احببت العنقاء امل العناني

الفصل التاسع عشر

الفصل التاسع عشر من #احببت_العنقاء_امل_العناني
فاقت لبني وقالها مازن تهدي وعرفت من نبرة صوته انها مكنتش بتحلم ..عدوا المقابله علي خير ولما طلعت سلمي ..انهارت لبني _انا مش قادره اصدق يا مازن ..دي هيا ..دي سالي .بس سالي ..سالي ماتت .
مسكت لسانها عند اخر كلمه ..كانت هتقوله ان سالي هي سهي .
_منا عارف انها شبهها بس مهاش هيا .
_ايه عرفك بقي .
_محستش ناحيتها باي حاجة .
_طيب تكون مين دي يا تري .
_وريني السي في كدا .
ادتله السي في وبص فيه _سلمي شرف الهواري متخرجة من جامعه كامبريدج .تاريخ الميلاد نفس تاريخ ميلاد سالي .والوش هو هوا ..ممكن تبقي اختها .
لبني _اختها ازاي .سالي مكنش ليها حد وعمرها ما عرفت حد من اهل امها او من اهل ابوها .
_ماشي ممكن تكون نبيلة منعت عنها الكل ..انا معرفش صدقيني يا لبني بس اللي انا متاكد منه انها مش مراتي .
_اوك يا مازن ..انا هستاذن بقي .وهاخد باقي اليوم اجازة بعد اذنك ..انا حاسه اني تعبانه .
خرجت لبني وخدت حاجتها وركبت عربيتها واتصلت بسالي اللي ردت بسرعه ..قالتلها لبني _انتي فين عايزاكي في موضوع مهم جدا .
_انا في الشركة تعاليلي هناك .
_اوك انا في الطريق .
___
فضل مازن يفكر في سخرية القدر ..جاتله واحدة شبه مراته لكن محسش تجاهها باي حاجة وواحدة تانية مختلفة عنها لكن بيحس بيها من قبل ميشوفها .
اتصل بسلمي  علي رقمها المكتوب في السي في وطلب منها يزورهم في البيت لامر ما ..عايز يبحثه مع باباها .
____
وصلت لبني عند سالي وقالتلها اللي حصل ..سالي كانت هتجنن .
سالي _يعني تكون مين دي يا لبني ..هي سلمي شرف الهواري وانا سالي شريف الهواري ..تكون بنت عمي مثلا ..لكن ازاي تبقي نسخه مني كدا زي ما قولتلي .انا بجد مش عارفه ايه اللي بيحصل دا .خليكي ورا مازن ..انا عارفه انه هيروحلها عشان يفهم .خليكي انتي في الصورة يا لبني قبل ما اظهر .ممكن تكون لعبه من حد .أنا مبقتش فاهمه حاجة  .
____
في بيت شرف الهواري
سلمي _شوفت يا دادي..صاحب الشركة اللي عملت عنده  انترفيو النهارده اتصل بيا وعايز يجيلنا ..شكله وقع ..عشان تعرف ان بنتك مبتقعش الا واقفه هههههه .
شرف _ايه دا بجد .
سلمي _والله يا دادي ..هو اصلا كدا ساحر ووسيم زي نجوم الافلام ..فانا عاوزاك تكون سبور معاه بقي زي عادتك .
شرف_اممم طيب ادخلي عرفي مامتك عشان تجهز نفسها .
_اوكي .
دخلت عرفت مامتها شاهيناز علي التفاصيل وفرحت ليها جدا .
حضر مازن في ميعاده بالظبط ودخل ..رحب بيه شرف الهواري وحس انه بيتعامل مع راجل شخصيته قوية جدا من قبل ما يتكلم حتي .
قعد مازن وفضل يبص لسلمي اللي كانت لابسه فستان عريان وحاطة ميك اب كامل .كان نفسه يقولها _خسارة وشك الجميل دا يبوظ من الميك اب الكتير دا .
همهم ابوها فلاحظ مازن انه كان بيبصلها فاعتدل كدا في قعدته وبدأ يتكلم _انا اسمي مازن السواح ..والسبب اللي خلاني اطلب اقابل حضرتك هو الصورة دي .
اداله صورته مع سالي ..متفاجئش شرف ومراته ابدا لكن اتخضت سلمي اول ما شافتها وقالت _ايه دا ازاي ..دي انا .
كمل مازن كلامه _من تعابير وش حضرتك ..قدرت افهم انك عارف ان دي مش سلمي بنتك وانك تعرفها .
سلمي _انا مش فاهمه اي حاجة بجد .متقولي يا دادي فيه ايه .ومين دي اللي في الصورة وشبههي كدا ازاي .
شرف _اهدي بس يا سلمي وهفهمك .
مازن _دي تبقي سالي مراتي يا سلمي ..اتوفت من سنتين بس اللي اعرفه عنها انها كانت ملهاش اهل ابدا ..فلما انتي ظهرتي بنفس شكلها وكمان اسم قريب من اسمها ..الفضول خلاني اجي اتكلم مع والدك واديكي عرفتي رد فعل لبني اعز اصدقائها النهارده لما شوفتيها ..المهم يا جماعه مراتي متوفتش بطريقة طبيعيه ..هي ماتت مقتوله علشان كدا حبيت افهم القصه كلها لان بظهور سلمي دلوقتي اكيد هتلفت الانظار .
انفعل كلا من شرف وشاهيناز _يعني ايه ..انت بتقول ايه .انا اللي يقرب من بنتي اكله بسناني .
مازن _اهدي يا فندم ..انا بس عايز اعرف ايه علاقتكم بمراتي .
شرف _انا مش عارف ابدا منين .ياااه عدي وقت طويل اوووي .
شاهيناز _اسكت يا شرف ..نبقي نتكلم في الموضوع بعدين ..حضرتك ممكن تتفضل يا استاذ مازن ..وهيبقي شرف يكلمك وقت تاني .
قالت سلمي بصريخ _لا يا مامي لازم اعرف كل حاجة .
شرف _خلاص يا شاهيناز ..مفيش مفر بقي ..ولازم اتكلم ..مراتك يا استاذ مازن تبقي تؤام سلمي بنتي .
سكت مازن والجميع فكمل شرف وكانه بيشوف ذكرياته قدامه _قبل ميتولدوا بيوم عرفت مرات شريف اخويا ان جوزها بيخونها مع بنت خالتها نبيلة الاسيوطي ..كانو الاتنين بنفس الاسم لكن مش بنفس الطباع ابدا .ام سالي وسلمي كانت بنت ناس ومؤدبه وتتحط علي الجرح يبرد لكن نبيلة الاسيوطي كانت بنت حرام ..لعبت علي اخويا وميلت دماغه واغرته وخلته يعمل معاها علاقه .لحد ما اتجوزها .واجهته نبيله امكم يا سلمي ..فقالها انه مش هيطلقها ..وانه هياخد منها ابنه اللي جاي وهيرميها في الشارع .ولدتكم ومقامتش تاني ..اتخض شريف اخويا لما عرف انكم بنات وقال مش عايزكم وانه عايز ولد يورثه ..ابويا وامي سابولنا ورث كبير .دا خلي شريف يتجنن لحد ما اقنعته ان انا اخد واحدة منكم اربيها.وافق ورضي احسن ما يبقوا اتنين علي قلبه  .كنت انا وشاهيناز بقالنا سنين مش عارفين نخلف فما صدقنا اخيرا ان ربنا بعتلنا بنت ..اخدناكي يا سلمي وسافرنا لندن وبعدنا عن كل حاجة . بس الحقيقه ان شريف اخويا حب سالي اوي لدرجه انه بعتلي وقالي انه كتبلها كل حاجة  وعرف حقيقة مراته وقالي انه  هيسبها ويجيلي يعيش معايا في لندن ويجمع بناته مع بعض .
مازن _طيب اما عرفت بموت اخوك مرجعتش تاخد سالي ليه معاك .
_انا معرفتش بموت شريف غير لما اتاخر عليا انه يجيلي ..نزلت مصر قالولي انه مات وسالي بنته خدتها نبيلة واختفوا ..دورت عليهم كتير معرفتش الاقيها وبطبيعه الحال كان عندي بيتي واسرتي يا مازن اللي رجعتلهم بسرعه .
_يعني سبت بنت اخوك مع واحده زباله زي نبيلة .وعيشت حياتك عادي .تعرف ان سالي مشافتش يوم حلو في حياتها ابدا ..تعرف ان نبيلة استغلتها اسوء استغلال عشان فلوسها ..اظن ان السبب الوحيد اللي خلاها متموتهاش هي فلوسها .تعرف ان سالي فضلت عايشة وهي حاسه انها ملهاش حد وكمان حصلها مشاكل كتير اوي لانها فكرت ان نبيلة هي امها الحقيقية .نبيلة حرمتها طفولتها وشبابها .انت ....
قاطعته سلمي والدموع في عنيها _ارجوك كفاية يا استاذ مازن ...لو سمحت معلش اتفضل ..واديك عرفت كل اللي كنت عايز تعرفه .
خرج مازن من بيتهم ومبصش وراه .كان حاسس انه عايز يكسر اي حاجة ..(يا حبيبتي يا سالي ..عيشتي وموتي وانتي مش عارفة ان ليكي اهل ..يا حببتي حياتك كانت صعبه اوي انا مش عارف كنتي متحمله دا كله ازاي .. ياريتك ترجعي وانا هعوضك )
روح مازن ودخل علي مامته اوضتها وحضنها وحكالها علي كل حاجة ..
مازن _انا قلبي واجعني اوي يا امي ..مش عارف هي كانت ازاي متحمله كل دا ..سالي تعبت اوي في حياتها ..تفتكري علشان كدا ربنا اخدها عنده ..كنت اتمني اعوضها ..ازاي مكنتش بقدر كل كلامها (انا بعتبركم اهلي )ازاي كنت مستهون باحساسها انها ملهاش اهل ولا اي حد .
حاولت ثريا تهديه ..بس معرفتش ,شوية وسابها وخرج .
__-
سلمي _يعني دا كله كنتم بتخدعوني ..انا مش بنتكم ولا اي حاجة صح .
شرف _ازاي تقولي كدا ..احنا اهلك يا حبيبتي .
_اهلي ازاي وانتو فرقتوني عن اختي وابويا .
شاهيناز _يا سلمي يا حببتي عارفه انك منهاره دلوقتي بس صدقيني احنا عملنا كدا لمصلحتك مش احسن مكنتي تتربي مع نبيلة الاسيوطي ويا عالم كانت عملت فيكي ايه .وبعدين الاهل اللي بتربي مش اللي بتخلف .
سلمي بعنف _صح صح انتو عندكم كل المبررات بس اختي المسكينه اللي ملقتش حد يكون جنبها دي كان احساسها ازاي .دلوقتي عرفت ان ليه طول الوقت كنت بحس بالحزن ..اكيد من احساسها هي ..لو كنت بيوصلي منها جزء صغير من المشاعر وانتو كنتم جنبي بتحاولو تفرحوني بكل حاجة ..هي بقي كانت بتحس بايه ..انا عمري ما هسامحكم انكم مدورتوش عليها .
_____________
حكت ثريا لفاطيما كل حاجة وبدورها حكت ل لبني ولبني اتصلت بسالي وحكتلها ..
سالي _يعني ايه يا لبني ..يعني انا ليا اهل .ليا عم عايش وموجود وليا اخت ومش اي اخت ..اخت تؤام ..ايه حكايات الافلام دي ..انا مش مصدقه ..انا عايزه اروحلهم واتكلم معاهم .
لبني _تروحي فين ..وهتقوليلهم انك مين وعلاقتك بسالي ايه .وبعدين منا بجبلك كل الاخبار اهوه .
سالي وهي بتعيط _انتي عارفه انا مبسوطه ..مبسوطه ان نبيلة مش امي ..دلوقتي عرفت هي بتكرهني ليه ..دلوقتي عرفت ليه عمري ما حسيت ناحيتها باي حب ..وكمان عرفت سبب تصرفاتها ..كانت بتستنزفني وبس  وبتاخد فلوسي وفي الاخر لما لقت اني مش هديها فلوس تاني قررت انها تتخلص مني بعد ما خربت بيني وبين جوزي ..يبقي الصحفي مكنش غلطان يا لبني ..مكنش غلطان اما قال نبيلة الاسيوطي ..انا اللي كنت غلطانه وفكرتها امي نبيلة الشامي .
لبني _اهدي بس يا حبيبتي وخير ان شاء الله ..وانا هحاول اعرف اي اخبار تانيه وصحيح مازن وافق انها تشتغل معانا في الشركه .
_ايه ...ليه .
_بيقول دراستها في احسن جامعات لندن هيدخل دم جديد في الشغل وبس ..بس اللي قلقني انه عينها في التيم بتاعه وانتي عارفه ...
_سكتي ليه يا لبني متقولي ..يعني هيستبدلها بيا قصدك .
_يوووه يا سالي انا مقلتش حاجة ..انا قلقانه بس .
_عادي لو حبها يبقي كل المشاعر اللي بينا دي مكنتش حقيقيه .
قالتلها الكلام دا وهي قلبها بيتقطع بس لازم تكون قوية عشان تواجه اللي جاي .
________
بالفعل حاول مازن يستبدل سالي بسلمي اللي بيشوفها قدامه كل يوم في الشغل ..كان بيحس ناحيتها بموده لكن مش بحب ابدا ..هو عارف يعني ايه احساس الحب كويس .. لكن كان مبسوط انها قدامه طول الوقت .بتفكره بمراته وبحركاتها وضحكها وشقاوتها .بس الفرق ان سلمي كانت متدلعه كتير بيحسها لسه بنت عندها 18 سنه حتي طريقه كلامها غير سالي خالص .
كان بيتكلم معاها  كتير ..وحكالها عن علاقته بسالي من البدايه للنهاية ..كان مستمتع بكلامه معاها .وحكالها عن فرح بس مقلهاش عن سهي ..استغرب من نفسه ليه محكلهاش بس قرر يسيب سهي علي جنب .
سلمي _يااه بجد قصتكم زي الافلاام وصحيح سالي عانت كتير بس كانت قوية وجريئة ..انا اهوه اللي عيشت في لندن وكدا لو اخدت شقة مع شاب دادي كان يموتني .ولا عمري كان ليا بوي فريند ..كلهم زمايل وبس وكمان ماما وبابا كانوا محرصين اوي من موضوع العلاقات دا وكانوا دايما يعرفوني الصح من الغلط .
بصلها مازن باعجاب وقال _علي فكرة والدتي ووالدي كانوا كدا مع فاطيما والحقيقة معايا انا برده بس للاسف الشديد عرفت بنات قبل سالي ودا خلاني متدايق من نفسي اوي لان اول معرفتها كانت كل حاجة معاها حلوة ومميزة وليها طعم مختلف ..فباباكي ومامتك كانوا موفقين اوي انهم عرفوا يعلموكي انك تحافظي علي نفسك وخصوصا في المجتمعات الاوروبية .
سلمي _طب انت شوقتني اشوف فرح اوي علي فكرة .شبهك ولاشبه سالي .
_هههههه شبهك لانها كلها سالي بس فرق لون عنيها انا وشوية تفاصيل صغيره كدا ..هتحبيها اوي ..مشفتش في طعامتها ابدا .
_طيب هي ليه مش عايشة معاك .
_والله نفسي اخدها بس سهي اللي ربتها وهتزعل اوي وكمان ماليش زوجه دلوقتي فالبنت هتبقي محتاجة مامتها برده وسهي احسن ام شفتها في حياتي .
بصتله بدلع _شكلك بتعز سهي اوي .
حاول يغير الموضوع _بس متقلقيش هتشوفيهم في سبوع سالي الصغيره .
_سالي الصغيرة مين .
_بنت اختي فاطيما سمت بنتها الصغيرة سالي هههههه.وهتعمل سبوعها يعني بعد شهر من الولاده بس هي مصممة ..هيبقي الجمعه الجايه وانا بعزمك يا ستي اهوه انتي وعمو وكلكم وبالمرة تشوفوا فرح وتتعرفوا عليها .
_يااه بجد هكون مبسوطة يا مازن .نفسي اكلها البسكوتة دي ..انا بحب الاطفال اوي .
_____
اتصلت فاطيما بسهي تعزمها علي السبوع وقالتها _لازم تيجي من بدري بقي عايزين نقضي اليوم سوا وبعدين وحشتيني ..ليه مجتيش تاني من يوم الولاده .
_والله يا طومي مشغوله جدا ..واخدين مشروع جديد مطلع عيني بجد .وفعلا انا مقصره معاكي .بس دونت وري هجيلك يا قلبي وهروقك يوم السبوع .مصطفي جه ولا لسه .
_ههههه ايوا جه من اسبوع ومبسوط بسالي اوي .بتفكره بحبيبته بقي .
_انتي غيرانه ولا ايه .
_لا طبعا مهي سالي فعلا كانت حبيبتنا كلنا ويارب بنتي تبقي زيها .كانت ونعم الاخت والصديقة وكل حاجة .
_طيب اسكتي بقي والا هغير انا بقي منها .
_انتي بقي يا ستي بقيتي زيها واكتر عندنا ويارب نفرح بيكي وباخويا بقي .بدال مانتو كل واحد في بيت وفرح بينكم ..نتلم كلنا في بيت واحد بقي يارب .
_انا زعلانه علي لبني اوي ..ربنا يرزقها يارب .
_بتغيري الموضوع بس ماشي ..ايوا فعلا ربنا يرزقها الذرية الصالحة والله .
_يارب ..مقولتيش بقي عايزة هديه ايه  .
_ولا اي حاجة يا قلبي .
_لا ازاي لازم يا ام سالي نروقك .
_والله ام سالي عايزة تنام بس . ههههه ..خديها عني يوم انام فيه ..ودي هتبقي احلي هديه .
_ هههههههههه حاضر من عنيا يا قلبي .ربنا يعينك .
_____
راحت سهي مع فرح لسبوع سالي بنت فاطيما واتفاجئت بوجوه جديده ..طبعا عرفت اللي المفروض اختها سلمي ..واكيد الراجل والست اللي معاها دول هما عمها وعمتها .
رحبت بيها فاطيما جدا _اخيرا جيتوا يا وحشين ..كان المفروض تيجي بدري تلات ساعات .
_معلش بقي ..فرح صممت تجيب هديه للبنوتة .ومتقلقيش هنعوضها بالليل .
جريت فرح علي مازن ورمت نفسها في حضنه ..وقامت ثريا ولبني ومصطفي يسلموا علي سهي .
عرفت سلمي من المشهد اللي قدامها ان سهي ليها مكانة كبيرة جدا عندهم ودا قلقها متعرفش ليه .
سلم مازن علي سهي باقتضاب وعرفها علي الباقي _دي سلمي تبقي اخت سالي مراتي الله يرحمها ودا عمها وعمتها .
وبعدين شال فرح وقالها _دي تبقي خالتو يا فرح ودا جدو ودي تيتة .
فرح وهي بتعد علي صوابعها _يعني كدا بقي عندي تلاته اربعه  جدو وتيتة .
مازن وهو بيبوسها _ايوا يا لميضه .
سلمي _هتهالي يا مازن .عايزة اكلها .
بصت لها فرح بقرف _ليه هو انا ايس كريم .
ضحك الكل عليها وسابتهم فرح وراحت لسهي وقالتها حاجة في سرها فردت سالي _حاضر يا حببتي ..هديهالها .
طلعت من شنطتها علبه مجوهرات صغيرة  وادتها لفرح .اللي ادتها للنونة .
فتحتها فاطيما ودمعت عنيها كان طقم دهب فيه فصوص الماظ ..السلسه كانت بكلمة انت الحب والخاتم باسم حب وكذلك الحلق .
فاطيما _تعبتي نفسك ليه يا سهي .
قامت لها سهي وحضنتها بحب _ابدا مفيش اي تعب وبعدين فرح اللي اختارت .
قامت لبني وادت فاطيما علبه فيها برده سلسله باسم سالي .وحضنتها ..
فاطيماوهي بتدمع _طيب وبعدين كدا ..ربنا يخليكوا ليا يا احلي اخوات .
سهي _طب كنتي عرفيني ونجيب سوا .
لبني _فكرنا فيه واحنا جايين ..زيك كدا بالظبط .
سهي _هههههه بصرة .وانتي يا اخت هرمونات بطلي عياط مش يعني اخدتي شيك بمليون دولار .
مصطفي _هههههههه الشيك دا بقي عليا انا يا سهي.
سهي _ههههههه طيب مين يزود .
ثريا _عليا اشيل البيبي يومين ..واحضن وابوس سالي وام سالي .
سهي _الاونا .الادو.الاتري ..كسبت ماما ثريا ههههههه .
فاطيما _خلاص يا ختي انتي وهما ..هتعملوني والبت مزاد ولا ايه .
سهي _لا يالا قومي كدا وشدي حيلك عشان تخطي الملح .
فاطيما بخوف _ملح ايه .
سهي بتلقائية _الملح يا شابة ...انا كلمت ام جنة وخلتها تجهز كل حاجة .
فاطيما _انا مش مرتاحالك يا سهي .
نادت سهي علي ام جنة اللي كانت فعلا مجهزة كل حاجة ..الملح والغربال وكل حاجة بحسب طلب سهي منها .
فاطيما _ايه دا يا سهي .ايه الحجات دي .
سهي بانتعاش _تعالي بس ..اومال محضرة سبوع ايه ..مهو دا السبوع ..تخطي الملح وتحطي بنتك في الغربال وتغربليها وندق بالهون ونقولها متسمعش كلامك وتسمع كلام ابوها .
لبني _انتي عرفتي الحجات دي منين .
سهي بفخر _عملت اتصالاتي وابحاثي ودورت علي كل الحجات بتاع السبوع ..اتصلت علي ام جنة من يومين اقولها حضروا ايه للسبوع ..تقولي تورته وجاتوه .بقي دا كلام يا بشر .هوعيد ميلاد .
نادت سهي علي حسن وجنة وشغلت الدي جي علي يارب ياربنا تكبر وتبقي زينا .وغربلت ام جنه سالي .ودقولها الهون مع انبساط كل الموجودين .والكل بيصور وفرحان وجه وقت انها تخطي الملح ..فضلت فاطيما خايفه لغاية مختطه سالي الاول وبعدين اتجرأت وعملتها وعدت السبع عدات .وكذلك لبني وثريا وام جنة وقامت سلمي عملت زيهم وهي مبسوطه .
فرح _وانا يا مامي .
شالتها سهي وقالت _لا يا حببتي انتي صغيره .طب استني .
شالتها سهي وعدت الملح تاني .كان الجو بقي دخان .فتحوا الشبابيك وشغلوا الدي جي وجاب حسن وجنة من شنطة سالي .بوكسات مليانه هدايا وسبوع وكروت باسم سالي الصغيرة ووزعوها علي الموجودين .
كانت فاطيما طايرة من السعاده وقامت ترقص ..وشدت سهي معاها ..ولبني والجو العام كان رايق .
فاطيما _انتي عملتي دا كله ازاي وامتي .
سهي _امتي من وقت مكلمتيني ..وازاي عادي ساعدني ناس كتير .المهم انك اتبسطي .
_جدا ياريت كنا عرفناكي يا سهي من زمان ..كنتي ظبطي سبوع يوسف .
_هههه المرة الجاية كمان ابقي اظبطك .
مصطفي بخوف _لا كفايا اوي كدا وربنا يبارك .
ضحك الكل عليه ..خلاص الجو هدي واللي كانت بتحاول تتناساه سالي اصبح حتمي ..بصت لسلمي اوي وتفاصيلها .(مش معقولة هي هي شكلها اللي تقريبا كانت نسيته ).طول الوقت مازن معملش اي نشاط ولا شارك في اي حاجة غير انه قاعد جنب سلمي وبيكلمها بصوت منخفض .اتغاظت سالي منه جدا ..كانت عارفة  انه بيبذل مجهود فظيع عشان يطنشها .بس السؤال هو _ليه . ليه بيعمل كدا .
حاولت شاهيناز تتكلم معاها في مواضيع عامه ..ارتاحت لها سالي ..مكنش  فيها امر مريب ولا حتي عمها .اتكلموا كلهم في امور عادية ..كان الجو العام لطيف ومحبب لكن مازال مازن بتحس انه بيبصلها وهي مش بصاله واول متلتفت ليه بيبص لمكان تاني ..مش عارفه ليه غامض كدا .
سالي الصغيره اتفتحت في العياط ومش راضية تسكت ..زهقت منها فاطيما وادتها لمصطفي اللي اداها لثريا لما معرفش يسكتها .
اخدتها سلمي منها فزادت البنت عياط .راحت مدياها لسهي _خديها انتي بقي يا سهي ..هتلاقي عندك خبرة من ايام فرح ما كانت في سنها  بقي .
حست ان الكل باصص عليها ومركز والبنت مفحوته عياط .وشها بقي احمر زي الدم وجاب الوان ..بصتلها وقالت في نفسها _يارب متكسفنيش ..ياتري بتعيطي ليه يا سالي .
شالتها وغيرت الوضعيات وسالت فاطيما اللي قالتلها انها رضعتها وغيرتلها وروقتها .قامت تمشي بيها شوية وخرجت في الجنينة ومازلت البنت بتعيط ..تسكت وتفرك وتعيط .جابتلها لبني دوا مغص ومازالت بتعيط .
جت فاطيما تاخدها منها ..سالي مرضيتش وقالتها ارتاحي وهي هتلف بيها .
بعد عشر دقايق ولما سالي تعبت من الوقفة ..دخلت ونيمت البنت علي السوفا وكلمتها _وبعدين يا سو ..كدا مش كلام ..اسكتي بقي .
فركت ايديها وعملت لها تمارين ايدين ورجلين البنت سكتت يبقي كويسه ..واول مبطلت عيطت تاني ..راحت سالي خالعه شرابها لقت خيط لافف علي صباعها الصغير .
اتنهدت بارتياح وقالت للبنوتة بحنية _يا روحي دا بقي اللي تاعبك ..حقك علينا ..احنا مش فاهمين .
سكتت سالي الصغيرة ونامت في حضن سالي .
فاطيما _يعني انا وانتي عيالنا في نفس السن ..ازاي مجاش في بالي حكاية الشراب دي .
_عادي يا طومي ..تيك ات ايزي ..بتحصل .
نيمت فاطيما بنتها في سريرها وخرجت في الجنينة مع لبني وسهي ..وقعدوا يتكلموا .شوية وخرجت سلمي وراهم وفضلت تتكلم معاهم ..حست سهي انها بتحبها ..مفيهاش حاجة تدايق غير قربها من جوزها .ودا اللي عصبها اكتر واكتر .فضلوا يهزروا شوية لغاية ما مصطفي نادي علي فاطيما تروح تاخد سالي لانها بتعيط .
فاطيما _اهو الرجاله كدا ..طب شيلها يا عم .لكن يقولي لاء اما تكبر شوية .
سهي _خليكي انتي وانا هجبها .
راحت سالي تجبها لقت مازن عندها وبيهز سريرها عشان تسكت وهي مازالت بتبكي .
مسكت السرير فبطل هز بس ممشيش ..قالتله _البيبي وهو صغير كدا بيحب يحس بدقات قلب امه .شالتها وادتهاله لقي فعلا البنت سكتت .
مازن _معلش بقي مهو انتي ام وعارفة المواضيع دي .صحيح ..شكرا علي الجو اللي عملتيه النهارده .
_ايه دا انت كنت معانا ..دانا مسمعتش لك حس ابدا ..الا في النمنمة مع سلمي .
_غيرانه ولا ايه .
_وانا هغير من ايه ..تكونش جوزي خطيبي قريبي مثلا .
جت تمشي مسك دراعها ونيم سالي في سريرها من تاني .
_سبني يا مازن ..بتعمل ايه .
لمس وشها وخدودها الحمرا وحضنهاا وقالها _وحشتيني ..مش عارف اسيبك ابدا ..انتي بتجري في دمي يا سهي .
جمدت سالي قلبها وقالتله _وبعدين ..هنفضل ناخد حضن في السر او بوسه بعيد عن الناس .والوش الحلو والنحنحه مع غيري .انت فاكرني ايه ..واقعه فيك اوي يعني .لا فوق يا مازن ..انا ممكن احط قلبي تحت رجليا بس متهانش كدا .
سابته وخرجت وعرف انه بدات خطته في انه يخسرها ..المفروض يبقي مبسوط بس ليه زعلان ومتدايق اوي كدا .كلم نفسه _ليه هي بالذات اللي بحس معاها كدا . وزه شيطانه _يمكن لانك بقالك كتير معرفتش غيرها .
فضلت سالي متدايقة طول الوقت وعرفت لبني السبب وحاسة بيها ..وكمان خمنت فاطيما ان السبب مازن اللي اهملها فعلا واهتم بسلمي ..كان هاين عليها تدخل تضربه ..صحيح هي حبت سلمي لكن عمرها مهتيجي ذرة في محبتها لسهي ولبني .
راحت سلمي تتكلم مع مازن اللي كان بيتمشي في الجنينة  وفجاه صرخت فرح ..سابت سالي اللي في ايديها وجريت  لبنتها هي عارفه  ان فرح مبتصرخش من غير سبب لقت بنتها سايحه في دمها ..هربت روحها منها بس تمالكت اعصابها ..قالت فرح وهي بتعيط _يوسف ضربني باللعبه في راسي .
يوسف _اثف يا فرح ..مكنتش اقثد .
شالتها سالي وجريت تحت علي المطبخ ..انتبه ليها الكل وجري يشوف فيه ايه ..حاولت سالي تكتم الدم معرفتش ..جالها مصطفي وساعدها ..هدومها اتلطخت دم بس شالت بنتها وجريت بيها علي عربيتها .البيت اتقلب ومازن شافهم بيجروا وسالهم فيه ايه ردت فاطيما _بنتك اتعورت وانت قاعدلي تحب تحت ضوء النجوم .
ثريا _فاطيما اسكتي .
جري مازن ورا مصطفي وسهي ..بس سهي بصتله بطريقة خرسته ..قعد جنب مصطفي في عربيته من غير كلام ..وصلوا المستشفي وعملوا اللازم وادوا فرح مسكنات ونامت من البكاء والتعب .
مصطفي _ان شاء الله هتبقي كويسه يا سهي اطمني .
هزت سالي راسها وهي بتعيط وواخده بنتها في حضنها .ركب مازن عربيتها ووصلها لبيت الشناوي من غير ميتكلم .هيقول ايه _اهمل بنته اللي بتجيله كل فتره عشان تشوفه وقاعد فعلا يحب تحت ضوء النجوم .
حاول ياخد فرح منها يدخلها بس هي رفضت ..شكلها قطع قلبه اكتر من بنته ..هدومها متلطخه دم وكحلها سال علي عنيها ومكياجها باظ .
دخل معاها ومرضيش يمشي ..دخلت فرح ونيمتها وغيرت هدومها وغسلت وشها وطلعتله _ايه يا مازن عايز ايه .
_عايز اطمن عليكي .
_انا كويسة اهوه زي ماانت شايف .
_انا اسف يا سهي ..انا ....
_ارجوك وفر اعتذارك لنفسك ..مش عايزة اسمع اعتذار من حد ..اللي حصل بيحصل لاي طفل عادي .
_بس انا كان المفروض ...
_مازن بجد انا تعبانه ..ارجوك امشي ..انا فيا اللي مكفيني .
سابها ومشي بس هي وقفته وقالتله _بتحاول تلاقي فيها سالي صح .
فهم هي بتتكلم عن مين فقال _احتمال .
_ماشي براحتك بس انت بتدور في المكان الغلط .
_عادي غلط او صح مبقتش فارقة .
قالها كدا وخرج وهي شالتها رجليها لاوضتها وسمحت لنفسها تنهار اخيرا .كل الماسكات اللي كانت لابساها طول اليوم سابتها تقع .طلعت كل الالم والكبت اللي جواها .وبعدين غسلت وشها ونامت جنب بنتها .
___
رجعت  سالي تشتغل تاني مع مازن بس المرة دي مش بمزاجها ..الموضوع ان شركته وافق عليها مجلس الادارة كله وكلفوها هي ونبيل يتابعوا معاهم الشغل .طبعا نبيل مصدق ووافق لانه هيكون قريب منها .بس هي اعترضت جدا لكن نجاحها في الحملة الاعلانية اللي فاتت خلاهم يضغطوا عليها لانها بتنجز الشغل ببراعه واتقان .
في مكتبها بعدين قالها نبيل _ايه سبب رفضك يا سهي .
_معرفش يمكن لان ورايا شغل كتير هنا وهناك بضيع وقتي .
_طيب منا معاكي اهوه وهننجز جدا واليوم اللي مش عايزة تروحيه خلاص اخلص انا بدالك يا ستي .اتفقنا .خليكي معايا بس اول اسبوع عرفيني الحوار ايه وبعدين اخلعي .
_اخلع ..طيب ماشي يا نبيل .اتصل بقي وحدد معاد اجتماع معاهم .
اتصل نبيل فعلا بمازن شخصيا وحدد معاد للاجتماع ..راحت سالي ونبيل .كانت انيقة كعادتها ومكياجها هاديء جدا وبكل ثقة تدل انها سيدة اعمال محترمة .
دخلوا غرفة الاجتماعات وعرفت نبيل علي الكل .وقعد جنبها .شاورلها مازن تبدأ الاجتماع وفعلا حصل الامر بكل احترافيه منها ومنه  .خلصوا واتفقوا علي كل حاجة وعلي التكاليف ومواعيد التسليم بس كان لسه رايها في الموديلز اللي هتعمل اعلان عن شركتهم .
مازن _انتي معاكي كل صور الموديلز يا فندم ومش كل اعلان نجيب واحدة جديده .
_اممممم وفيها ايه يعني لما نجدد ..انا  عايزة الوش يكون ملفت بس بطبيعته ..اغلب الموديلز دلوقتي بيعتمدوا علي الميك اب .وانا مش حابه دا وكمان بفكر ان يكون الموديل المرة دي راجل .
بصلها مازن بتحدي _نعم .
_ايوا عايزة اعمل مقابلات لو سمحت واختار واحد كدا وجه سينمائي ..ملفت لكن بجاذبية لان في دماغي فكرة للاعلان هتبقي واو لو اتنقذت صح وانا موجوده وان شاء الله هنفذها صح .
نبيل _شكلك يا سو عندك خبرة كبيرة اوي في المجال دا.
_ايوا طبعا .اشتغلت فيه فترة لان ....
قاطعها مازن _طيب وفكرتك دي مش هتشاركينا فيها ولا ايه .
_لا يا استاذ مازن هشاركها مع لبني .واحنا بنعمل انترفيوهات زي مقلتلك لان لو ملقتش الشاب اللي بدور عليه هلغيها اصلا .
بصلها نبيل وقام يمشي في المكتب وقالها _طيب ايه رايك فيا يا سو .
ضحكت سالي جدا من كل قلبها _ضيعت جدية الاجتماع بهبلك يا نبيل .
حست ان مازن اتدايق فقررت تتمادي اكتر _طيب روح وتعالي كدا ..اممممم ..تصدق تنفع .
مازن بغيظ _لو سمحت يا استاذ نبيل .كفاية هزار .
خبط الباب ودخلت سلمي ..انشرح وش مازن اول مشافها .كان بيرد لسهي الضربة .حاولت  سالي تبان طبيعيه .
سلمي _اتفضل يا مازن ..الورق اللي طلبته .
مازن _اوك شكرا يا سلمي .اتفضلي اقعدي احضري الاجتماع .
بص لساالي اللي بصتله ورفعت حاجبها .وبعدين دورت وشها .واتكلمت _خلاص الاجتماع خلص .احنا هنمشي ووقت متعملوا انترفيوهات هجيلكم عشان اختار ومن بعدها علي طول هنبدا الشغل .
سابتهم وخرجت ..وقفتها لبني برا _براحة شوية يا سو ..هو هيعاندك اصلا اكتر .
اخدتها سالي في جنب وقالتلها _تفتكري بيحبها يا لبني .
رن موبايل لبني برقم جوزها قبل ما ترد ..استاذنتها ترد _الو ..ايه ..بجد .طب ازاي .طيب جاية حالا .
سهي _في ايه حصل ايه .
لبني _اخو جوزي عمل حادثه هو ومراته ..واخوه اتوفي ومراته في العمليات ..انا لازم امشي .
قالتلها الكلام دا وهي بتجيب شنطتها .
دخلت سهي بسرعه وكلمت نبيل ..خد لاب توبي وديه البيت انا هروح مع لبني .
مازن _لبني مالها .
_سلفها عمل حادثة هو ومراته .وانا مش هسبها .
جريت ورا لبني وراحوا المستشفي لقت جوزها واهله واهل سلفتهاا كلهم منهارين .وبيدعوا ان سلفتها تنجو .بس للاسف عدي نص ساعه وماتت .
كله لقي حد يحضنه ويخفف عنه .بصت لبني لقت جوزها في دوامه ..بصت لسالي اللي فتحت ليها دراعها ..حضنتها لبني وعيطت ..فضلت معاها سالي مسبتهاش ابدا ..وحاولت تهون عليهم .
روحت بيتها متاخر جدا .ونامت مهدوده وقضت باقي الاسبوع تروح ل لبني لانها عارفه انها لوحدها ..اهلها اتوفوا من وهي في الجامعه وملهاش الا خال وعم بس علاقتهم سطحية عشان كدا هي بتحاول تعوضها وتحسسها انها مش لوحدها .
راحت لها سالي اخر الاسبوع وكان كل الاهل هناك ..قالت ام سلفتها _طيب يا جماعه وبعدين في البنات..انا نفسي اخدهم بس سنهم صغير وعايزين اهتمام وانا صحتي علي قدي .
ردت عليها ام جوزها _والله وانا كمان بس خلاص خليهم عندي واهو عمهم ولبني هيبقوا يخلوا بالهم منهم معايا .
وشوشت سالي لبني في ودنها فقالت لبني بتردد _معلش بعد اذنكم ..لو ممكن انا اخد البنات .زي ما انتم عارفين معنديش اولاد وهكون مبسوطة اوي لو فضلوا معايا .
اتبسطوا كلهم جدا واطمنوا علي البنات ..شوية ومشيوا وفضلت سالي ولبني وجوزها .اخدها جوزها في حضنه وقالها _معقوله هتقدري يا لبني .
_ان شاء الله هقدر واهو يعوضوني شوية .
_يا حبيبتي انا مش عارف اقولك ايه ..جميلك دا فوق راسي .
_مفيهاش حاجة يا حبيبي ربنا يقدرنا ونربيهم تربية صالحة ويعيشوا عيشة سوية .
نزل جوزها يجيب البنات ويعرفهم اللي حصل فاستاذنت سالي تمشي لكن لبني رفضت وقالتلها _خليكي معايا انا بس لحد ما البنات تطلعلي .انا خايفه موت .
_لا جمدي قلبك وبعدين دول بنات يعني هيفكوا بالحنية .وانتي مفيش احن منك يا لبني .
دخلوا البنات وهما منكوشين ..طبعا بقالهم اسبوع محدش اهتم بيهم في دوامة الدفن والعزا دا ..
كانت مكة عمرها تلات  سنين ومريم عمرها ست سنين ..كلمتهم لبني وقالتلهم علي التفاصيل وانهم هيعيشوا معاها وانها هتحبهم وهتخلي بالها منهم .
مكة وهي ماسكة في اختها _انا عايزة ماما .
لبني _خلاص يا حببتي .ماما راحت عند ربنا .
حضنتهم لبني وهما بيعيطوا ..شاورت لها سالي انها تمشي ..وبالفعل خرجت .
فتحت تويتر بتاعها اللي مش بتستخدمه اصلا الا نادر جدا وكتبت _ويبقي الموت هو الحقيقة الوحيدة ليس لانه ياخذ منا احبابنا بل لانه يظهر حقيقة الاحياء حولنا ..وكم اننا محظوظون لاننا وجدنا من يهون عنا  وقت احزاننا .والعكس صحيح.ياليتني اتحول لملاك واذهب لجميع التعساء وابدل احزانهم فرحا .

بعدها بخمس دقايق جاتلها رسالة من مازن وفيها اسكرين شوت لكلامها وكتبلها (انتي فعلا ملاك ).
مشافتوش من وقت العزا ولما جه ياخد فرح عنده لانها كانت مشغولة مع لبني .
بعتتله _هاجي اخد فرح .
_خليها النهارده كمان .هي نامت دلوقتي .
_لا كفايه عليها كدا .وحشتني .
راحت لبيته كانوا كلهم صاحيين وفعلا فرح نايمه علي رجل مازن .
سلمت عليهم وحكتلهم اللي حصل والتفاصيل .
فاطيما _سبحان الله ..ربنا عوضها بطفلتين مرة واحده .انا شفتها في العزا وكانت منهاره فعلا .
سهي _اكيد الموت اصلا حاجة تخوف اوي يا طومي ربنا معاهم .هو مصطفي سافر تاني .
فاطيما بحزن _ايوا ..شفتي بقي .لحد ما اخويا يرضي عليه ويخليه يشتغل هنا .
رد عليها مازن بعصبية _وبعدين معاكي ..منا قلتلك مينفعش اقفل فرع هناك ..افرضي حصل اي حاجة هنا ..نلاقي بقي مكان تاني نروح له .
سهي _خطة احتياطية يعني .بدال منقعد ونواجه اللي بيحصل .نهرب .
كان هيرد ..سكتته _بليز مش عايزة اي رد دلوقتي ..هات بنتي علشان اروح لاني هلكانة جدا .
فاطيما _طيب متخليكي النهارده ..واقعدي معايا .
ابتسمت سالي _يا بنتي مينفعش وبعدين انا ......كلي طاقة سلبية ومش عايزة اطلعها عليكي .
وصلها مازن لعربيتها ونيم فرح في كرسيها .
مسك ايد سهي تاني وخلاها تسند علي العربية ..قالها _عايزة تبقي ملاك ..خليني اكون انا الملاك النهارده .
حضنها وهو بيلمس علي ضهرها ..كان حضن امان مفيهوش اغراء ..كانه بيقولها (انا هنا معاكي وقريب منك ..اديني شوية من زعلك .انا هتحمل )
ارتاحت سالي في حضنه وهي بتاخد قوة جديده منه ومن احساسه .وحشها حبه ولمسته واحساسه ..واحساسها وهي معاه .مسكت نفسها قبل متنهار وسابته وركبت عربيتها ومشيت ومبصتش لورا .فضلت تقول لنفسها _هقوله ..لازم اقوله ..مش هقدر اتحمل .
_¬¬¬____
في سجن النسا قعدت نبيلة الاسيوطي مع المحامي بتاعهاا وبتقوله _وبعدين يا محامي الغبرة ..هطلع من هنا امتي .
رد عليها محاميها _قريب ..قريب اوي يا نبيلة .
بصتله نبيلة بتوعد بس اللي شاغل دماغها هتصرف منين بعد ما تخرج وندمت لاول مرة انها قتلت سالي ..كانت هتتحايل عليها تديها قرشين .

____________
رايكم يا شباب ايه ممكن يحصل الفصل الجاي ,ياتري نبيلة هتجيلها فرصه تانية تدمر حياة سالي ولا لاء ...ياتري سالي هتقول لمازن