احببت العنقاء امل العناني

الفصل الثامن عشر

الفصل الثامن عشر من رواية #احببت_العنقاء_امل_العناني
رن تلفون سالي فقطع اللحظة الحلوة اللي كانوا عايشينها ..فاق مازن لنفسه وبصلها بقرف _انتي ايه ..اي حد يعرف ياخد منك اي حاجة كدا .مفيش احترام لنفسك .
بصتله سالي وكأنه حط عليها مايه تلج وردت بحزن _انت قصدك ايه بالظبط يا مازن ياريت توضح كلامك .
_يووه ..قصدي ان كان ممكن اخد منك اي حاجة انا عاوزها في اللحظة دي وانتي مكنتيش هتمانعي .
_انت بجد مجنون ..مين اللي نزل ورايا ..مين اللي كل متجيله فرصه بيلمسني ..مين اللي قرب مني دلوقتي ..مين اللي باسني  ..انت مجنون .وعلي العموم انا بعمل كدا ومعايا اسبابي اللي مش هقدر اوضحهالك ..انت بقي سببك ايه .
سابته وطلعت واندمجت في الحفلة ورقصت مع عصام ونبيل ..كانت نجمة الحفلة بجاذبيتها الواضحه .مازن كان هيموت من الغيره لكن معملش حاجة ولا كلمها ولا قرب منها ..كفايه عليه انه بيلعن  نفسه كل لحظة انه بيخون مراته ..
.....
مازن مشافتش سالي تاني لمده شهر او اكتر ..خلاص مبقاش فيه شغل بينهم ومن اخر لقاء بينهم وهي حاسه بالم في قلبها منه ..كانت تتمني يطلب يتجوزها وهي سهي لكن  من الواضح انه بيحبها اوي وبيتعذب اوي علشانها .هي كمان بتتعذب علشانه مش  عارفه تفرح ولا تزعل ..تفرح انه بجد صعب عليه يشوف حد غيرها ولا تزعل لانها كان نفسها يحس انها هيا بعيد عن الشكل .
كلمتها فاطيما تعزمها علي عيد ميلاد يوسف فوافقت سالي طبعا .وطلبت فاطيما منها تجيب فرح من اول اليوم ويقضوا اليوم كله سوا .
راحت سالي وفرح العيد ميلاد وكان يوم جميل جدا ..مشافتش مازن لانه كان في الشغل ..حضر بالليل ومعاه مصطفي واتفاجيء بوجودها ..
عرفت فاطيما جوزها علي سهي ..اللي قال _يااه اخيرا قابلت سهي المشهورة ..انا سمعت عنك كلام كتير اوي .
_اتمني يكون خير طبعا .
مصطفي _طبعا بس عن جمالك وشياكتك بصراحه مالهمش وصف .
فاطيما _وبعدين معاك يا مصطفي ..متحرجهاش .
مصطفي _اهو يا سهي ..من وقت متجوزت وانا ممنوع اقول اي  مجاملة لاي ست غير مراتي .
سالي _والله دا الصح .ربنا يخليكم لبعض .
كان العيد ميلاد مقتصر عليهم وبس ..لكن كانت ايمليا موجوده لانها جت مع مازن بحجة تشتغل معاه فتره وبعدين تروح ..ولبني طبعا اللي وصلت بعد وصول مازن بوقت قصير .
خلصوا العيد ميلاد ..وقعدوا الستات يشربوا قهوه ويتكلموا ..بصلهم مازن وحس بالحزن لانهم كدا نفس قعدتهم ايام وجود مراته .حس ان سهي استبدلت مكانها في قلوب عيلته زي ما عملت بالظبط معاه .
جتله فرح _عمو مازن ..العب معايا .
_معلش يا حببتي ..مش فاضي المرة دي ..هخلص شوية شغل وهجيلك .
_بس ..بس هنكون روحنا .
_طيب معلش بلاش المرة دي وهبقي اخدك يوم تاني افسحك اتفقنا .
_يااااااااي ..طيب امتي .
علي مازن صوته بنفاذ صبر _خلاص بقي يا فرح .روحي لماما .
جت سالي علي صوته وبرقتله وقالت لفرح _روحي يا حبيبتي كلي كيك مع يوسف بسرعه .
راحت فرح وبصت سالي لمازن بغضب شديد _انت ازاي تزعق في فرح بالطريقة دي .
_بقولك ايه يا سهي انا مش ناقصك .وبعدين مزعقتلهاش .هي طفلة زنانه .
_لا مهاش زنانه ..هي بتتعامل علي حسب سنها .وهي بتحبك .فهمت .
_وانا كمان بحبها بس مشغول وهي مش راضيه تحل عني .
_بالراحة علي نفسك بس .
سابته ومشيت وهو اتغاظ منها جدا .,دخل مكتبه يشتغل مع ايمليا بس عقله مع السهرة اللي برا وخصوصا ان اصوات ضحكهم وهزارهم واصله عنده .مكنش عارف يركز ابدا .لاحظت ايمليا واستئذنت ومشيت .
ودعها لانها كانت هتسافر كندا خلاص لان يبدو انها مش هتنجح تميل مازن لصفها وهي بتعرف امتي تنحسب من معركة خسرانه .
ودعته قدام الكل وحضنته بشده وقبلته من خده ومشيت ..طبعا سالي كانت غيرانه جدا بس مبينتش ..قعد مازن معاهم ساكت بيراقبهم وبيدعي انه يرجع يحس بالسعاده جنبهم ..قعد جنب فرح علي الارض وحضنها وصالحها ولعب معاها هي ويوسف بلعبه المكعبات بس طول الوقت وهو بيلمس علي شعرها ومقعدها علي رجله وكان احساسه انها بنته واصله بس هو لسه مش شايفه .نزل مصطفي كمان يلعب مع العيال وفاطيما وسالي بيفكروا في ازواجهم الرائعين ..ولبني زعلانه  بسبب انها مخلفتش .استئذنت لبني ومشيت ..وقررت سالي تمشي لكن فرح عيطت وبهدلت الدنيا عشان مش عايزة تسيب يوسف وعمو مازن .
قعدت سالي شوية لحد ما يوسف نام ..وفرح كمان نامت في حضن مازن ..حاولت تاخدها سالي منه عشان تروح بس هو اصر يوصلها للعربيه .
مازن _خليني انا اوصلك انتي وهيا وارجع بتاكسي .
سالي _اممممم لا مش مشكلة ..انا هسوق عادي .
اداها فرح و وقالها  _مع السلامه يا سهي .وابقي طمني فاطيما بوصولك وهي هتقولي .(احببت العنقاء امل العناني )
_لو كنت عايز تتطمن عليا ..اكلمك انا اول ما اوصل .
_متصعبيهاش يا سهي بالله عليكي .
_انت اللي مصعب كل حاجة علي نفسك .مش انا .سلام .
............
حاول نبيل يتقرب من سالي كتير جدا وهي بتصده ..كان جواه حاجة مهاش فاهماها ..جه عصام في يوم يقولها
_نبيل اتقدم ليكي علي فكرة .
_ههههههه اتقدم لواحده متجوزة ..يا فرحتي .
_امممم منا قلتله انك مش هتوافقي لانك متفرغه لبنتك وبس .
_كويس ..بس غريبه هو كان بيحب سهي زمان ولا حاجة .
_امممم علي ما اعتقد لاء ..بس هو بيحبك انتي يا سالي ..او علي الاقل انجذب ليكي ..بنتي انا كانت انطوائية وموت والدتها قدام عنيها اثر عليها جدا ودخلت في اكتئاب حاد ..عاشت طول الوقت بالادوية وانا مكنتش برفض لها طلب .حتي جوازها من احمد .فعشان كدا اقدر اقولك ان نبيل استحالة يكون حبها.هو بيحبك انتي .
_ معلش يا عصام ..ربنا يرحمها هي اكيد في مكان احسن بكتير .وبالنسبة لنبيل انا هكلمه ان الموضوع منهي بالنسبالي وهقوله علي السبب الرئيسي عادي عشان ميفضلش حاطط امل ..هقوله اني بحب مازن السواح .
_هههههههه انتي بقيتي جريئة اوي .
_انا مش عارفة اعمل ايه ...عايزة اعمل صيت ان انا وهو مع بعض عشان يبطل يلف حوالين نفسه ويواجه قلبه بالحقيقة .بجد زهقت .
_هههههههه انا مش عارف بجد ..المفروض تتبسطي لانه لسه بيحبك انتي يا سالي ومش قادر يتخلي .
_بس لازم يتخلي يا بابا ..لازم يشوفني انا ..مش بوشي بس ..باحساسي ومشاعري .انا بلف في حلقه مفرغه ومش عارفه احلها ازاي .
_هتتحل متقلقيش .مسيره يواجه نفسه زي ما بتقولي .
سابته وطلعت اوضتها ..وكلمت فاطيما .تسال عنهم وتحاول تعرف اي اخبار عنه .بقالها شهر مشافتوش ..والوقت بيعدي كانه سنه .طلبت منها فاطيما وكانها حاسه باحساسها انها تجيلهم يقعدوا سوا بس سالي رفضت وقالت لها انهم اللي ييجوا عندها .
فاطيما _ يا سهي .تعالي عشان تشوفيه .
_اشوف مين يا طومي .
_هههه هيكون مين يعني ..مازن اخويا .
_ومين قالك اني عايزة اشوفه .
_انا عارفاكي .معرفش ازاي قريت شخصيتك بسرعه ممكن لانك بتفكريني بسالي .بس هو كمان مكتئب وحزين اليومين دول .تعالي ممكن اما يشوفك يفك .
_انا مستغرباكي ..مش المفروض بتحبي سالي .عايزاه يعرف واحدة تانية .
_بصي سالي كانت اختي وحبيبتي فوق ما تتخيلي .بس بقالنا تقريبا تلات سنين اهوه مفيش اي اخبار عنها ..انتي متعرفيش مازن لف قد ايه ..ودور ازاي عليها ..مسابش اي مستشفي ومعاه صورتها وشاف البيانات بنفسه في كل مكان بس ولا اثر ..تعرفي انه اتخطف مرة .
_ايه ..ازاي .
_ياستي شوية بلطجيه قالوله عندهم معلومات عنك وبتاع وهو كان بيتعلق باي قشاية ..راح وخطفوه لحد مداهم خمس مليون جنيه .وكمان الشرطه شكت فيه فتره بس ملقوش دليل فنسيوا القضيه ..هي مشيت عادي من غير جواب من غير وداع ..اختفت .ومازن مش فاكر اي حاجة خالص ليلتها غير انه راح لجيسكا .وروح ملقهاش .افتكرها معايا لانهم كانوا زعلانين شوية .بس يا ستي .فاعذريني لو انا هشوف اخويا سعيد مرة تانية .واشوف ضحكته اللي مبقتش تطلع اصلا الا بالعافيه .هتيجي بقي .
_لا معنديش حجه .انا ليا كرامه برده .
_يووه عليكي وعليه .انا صدعت منكم .
______
نادي عليها عصام وقالها _تعالي شوفي دعوة عيد ميلاد فرح .
_ايه ..انت هتعمل حفلة كبيرة ولا ايه .
_ايوا طبعا مش حفيدة الشناوي وبقت تلات سنين .لازم احسن حفلة لاحلي اميرة .
_مش عارفة يا عصام .مش عايزة الفت الانظار بس .
_لا ابدا خلاص عارفين انها بنتك .
وافقت سالي وكان قلبها مش مرتاح ابدا للي هيحصل .. بس وافقت عصام لانها عارفة مقدار حبه لفرح .
اتصلت بفاطيما وقالت هتجلهم بحجه انها توديلهم دعوات العيد ميلاد .
..........
راحت سالي وفرح واللي فتح لهم الباب كان مازن ..كان باين عليه التعب والارهاق بشكل مش طبيعي ودقنه طويله عن العاده ._ازيك يا مازن ..فاطيما موجوده .
جريت عليه فرح تحضنه وهو حضنها بمحبة شديده _ايوا اتفضلوا .
دخلت وقعدت وجابتلها ام جنه عصير وفرح مسابتش مازن طبعا .سالتها سالي عن الاولاد واطمنت عليهم لكن حست انها غلطت لان محدش يعرف انها تعرف ام جنه وعيالها .بس حمدت ربها انها كانت لوحدها علي ما تنزل فاطيما .
نزلت ليها فاطيما وثريا بسرعه ورحبوا بيها جدا ..وكان مازن بيلعب برا مع الاولاد كلهم فرح ويوسف وجنه وحسن .
كانت صوت ضحكته طالعه فقالت فاطيما _مش قلتلك ..وجودك بيغير موده .
اتكسفت سالي ..فردت ثريا _عيب يا فاطيما .اسكتي .
طلعت سالي الدعوات وادتهالهم ووعودها انهم اكيد هييجوا العيد ميلاد .دخل مازن ووراه العيال وهو بيضحك ..قعد علي الكرسي بارتياح وعمال ياخد نفسه ..بصتله سالي وضحكت وقالت _كنتو نايمين وجينا فوقناكم ..نجيلكم كل يوم بقي .
ردت ثريا _ياريت .بس فعلا فرح بنتك تبارك الله روحها حلوة اوي .وطفلة امورة اوي .بتفكرني بمازن وهو صغير بالظبط تقريبا نفس حركاته وشقاوته .كنت اتمني اشوف فرح بنته بس بنتك عوضتني شوية عن غيابها ..ابقي هاتيها كتير .
ردت سالي بارتباك _حاضر ..ان شاء الله ..انا بس مبحبش اتقل .
قالت الجمله الاخيرة وبصت لمازن اللي كان بيبصلها اصلا .كانت عنيها بتقوله _وحشتني .غمض عنيه وفتحها وقام يلعب تاني مع العيال.
..جه وقت انهم يمشوا ..طلعت الجنينة تجيب فرح ..واتبسطت وقت ما شافت الجنينة ..وافتكرت كل شجره فيها .وقفت جنب شجرة ورد حمرا ..هي اللي كانت جيباها وبترعاها كل يوم ..جت تقطف وردة شوكة دخلت جامد في ايدها ..صوتت ورمت الورده .
جه مازن بسرعه ليها وشاف الدم خارج من ايديها ..مسحها في التيشرت بتاعه وطلع الشوكة بفمه.وقبل ايديها مكان الشوكة .
قالته _وبعدين يا مازن .
_بعدين ايه .
_الحركات دي وهتيجي تقولي انا اللي سهله وبتاع بعدين .
_هو انا عملت حاجة اصلا .انا بوست الواوا ههههههه .
_هاهاها ايه الظرافه دي ..علي العموم شكرا .
سابته وجت تدخل تاني راح ماسكها واستخبي ورا شجرة كبيرة وحضنها ..كانت حاسة انه هيكسر عضمها .كانه بيحضنها وبينتقم منها في نفس الوقت . سابها بسرعه ومشي ..كانه بيعاقب نفسه .
خدت فرح ومشيت ..روحت البيت وقعدت علي الصوفا وفضلت تحسس علي ايدها مكان قبلته.عصام لاحظ وابتسم بس
.......
جه يوم العيد ميلاد ..ولبست سالي وفرح نفس لون الفستان مع اختلاف شوية في التصميم ..كان شكلهم يجنن ..كان الكل مبسوط في الحفلة .جه مازن وعيلته ولبني وجوزها وقرايب عصام .احمد طليق سهي  كان موجود متعرفش اتعزم ازاي..بصت لعصام فجالها وقالها _معزمتوش ..معرفش اي اللي جابه .
حاول نبيل طول الوقت يقرب من سالي وفرح بس الاخيرة كانت مهاش عايزة تعرف حد غير مازن اللي عماله تروحله وتديله كل حاجة .ووقت ما طفوا الشمع ..خلت مازن يشيلها وعلي جنب سالي وعلي الجنب التاني عصام .
كان نبيل غيران جدا بس حاول ميبينش علشان ميلفتش النظر .قطعوا التورته وغنت سالي مع فرح اغاني اطفال والكل ضحك وكانوا مبسوطين .
كان مازن واقف معاها وفرح بتاكله في فمه..جالها احمد وقالها بحقد _انتي عاملة الحفلة دي كلها ليه ..لبنت مهاش بنتك اصلا .كنتي وفري الفلوس دي لحد محتاجها .المفروض البنت دي تبقي مكانها دار الايتام .
اتخضت سالي من كلامه .كان مازن هيضربه فترجته _ارجوك يا مازن ..مش عايزة فضايح .
سالي _اطلع برا بيتي يااحمد .اطلع برا حياتي .
_اطلع يا بنت ...... بتطرديني يا .........
قاطعه مازن ومسكه من ايديه ورماه برا وضربه فقاله احمد بغيظ _الله يلعن الليله اللي لقينا فيها الوليه الحامل .اللي جابتلي البت دي .كان زمان سهي معايا لحد دلوقتي ..وكنت انا ملك القصر دا .وليا مقامي في الشركة .
ضربه مازن تاني فطلعت سلسله من رقبته فيها دبلة دهب فيها فصوص الماظ ..اتسمر مازن مكانه ونتشها من رقبته ..فضل احمد يحاول ياخدها منه ..بصلها مازن من جوا واتخشب مكانه كان مكتوب فيها (مازن سالي للابد ).
ضربه تاني وقاله _جبتها منين دي .
_متضربش بقي خلاص بوظت وشي الله يخربيتك ..خدها لو عجباك ..هي كدا الكحكه في ايد اليتيم عجبه .
_بطل كلام بقولك وقولي جبتها منين .
_خدتها من ايد الولية اللي لقيناها مرمية ..ام البت اللي سهي اتبنتها .
حاول مازن يجمع افكاره ويهدي نفسه باقصي هدوء _طيب احكيلي بقي علي اللي حصل يومها بالظبط .
حكاله احمد وبعدين قاله _وخلاص يا سيدي الست دي ماتت وسهي خدت بنتها وربتها زي ما انت شايف .المهم يعني انت هتستفاد ايه من الموضوع .
ركب مازن عربيته .وفضل سايق وهو بيعيط ..مش عارف يمسك اعصابه ..وقف علي جنب وهو منهار..عدي عليه الوقت لحد ما هدي ..اتصل بفاطيما وقالها تروح هي ومامتها .
راح تاني لبيت سالي متاخر جدا ..اتخض عصام وفتحله لقااه في حاله نفسية سيئة جدا .طلب منه يكلم سهي ..وافق عصام بس رأفة بحاله .
نزلت سالي مخضوضة _مازن ..مالك .حصل حاجة .
قالها بضعف _فرح بنتي صح .
اتخشبت في مكانها هي وعصام ..هزها مازن _قوليلي ..فرح بنتي صح ..انا خسرت مامتها ..مش هخسرها هي كمان .
رد عصام _احنا مش فاهمين حاجة يا مازن ..اهدي بس وقولنا تقصد ايه .
حاولت سالي تتدراك الموقف ..قعدوا فحكالهم مازن اللي احمد قالهوله ووراهم دبلتها .
شافتها ورجعت ليها الذكريات تاني ..مكنتش عارفة تقول ايه او تتصرف ازاي .فعصام رد بدالها .