أخدت كل الخطوات دي من غير ما أقول لحسام ، رغم ان هو صاحب القضية و هو اكتر حد من حقه ييجي معايا أو علي الأقل يعرف !!
بس انا محبتش انه يعرف اني رجعت في كلامي و فتحت الشنطة ، طول عمري كدا ، حتي في الحضانة لما ماما كانت بتديني ساندوتشات زيادة و أقولها لا مش عايزة ، كنت بفضل طول اليوم هموت من الجوع بس مرجعش في كلمتي ، وصلت المكان اللي اتفقنا نتقابل فيه و استنيتها لحد ماوصلت
كانت لابسة بلوزة صفراء و بنطلون جينس ، ملامحها كانت حلوة جدا بس كان باين عليها إستعجال رهيب، مكانتش عايزة تقعد عشان نتفاهم حتي ،كل اللي كانت عايزاه موبايلها و خلاص ، كانت بتحاول علي قد ماتقدر متبصليش او تكلمني ، حاولت ألطّف الموضوع يمكن متوترة
- استاذة هند ينفع تتفضلي؟
= مش هينفع عتدي شغل
- عشر دقايق بس مش هاخد من وقتك كتير
= تمام
- انا كاتبة و مسئولة عن قضية الدكتور حسام
= مين دكتور حسام انا مش فاهمة حاجة
- دكتور حسام والدته كانت بتشتغل في بيت مدام هند اللي شنطة حضرتك كانت فيه ، بس للاسف سابت الشغل قبل بوفاتها بأيام قليلة و في شكوك كتير بتقول ان والدته اتقتلت عمدا
= و مطلوب مني إيه؟
- حضرتك صاحبة مدام هند و أنا سألتها عن القضية بس هي مش عارفة حاجة ، فلو حضرتك تعرفي أي معلومات ياريت تساعدينا
= بس انا معرفش مدام هند ولا حتي أعرف حضرتك جبتي الشنطة منين ! انا كنت في مكان عام و فجأة ملقتهاش
- حضرتك متأكدة؟
= أكيد
منكرش انها أثارت شكوكي بشكل مريب ، حاولت آخد منها أي معلومة او أستفسار بس برضو مقالتش أي حاجة !!
فضلت قاعدة في الكافيه شوية بفكر المفروض اقول لحسام ولا لأ ، و في الآخر خدت قراري و هو اني هقول له ، اتصلت بيه و طلبت منه انه يجيلي ، دخل لقاني قاعدة و باين علي وشي علامات التوتر بصلي و قال لي " انتي كويسة "
= كويسة بس انا مدينة لحضرتك بالاعتذار
- بس حضرتك معملتيش حاجة
= انا اتعصبت علي حضرتك جدا امبارح
- ساعة الشنطة؟
= ايوه
- اكيد كنتي مضغوطة ولا يهمك
= بس في موضوع مهم لازم اقوله لحضرتك
- اتفضلي
To be continued..
أنت تقرأ
Black & White
Romantizm- شايفني حلوه؟ = احلي من اي حاجه - يعني مش عايزني اتغير ؟ = مفيش حد في الدنيا يستاهل ان احنا نغير من نفسنا و من طبيعتنا عشانه ، خصوصا لو قابلين طبيعتنا و حبينها زي ماهي ، و خصوصا كمان لو طبيعتنا دي كانت حلوه و كل الناس شايفاها حلوه !! و انا شايفك ح...
