سكتت و فضلت ابص حواليا و قولتله " احنا وصلنا " ، خرجنا من العربية و وقفنا علي باب بيت نهي و استنينا شوية لحد مالقينا الباب بيفتح ، كانت ست لابسة اسود و شكلها غريب و مغطية وشها كله ، مكنتش عايزة أخش حسيت إني اتسّرعت لما قررت اروح لها البيت ،
سألتها "هو فين نهي؟"
= حد شافكوا و انتم داخلين؟
- لأ بس اشمعنا؟
مردتش عليا و فضلت تبص حوالين البيت كتير جدا لسبب مش مفهوم و بعدين قالتلنا نخش ، قبل مانتكلم سألتها نفس السؤال " هو فين نهي بعد اذنك "
كشفت وشها و طلعت هي ، نهي !
نهي يبان عليها شخصية هادية جدا و مبتتكلمش كتير ، الغريب إن دا عكس اللي بلاحظه كل مابتكلم معاها ، دايما بتتكلم بسرعة و طريقتها مش مباشرة و دا طبعا بيخلي كلامها كله مش مفهوم
= انا نهي، و معتقدش انه هيفرق معاكي أصلا لان اللي يهمك الكلام اللي هقوله و بس
- بس برضو غريبة يعني !! شوية تقولي انك متعرفيش حاجة و شوية و تتصلي تطلبي تقابليني
= انا لما سكتت سكتت بارادتي و لما اتكلم هتكلم برضو بارادتي
سكتت ، كنت خايفة تغير رأيها و متحكيش ، و لما ملقتش مني رد كملت كلامها
- الشنطة دي فعلا كانت في بيت مدام هند و انا اللي نسيتها هناك
سكتت شوية ، كانت بتتكلم بسرعة طول الوقت بس لاحظت مؤخرا انها مش عارفة تتكلم او مترددة ،
حاولت أسهل عليها الكلام فقولتلها
= نسيتيها ؟! أكيد انتي صاحبة مدام هند صح؟
- لأ
= امال؟
- مش مهم ، زي ماقولت لحضرتك من شوية المهم اللي هقوله و بس
المرادي مستنتش مني أي رد ، كانت بتتكلم بسرعة وكأنها خايفة اني اسألها عن تفاصيل
- يبان عليكي ذكية يا هدي ، بس للاسف الحقيقة واضحة قدامك زي الشمس بس انتي مش شايفاها ، يمكن كمان متعمدة متشوفيهاش !
حسام كان هيتكلم عشان يدافع عني بس انا شاورتله عشان نستني نشوف هي عايزة تقول ايه
في الحقيقة والدتك كان ممكن تتعالج و تبقي كويسة ، اقنعوك تستني دكتور سليم اللي هو اصلا مش موجود و انت صدقت معرفش ازاي ، حجزوها في المستشفي و دا بسبب اتفاقيات بين المسئولين ، دا كله يا استاذ حسام انت فكرت فيه و استنتجته متأخر جدا بعد وفاة والدتك ، مظبوط كدا ؟
- مظبوط بس هو حضرتك جايبانا عشان تقولي الكلام دا ؟ طب ما احنا اصلا عارفينه
= انا لسة مخلصتش كلامي ، ركزي فيه كويس بقي عشان هتشكريني
- اتفضلي كملي
= محدش فيكم فكر في الشخص اللي اتفق مع المسئولين ؟ طب انسة هدي و مش واخدة بالها او متعمدة متاخدش بالها لكن معقولة ؟ حتي انت يا أستاذ حسام مخدتش بالك؟
حسام كان هيرد حاولت اشاورله للمرة التانية عشان نستني بس المرادي مقدرش يستني و اتكلم " لأ مخدناش بالنا للاسف و ياريت حضرتك تحكي بقي عشان احنا مش فاضيين "
= الصبر ، الصبر يا أستاذ حسام ، مش انا قولت هترجعوا تشكروني؟
- هنشكرك اكتر لو كملتي كلامك بسرعة بعد اذنك
= خلاصة الكلام يا استاذ ان اللي قتل والدتك هو عمر
سكتت انا و حسام و بالأكتر انا . معرفتش اتكلم من الصدمة
- مش قولت لكم هتشكروني ؟ يلا اتفضلوا بقي عشان ورايا شغل كتير جدا
حاولنا نستفسر أكتر بس للاسف مكانش عندها أي وقت ، عمر هو الوحيد اللي مجاش علي بالي خالص !
اكتشفت متأخر اوي اني مكنتش اعرف عنه أي حاجة ، بس دا مش جديد علي عمر، طول عمره بيفاجئني بتصرفاته ، مش عارفة اذا كانت المفاجاة حلوة ولا لا ، ممكن تكون وحشة لإنها صدمتني فيه بس مع الوقت بكتشف انها مفاجأة حلوة لإنها كشفتهولي علي حقيقته ،
مترددتش لحظة اني ابلغ عنه ، يمكن كان شخص مهم في حياتي بس هو اللي اختار يقسي قلبي عليه لما باع .
- انا لازم ابلغ ياهدي و ييجوا يعملوا معاها تحقيق
= هيطلبوا دلايل ، متنساش انهم ساعتها قالوا انها موتة ربنا ، عمرهم ماهيصدقوا أي حاجة ، بس في حاجة غريبة ، شنطتها كانت بتعمل ايه عند مدام هند و هما مش صحاب اصلا؟
- ماهو دا اللي انا مش فاهمه ، فضلت تتوه في الكلام عشان منخشش في تفاصيل
= لا لا ، نهي طريقة كلامها سريعة اصلا ، انت مش فاكر اخر مرة اتقابلنا فيها؟
- الي جانب ان طريقتها سريعة هي مش عايزة عايزة تخش في تفاصيل ، صدقيني انا حاسس ان ليها علاقة بالموضوع دا
= تفتكر؟
- اه طبعا ، احنا لازم نفهم منها كل حاجة بالتفصيل و نفهم هي ليه قررت تيجي دلوقتي بالذات و تحكي كل حاجة
= تفتكر هتحكي؟
- لازم تحكي
= و افرض رفضت؟
- يبقي نبلغ عنها
To be continued....
أنت تقرأ
Black & White
Romance- شايفني حلوه؟ = احلي من اي حاجه - يعني مش عايزني اتغير ؟ = مفيش حد في الدنيا يستاهل ان احنا نغير من نفسنا و من طبيعتنا عشانه ، خصوصا لو قابلين طبيعتنا و حبينها زي ماهي ، و خصوصا كمان لو طبيعتنا دي كانت حلوه و كل الناس شايفاها حلوه !! و انا شايفك ح...
