Black & White

الجزء الثامن

أخدت الشنطة بس شكلها كان غريب ، مش لايقة علي انها تكون بتاعت ست في عمر الخمسينات !!! بصيت لمدام نهي و سألتها " هو حضرتك متأكدة ان دي بتاعت مدام سميرة ؟! "
-مدام سميرة بتيجي كل يوم ماعدا الجمعة و هي نسيتها عندي الخميس و اتصلت اعتذرت عن الشغل معايا الجمعة و من ساعتها و انا مش عارفة اوصل لها "

شكرت مدام نهي مع اني لسة مش قادرة انسي اللي حصل ، بس الشغل شغل و كفاية انها وافقت تساعدني ، ركبت معاه العربية و كنا في طريقنا لبيتي و كان في هدوء طول الطريق لغاية لما قال لي " الشنطة دي مش بتاعت امي "
- يا دكتور مدام نهي هتكدب علينا ليه؟
= معرفش بس انا عارف كل الشنط اللي عندها و دي عمري ماشُفتها مسكاها او خارجة بيها !
فتح الشنطة و لقينا موبايل نوكيا قديم جدا ، لقيت علامات الدهشة علي وش حسام و هو بيقول لي " قلتلِك، انا كنت متأكد انها مش بتاعت امي"
حسيت ان الموضوع كبير ، الموضوع مش مجرد قضية بكتب عنها ،
= احنا كدا لازم نرجع الشنطة لمدام نهي
- مش يمكن نلاقي فيها اللغز اللي بندور عليه؟
= حضرتك دا انتهاك لخصوصية الناس !!! لو الشنطة دي مش بتاعتنا يبقي لازم نرجعها ، دي اسمها سرقة
- انا بس عايز اعرف الموبايل دا بتاع مين
= رأيي الشخصي ان احنا كدا بنخرج عن موضوع القضية الاساسي
- صدقيني الموضوع دا هيساعدنا في القضية كتير
= حضرتك كدا بتضرني ! لو مخلصتش كتابة في اسرع وقت المدير هيدي القضية لحد تاني و معتقدش ان الحد دا هيساعدك ، هيكتب عن القضية بدون دخول في تفاصيل و ساعتها حضرتك اللي هتخسر و بجد انا لو ضيعت القضية من ايدي حضرتك مش متخيل المشاكل اللي هتحصل لي بسببك !!

حسيته اتضايق و الصراحة حسيت بالذنب بس هو مش حاسس بالمسئوليات اللي ورايا ، ميعرفش حاجة عن ابويا و أمي اللي محتاجينلي حاولت اصلح الموضوع عشان محرجهوش و قلتله
" انا اسفة عندي مشاكل و ضغوطات و كل دا جه في حضرتك "
- انا هيكون افضل بالنسبالي لو ساعدتك
= و انا مطلبتش مساعدة ، كل اللي بطلبه منك ان احنا نركز في القضية بعد اذنك !! بعد اذنك انا هاخد الشنطة و هعدي علي مدام نهي بكرة و هديهالها
- اللي حضرتك تشوفيه
أخدت الشنطة منه و طلعت البيت و انا واخدة قراري اللي عمري ماهرجع فيه و هو اني هرجع الشنطة ، اول ماطلعت البيت لقيت ست الحبايب قاعدة مستنياني بصت لعيني حست اني بفكر و محتاسة ، دايما عمرها مافشلت فأنها تفهمني من اول بصة ، قالتلي بصوت عالي " مين اللي واكل عقلك؟ "
= انتي ليه مقولتيليش ان بابا ساب الشغل؟
بصت الناحية التانية و اتجهت ناحية الباب و قالتلي بصوت مكسور
- انتي عرفتي منين ؟
= مش مهم عرفت منين المهم انتو ليه مقولتوش !
- عشان مكنتش عايزاكي تشوفيني انا و أبوكي عاجزين مش عارفين نعمل حاجة
= و مين قال انكم عاجزين ؟ انا موجودة و مرتبي مش حلو اوي بس هيكفي ، كل حاجة هتبقي كويسة انا متأكدة
بصتلي و عنيها كلها حزن ، ساعتها حسيت اني عايزة ادفع عمري كله بس تضحك ، الدنيا كلها تهون قصاد ضحكة منها

الصراحة المسئولية عليا كبيرة جدا ، دايما بيقولوا ان البنت بتبدأ تعقل و تشيل المسئولية لما بتتجوز بس دا عمره ما كان ولا هيكون حقيقي ، البنت بمية راجل ، تشيل الدنيا كلها علي كتافها و متُقعش ، كل بنت بتحارب مجتمع شايف ان اي بنت مش محجبة عاهرة !! مجتمع بيحكم علي اي بنت بتطالب بحق من حقوقها انها مش محترمة ، مجتمع بيمنع تعليم أغلب البنات بحجة انها ملهاش غير بيتها و جوزها !! بيحددو مستقبلها و حياتها و بيلغو تعليمها مع ان دا عمره ماكان حق اي حد !! مجتمع شايف الست المطلقة مُجرمة و مبيبطلش يقتلها بنظراته ، لو البنت اتعاكست يبقي هي اللي عايزة كدا ، مجتمع مريض بيشوف ان العيب في الست مش في عقول الرجالة !! كل بنت بتخاف من الناس و عيونها و بتاخد بالها من كل خطوة و الموضوع بيوصل بيها انها ممكن متعملش حاجات كتير لمجرد انها خايفة من الناس مع انها مبتعملش حاجة غلط
البنت تستحمل ألف مرة حاجة انت متستحملهاش مرة واحدة !!
المسئولية كبيرة عليا اوي بس انا قدها ، انا قيمتي بشغلي و حياتي و دراستي مش كل هدفي بيت و عيال و جواز!!
في وسط كل التفكير دا خدني النوم ، عربيتي رجعت من الصيانة اخيرا و قررت اني هاخد الشنطة بعد الشغل و أديها لمدام نهي ، بس الصراحة بدأت افتكر كلام حسام،
يمكن افهم حاجة لما اعرف الموبايل دا بتاع مين؟ مايمكن فعلا دي الطريقة الوحيدة ، طب دي اسمها سرقة؟ بس انا مش هاخد الموبايل انا هرجعه علي طول!!
لا مش قادرة انا هفتح الموبايل

To be continued...