كان مستني إجابتي بفارغ الصبر و انا الصراحة مكنتش عارفة المفروض أحكيله ولا لأ لإني كتومة جدا و نادرا لما بحكي أي مشكلة عندي لأي حد ، لسة فاكرة أيام الكلية لما صحابي كلهم قرروا يقاطعوني بشكل مفاجئ لسبب أنا مفهمتوش ، في كليتي كنا دايما سوا رايحيين جايين مع بعض و كنت دايمل بتباهي بيهم و بتشرف بيهم قدام أي حد ، من ساعتها و أنا بروح الكلية و افضل قاعدة لوحدي بالساعات ، حرفيا كانت اسوء أيام حياتي ، حاولت ألاقي صحاب بس مكنتش لاقية حد شبهي ، فضلت علي الحال دا مدة كبيرة و انا حابسة نفسي في أوضتي مبخرجش منها ، عاملة نفسي بذاكر و أنا اصلا بعيط ، أهلي كانوا دايما بيلوموني عشان مش بذاكر بس محدش فيهم كان عارف الأسباب ، مكنتش عارفة أقول لحد إني حسة إني لوحدي !!
- ممكن تفهميني ايه دا ياهدي؟
= ايه ياماما؟
- امسكي
مسكت الجواب لقيته جواب فصل ، رغم إني متدمرة نفسيا و بعيط كتير لوحدي إلا إني كنت دايما بحاول اتمالك أعصابي و منزلش دمعة قدام أي حد ، فضّلت السكوت لإني عارفة إني لو اتكلمت غصب عني هعيط
- إيه؟! ساكتة ليه؟ انتي مبقاش ليكي كبير خلاص ولا إيه؟ كلية و وديناكي مصاريف و دفعنا أكل و بنأكلك؟ عايزة ايه أكتر من كدا؟ هدي اللي كانت جايبة مجموع ولا كنا نحلم بيه في الثانوية تاخد جواب رفد؟ انتي عايزة ايه اكتر من كدا فهميني؟
= مش كل حاجة أكل و فلوس ياماما !! في حاجات كتير اوي انتي متعرفيش عنها حاجة
- انتي بتتبطري علي النعمة؟ انتي عايزة ايه اكتر من كدا ! إحمدي ربنا في غيرك مش لاقي اللقمة
أخدت نفس طويل و إكتفيت بإني اقول " انا آسفة "
= أصرفها منين دي فهميني !! أول ما مدة الفصل بتاعتك تخلص هتروحي الكلية و رجلك فوق رقبتك و اتفضلي علي أوضتك
كنت ناوية أحكي بس هي عمرها ماكانت بتسمع ، اتربينا في بيئة بتجبر المرء علي إخفاء مشاعره ، يمكن لو حطيت أي بوست علي الفيس بقول فيه اني لوحدي كل الناس هتزعل مني و تقول أنا رحت فين ، بس انا مريت بأسوء لحظات حياتي لوحدي محدش فيهم كان معايا !!في ناس كمان قالتلي مالك في ايه ماتنشفي كدا ،
فضلت حوالي شهر في البيت مبخرجش من الأوضة ، و لما وقت الفصل بتاعي خلص اتضطريت أرجع كليتي ، محدش من صحابي أو اللي كانوا صحابي رحمني من نظراته، مكنتش بكمل اليوم في الكلية غير و أنا بعيط في الحمام لحد ما اتعلمت اكتم في نفسي ، انا عديت مرحلة اني اشكي و ابكي ، بقيت بطلة في كتم المشاعر و مبدعة بإني أبين عكس اللي جوايا ،
بس اللي اكتشفته في وقت متأخر إن
"كلما كتم المرء أحزانه وراكمها ، كلما تحولت تدريجيا إلى ألم جسدي، تخيلوا مدى هشاشة المرء حين يظن أن الكتمان إنتصار بينما هو بالحقيقة أكبر هزيمة قد يرتكبها بحق نفسه"
مكانش في حاجة سنداني قد منال ، لأني زي ماقولت قبل كدا إن في ناس زي النجوم ، مهما الدنيا ضلمت و بخلت بنورها علينا ، كانت دايما هي موجودة عشان تنورهالي
فضلت دا كله قاعدة قدامه بفكر و كنت هحكيله كل حاجة ، لحد ماموبايلي رن ، حسيت إنها إشارة من ربنا ليا عشان محكيش
- استاذة هدي معايا؟
= أيوه ، مين؟
- انا نهي ، كنت عايزة أقابل حضرتك
= أنا موجودة في الكافيه اللي قابلتك فيه المرة اللي فاتت ، لو عايزة تيجي دلوقتي أنا هناك
- تمام ربع ساعة و هكون عند حضرتك
= تمام
- انا ممكن امشي ياهدي لو عايزة
= لا لا خليك ، دي نهي ، صاحبة الشنطة ، طلبت تقابلني و وافقت انها تيجي دلوقتي عشان القضية
- انا كنت قربت افقد الأمل في موضوع القضية دا !
= متخافش هنعرف الحقيقة
حسيته عايز يسألني عن موضوع خطوبتي تاني بس مش عارف ، و انا الصراحة مكنتش عايزة احكي فقررت أغير الموضوع علي أمل انه ميسألنيش . فضلنا حوالي ساعة و برضو نهي مجاتش ، اتصلت بيها ٣ مرات ردت في تالت مرة " أنا اسفة ياهدي مش هعرف آجي "
= طب كنتي هتقوليلي ايه طيب؟
- الكلام اللي هقوله مينفعش اقوله في التليفون ، لو عايزاني ممكن تيجي تقابليني
ادتني العنوان و حاولت انا و حسام نروح لها بسرعة قبل ماتغير رأيها ، كنت فاكرة ان حسام كدا مش هيفتح معايا الموضوع تاني و نسي خلاص بس انا عمري ماكنت بعرف اتوقع ردوده من قبلها ، كان بيبهرني دايما و أوقات كان بيوترني بكلامه المفاجئ دا !
- واضح انك مش عايزة
= مش عايزة ايه؟
- مش عايزة تحكي
To be continued..
أنت تقرأ
Black & White
Roman d'amour- شايفني حلوه؟ = احلي من اي حاجه - يعني مش عايزني اتغير ؟ = مفيش حد في الدنيا يستاهل ان احنا نغير من نفسنا و من طبيعتنا عشانه ، خصوصا لو قابلين طبيعتنا و حبينها زي ماهي ، و خصوصا كمان لو طبيعتنا دي كانت حلوه و كل الناس شايفاها حلوه !! و انا شايفك ح...
