#أسيرة_مختطف
الحلقة 1: 🔥🔥🔥
ريناد تحكي :
الجو بارد و السماء مغيمة و المطر داير حالة برا...هزيت فنجان قهوتي و قعدت على الفوتاي الصغير جنب الشوميني ..مرة على مرة نترشف رشفة من قهوتي السخونة نحاول ندفي روحي شوية و نخزر فنفس الوقت للنار الشاعلة قدامي ... تنهدت و خزرت للساعة لي محطوطة على الحيط راهي الستة تاع الصباح من عادتي نبكر كل يوم خصوصي مع خدمتي ...هزيت روحي و نضت من بلاصتي رايحة لخدمتي كيما كل يوم ...دخلت لغرفتي درت دوش دافي و لبست حوايجي روب رمادية تاع شتاء تجي تحت الركبة مع بوتس ...وقفت قدام المرايا و حطيت مايكاب خفيف على وجهي ...سرحت شعري على كتافي و حطيت بوني فوق راسي ..تبسمت برضا على شكلي و تلفت هزيت صاكي و اوراقي لي نحتاجهم ..نزلت للتحت و جبدت كرسي و قعدت على طابلة الفطور نترشف قهوتي للمرة الثانية ...سرحت شوية فتخمامي حتى قاطع سهوتي صوت زوج أمي يحكي و يتبسم
برهان: صباح النور يا أحلى قطة
جبد الكرسي و قعد على راس الطابلة
هزيت حاجبي مستغربة منو ..من وقتاه يصبح عليا و من وقتاه يتبسم في وجهي .....فرغتلو الخدامة القهوة و راحت
ما درتش عليه و كملت نترشف في قهوتي أما كلامو اللخر خلاني نشرق و نكح بشوية مصدومة من وقاحتو وين وصلت كان لازم نعرف ورا إبتسامتو شي ما يبشرش بالخير
برهان: صرتي كبيرة و صار وقت نزوجك بما أني في مكانتك باباك ..اخترتلك زوج مناسب ليك و ما راحش تلقاي كيفو
أنا: واش ؟؟ اولا خليني نذكرك أنت مستحيل تقدر تكون فبلاصة بابا و ثانيا أنا لي نقرر وقتاه نتزوج مفهوم و ثالثا أنا لي راح نخير شريك حياتي ..كملت كلامي ننهج من الزعاف صدري طالع هابط و هو ما تحركتلو حتى شعرة كأني ما حكيتش ...الكلام دخل من وذن و خرج من وذنو الثانية
تبسملي ببرود يحكي
برهان: قراري خذيتو و مرة ثانية ما تعليش صوتك عليا ولا نكسرلك شوكتك يا قطة ..المخالب تاوعك خليهم لحد ثاني ..و تاني نتي بنت أنانية ..يماك راهي مريضة فوق و بسيف رقدت البارح و نتي تعلي في صوتك هنا .. ناوية تحبسيلها قلبها الضعيف بتصرفاتك المتهورة !!
خبطت يدي على الطابلة و خرجت عيوني فيه نحكي و نرص على سناني
ريناد: و أنا مستحيل نرضخلك يا راجل أمي ...و أنت تعرفني مليح طول حياتي عايشة هنا معاك تحت سقف واحد بسبة أمي و بس لا غير حتى أني عندي خدمتي وحدي و كل حياتي نتكل على روحي و لا مرة طلبت منك شي و لا مديت يدي نطلب من عندك ...كليت و شربت و قريت بدراهم بابا ..و إذا فكرت أني راح نكون قربان تضحي بيه فخليني نقولك اخترت الشخص الغالط..ما تخلينيش نخرج للعلن كل وسخك و فسادك و نعلنو للناس ...كملت كلامي و هزيت روحي خرجت من تم و انا نغلي ...وقفت نلبس فالمونتو تاعي و غصة واحلة في حلقي ..غلقت الزرار المونتو و لفيت شال على رقبتي و حكمت صاكي و فتحت باب تاع برا ...ضربتني نسمة خفيفة على وجهي
خلاتني نغلق عينيا نستمتع بنسمات الهواء البارد على وجهي ...تنهدت و فتحت عيوني و حكمت طريقي لمبنى الصحافة لي نخدم فيه
بعد ما راحت ريناد بعشر دقايق نزلت رضوى أم ريناد للفطور ..لقات برهان يفطر و يتبسم
جبدت كرسي و قعدت تخزر فيه باستغراب تحكي
رضوى: نقدر نعرف سر إبتسامتك ؟؟
برهان: عندي خبر يفرح ليك عزيزتي
رضوى: اللي هو؟؟
مسح فمو بالمنديل يحكي
برهان: من شوي حكيت مع ريناد و قاتلي بلي راهي ناوية تتزوج
رضوى: ريناد!!! تتزوج؟؟ علاه ما حكاتليش ليا أمها؟؟
برهان: و علاه أنا غريب عليها
رضوى: لا أكيد ماش هك قصدي ..أنت باباها الثاني أما استغربت أنو ماحكاتليش موالفة تحكيلي كل تفصيلة على حياتها خصوصي هاذ الموضوع الحساس المفروض أنو تحكيلي أنو عندها واحد في حياتها و حابة تتزوج
برهان: ههه اتكالماي بشوية يا روحي ...هز يدو حطها على يدها يحكي و يخزر لعينيها
برهان: كل المسألة أنها حشمت منك لا غير ..علابيها حكاتلي ليا و قاتلي نفاتحك فهاذ الموضوع
رضوى: إذا هك معليش كي ترجع نحكي معاها و نفاتحها فالموضوع أما ما قتليش شكون هذا لي حبت تتزوج بيه نعرفوه شي ؟؟
تبسم بخبث و عدى يدو على شلاغمو يحكي
برهان: أكيد نعرفوه و نتي تعرفيه أكيد ...شفيتي على ولد صاحبي المقرب نايف
رضوى: ايه لي تعرض لحادث من شهرين و رجع مقعد و ما يقدرش يمشي ؟؟
برهان: أيواه هو
عقدت حواجبها تحكي
رضوى: ما تقوليش ناوية تتزوج بيه؟؟
برهان: أنعم ايه قاتلي بلي تحبو و كانت على علاقة بيه و دوك ناويين يتزوجو
رضوى: أما كيفاه؟؟ و وقتاه رجعو يحبو بعض أصلا من شي ست شهور كتبت مقالة على باباه و كان على شعرة راح يدخل الحبس بسبتها و دوك حبت وليدو و راح يتزوجو؟؟
أنت تقرأ
أسيرة مختطف {من تأليف و كتابة Macilia Ch}
Fiksi Sejarahأسيرة مختطف《مكتملة》 صحفية تختطف يوم زفافها لتقع أسيرة مختطف و تتوالى الأحداث داخل إطار تشويقي (باللهجة الجزائرية) {من تأليفي Macilia Ch} ❌( ممنوع النقل ) ❌ بدأت في جوان 2020 إنتهت في سبتمبر 2020
