صباح الورد ياورد ورجعتلكم بقصة جديدة. حقيقية تحمل الكثير من المعاني بطياتهة اتمنى تستمتعون بيهة واتمنى تضبطون اعصابكم كالعادة وبدون تجاوز ونكمل برقي اخلاقكم الي تعودت عليهة واتركم باول البارتات،،متابعة طيبة
البارت الاول
فيّد عبدالله
سرور،،كعدت الصبح على طكطكة البيت من وقت لان يردون يرحون اهلي للزيارة جانوا ناذرين نذر لابن اخوية بس يطيب يرحون وصدك استعجلوا يوفون هالنذر كدما انشلعت كلوبهم يلا تعدة مرحلة الخطر وطاب لدرجة ماانتظرونة نكمل امتحانات نصف السنة جنت صف سادس علمي واختي قمر صف ثالث متوسط كعدنة نراجع وهم يتحضرون واختي الجبيرة يسرا بايتة يمنة لان حامل بايامهة الاخيرة اباوعلهم واگول لامي ليش بالله متأجلوهة هن 3امتحانات بقن حتى نروح وياكم
الام،،يا ماما متشوفين اخوج شلون مشلوع گلبة علئ ابنة ماعول يطيب مااريد اعرضلة نروح وبعطلة نصف السنة روحة مخصوص الجن
سرور،،اذا هيج ارضى وكمت ابوس بماما وبابا جانت علاقتي بيهم كلش قريبة احب اتدلع عليهم واحب خوفهم علية واهتمامهم بية قمر جانت خجولة شوية تستحي تظهر حبهة الهم بس اني لا جنت احب قربي منهم امان وراحة ماابدلهة بكنوز الدنيا صدك طلعوا سيارة جبيرة خواني ثنينهم اخوية الجبير وزوجتة واطفالة واخوية الاصغر وزوجتة وجانوا بعدهم ماعندهم اطفال وبابا وماما وعمتي عايشة يمنة ودعناهم وذبينة مي وراهم وهم يوصون لاتفتحن الباب لا تتأخرن كبل للبيت ترجعن ديربالجن على نفسجن مشوا ورحنة بدلنة تريكنة وطلعنة للامتحان بسرعة امتحنت ورجعت وبقينة احنة ويسرا نخابرهم كالو زرنة ووفينة النذر وباقين يومين واحنة كضيناهة ضحك وشقة وونسة بنات والتمن بس جنت مشتاقة للكل خاصة بابا وماما مامتعلمة اظل بدونهم وابتعد عنهم وبالرجعة صار الي بعمري ما جنت محسبة حسابة السيارة انكلبت بيهم وانكلبت وياهة كل حياتنة وتفلشت وضاعت وياهة كل احلامنة واماننة توفة كل الي بالسيارة كلهم راحوا عدا بنت اخوية وهم مالحكنة عليهة بالمستشفى ولحكت اهلهة ماتحملت هالخسارة ولحكتهم وبقينة احنة بس احنة ال3بنات وحدنة لااخوة لااب لا عمام لان ابوية هالواحد وخواتة ثنين وحدة راحت وياه وبقت عمتي ام محمد الي صارتلنة الحضن الي يحاول يلمنة من الشتات والضياع الي صرنة بي بس للاسف اني ابتلعني هالضياع وضعت بعد اهلي فصلت عن هالعالم كلة وبقيت عايشة باوهام وجودهم حتى دموعي خذلتني وعافتني لوحدي انصدمت وسكتت وخلص هي السكتة قمر ويسرا احسن يبجن يعبرن اني ما اتقبلت اصلا فكرة غيابهم وبقيت عايشة وية صورهم لدرجة اكعد واحاجيهم وكانه بعدهم موجودين مو سهلة ولا واحد ولاثنين عائلتي كلهة خسرتهة وراحت الكل صار يحاول وياية عالاقل اطلع مشاعري اعيط ابجي مثلي مثل البقية ماكو بلا اي فايدة بلعني الحزن وغصت بداخلة وصعب اطلع منة صرت اكره احد يجي يمي لو يحجي وياي اريد ابقى وحدي وبس مااريد احد يطلعني من الخيال اليجمعني باهلي ورة الفاتحة الي قاموا بيهة بيت عمتي وولدهة التلاثة محمد وسامر وجاسر تقريبا بعشر ايام وجابت يسرا من التعب والقهر خطية وحدهة بقت واني بقيت بقوقعة الحزن وقمر صارت اني بجهة ويسرا تعبانة وهي ظلت وحدهة تجي تحاول تحجي وياي رغم تعبهة بس ماكو مني اي ردة فعل تمل وتگوم
قمر،،عمة شلون بسرور راح تتخبل هيج تظل خايفة عليهة عمة
ام محمد،،لاتخافين عمة ان شاء الله منعوفهة لحدما تصير زينة انتن بعد هم لمن شغلاتجن حتى نروح
قمر،،شنو وين نروح عمة
ام محمد،،اخذجن وياية قابل تبقن وحدجن بالبيت
قمر،،بس اني مااعوف بيت اهلي عمة مااكدر
ام محمد،،لابنتي ميصير وانتي عاقلة وحبابة
قمر،،مااريد مااروح كمت ابجي مااتخيل اعوف بيت اهلي واطلع منة ،،اني قمورة اصغر شي بالعائلة صح هادئة بس الصار هز كل كياني وصرت انفعل واخاف من كلشي لان من صدك مااعرف الايام شضامتنلة بعد ولو شتضم اكثر من هالاذية الشفناهة كمت لسرور الي احس اختفت من حياتنة من يوم الحادث وغابت عن الوجود ودفنت روحهة وية اهلي احس فقدت الكل وبقيت وحدي اصارع وادافع انه مانطلع من البيت سرور من كتلهة اصلا ما اهتمت ولاانتبهت يسرا حاولت تاخذنة يمهة بس ماقبلوا لان عايشة يم عيال وغربةو بعد ماانفتح الموضوع اكثر من مرة اتقرر نسكن ببيت عمتي صح بقيت وحدي برفضي وتالي استسلمت ووافقت وهم ودعنة شي عزيز علينة وقطعة من ذكرياتنة اضطرينة نعوفهة بكل مابيهة من ايام حلوة ورحنة لبيت عمتي الي فتحوا بيتهم واستقبلونة بكل حب بيت عمتي عندهة3ولد الجبير محمد عندة بنيةبعمري وولد اصغر وسامر متزوج بس ماعندة اطفال وجاسر لسة طالب يدرس طب استقرينة ببيت عمتي بس اني لسة احس بضياع صعب فجأة احس صفيت وحدي سرور عايشة بعالمهة الخاص لوترد كلمة لو ماكو ويسرا ملتهية ببنتهة خطية وتروح وترجع علينة واني احس الهم كبرني عشر سنوات وصرت اصارع بس حتى انقذ سرور من هالوضع وهي متتقبل اصلا نحجي وياهة ونطول الحجي احس تعبت سرور من هالخيالات الي دافنة نفسهة بيهة كامت تتخيلهم ومرات تكول عوفوني وياهم وحدي واني نفسيتي صارت تتعب اني اريد واحد يخفف عني اخر شي لكيت الاخت والصديقة برهف بنت عمو محمد جانت بعمري وصارتلي صديقة واخت تواسيني وتخفف عني وتحاول تشغلني عن هالوجع الي جاي نعيشة وانقلت وياهة لنفس المدرسة وصرنة نداوم سوة
سرور،،ايام تمر واني بنفس الوضع حتى دراستي ما قبلت ارجع ولاانقل ولااي شي تركت كل حياتي ومتت واني على قيد الحياة قمورة رجعت تداوم خطية عفتهة وصارت هي التحاول تخفف عني وتواسني رغم صغر عمرهة بس موبيدي هالشي تعبت هالشي فوك طاقتي جان بهواي عمتي خطية مداريتنة بس مو بيدي شكد جانوا يحاولون يطلعوني من هالوضع بس ماكو ماكدروا جنت مااكعد يمهم ولااسمع كلامهم اصلا ولااركز بس حتى الاكل لو وجبة باليوم هذا يعتبروه انجاز جان الكل حاير بية ومخبوص حتى الولد هم محمد وسامر يجون يسألون ويحاولون وياي بس اني فاصلة عن هالعالم وهيج مرت الايام ببرودهة السلب كل دفو حياتي
قمر،كمت اداوم وية رهف وصرنة صديقات كلش واتعرفت على بنية اقاربهم بنت عم ابوهة لرهف اسمهة جنات وصرنة صديقات مقربات وخففوا عني بمحنتي هواي وكدرت اتأقلم وية وضعنة الجديد وبقة كل دعائي لسرور تتقبل وترجعلنة وبسبب انشغال الكل بوضع سرور الي ميطمن قرروا قرار مصيري لحياتهة،،اتفاجأنة بقرار عمة انه تزوج سرور لابنهة جاسر،،جاسر اي يا جاسر الي يتخبل من طاري جنس حواء وماحاط ببالة اصلا فكرة الزواج والارتباط ومقرر من اول ما دخل مجال الطب انه يعوف العراق ويكمل برة شلون عمتي قررت هيج مااعرف وهنا هم بلشت مرحلة جديد بحياتنة،،،،يتبع
أنت تقرأ
حصاد الهشيم
Romanceجاسر،،لااؤمن بالحب ولااسعى اليه ولكني وقعت سهوا في عالمها وعلقت للابد وحين قررت ان ابدأ بالفوز بثمرة الحب وجدتني كاللذي يحصد في الهشيم سرور،،نعم كنت هشيما هل أملت انت تحصد مني ثمار الحب الذي لم تسعى ان يولد،،لم تسقني باهتمام او عطف واملت ان ازهر لك...
