احببت العنقاء امل العناني

الفصل الثاني والعشرون

اللهم انك عفو كريم تحب العفو فاعفو عنا يارب العالمين
باقي الفصل الحادي والعشرون من #احببت_العنقاء_امل_العناني ..الفيس بوك مرضيش ينزلهم
مازن _ومين قال ان مرحب بيكي هنا .
_انا حاسة اني مرحب بيا هنا .
دخلت ام جنه تساعدها ..فتحت سالي الدولاب ولمست كل هدومها القديمة بمحبة وشوزاتها واكسسوارتها ولقتها كلها نضيفة ..شكرت ام جنة جدا .لان حاجتها كانها مجاش عليها زمن .
طلعت اللبس وبصت عليه وقررت اي اللي تحتفظ بيه واي اللي تتبرع بيه ..طلع مازن البلكونه بعد ما دخلت مامته وفاطيما وام جنه وشغلوا اغاني وهما بيظبطوا الاوضه .. زهق بعد ساعه .دخل ..لقاهم لسه مخلصوش ..دخل الاوضه التانية شاف بنته نايمة زي الملاك ..اخدها في حضنه ونام .كان زعلان طبعا بس حس ان حياته رجعت نورت من تاني .
خلصت سالي ورتبت اوضتها وظبطت دولابها ونزلت الزيادة تحت عشان تفتكر تتبرع بيهم .
طلعت اخدت دوش ولبست هدومها وبدات تدور علي مازن ..لقته نايم وفرح في حضنه ..ابتسمت لهم وضحكت ودخلت تنام هي كمان .
دخل مازن ومعاه فرح بعد ما نامت ..أتخضت سالي من عياط فرح فقال مازن _عايزاكي مش عاجبها حضني يا ستي .
سالي بسعاده _طبعا وهو فيه بعد الام . اخدتها في حضنها وهدتها بمحبه لحد ما نامت فرح تاني .نام مازن جنبهم وقال
_هي متعوده تنام معاكي علي طول ..كدا مش هينفع 
_مش هينفع ليه بالظبط .
مردش عليها واداها ضهره ونام ..كانت حاسه انه مش نايم بس طنشته وحاولت تنام هي كمان ..فضلت نص ساعه تتقلب في مكانها لحد ما رن تليفونها .
بصت لقتها مديرة منزل عصام ..ردت سالي بسرعه .
مديرة المنزل _الو يا سهي هانم ..تعالي بسرعه دلوقتي ..عصام بيه ..تعيشي ..تعيشي انتي .
سالي _ايه ..انتي بتقولي ايه .
عيطت مديرة المنزل ..قالتلها سالي _انا جاية حالا ..
قامت بسرعه زي المتخدرة لبست هدومها ..التفت مازن ليها وقال _انتي راحه فين .
ردت سالي ببطء وكان الكلمات مش راضية تخرج منها _عصام ..عصام مات .
_________
الفصل الثاني والعشرون من #احببت_العنقاء_امل_العناني
راحوا القصر استقبلتهم مديرة البيت وهي بتعيط وقالت _انا صحيت اصلي الفجر يا ست سهي لقيت النور والع .دخلت لقيته علي سجادة الصلاه ..كلمته مردش .حركته عرفت انه مات .
كانت بتكلمهم وهما في طريقهم للمكتب ..وقفت سالي علي باب المكتب بصت لمازن وهزت راسها بمعني مش هتقدر تدخل ..دخل مازن وشاف نبضه ونفسه وعرف انه مات   .. كان اتصل مازن بالاسعاف وهما في الطريق ..وصلوا بعدهم بخمس دقايق بس .
جم ودخلوا بسرعه ..فضلت سالي واقفه قدام باب المكتب مش قادرة تتحرك ..شالها مازن وقعدها علي كرسي في الصالون لحد ما خلص الدكتور واعلن وفاته ..فضلت قاعده مكانها والدنيا اتقلبت واخواته حضروا  واولاد اخواته وزوجاتهم وعيلته كلها .
فضلت الناس تكلمها وهي حست ان عقلها متخدر ..مش قادره تعمل اي حاجة او تحس باي حاجة ..
خلصوا اخوات عصام الاجراءات بسرعه بعد ما جه  كم دكتور تانيين وفحصه عشان يتلاشوا يكون سبب موته مش طبيعي .واول ما اتاكدوا بدؤوا اجراءات الدفن .
دخل مازن يوشوش  سالي _تعالي شوفيه قبل  ميغطوا وشه .
هزت راسها بمعني لاء ..قالها مازن _متاكده .
جت فرح مع ثريا وفاطيما وجريت عليها _ماما ماما ...مين دول فين جدو .
فاقت سالي مع كلام فرح وكأنها فوقتها من التخدير اللي كانت فيه ..جريت عليها ..بس فرح سبقتها لفوق ..شال مازن فرح قبل متدخل الاوضه ..
وفقت سالي قدام باب الاوضه واخوات عصام قالولها تدخل تشوفه ..مجرد خطوات حست وكأن رجليها فيها رمل ..تقيله ..الكل كان بيراقبها وعمالين يصبروها ..مكنش عندهم اي شك انها بنته من دمه لان منظرها حتي من غير بكاء وصدمتها كانوا كافيين .
بصت لوشه ولمسته بايديها وقبلت جبينه وقالتله _سامحني عشان مشيت .
غريبه ازاي ممكن الدموع تتحجر في العيون كانها بتعاند العقل اللي مش قادر يصدق فراق شخص عزيز .والقلب اللي بيبكي بدال العين .
دفنوه ومشيوا وهي بقيت ..فضل مازن معاها بيراقبها من بعيد حس انها عايزة تكون لوحدها ..فضلت تقرا قران لحد مخلاص الليل حضر .
راحلها مازن وقال _خلاص بقي يا سالي ..ليلت .تعالي .
قومها ومشيوا ..وشريط ذكرياتها مع عصام بيمر قصاد عنيها ..فرحته بيا وفرحته بفرح ..اهتمامه وعطفه ومحبته ..فتحلها بيته وقلبه .
قالت بصوت منخفض _انا قتلته يا مازن ..مكنش لازم امشي .ليه مستنيتش الليلة دي ..ليه مشيت ..
شالها ووداها عربيته ..ومشيوا ..
حضرت العزا وسلمت علي ناس كتير متعرفهمش ..وقابلت وجوه كتير وهي غايبه في عالم لوحدها ..عنيها بتبص علي كل ركن من البيت .والذكريات بتهاجمها .
خلص العزا والكل مشي وفضلت هي ومازن ولبني وثريا وفاطيما .
قال مازن _يالا يا سالي عشان نمشي .
قالت _انا محتاجة افضل هنا النهارده .
ثريا _لا يا حببتي ..بلاش تبقي لوحدك .
رد مازن _يالا يا ماما عشان اوصلكم ..خليها براحتها .
نامت فرح اللي مبطلتش عياط طول اليوم عايزة جدها بس قالولها سافر .وخبتها فاطيما وقت خروج النعش .
وصلهم مازن وقال لمامته _خلي فرح في حضنك النهارده يا ماما ..بلاش تبقي لوحدها .
.....
مشيوا ..البيت بقي فاضي ..دخلت اوضته ..دخلت كل ركن كان بيدخله ..خلاص مبقاش موجود ..راحت لمكتبه ..دخلت عليها مديرة المنزل وقالتلها _يا ست سهي .والدك كان سايب معايا حاجة ليكي بعد ما مشيتي امبارح ..قالي لو جراله حاجة اديهالك .خرجت ظرف وادتهولها وخرجت .
قلبت سالي الظرف يمين وشمال ..كان مكتوب عليه _الي بنتي سالي .
فتحته لقت جواه فلاشه .قعدت علي كرسيه وفتحت اللاب توب بتاعه ..شافت صورتها هي وفرح ..خلفية اللاب توب .نزلت دموعها من غير ما تحس ..بصت لانعكاس صورتها في الشاشه وقالت لنفسها _هو انا بعيط ليه ..انا لازم اتعذب شوية كمان عشان سبته .
حطت الفلاشه وشغلت الفيديو الموجود عليها .
(امممم ..الكاميرا دي شغاله ولا ايه ..طيب شكلها اشتغلت ..احم احم انا عصام الشناوي ..ودي رساله لبنتي سهي ..اقصد بنتي سالي ..الاب مش اللي خلف ..الاب هو اللي ربي ..معلش انا مش عارف اقول ايه ..انتي جتيلي هديه من السما علي اخر ايامي .تسلم تربيتك وتسلم اخلاقك اللي انتي ربيتي نفسك عليهم ..انتي متعرفيش انا كنت فخور بيكي ازاي ..مش علشان في وش سهي ..لا ابدا ..عشان نفسك ..عانيتي كتير اوي ,ومازلتي خلوقة وشجاعه وبتحبي الخير للكل .
انتي عارفة انا كنت بحس بالفخر لما حد يتعامل معاكي وييجي يشكر فيكي ..بحس بالفخر كأني ابوكي .مش عايزك تزعلي لو جرالي حاجة ..انا كنت بدعي ربنا كتير اوي بقالي فترة وبصلي قيام كل يوم عشان مقعدش ليله تانية في القصر الكبيردا لوحدي .فلو ربنا سبحانه وتعالي افتكرني النهارده هيكون اتقبل دعايا ودا هيكون احسن يوم عندي ..هروح للي بحبهم .بصي انا عايزك تبقي شجاعه كدا ..وترمي الحزن ورا ضهرك .وانا متاكد انك هتشوفي ايام كتير حلوة جايه ..انا عمري ما بطلت ادعيلك يا سالي وربنا هيتقبل مني ان شاء الله .قلبي اتقسم نصين وقت ما شوفتك ماشية بس دا الطبيعي حتي لو كنتي بنتي سهي واتجوزتي اكيد هتروحي بيت جوزك .عشان كدا متزعليش .خلي صورتي مع فرح علي طول عشان تفضل تفتكرني ..ربنا مرزقنيش غير ب بنت وربنا توفاها بقي ..فانا عايزك تدعيلي علي طول ..انتي الولد الصالح الي اتمنيه ولقيته من الدنيا يا حببتي .........اسف مش قصدي ابكي بس غصب عني ..سامحيني لو زعلتك .انتي فرحتيني اوي في اخر ايامي ..حبيت المناكفة معاكي صدقيني ..حبيت وقت ماقولتيلي يا بابا من غير متقصدي ..دي كانت احلي ميت مرة وانتي قصداها ..حبيت عنادك ..حبيت وجودك انتي وفرح في حياتي ..متزعليش اذا توفاني الله ..كله مكتوب يا حبيبتي انا انسان مكنش يعرف للحياة حس ولا قيمة ..نورتيهالي تاني ..خلاص كفاية بقي ..استودعك الله )
سمعت سالي الفيديو مرة واتنين وهي بتلمس الشاشة كانها بتلمس وشه ونزلت دموعها زي الشلال مش عارفة تتحكم فيها ..مفيش اصعب من عذاب الفراق لانه مش بس مش هنشوف اللي بنحبهم تاني .دا بيفكرنا اد ايه احنا وحياتنا وكل شيء في الدنيا لا يساوي شيء وان الموت هو فعلا الحقيقة الوحيدة اللي كلنا لازم هندوقها وياريت حد كان مات ورجع تاني كان فك شفرات العالم المجهول الذي لا يعلمه الا الله و اكيد دا الافضل ومن رحمة ربنا سبحانه وتعالي .
دخل مازن الاوضه علي صوت شهقاتها وبكائها ..كان وصل عيلته ورجع لها ..كان من المستحيل يسبها لوحدها .بغض النظر عن خلافه معاها لكن كل ذرة الم كانت بتحسها كانت بتقطع في قلبه .
حضنها وهي مازالت بتبكي ...سابته وقالت من دموعها وهي بتصرخ _انا مخنوقة يا مازن .
طلعت للجنينة وفضلت تحاول تتنفس ..مش قادرة تصدق انه خلاص مبقاش موجود ..جابلها شال وحطه علي كتفها وفضل حاضنها من كتفها ....قالها _خلاص يا حبيبتي ...اهدي .
لكن العكس اللي حصل كل ما يقولها اهدي تزيد بكاء والم وحزن ..جابتله انهال  مديرة المنزل عصير لمون ..حاول مازن يشربها لكن مقدرتش ..
فضلت وقت طويل بتعيط لغاية مبطلت ..اخدها مازن وطلع اوضتها وحاول ينيمها ...
حضنها وقام يجيب مايه مسكت فيه زي الطفل الصغير _متسبنيش يا مازن .
حضنها تاني وفضلت يقرالها قران لحد ما نامت وهو كمان نام ..صحي مازن فجأة علي صوت رعشة وهي واخدة وضع الجنين وجسمها كله بينتفض وجبينها مولع وجسمها عرقان ..كانت درجة حرارتها مرتفعه جدا ..
ملي البانيو مايه ودخلها  .. وبعدين لبسها  وكانت جثة هامده مش قادره حتي ترفع ايديها ..اتصل بالدكتور وجاله اداها حقن حرارة ومهدئات .
كان من الواضح انه اللي حصلها نتيجة صدمتها من  وفاة عصام
اتصلت والدته بيه بتقوله فرح عايزة تجيلهم لكن هو منع اي حد يروحلهم .
فضلت سالي حرارتها مرتفعه ..تنخفض مع الحقن وترجع تاني مع هلوسات .
كل متنام تتكلم في نومها _متمشيش ..خليك ...عصام ...سبوني ..هموت ..فرح ..متضربنيش .
وكلام كتير مقدرش مازن يفهم منه اي حاجة ..كلم الدكتور تاني لكنه طمنه  وقاله اذا استمرت لليوم التالي في الحاله دي لازمها مستشفي .
فضل مازن يحضنها ويكلمها ويهديها حتي في نومها علشان يخرجها من حالتها _انا معاكي ...مش هسيبك ابدا ..وفرح مستنياكي ..لازم تفوقي عشان فرح .
حضر نبيل بالليل يشوفها ويطمن عليها ..اتفاجيء بوجود مازن اللي قاله انه وسهي اتجوزوا قبل وفاه عصام .ساب لسالي الفرصه انها تشرحلهم موقفها بنفسها .
مرضيش يخليه يطلع يشوفها في حالتها ..مشي نبيل ..واخد مازن الاكل وطلع بيه يحاول ياكلها اي حاجة ..لقي حرارتها نزلت شوية فحمد ربنا وبدات تفوق ..
بصتله وشاورته وقالت بصوت مبحوح _مش ..قادرة ..اتكلم .
جابلها مشروب سخن وحاول معاها تشربه لحد ما بدات تتكلم بالراحة ..اكلت ملعقتين شوربة خضار ونامت تاني ..سابها نايمة ..
نامت يوم كامل متواصل ..زي عادتها بتهرب من مشاكلها بالنوم .
صحيت علي صوت قران وشيوخ بتقرأ قران واصوات في القصر ..شوية ودخلها مازن ولابس بدله سودا ..
قالها _اخوات عصام عاملين عزا تاني وجايبين شيوخ ..وناس كتير اوي تحت .انا طبعا مقدرتش اقولهم اي حاجة ..لو هتقدري تلبسي وتنزلي ..ماما وطومي واصحابك تحت وناس كتير عايزين يعزوكي بيسالوا عليكي.عايزاني اساعدك او ابعتلك حد يساعد ك.
هزت راسها بمعني لاء .
فضل معاها ومازن وساعدها علي قد ما قدر .
نزلت سالي وهي لابسه فستان اسود طويل واكمامه طويلة ومازن مسندها ..جريت عليها سلمي اول واحدة تحضنها وعزتها .قعدت سالي وكان منظرها يخض اي حد كان يعرفها قبل كدا ..وشها حزين كانها كبرت مية سنة .جات ليها فرح وقعدت جنبها .ومتكلمتش وكانها حاسة بيها .
بدات تسرح مع جمال صوت الشيخ ..وقلبها يرتاح من اي حاجة تعباه .غمضت عنيها وفتحتها وكانها شافت عصام قدامها كعادته جاي من بعيد بيبص عليها وبيبتسم ..لو كانت الاشباح موجوده كانت صدقت فعلا انه روحه سعيده ومعاها .
رفعت ايديها وكانها بتسلم والكل شافها وعمال يتعجب ويقول _لا اله الا الله ..ربنا يقويكي ويصبرك .
جتلها ثريا كعادتها وحضنتها .فضلت سالي في حضنها مش عايزة تسبها .كان نفسها تقولها _بحب حضنك اوي يا ماما ثريا ..كانك بلسم علي جروحي ..ربنا يخليكي ليا .
بصت حواليها وحمدت ربنا انها مش لوحدها . مازن وبنتها وثريا وفاطيما وسلمي ولبني ..جنبها عيلة وناس بتحبها من قلبهم..حست انها محظوظة جدا وان حياتها هتبقي افضل او حياتها اصلا حلوة بوجود الناس دي فيها ..من كم سنه كانت وحيدة تماما والنهارده جنبها حبيبها و اصدقائها وعيلتها ..جه مازن وحط في ايديها عصير ولمس وشها بايديه باريحيه قدام كل الناس وقبلها من جبينها وقالها _حاولي تشربيه عشان خاطري . وبص لمامته وكلمها _خليها تشربه يا ماما .
بصتله وفي عنيها  معاني وكلام كتير ..اللي تعرفه انه احساسها بيه تعدي الحب والعشق ..عرفت انها طول ما هو معاها وفي ضهرها مش هتكون وحيده .يمكن هو السبب الوحيد لاحساسها بانها هتعدي الازمة دي بخير .
خلص العزا والناس مشيوا ..وجاتلها سلمي حضتها تاني وكانها مش عايزة تسبها فعلا ..سلمي طيبة وحنينة زيها .صحيح شخصياتهم مختلفه لكن احساسها بيها  مفيهوش اختلاف ..احساس جديد عليها ..دي اختها قلبا وقالبا .وكل يوم بتتاكد انها بتحس  بيها من غير اي كلام ..
....راح الكل لبيته ..بس قبل ما تمشي سالي .دخل ليها اخوات عصام وطلبوا يكلموها في مكتبه .
فضل معاها مازن وممشيش ..قال   محمود الشناوي _طبعا يا سهي انا وعمك صلاح عايزيين ننتهي من الموضوع مرة واحده احنا مش عايزين نفتح موضوع ا لورث والكلام دا ..كل حاجة لعصام اخويا الله يرحمه ليكي ولبنتك ..احنا كلنا عندنا اللي يكفينا وزياده .
بص لايديها اللي حضناها ايدين مازن وقال _نبيل طبعا قالنا علي جوازك ..واحنا بنقولك الف مبروك وربنا يسعدك ومفيش اي حاجة هتتغير ومكانك في الشركة موجود وكل حاجة ليكي زي ما قلتلك .
اخدت سالي نفس عميق وقالت _انا طبعا مقدرة جدا موقفكم المحترم بس الحقيقة انا ماليش ولا قرش في فلوس عصام الله يرحمه لانه مش والدي ..انا سالي شريف الهواري مرات مازن اصلا ..حصلتلي حادثة وناس اذتني جامد جدا وبعدين سهي الله يرحمها انقذتني وكان فيه دكتور بيعمل عملية مجنونه كدا .اداني وشها بعد ما اتوفت  لان وشي كان اتشوه جدا وهكذا حفاظا عليا وعلي بنتي عصام اخدنا عنده .بس من ناحية الحب هو ابويا فعلا ..اللي هفضل اتكلم عنه وادعيله انا وبنتي لكن الفلوس والقصر والشركة صدقني انا اصلا مش محتاجة ..اظن تعملوا بيها حاجة لعصام افضل ..كان طول عمره بيشتكي من الوحده ..افتحوا القصر دا واعملوه دار ايتام .خلوا اطفال تلعب وتعيش وتحب الحياة في مكان كان مصدر حزن السنين اللي فاتت ..طلعوا فلوسه صدقات للناس ..ساعدوا باسمه ناس كتير ..فيه فعلا ناس مستواها تحت الصفر .انا كان ممكن افضل مخبية ..لكن صدقني مش هقدر تاني .عارفة ان الكلام دا صدمة بالنسبالكم لكنه الحقيقة .واتمني محدش يعرف الاخبار دي لان اللي اذوني لسه موجودين .
ولع محمود الشناوي سيجاره بيحاول يستوعب الكلام لكن صلاح قالها _عندك اثبات علي الكلام دا .
فتحت سالي اللاب توب وسمعتهم فيديو عصام ..وغصب عنها عيطت تاني وحست انها هتدخل في نوبة بكاء زي اللي حصلتلها يوم وفاته ..
حاولت تتماسك ..لحد ما خلص الفيديو وهنا اتكلم محمود بعد مشاورته لصلاح وقالها _زي مقولتلك انتي بنته ومن حقك كل حاجة حتي لو مش واخدة اسمه ..انتي هتعرفي تعملي اللي احنا هنكسل نعمله .عصام اخويا ابدا عمره ما اتاخر عن اي حد فينا ..كان قوتنا ..كان مجمعنا ..كان معانا في الوحشة قبل الحلوة بس عمره ابدا ما سمح لحد يخترق الجدار اللي كان عامله علي قلبه ..عمره ما اشتكي علي الرغم من محاولاتنا معاه ..لكن اخر سنه في وجودك حسينا وكانه صغر عشرين سنه ..ودايما مبسوط وبيتكلم علي فرح وشقاوتها وبيتكلم عليكي .وانكم ماليين حياته .
نزلت دموع محمود وصلاح ..وكمل صلاح _احنا كبرنا وعايزين اولادنا يتعلموا منك يا سالي .ربنا يوفقك يا بنتي في حياتك ومتنسيناش ..ليكي اعمام في ضهرك حتي لو مكناش في الصورة قبل كدا .بس بعد موت باباكي ..اعتبرينا مكانه .
قاموا يمشوا وسلموا عليها ..حضنتهم سالي علي استحياء ..
دخل نبيل وقالهم _معلش اتاخرت سلمي تعبت شوية .
ردت سالي بسرعه _مالها .
نبيل_معرفش من يوم الوفاه وهي نفسها بيضيق كدا ..عشان كدا مجتش يوم الجنازة .
بصت لمازن وهو فهم قصدها .
________
روحت سالي لبيتها ونامت في سريرها اول ما حطت راسها  علي المخدة ..اخد مازن فرح في حضنه وناموا ..
حلمت سالي بعصام وهو بيبتسم لها وباين عليه انه مبسوط .
صحيت وهي مبسوطه ونزلت دموعها لكن المرة دي دموع فرح ..هل ممكن يكون مجرد حلم او كانت فعلا رؤية تصبرها علي فراقه .
دخلت ليها فرح وقالتلها _انتي صحيتي يا مامي ..يالا بقي عشان نلعب سوا .
حضنتها سالي بمحبه وقامت دخلت الحمام تاخد دوش وتصلي ..وتنزل تلعب مع بنتها .علي الرغم انها حاسه ان معندهاش اي ذرة طاقة .
نزلت لقت ثريا بس تحت وفاطيما بتعلب مع العيال كلهم في الجنينة ..سالتها عن مازن ردت ثريا _راح الشغل .بيقول وراه حجات مهمة اوي .ازيك يا حبيبتي النهارده ..يارب تكوني احسن .
ابتسمت سالي برقة وقالت _الحمدلله احسن .
جاتلها ام جنه بفطور ملوكي ..فيه كل الاصناف والانواع ..استغربت سالي فردت ثريا _ام جنه قررت تظبطلك فطار جميل علشان بقالك كتير ماكلتيش واحنا بقي استنينا علي ما تصحي علشان نفطر سوا .
طلعت ام جنة نادت علي فاطيما والاولاد ..ودخلوا كلهم وقعدوا علي سفرة واحده وفطروا مع بعض .حاولت فاطيما تهزر علشان بس  سالي تاكل ومتفكرش في اي حاجة مديقاها .
قاموا كلهم قعدوا في الصالون قالت سالي _يانهار ابيض ..انا حاسة اكلت خروف ..بقالي كتير اوي محستش الاحساس دا ..تقريبا كدا طبخ ام جنة ليه طعم تاني .
عدي اليوم بسلام وجات لبني بالليل هي وبناتها ..وسهروا سهره لطيفة ..اتصلت سالي بسلمي وقالت لها تيجي .وفعلا راحتلهم ..قعدوا كلهم في الجنينة ..بس كانت سالي منبهه عليهم ان محدش يقول لسلمي انها اختها ..كانت عايزه تقولها وهما لوحدهم .وفي وقت يكون افضل من كدا .
فضلت سالي اغلب الوقت تتكلم عن عصام .وعن انها اساءت فهمه في كتير من الاوقات وعيطت وهي بتفتكر .صحيح اوقات كتير كان بيتعامل بطريقة غريبة لكن حبه ليها مفيهوش شك .قضوا سهرة لطيفة ..وروحت لبني وسلمي .
طلعت سالي اوضتها لقت مازن نايم ..بصتله شوية ..كان باين عليه التعب كتير ..ملقتش فرح فراحت تدور عليها لقت ثريا بتنيمها في الاوضة مع يوسف ..وقاعده بتحكيلهم حدودتة .
قالت لها _تعالي يالا يا فروحتي عشان انيمك .
ردت فرح بنعاس _لا يا مامي ..تيتة قالتلي اكون شاطرة زي يوسف وانام هنا .
سالي _متاكدة مش هتخافي .
ورتها فرح عروسه كبيرة شوية وقالتلها _لا يا مامي ..لي لي معايا ومش هخاف وبعدين تيته هتعلمنا قران نقوله قبل مننام عشان منخافش ابدا ..صح يا تيتة .
ثريا _صح يا قلب تيتة .
قعدت سالي وثريا بتعلمهم الفاتحة وهما بيرددوها وراها .لحد ما غمضوا عيونهم فعلا ..وناموا ..سابت ثريا قران شغال في اوضتهم بصوت منخفض جدا ..
طلعوا برا ...قالتلها سالي _مش عارفة اشكر حضرتك ازاي ..انا بقالي كتير مش عارفة افصلها عني ..او ممكن مش قادرة افصلها عني .
ابتسمتلها ثريا وقالت _اي طفل وقت ميشوف طفل تاني بيعمل حاجة لازم يقلده ..فانا بصراحة مش السبب هي قلدت يوسف وسالتني هو بينام لوحده ليه فقتلها عشان كبير وشاطر فاخدتها تحدي بقي ..طالعه لمين بقي .
ضحكت سالي وقالت _اكيد مش انا .
ضحكت ثريا _ايوا مازن كان عنيد جدا وغيور وهو صغير ممكن تبقي طلعاله بس قلبها طيب زيك بالظبط يا حببتي .
حضنتها سالي وقالت _ربنا يخليكي ليا يا ماما .
ثريا _ويحفظك ويباركلي فيكي يا حببتي ..تصبحي علي خير .
____
دخلت سالي اوضتها ..لقت مازن صاحي وبيبصلها .