احببت العنقاء امل العناني

الفصل الحادي عشر

الفصل الحادي عشر من #احببت_العنقاء_امل_العناني
عدي الاسبوع علي نفس الروتين وفي يوم الاجازة قالهم مصطفي مفاجئة علي الفطار
_انا بفكر اخطب رحاب ..ايه رايكم .
فرحت ثريا وكذلك مازن ولكن سالي مردتش ولا فاطيما .
كلمها مصطفي _ايه رايك يا سو .
سالي _اممم معرفش يا مصطفي انا متعاملتش معاها انت ادري .بس هتخطبها ازاي وهي حياتها هنا وانت هناك .
رد  مصطفي بهدوء_مهي لمحت انها بتحب السفر وكدا يعني اكيد هتستقر معايا في كندا ..العمر بيجري وعايز اخلف بقي وافرح باولادي .
ثريا_عين العقل يا حبيبي .ربنا يسعدك .
مصطفي _ايه رايك يا فاطيما .
بصتله ثواني ومردتش عدوا وكانهم سنين فضلت تشجع نفسها انطق يا لساني وحست وكأن كلمه مبروك بقت محرمة ..مش قادره تنطقها ..الكل باصصلها ومستغرب ..شجعت نفسها وقالتله _مبروك .
تجاهولها كالعاده الا سالي كانت عايزة تقوم تحضنها بس مينفعش تحرجها قدام حد حتي وان كان اهلها لان من الواضح انها بتحب مصطفي من طرف واحد .
ثريا _طب اعزمها يا بني اتعرف عليها واقولك رايي .
مصطفي _بعد اذن حضرتك طبعا ممكن اعزمها علي العشا .
ثريا_طبعا طبعا .
طلعت فاطيما اوضتها وعيطت بحرقة دخلتها سالي وحضنتها وواستها ..بصتلها فاطيما بالم _انتي كنتي عارفة .
سالي _ايوا ..كان باين .
فاطيما_طيب لو انتي حسيتي بيا ..هو ازاي محسنيش يا سالي .ازاي بس .هو الحب دا لازم اقوله بحبك .طيب منا زمان من خمس سنين قلتله بحبك قالي انا لسه صغيره ومعرفش ايه الحب .وان الحب افعال مش كلام .طيب انا اتصرف ازاي ..هو ازاي جامد كدا .دا لو حجر كان حس يا شيخه والله حرام .
حاولت تهديها سالي بكل الطرق وتسمعها وهي بتقول كلام مش مفهوم بس بتتكلم وخلاص عن انها حبته من صغرها ورفضت اي حد يقربلها حتي انها حافظت علي نفسها عشانه .كبرت وهي بتحبه .ملقتش حد يملي قلبها وعنيها غيره بس عمره ما عاملها غير انها اخت مازن وزي اخته .
فاطيما _انا مش عايزة ابقي اخته ..انا عايزة ابقي حبيبته .انتي عارفة اتخيلت حضنه كام مرة .انتي عارفة اتخيلت اني بلمسه كام مرة .انا مجنونة بيه .انا مش طبيعيه .طيب هو ليه عمره ما حسني .هو انا وحشة يا سالي ..قوليلي ..انا هتجنن .انا كنت عايشة علي امل ودلوقتي راح الامل دا .
كانت بتسمعها سالي لحد ما عدي الوقت ومازن اتصل بيها وفاطيما قالت مش عاوزة تشوف حد .
جه وقت العشا والكل سال عليها معرفتش  سالي تقول ايه قالتلهم _تعبانه شوية . سالتها ثريا _مالها اجيب لها دكتور .
معرفتش سالي تقول ايه بس ردت _خلاص يا ماما ..لا المواضيع دي عاديه مش محتاجة دكتور ..اديتها مسكن وهتبقي كويسه .
فهم الجميع هي بتتكلم عن ايه ..عدي العشا ورحاب كانت مثال الادب والاخلاق والاحترام وثريا فرحت بيها جدا بس كان من الواضح انه مصطفي موجود بربع عقل بس ..ومازن وثريا فسروا دا بان رحاب شاغله دماغه بس سالي كانت عارفة ماله .مكنتش عارفة تتصرف ازاي .تتكلم مع مصطفي ولا متتكلمش .
...........................
اتمشي مصطفي في الجنينة باليل وفضل يبص علي اوضتها ..يتمني يطلعلها ويطمن عليها ..طلعت البلكونه وكأنها حاسه بيه .بصت لتحت وشافته وهو بصلها .فضلوا كتير باصين لبعض لحد متصل بيها _الو ..انتي كويسه .
_ايوا كويسه .شكرا لاهتمامك .
-عادي انتي زي ...
_عارفة زي اختك بالظبط ..معلش محضرتش العشا.
_لا عادي كان ممل شوية ..كان ناقصك.
_بتحبها .
سكت شوية  ورد_بحاول .
.................
حاولت فاطيما تبدو انها متماسكه وانها مش فارق معاها لكن كانت عصبيه حتي والدتها لاحظت الموضوع عليها ودخلوا سوا اوضة ثريا عشان تكلمها ..ثريا_مالك يا فاطيما ..متغيره ليه .
_مفيش يا ماما .عادي ضغط الشغل .
_ضغط شغل ولا خطوبة مصطفي .
_مصطفي ..ومصطفي ماله بقي .
_مقلتش مصطفي نفسه ..قلت خطوبة مصطفي . بصي يا حببتي ممكن تبقي غيرانه ..لانه عزيز عليكي زي مازن بس صدقيني انتي كمان هيجيلك اللي يحبك وتحبيه .
_يا ماما خلاص قلتلك مفيش حاجة ضغط شغل بس ..عن اذنك .
خرجت فاطيما وقعدت ثريا تدعي ان ربنا يريح قلب بنتها اللي كانت تتمناها لمصطفي لكن مفيش نصيب .
.....
عدت ايام في الشغل بنفس الروتين اللي الحياة ماشية عليه لكن فاطيما كان باين عليها  وكانها انطفت .فيها حاجة متغيره ..سالي طبعا بس هي اللي عارفة .
كانت في اجتماع مع سالي ومازن ومصطفي ولبني وبعض الاشخاص التانيين بيتناقشوا في مشروع جديد .
كانت مسهمه وسرحانه وكان موضوع الاجتماع انهم بيدوروا علي وجه جديد لمجموعه مستحضرات التجميل بس يكون وجه لافت للنظر .فضل مدير الحملة يبصلها شوية وقالهم وسط ذهول الجميع _ايه رايك يا استاذ مازن لو سكرتيرتك تبقي الوجه الجديد ..عمرك فكرتي في الاعلانات يا انسه ...
فاقت فاطيما من حزنها علي الكلام الموجه ليها ..ولسه هترد ,,مازن رد بدالها _لا دي اختي ومش هتبقي موديل ابدا .
مدير الحمله _بس بجد وشها مميز ومعبر جدا .
مازن _امممم دور علي موديل تانيه في اقرب وقت انا عايز اخلص بقي من الاعلان دا ..اخد وقت طويل اوي .
انتهي الاجتماع لكن الاربعه فضلوا قاعدين شوية ..قاطعتهم فاطيما بغضب ووجهت كلامها لمازن _انت امتي هتبطل تاخد قرارات حياتي عني .انا كبيرة دلوقتي 24 سنه مش صغيرة واقدر افهم ..مش لازم تحميني طول الوقت انا زهقت .
مازن _مالك يا طومي ..انا كان قصدي انك مش موديل .مفتكرتش ان دا يدايقك .
فاطيما _ايوا ..كل حاجة بتعملها بتدايقني ..جبتني الشركة عشان نفسك انت ومركزك انت ومفكرتش في الي يبسطني .وثانيا لقيت فرصه اعمل حاجة تانية ممكن احبها بتمنعني .وبتاخد قرارات حياتي عني ..انا حاسه اني بقيت بكرهك يا مازن .
سابتهم ومشيت بغضب وراحت علي مكتبها ..حاولت سالي تروح وراها منعها مصطفي وقالها انه هيروح يشوف مالها .
قعدت سالي مع مازن اللي مستغرب من رد فعل اخته اللي عمرها ما كانت كدا وكمان بتقول انها بتكرهه ..مكنش مصدق .
سالي _معلش يا مازن هي ممكن اعصابها تعبانه دا غير تصرفك غلط ..بطل تاخد قرارات عنها ..اسالها يا مازن .(#احببت_العنقاء_امل_العناني)
مازن _هي اختي الصغيرة يا سالي .بحسها بنتي ..اول مرة النهارده اشوفها كبيرة ومبقتش الطفله المدللة الي كانت بتجري تتشعلق في رقبتي كل ما اشوفها .
سالي _كويس انك شوفتها كبيرة ..ممكن تفتح عنيك وتشوف حجات تانية كانت مدارية .
_قصدك ايه .
_سامحني مش هقدر اقولك ..لانه مش موضوعي .
سابته وراحت لمكتبها وقعد هو يفكر في كلامها بهدوء وفعلا كلامها فتح حجات كتير وشاف في اخته تصرفات مش لاقي لها تفسير بس واثق ان سالي عندها تفسير ياما يسال اخته بنفسه .
اخد مصطفي فاطيما من ايدها بقوة ودخل بيها مكتبه وقفل الباب وقال لرحاب متدخلش حد .
قعدها علي الكرسي ووقف قدامها وقالها _مالك .ماشية تتخانقي مع دبان وشك ليه .
بصتله بقرف  وردت_وانت مالك اصلا .تقربلي .حبيبي .خطيبي .جوزي مثلا .
مثل انه اتجرح من كلامها وقالها _ياه كنت فاكر اللي بينا اكبر من كدا يا طومي .
_وايه اللي بينا يعني ..متقوليش انا زي اختك لانك مش اخويا .
_شكلك معبية من الكل يا فاطيما .
_والله انا حرة اعبي معبيش ..كل واحد يخليه في حاله وخليك في خطيبتك .
_لسه مبقتش خطيبتي .
_خلص يا مصطفي انا مش فاضيه للرغي ورايا شغل .
_شوفوا مين بيتكلم (look who’s talking) ...انتي الي بقيتي تقولي كدا .
_اتغيرت صح .
_طبعا اتغيرتي للاحسن بس انطفيتي .
_كدا احسن .عن اذنك .
قبل ما تمشي سالته سؤال غريب عمرها متوقعت تقولهوله قالتله _مصطفي ..هو انا جميلة .اقصد ممكن يكون مازن شايف اني مش حلوة عشان كدا مش موافق علي الشغل .
لمس خدها بصابعه فغمضت عنيها وقالها _انتي كلمة جميلة متوصفش جمالك يا طومي ..ومازن شايفك كدا برده ..هو بس بيحميكي من الوسط دا مش اكتر .
_طيب .
____
عدي اليوم وروحوا الفيلا ..ومازن دخل لطومي اوضتها يتكلم معاها ..اعتذزلها عن اللي حصل منه ووعدها مش هياخد قرارات عنها تاني وسالها اذا كانت حابة تبقي موديل بس لشركتهم بس والاعلانات اللي مفيهاش حاجة عريانه او غلط .
مكنش موافق طبعا انها تدخل المجال بس اداها فرصة صغيرة تجرب وهو عارف اخته عمرها ما بترضي بالغلط او بالحاجة الغير مريحة .
___
كان مصطفي هيموت من الغيرة وهو شايف فاطيما تحت عدسات المصورين ..بتضحك وبتتمايل ,,كانت مغرية لدرجة كبيرة جدا ..فرح اما مازن رفض بس دلوقتي مالوش حتي حق يقوله يغير رايه ..او يغير رايها وهو شايفها مبسوطة .حس انه مش هيقدر يكمل كدا لازم يمشي .
ودا اللي قرره وقال لمازن عليه اللي وافق علي مضض لانه بيحب مصطفي وبيعتبره اخوه وسنده في الشركة لكن تحت اصرار مصطفي وافق .
بلغ البيت كله الخبر في يوم الاجازه ..طبعا كانوا كلهم زعلانين جدا ومصطفي كمان كان زعلان بس هو عنده ظروفه الي بسببها لازم يبعد عشان مينجرحش اكتر من كدا .
سالته ثريا _طيب والخطوبة .
_مش عارف يا طنط ممكن اسافر وارجع تاني ..وممكن اتجوزها في الاسبوعين دول واخدها وامشي .لسه مقررتش .
_ربنا يصلحلك الحال يابني .
قطعت الكلام عليهم فاطيما اللي قالت _ورايا سهره النهارده يا ماما ومش هتاخر ..حفلة صغيرة كدا عاملها مدير الحملة وفرصة اقابل موديلز تانيين ومصورين وكدا .
ثريا _مازن انت موافق علي الكلام دا .
مازن _والله يا ماما موافق او مش موافق مش هتكلم ..فاطيما كبيرة وعارفة مصلحتها .
ثريا _طب مصطفي ييجي معاكي .
فاطيما _لا مش عايزة بودي جارد لو سمحتي يا ماما ..انا كبرت خلاص .
__
دخلت سالي لمصطفي وكلمته بصراحة بقي عشان تفض المهزلة دي _انت بتحب فاطيما .
استغرب من كلامها وقالها _لا طبعا دي زي اختي .
_اممممممم يعني لو انا معرفكش من سنين واعرف انك مبتحبش الكذب .هتغير رايك .
_يووه يا سالي عايزة توصلي لاية ..مش كل الناس تقدر تلاقي الحكاية الخرافية اللي انتي لقتيها .في ناس بتحب من طرف واحد عادي جدا .
ضربته علي دراعه بقوة وايدها هي اللي وجعتها _وهي بتحبك يا غبي ..انا مش فاهمه قاعدة وسط اكتر اتنين اغبيا في العالم .
_انتي بتهزري صح ..طومي بتحبني انا .
_ايوا يا غبي .
_انا فعلا غبي ..يبقي كانت غيرانه بقي .دا السبب اللي خلاها متغيرة الايام اللي فاتت .
سالي _صبرني ياربي ..انا حامل وعلي اخري مش ناقصني غباءكم .
__
راحت فاطيما الحفلة ورجعت علي اوضتها والصبح قالتلهم علي خبر _ماما ..جالي عريس ههههههه هو مصور وناجح جدا وهيبقي لينا مستقبل مع بعض ..هو بيستاذن عشان ييجي يقابلكم .
ثريا _والله اخوكي هو اللي ليه الكلمة .
مازن _طيب يجي النهارده عشان مبفضاش باقي الاسبوع .
__
نفس احساسها وقت معرفت انه هيخطب كان احساس مصطفي واكتر دا خلاه  قرب معاد سفره وبدا يصبر نفسه ..اسبوع واحد بس وهمشي ,,معرفش حد لانه مبيحبش الوداع  .
جه العريس احمد الحسيني وكان شاب رائع بكل المقاييس ظاهريا طبعا ..تمت الخطوبة او قراية الفاتحة وبدات تخرج معاه فاطيما كل يوم وهي متشيكة تحت انظار مصطفي اللي نفسه ياخدها يضربها قلمين عشان تفوق او يضرب نفسه بالرصاص عشان يرتاح .
__
جه يوم الخميس وكان مصطفي مسافرالجمعه الصبح ..خرجت كالعاده فاطيما مع احمد واتاخروا ..سمعها باليل بتصرخ وتنادي سمعها لانه تحت في الارضي واوضته جنب الجنينة علي طول ..طلع ولقي احمد سكران وبيتهجم عليها زي الحيوان ..مسكه ضربه طبعا لحد ماكان هيموت في ايده وهي الي منعته يكمل ..قالته _سيبه يا مصطفي ..سيبه .
_خايفة عليه .
مسكه رماه في الشارع وقفل الباب , قالت من غير ميسمعها مصطفي _لا خايفة عليك انت .
رجعلها لقاها بتعيط ومنهاره وفي اعراض صدمه حضنها طبعا وشالها وطلعها اوضتها ..فضل جنبها فترة طويلة لحد ما ارتاحت وبدات تنام .قالتله وهي نعسانه _متسبنيش يا مصطفي .انا خايفة .
مصطفي _انا عمري ما اقدر اسيبك .
راحت في النوم وصحيت تاني يوم علي حركة مش طبيعية في البيت .نزلت لقت ثريا بتعيط وسالي حزينة قالتلهم ايه اللي حصل
سالي _مصطفي مسافر ومازن راح يوصله .
طومي _يسافر ايه ..مش لسه اسبوع .
سالي_لا بقولك مشي .
بصت فاطيما علي ايدها اللي اتملت مايه ..حسست علي عنيها لقت دموعها هي الي يتنزل من غير ما تحس ..شافتها ثريا واستغربت جدا واخيرا فهمت .سبب تغير بنتها .اتدايقت من نفسها انها بعد العمر دا كله محستش بيها ..حضنتها وهونت عليها ولكن دماغ سالي اشتغلت
وشدتها _قومي كدا وبطلي عياط هي طيارته لسه قدامها وقت وممكن نلحقه .(#احببت_العنقاء_امل_العناني)
فاطيما _وان لحقته هعمله ايه .
ضربتها سالي بالقلم _فوقي بقي ..الحقيه  قوليله انك بتموتي بيه ..بتحبيه يا اختي ومتقدريش تستغني عنه ..انا حامل وعلي اخري منكم والله .بيحبك وبتحبيه ودماغكم شبه الصرمة القديمة ..سامحيني يا ماما علي الالفاظ انا حامل .
ردوا فاطيما وثريا في نفس الوقت _وعلي اخرك عارفين .
اخدت سالي عربيتها وراحت معاها فاطيما وثريا اللي كانوا في سباق مع الزمن لكن طبعا زحمة القاهره تفوق كل التوقعات
وصلوا متاخرين واتصل مازن بسالي اللي قالتله انهم رايحين المطار قالها _خلاص الطيارة طلعت .
رجعوا تاني طبعا وسالي قالتلها _روحيله ..هنحجزلك بكرا وسافريله .
فاطيما مقدرتش تمسك دموعها اللي فضلت طول الطريق تنزل من غير سبب ..وصلوا البيت ومازن استغرب من وش اخته وعنيها المتورمه من الدموع قالها بفكاهه _بتحبي مصطفي اوي كدا .
بصتله بقرف _ايوا بحبه ملكش دعوة .
مازن _طيب هو قالي انه سايبلك هدية جوا اوضته .روحي شوفيها .
بصتله سالي باستغراب انه ازاي عرف اخدها علي جنب وقعدوا في الصالون وقالها تستني عشر دقايق بالظبط وهيشرحلها كل حاجة .
___-
دخلت فاطيما اوضته وقعدت علي سريره وحضنت مخدته اللي فيها ريحته ..فجاة لقت صوت طالع من الحمام ولقته قدامها .
اتخضت واتكسفت ووشها احمر ..قعد مصطفي جنبها وقالها _بتحبي مخدتي اوي كدا .
لكمته في جنبه وقامت تمشي .شدها وقعدها جنبه ..وبعدين اتنفس بعمق وبص في عنيها وقالها _بحبك .والاسبوع دا هتجوزك .وهنعيش هنا مع بعض مش مسافر تاني .
بصتله ومتكلمتش لحد ماقالها _مفيش رد .
بصت في الارض وقالتله _وانا كمان .
_وانتي كمان ايه .
_بحبك اوي اوي اوي .عيطت ومسكت وشه بين ايديها وقالتله _متسبنيش تاني ..مش هقدر اعيش من غيرك .
مسح دموعها وقام شالها ولف بيها وهي بتصرخ من الفرحة ...جريت سالي وثريا علي صوت فاطيما لقوا مصطفي معاهم
وقالولهم بصوت فرحان _هنتجوز .
ثريا زغرطت من الفرحة وسالي اتنطتت من الفرحة وبعدين وقفت وبصتلهم كلهم _مش حرام عليكم الخضه دي ولكمت مازن في جنبه وكملت_انا حامل ..
ردوا كلهم بضحك _وعلي اخرك عارفين .
مازن _امتي تولدي بقي . يا مسهل .
__
بعدين..مازن قالها انه مصطفي قاله كل احساسه في الطريق اما ساله هو ليه قرب معاد سفره ولان مصطفي مبيحبش الكدب ومازن اخوه اعترفله بكل حاجة ..بس اللي محدش فيهم يعرفه ان مازن كان متفق مع احمد انه يخطب اخته عشان مصطفي يتحرك لكن الحيوان احمد تمادي وفكرها سايبه ولو كان مازن موجود كان خلص عليه .
سالي _يعني انت كنت عارف ,طيب مقلتليش ليه .
مازن _لنفس السبب يا حياتي ..اللي انتي مقولتليش عشانه .كنت عايز دليل واديني لقيته واستغليته ,اومال مين اقنع مصطفي يرجع عشان اختي الهبله بتحبه هي كمان بس مكسوفه تقول .
_عادي يا حبيبي ..كل البنات بتتكسف .طب مانا كنت مكسوفه .
مازن _ياستي الحمد لله ان الايام دي عدت وبقيتي ليا شرعا وقانونا ووداعا لكسوفك مني .
_لا عادي لسه بتكسف برده بس بداري .
_طيب انتي ادورتي كدا ليه ..الحمل لايق عليكي اوي .
_يووه يا مازن .
_عيون مازن ..قلب مازن .اغلي حاجة في حياة مازن ..
___
انتهت تحضيرات فرح مصطفي وفاطيما بسرعه جدا وتم حجز قاعه الافراح وطباعة الدعوات وتوزيعها ..اتبعتت دعوة فرح ل جيسكا عن طريق الايميل لانها في قائمة الاتصالات عند مصطفي وبكدا عرفت جيسكا انه هيجوز اخت مازن وطبعا اشتعلت نيران الغيرة والحقد والالم جواها فقررت تعمل حاجة تخرب عليهم حياتهم والسعاده اللي هما فيها اتصلت بنرمين اللي هدتها لحد ما يلاقوا فرصه ..
نرمين وامير اتجوزوا لان نرمين اقنعته انها حامل  ولكن كانت الحياه بينهم جحيم ..مشاكل مستمرة علي تصرفاتهم هما ال2 دا غير كذبها من الاساس عليه بحملها وهي مكنتش حامل بس طبعا امير حمد ربنا لانه مش عايز منها اطفال .
امير كان بيتابع اخبار سالي وحملها وشكلها هي وجوزها في المجلات ودخل في حالة اكتئاب لانه ضيع من ايده اكتر انسانه حبته وكان فعلا هيكون سعيد معاها غير انه اتجوز احقر انسانه علي وجه الارض ..انسانه غيورة مبتحبش الخير لحد ومستعدة تعمل اي حاجة عشان توصل للي هي عايزاه ..كان احيانا بيحس بالخوف منها .
وصلت دعوة الفرح لرحاب اللي انضمت للقائمة الاشخاص اللي بيكرهوا مازن السواح ومراته وعيلته كلها ..حست ان مصطفي خدعها علي الرغم انه معشمهاش باي حاجة لكن دا حال بعض الناس بيكون اسهل بالنسبالهم يحقدوا علي غيرهم احسن ما يطوروا نفسهم .
................
اشتكي مازن من سالي بمحبة لانها اهملته واتشغلت مع فاطيما ..دخل اوضته بالليل وهو غاضب ووجه لها الكلام
_وبعدين يا سالي انا مبقتش اشوفك خالص .
_هههههههه معلش بقي عشان فاطيما متبقاش لوحدها .
_طيب وانا ..مانا حاسس اني لوحدي من غيرك .
راحتله وحضنته بمحبه وقالتله _كلها كام يوم وتتجوز وافضالك بقي .
جاتله فكرة مجنونه قالهالها _ايه رايك نروح كلنا نغير جو اسبوعين مثلا كدا مع العرسان هههههه.
_اممممممم مش عارفة بس اظن انهم عايزين يبقوا لوحدهم ..ممكن نروح احنا مكان تاني .
_خلاص هسالهم واشوف هنعمل ايه ..المهم انتي وحشتني .
سالي _وانت كمان يا حبيبي .
_____
كان مصطفي وفاطيما سهرانين تحت في اوضته .كتبوا الكتاب تحت اصرار سالي اللي عارفة بيحصل تجاوزات ايه ومكنتش حابه انهم يغلطوا .
مصطفي _مش مصدق يا طومي انك بقيتي مراتي .
قالتله طومي وهي بتحضنه _لا صدق عشان انا مصدقة ومبسوطه اوي .وبحبك اوي اوي يا مصطفي .
_طب ليه عمرك ما صارحتيني بحبك او حتي عبرتي عنه .
_يوووه صارحت وعبرت وانت مبتحسش .شوية في كندا تقولي صغيرة وشوية هنا مش فاهمني .انا تعبت منك معلش يا حبيبي بس انت غبي شوية في الحجات دي .
_انا غبي .قام يجري وراها وخدوا الدور الارضي كله لف وجري ورا بعض وضحك لحد ما طلعت ليهم ثريا وقالت _مخلاص يا ولاد ,انتو لسه صغيرين ,مش عارفة انام من صوتكم .
بصوا لبعض وضحكوا ووفاطيما دخلت اوضتها ومصطفي راح اوضته هو كمان
___
جاء يوم الفرح وكان الجميع سعيد جدا ومبسوط وكان فاطيما عروسة زي القمر وعزموا صحفيين ونزلت صورهم في صفحات اخبار المشاهير وكانوا فعلا متالقين للغايه ..كان مازن مشغول بالمعازيم وكانت سالي عماله تروحله عشان يقعد معاها مرضيش .
سالي _يا مازن تعالي اقعد معايا او نرقص شوية .
مازن _ترقصي ايه يا حبيبتي ببطنك دي ..وكمان حاضر لازم اشوف المعازيم كلهم زي منتي عارفه معارفنا كتروا اوي ..اتحمليني .
غمزلها وكمل كلامه _وبعدين خلاص عشان تجربي احساسي اليومين اللي فاتوا .
ضربته في كتفه بهزار ومشيت  ..فضلت متابعها لحد مقعدت مع مامته وعنيه بتنطق كلمة بحبك اكتر من لسانه .
خرجه من سرحانه واحد من كبار رجال الاعمال كان بيسلم عليه .
راحت سالي لفاطيما تشكيلها قالتلها طومي _متزعليش يا حبيبتي وبعدين هو راجل البيت بقي ولازم يسلم علي الكل ..اتحمليه النهارده ..او خليكي مبدعه .
سالي _مبدعه ازاي يعني .
طومي_معرفش فكري وانا معاكي عايزين نهيص .
سالي_انت بتتصرفي وكانك مش العروسه ..خليكي وقورة كدا .
فاطيما_لا انا وقورة اوي واعجبك بس فكري كدا وانا معاكي .
_______________
ولنا لقاء في الفصل الجاي ان شاء الله ....
رايكم وتفاعلكم يهمني جدا ..........
#احببت_العنقاء_امل_العناني
تعديل.... هي الناس مبتحطش كومنت ليه،، قله التفاعل دي هتخليني ابطل انشرها والله.. انا اصلا بشوف اللي بيقروا كتير طيب ليه مبتتعلقوش بحاجه تفرحني زي ما انا بفرحكم بالكتابه..... انا زعلانه بجد.. وفعلا بفكر جديا ابطل نشرها