيد اللي بينقذني في أي خروجة ، خرجت و قعدت مكاني بس ساعتها الكيس مكانش جمبه ، كان حاطط حاجة ورا ضهره و ماسكها في إيده و بيستعد عشان يوريهالي ، حسيت إن قلبي بيرقص من مكانه ، أول مرة في حياتي حد يعمل لي مفاجأة ، طلب مني أغمض عيني ، غمضت عيني و الصراحة مقدرتش أستحمل و فتحتها ، بصيت لقيته الفستان الأبيض ! ضحكت جامد و كل الناس اللي في الكافيه بصو علينا و معظمهم صورونا ، الفستان مكانش عاجبني أوي بس اللي عجبني الفستان ، كان احلي حاجة في الدنيا ، للحظة نسيت كل اللي قولته عليه ، كان احلي فستان ممكن اشوفه في حياتي، مكنتش عارفة اتكلم كنت بضحك بس ، رغم اني حسة انه هيطلع وحش عليا بس انا اتبسطت اوي من مفاجئته
- انا بجد مش عارفة اشكرك إزاي
= دي حاجة بسيطة جدا و مش كفاية عليكي ، مش هتقيسيه بقي؟
- أول ما أروح هقيسه و اصورهولك
كنت بحاول أروح بأقصي سرعة عشان اقيسه و فعلا قيسته ، كان شكله و انا لابساه أحلي من شكله علي الفاترينة ألف مرة ، فتحت موبايلي و اتصورت حوالي عشرين صورة بحاول ادور علي احلي واحدة فيهم عشان ابعتهاله ، بعتتهاله و شكرته تاني و لقيته بيقول لي
- زي ماتوقعته عليكي بالظبط ، أول ماشفته قلت إنه زي مايكون معمُلك مخصوص!!
= من فترة لقيت فستان أسود حلو أوي ، كان عاجبني جدا و كنت فاكرة اني مش هلاقي زيه تاني بس للاسف كان ضيق جدا عليا ، كان جسمي بيوجعني اوي طول ما أنا لبساه بس برضو عمره مافرق معايا ، كان كل الناس شايفين انه متخنني بس انا مخدتش بالي !! ، اصلا انا طول عمري بحب الأسود ، ماما طول الوقت بتحاول تخليني البس أي لون تاني بس راسي و ألف سيف اني مش هلبس غير أسود ، كنت فاكرة ان مفيش أحلي منه لحد ماشفت الفستان دا ، فعلا ماصدقت لقيت حاجة حلوة عليا و مش مبينة وزني الزيادة، لسة لحد دلوقتي مستغربة ازاي وافقت ألبس الفستان الاسود في خطوبتي و ملبستش الفستان الحلو دا !
= خطوبتك؟! هو انتي مخطوبة ؟
To be continued..
أنت تقرأ
Black & White
רומנטיקה- شايفني حلوه؟ = احلي من اي حاجه - يعني مش عايزني اتغير ؟ = مفيش حد في الدنيا يستاهل ان احنا نغير من نفسنا و من طبيعتنا عشانه ، خصوصا لو قابلين طبيعتنا و حبينها زي ماهي ، و خصوصا كمان لو طبيعتنا دي كانت حلوه و كل الناس شايفاها حلوه !! و انا شايفك ح...
