Black & White

الجزء الثالث

مكنتش عارفة استني في المستشفي ولا امشي ، فضلت كتير اوي مش عارفه اعمل ايه او اتصرف ازاي، و في النهاية قررت اتصل بحسام و اقوله علي اللي حصل ، فجأه لقيت رسالة من رقم غريب
* هدي، انا اسف علي كل حاجه، في الفتره دي كنت متلغبط جدا و عارف اني غلطت في حقك، حقك عليا و ياريت نرجع تاني و تديني فرصة تانيه انا بحبك جدا و مش قادر اتخيل حياتي من غيرك و ياريت نتقابل بكره الساعه ٧ في المكان اللي كنا بنتقابل فيه *
فضلت كتير اوي متنحه و مقدرتش معيطش في الشارع، مكنتش عارفه ارد عليه، مكنتش عارفه اي حاجه غير اني مش هرجعله، لو السما اتطربقت علي الارض انا مش هرجع، تمالكت اعصابي و قررت اني مش هرد و هتجاهله، ركبت العربية و رجعت البيت ، حاولت انام بس التفكير لسه بيقتلني، اسئلة كتير بتدور في دماغي!! اشمعنا جاي يفتكرني دلوقتي؟ يمكن ندم؟ فضلت قاعده بحاول انام اكتر من ساعه بس برضو مفيش فايده، قطع تفكيري الموبايل لما رن و كان رقم غريب ، مجاش في دماغي غير انه عمر ، فضلت متردده مش عارفه ارد ولا لا، و في النهاية رديت
- الو
= مين معايا ؟
- ايوه يا هدي ، انا حسام
حسيت ساعتها ان في جبل اتشال من علي قلبي
= كنت عايزه اقابل حضرتك عشان اقول اللي وصلتله في القضية
- حضرتك هتبقي موجوده في الشغل الساعه ٧؟
= لا للاسف بمشي الساعه ٣
- اصل انا عندي ظروف و مش هعرف اجي قبل ٦ ، طب ينفع نتقابل في كافيه دندشه الساعه ٦ ؟
اتوترت اوي و معرفتش اتصرف خصوصا ان دا الكافيه اللي عمر عايز يقابلني فيه و لو شافني هيفتكرني جايه عشان اغيظه بحسام او جاية عشان اشوفه ، طب هنلحق نخلص كلام قبل الساعه ٧ ؟ و لو ملحقناش ؟ فكرت بسرعه و حاولت انقذ الموقف بأني اقنعه بأي مكان تاني
= مابلاش كافيه دندشه
- هو علي راحة حضرتك بس ليه؟
اترددت جدا و مكنتش عارفه اتصرف و قررت اقول اي حاجه
= اصله غالي جدا فخلينا فمكان تاني احسن
- لو علي الفلوس انا هدفع ، كفايه اني تاعب حضرتك معايا جدا في موضوع الكتابه عن مشكلتي و مضيع وقتك
ساعتها عرفت ان مفيش مفر و انا خلاص اتدبست و ملقتش اي حل غير اني اوافق
= لا يافندم مفيش تعب ولا حاجه ، خلاص نتقابل ٦
- اتفقنا
= مع السلامه
- سلام
اتوترت اوي و حسيت اني عاجزه ، كدا عمر هيفتكرني جايه عشانه و حسام مش فاهم حاجه و انا مش عارفه ارفض
فكرت كتير اوي اعتذر عن مقابلة حسام بس انا مش عايزه اوقف شغلي و حياتي عشان عمر، مايمكن نخلص فعلا قبل ٧ ، لا لا خلاص خدت قراري، انا هروح و مش هاممني عمر، مش مهم اي حاجه المهم شغلي ، شغلي و بس و لو مخلصناش قبل ٧ هستأذن و امشي و نكمل كلامنا بعدين
روحت نمت و صحيت علي ميعاد الشغل بس كنت متوتره جدا من اللي هيحصل بليل ، اعصابي كانت بايظه لدرجة اني اتخانقت مع منال خناقه كبيره جدا جدا ، كنت زعلانه من نفسي عشان اتعصبت عليها بس انا فعلا مش عارفه اتمالك نفسي ولا اتمالك اعصابي ، بعد شغلي روحت البيت و كنت لابسه و جاهزه ٦ الا ربع
نزلت و وصلت الكافيه بس حسام لسه مجاش!!! استنيته لحد ٦ و نص و برضو لسه مجاش ، بدأت اتوتر اوي ، اتصلت بيه حوالي مرتين بس برضو مردش عليا دخل عليا علي الساعه ٧ الا ربع و اول ماقعد بدأت ابين اني كويسه و مش متوتره
- اسف جدا علي التاخير
= ولا يهمك بس انا اسفه قدامنا ربع ساعه لاني هتضطر امشي ٧
- تمام انا مش هاخد من وقت حضرتك كتير ، تشربي ايه الاول؟
= ممكن عصير فراوله
- غريبه ! انا كمان بحب عصير الفراوله، واضح ان احنا شبه بعض في حاجات كتير
ابتسمت و وشي احمر بس طبعا حاولت اغير الموضوع و كملت كلامي
=استاذ حسام، انا اتجهت للمستشفي امبارح و هناك قالولي ان مفيش دكتور بالاسم دا
- ازاي !!! انا متاكد من الكلام اللي قولته
= حضرتك ممكن تكون متلغبط فالاسم مثلا حاول تفتكر تاني
- انا متأكد من الاسم صدقيني
= المره اللي فاتت لما وصلت المستشفي سالت الممرضه المره الجايه ممكن نسال حد من المسئولين
- اتفقنا ، نبقي نروح في أي وقت، حضرتك معاكي رقم تليفوني، شوفي ايه الميعاد اللي مناسبك و بلغيني
= تمام ، هستاذن النهارده بقي عشان اتاخرت و بكره نشوف
خدت شنطتي و كنت لسه هقوم بس لقيت باب الكافيه بيفتح فجأه ، اتخضيت اوي ساعتها بس هديت لما لقيتها واحده ست ، بس الغريب انها كانت بتتجه ناحية الترابيزه اللي انا قاعده عليها ، و كانت المفاجأه !!!

To be continued ...