احببت العنقاء امل العناني

الفصل التاسع

رب اشرح لي صدري ويسر لي امري
الفصل التاسع من (#احببت_العنقاء_امل_العناني)
رجع مازن وسالي الفيلا .سلمت عليهم فاطيما بمحبة كبيرة جدا وكانت مبسوطة جدا برجوعهم ..جت ثريا تسلم علي سالي ومازن سابتها سالي وطلعت اوضتها شوية وجه وراها مازن وقالها _ليه احرجتي ماما كدا يا سالي .
سالي_معنديش رد يا مازن ..ارجوك .
زعل منها وبين لها زعله بانه متكلمش معاها طول النهار .ولا هزر معاها كعادتهم سوا بس هي كذلك طنشته .كانت بتتفرج علي التلفزيون مع فاطيما وجت ثريا تقعد معاهم ..جت تقوم سالي وقفتها ثريا _مش كفايه كدا يا سالي ..هتفضلي مخصماني كتير .
مشيت سالي وطلعت اوضتها وجت وراها فاطيما اللي زعلت من سالي لانها مامتها برده ومتحبش اي حد يعاملها كدا .
فاطيما _ليه كدا ياسالي .هتفضلي تعامليها كدا ازاي ..دي امي برده مقدرش اشوفك بتعامليها وحش واسكت .
سالي_بس انتي شوفتيها بتعاملني وحش وسكتي يا فاطيما .
فاطيما_ابدا ..اومال مين اللي لحقك يا هبله ..ومين اللي اترجاكي تفتحي الباب يوميها .حرام عليكي تظلميها ..هي كانت مشتته وامير لغبط دماغها واي حد مكانها وخد الصدمه لوحده كان هيعمل كدا .
سالي_يووووه كلكم سبوني اهدي لوحدي واسامحها لوحدي ارجوكم .
طلعت فاطيما وهي زعلانه وبتعيط من اوضة سالي قابلها مازن علي السلم وسألها الحكاية ..قالتله اللي حصل فاتضايق زيادة بس هيعمل ايه مراته دماغها ناشفة .دخل اوضتهم لقاها نايمه او عاملة نفسها نايمة .مكلمهاش ..راح علي حرف السرير ونام من غير ميكلمها .
شوية واتقلبت وكلمته _مازن ..هتفضل مقموص كتير .
مازن_انا مش مقموص يا سالي ..انتي اللي مزعلاني .
سالي_يوووه كله عمال يقولي مزعلاني مزعلاني .انا اعمل ايه بس ..مقدرش اعامل حد كويس وانا شايله منه ..ارجوكم ادوني فرصه بس احاول انسي .
مازن_بس ماما ست كبيرة والعمر الباقي لها مش عايزها تقضيه في الزعل .
سالي_بعد الشر عليها متقولش كدا .وبعدين اديني وشك وانا  بكلمك .
مازن_لا .
سالي_لا ليه .
مازن_عشان مخاصمك ومش عايز ابصلك .
ضحكت وطلعت فوقيه كالعاده وهو كان مغمض عينه زي الاطفال ..قبلت كل عين لحد ما استسلم وفتحها وضحك .هيعمل ايه  متجوز مجنونة .
مازن_يا ستي انزلي قلتلك انك تقيلة .
سالي_تؤ.
مازن_يا دي تؤ وسنين تؤ .طب تعالي وانا هأدبك علي سوء اخلاقك دي .
____

صحي الصبح علي مكالمه من صديقه مصطفي بيقوله انه وصل المطار وعايز عنوان البيت عشان يقول للسواق عليه .اداله العنوان وقفل وصحي مراته بمحبه وشوشها في ودانها _اصحي يا حببتي .
_لا مش صاحية سبني انام .
حاول معاها كام مرة لكن مرضيتش تصحي فقام هو جهز عشان صاحبه اللي جاي .
وفعلا في حوالي ساعه كان وصل رجل الاعمال مصطفي المحمدي ..باناقته وشياكته وشخصيته المسيطرة .
استقبله مازن وكان اللي في البيت لسه نايمين .فرشلة اوضة المكتب ينام فيها حاليا لحد ما يجهزوا اوضة ليه  وهو وافق جدا بكل ارتياح لانه كان مرهق ومحتاج يرتاح .
سابه مازن يرتاح وطلع لمراته يكمل نوم في حضنها ..صحيت فاطيما ودورت علي موبايلها ملقتوش .افتكرت انها نسيته في المكتب بالليل وقت ما كانت بتبعت ايميل علي جهاز الكمبيوتر الموجود هناك .
نزلت ببجامتها الورديه المطبوع عليها قلوب..فتحت باب المكتب لقت ضهر  راجل ..اتخضت ورجعت لورا وكانت هتصوت لما لف وشه وشافها ووقته وشها احمر ودرجة حرارتها عليت فجأة ..مش معقولة اللي سابت كندا كلها عشانه رجعلها تاني وفي بيتها .وقدامها وهي زي الهبله ببجامتها الطفولية قدامه .فضل مصطفي يبصلها شوية وبعدين قالها بنبرة صوت ساخره
_لو كنت اعرف انك هتيجي تستقبليني بالسرعه دي كنت جيت من بدري .
بلعت فاطيما ريقها وقالتله بصوت بيحاول يكون قوي _والله انا معرفش انك جاي اصلا ..ولو اعرف كنت سافرت انا كندا من جديد .
دخلت الاوضة براحتها تدور علي تلفونها وبهدلت هدومه الموجوده وفي الاخر لقت تلفونها واقع علي الارض .
حطته قصاد عينه وقالتله _دا الي جيت ادور عليه ويارتني مجيت .
سابته ومشيت وهو ضرب ايده في الحيطة من اسلوبها وكالعاده سرح بخياله في بيجامتها الطفولية .
___
في اوضة مازن حضن مراته بس معرفش ينام تاني ..فضل يبص لملامحها ويقبلها في شعرها وهي نايمه ونعسانه لحد ما زهقت منه _حرام عليك يا مازن سبني انام ..محتاجة انام .
لفت ضهرها وسابته وهو زعل واداها ضهره وبعد عنها ..راحت هي مقربه شوية ولازقه فيه ..ضحك ولفلها حضنها وباس شعرها وراح في النوم.
في اوضة فاطيما فضلت راحة جاية في الاوضة لحد ما رجليها تعبت وعماله تكلم نفسها .
_ايه اللي جابه دا دلوقتي ..بقي انا اسيبه في كندا اجي الاقيه هنا ..لا كدا كتير .طب وانا هعمل ايه وهتعامل معاه ازاي ..ممكن يبان عليا اي مشاعر او اي حاجة وانا بكرهه ..فضلت تقنع روحها وتقول انا بكرهه لحد ما لسانها صدقها لكن قلبها وعقلها عارفين انها كدابة .