احببت العنقاء امل العناني

الفصل السادس عشر

الفصل السادس عشر من رواية #احببت_العنقاء_امل_العناني
ارتبكت سالي بس عصام لحقها ..اتعرف بمازن ووالدته واصر مازن انهم يتغدوا سوا مادام في نفس المطعم مع بعض
كانت سالي متوترة جدا وخصوصا وهي شايفه مازن بيلاعب بنته واللي فعلا شبهه جدا ..لقت ثريا بتبصلها جامد وفضلت تدعي سالي بقلبها ان متتعرفش عليها او متربطش الشبه بين مازن وفرح .
ثريا _بنتك جميلة اوي يا سهي ربنا يخليهالك ..هي عمرها كام .
سالي بتوتر _ربنا يخليكي يا طنط ..هي لسه ... لسه هتم السنتين بعد شهرين ان شاء الله .
ردت ثريا بحزن _ايوا ان شاء الله العمر كله في هنا يارب ..انا كان المفروض يبقي لمازن بنوته بس تكون دلوقتي سنتين ونص كدا .
سالي _اه ..حضرتك قولتي كان المفروض ..هي جرالها حاجة لاقدر الله .
مازن _خلاص بقي يا ماما ..هنصدع الناس بمشاكلنا . بص لفرح وقالها _الاميرة الحلوة هتاكل ايه .
ردت فرح بسعاده _طاطس طاطس .
ضحكوا كلهم ..جاب الجرسون الطلبات ولاحظ مازن التشابه بين طلب سهي وطلب مراته لكن معلقش لانها صدفة بحته .
سالي _هات فرح عنك شوية يا استاذ مازن .احسن تتعبك .
_اممم لا ابدا ..صدقيني مفيش اي تعب خالص .أنا مبسوط بيها اوي .
فضلت تبصلهم ومازن بياكلها وبيلعب معاها وحست بالذنب لانها حرماه من بنته بس غصب عنها ..مش بايدها اللي حصلها ولا اللي جاي ..بس دعت ربها بقلبها يلم شملهم قريب .
خلصوا الاكل واستاذن عصام وسالي عشان يمشوا ..اصر عليهم مازن وثريا يقعدوا يشربوا قهوه او اي حاجة تانيه لكن مرضيوش .
مشيوا وحست سالي انها بتجري لحد مادخلت العربيه ببنتها ..فضلت ساكته طول الطريق وحاضنه فرح النايمة في حضنها .
عصام كمان مكلمهاش في اي حاجة لانه كان سرحان في افكاره هو كمان .
في المطعم كلمت ثريا مازن _حلوين اوي سهي وبنتها صح ..بيخلوني اتخيل بالظبط سالي وبنتك يا مازن لو كانوا موجودين ..احساس وكان روحهم كانت موجوده معانا ..دمعت ..انا خايفه اموت قبل ما اشوفهم .
قعد جنبها مازن وحضنها من كتفها وهداها وهو كمان قلبه بيتقطع من الحزن والالم لفراق مراته وبنته واحساسه نفس احساس والدته بالظبط وكأن سالي هي اللي كانت معاهم بس لازم يقاوم احساسه عشان ميبقاش خاين بجد زي موصفته سالي ..
هيستناها لحد اخر يوم في عمره .
روحت سالي البيت ونيمت بنتها ..حاولت تنام معرفتش نزلت تتكلم مع عصام .لقته في مكتبه بيتشغل علي بعض الاوراق
سالي _انت فاضي شوية .
عصام _طبعا يا حببتي .تعالي .
_انت ايه رايك في اللي حصل النهارده .
_اممممممم وايه بالظبط اللي حصل النهارده .
_يوووه يا عصام هنلف وندور بقي ..يعني وجود فرح مع باباها ..انا كنت حاسه بتانيب الضمير وزعلت اوي لما شيلتها منه ..كان هيبقي اب كويس اوي يا عصام اعمل ايه .
_ولا حاجة ..دا مجرد حد تعرفيه في الشغل واتعرف علي بنتك .مفيهاش داعي تكبري المواضيع .
_انت بتهزر صح .
_لا ابدا والله .لو قررتي تقوليله الحقيقه يبقي تحسي بالذنب لكن دلوقتي وانتي مستخبيه كدا لازم تحترسي ..اللي بيواجهك وحواليكي مش امر هين يا سالي وظهورك زي ما سبق وحذرتك هياذيكي انتي وفرح وممكن المرة دي منعرفش نرجعك للحياة تاني ..وبالنسبه لاحساس الذنب دا ابقي خدي فرح معاكي من وقت للتاني لوالدته تشوفها او هو يشوفها اذا جت فرصه .
_بالسهوله دي .
هز عصام كتافه وسكت وهي فهمت انه خلاص مبقاش عنده حاجة يقولها ..كان قاسي في رده بس فعلا ملهاش حاجة تانية تعملها .
___
بدا الشغل مع شركة مازن وكانت سالي تقريبا كل يوم هناك علشان تتابع بنفسها ..كانت بتتكلم بثقه ومعرفة للي بيحصل ..الكل كان معجب بيها لكن لبني كان قلبها بيقولها كلام تاني ..
تجنبت سالي وجودها مع مازن اغلب الوقت لكن كان دايما بيجمعم وقت ..مجرد ثواني او دقايق بتخلي قلبها يدق وكانه هيخرج من صدرها ..ووشها يحمر ..كانت بشرة سهي فاتحه كتير عنها وبتحمر بسرعه فكان بيبان عليها للاسف .
فضلت تقول لنفسها تقسي قلبها بس مقدرتش ..وحشها ..كانت بتحس بيه قبل ما يقرب منها احساس جنوني ..هي نفسها لو حد قالها انه ممكن يحصل كانت كدبته .
شغلت اله القهوه بتعمل اسبريسو وقلبها دق ..عرفت انه وراها من قبل ميتكلم ..لفت ولقته في وشها ..وشها احمر زي الغبيه بالظبط .استئذن منها ودخل يعمل لروحه فنجان .
بيعمل القهوه وبيبصلها من تحت لتحت وكانه بيراقبها كانت حاسه بنظراته وكانها بتحرق في جلدها ..
قالت بتوتر _يااااه اخيرا خلصت القهوه .
_انتي مستعجله ولا ايه .
_اممممم اكيد ..المفروض نخلص اول مشروع بقي ونبدا نعرضه في الميديا كلها .
_اها ما عارف .
_طيب عن اذنك .
_معلش سؤال يا سهي بعد اذنك ..هزت راسها بالموافقه فكمل _هو انتي ليه وشك بيحمر كل متشوفيني .
_نعم .
قرب منها ولمس خدها بصابعه حركته المعتاده _اهوه بصي لنفسك كدا ..دايما بتحمري بسرعه اوي ..انتي مكسوفه ..ولو كنتي مكسوفه ..فالسؤال هو من ايه .
غمضت عنيها وعضت علي شفتها من لمسته  بس كلامه فوقها بسرعه وكانه حط مايه ساقعه فوق راسها .
شالت ايده من علي وشها وبصتله باستهزاء ومشيت .
دخلت الحمام وفضلت تدعك في وشها وتحط  عليه مايه ساقعه بس كل شوية يزيد احمرار اكتر .
كلمت نفسها في المرايه _ماشي يا سهي شكلك كنتي خجوله وعدتيني معاكي ..اعمل ايه بقي في المصيبه دي .
خرجت برا لقته بيتكلم مع لبني وبصلها وركز علي خدودها وابتسم بنص ضحكه .
مشيت تقول لروحها _اه دلوقتي يقول دايبة في هواه ..او بغريه مثلا ..دا اللي ناقص .
قضت اليوم بعصبيه كل اللي شغالين معاها لاحظوا .وراحوا اشتكوا لمازن ..اللي طلب من لبني تقولها انه عايزها في مكتبه .
دخلت سالي ومازال وشها احمر بس المرة دي من العصبيه .
سالي _نعم ..عايزني في ايه .
مازن بهدوء _الموظفين اشتكوا منك يا سهي هانم وانا بس قلتلهم هتكلم معاكي عشان تهدي عليهم حبه بس دا كل الموضوع .
اتريقت علي كلامه بطريقة طفوليه اول مرة تتصرف بيها فضحك مازن جدا .
قعدها علي الكرسي وقعد قبالها وكلمها براحه وكانها طفله _قوليلي بس ايه مزعلك .
بصتله باستغراب _وانا ايه يزعلني .كل ما في الموضوع انهم بيتلكعوا وانا عايزة اخلص النهارده زي مقلتلك .
_اممممممم يعني زهقتي مننا بسرعه كدا .
رفعت حاجبها وقالت _مش بالظبط .
بصلها بتامل وقال _تعرفي ان وشك معبر اوي ..عمري ما شفت حد كدا .
قررت تفوقه من اوهامه _والله حتي مراتك ..هي فين صحيح .
قام من قدامها ورجع لكرسيه ورا مكتبه وقالها _لو سمحتي بطلي عصبيه مع الموظفين .
خرجت من عنده مرفوعه الراس انها ردتهاله زي ما هو عمال يلاعبها واتضايقت من نفسها جدا انها غيرانه من وش سهي اللي هو اعجب بيه .كلمت نفسها بتمتمه _انا شكلي هتجنن بجد .
سالتها لبني بفضول _ايه حصل ايه .
سالي باشمئزاز _الموظفين النايتي بيشتكوا مني .
ضحكت لبني من كلامها جدا فسابتها سالي ومشيت وفقتها تاني وقالتها _متزعليش ..تعالي بس نشرب حاجة سوا .. روقي اعصابك كدا .
_لا انا هروح وهو يتصرف مع موظفينه ياختي ..كفايا عليا ادادي بنتي في البيت واهي طفله لكن مش هدادي موظفين بشنبات كمان .وبعدين انا لاول مرة اسال نفسي انا باجيلكم ليه ..متسلموني الشغل خلصان ..هو انا صاحبة الشغل ولا انتم .
ابتسمت لها لبني بمحبه وقالتها _انتي عندك بنوته .
ردت سالي بعدم تفكير _اه فرح ..هبقي اجبها تشوفيها ان شاء الله او نتقابل سوا برا ايه رايك .
دمعت عيون لبني _تبارك الله ..ربنا يحفظهالك ويرزقني ان شاء الله.اصل انا مبخلفش .
حضنتها سالي بمحبه وقالتلها _ان شاء الله ربنا هيرزقك وهتبقي احلي مامي .
روحت سالي عشان تنسي همومها وضعوط يومها في اللعب مع بنتها الحبيبة ..اللي كانت بتخرجها من اي مود وحش تكون فيه كفايه لعبها وضحكتها الحلوه .
فضل مازن في مكتبه يعاتب نفسه علي اللي بيحصل وانه ازاي بيكره نفسه اوي كل ميشوف سهي لانها بتصحي فيه مشاعر افتكرها لسالي وبس ..بس فيها غموض وسحر غريب ..بتفكره بسالي وفي نفس الوقت مختلفه عنها .حاسس وكانها سالي بس بنسخه معدله ..بنسخه حره تقدر تتصرف اوقات زي الاطفال وتتصرف بحكمة واتزان زي سالي ..تقدر تغضب من اقل كلمه وتبقي بارده وهي بتقول كلام تاني .بشرتها بتقشعر تحت لمسته زي ما كانت سالي بتعمل ونفس طريقتها .كان حاسس انه هيتجنن ..تقريبا هيفضل يقارن اي ست يعرفها في حياته بمراته اللي مش عاوزة تظهر .لازم يشيل سهي من دماغه باي طريقه .
فتح اللاب توب وبعت ايميل لايميليا هارت وطلب منها تيجي تشتغل في فرع مصر لانه محتاجها ..هو فعلا محتاج دماغها في الشغل بس برده محتاج حبها ليه واهتمامها الزايد بيه الفتره دي .
___
وصلت الانسه هارت واستقبلها مازن بكل الود المصتنع في العالم وهي صدقته بمزاجها ..حجزلها فندق ووصلها ليه .
وفي تاني يوم وصلت المكتب والكل عنيه عليها ..سالي قررت انها متروحش شركة مازن تاني بس كانت هتموت من الشوق ليه وانها تبقي معاه بس قررت انها لازم تحاول تبعد هي كمان .
كلمتها السكرتيره وقالتلها ان فيه حد عاوز يقابلها اسمه امير سالم ..خرجتها من الاحلام اللي كانت عايشة فيها لواقع مؤلم مرير ..هزت دماغها عشان تطرد اسمه بس معرفتش _ياتري عايز ايه منها .هي نسيتهم اساسا هو ومراته وعايشة حاله من السلام مع بنتها عشان تعوضها سنين الغيبوبة بس من الواضح ان المشاكل وراها وراها .كان ممكن ترفض مقابلته بس فضولها لزيارته هو اللي كسب .وقالت للسكرتيرة تخليه يدخل .
فضلت قاعده علي كرسيها متحركتش ولا سلمت عليه اول ما مد ايده .شاورت باديها انه يقعد ..فقعد علي كرسي قبالها
فضلت ساكته لحد ما بدا هو بالكلام
_انا متشكر جدا ان حضرتك وافقتي تقابليني ..واحب اعرفك بنفسي انا امير سالم ..عملت شركة صغيرة كدا للدعايا والاعلان مع زوجتي وشوية ناس اصدقائي وحبيت اجي لحضرتك يعني اعرفك بنفسنا علشان اذا احتجتينا مثلا لاي دعايا لشركة حضرتك وطبعا باسعار مخفضة اقل من اي سعرفي السوق والجوده عاليه طبعا .
حاولت سالي تغير من صوتها ونجحت لحد ما _طيب واسم شركتكم ايه .
_النرمين للدعايا والاعلان .
_امممم اشمعنا الاسم دا .
ضحك باحراج _علشان اسم زوجتي وبنتي ان شاء الله .
_كويس كويس ..طيب ممكن تسيب البروشور بتاعك واحنا اذا احتجنا اي دعايا ممكن نكلمكم .
_علي فكرة يا فندم احنا عندنا جروب اشطر من الفريق اللي عند مازن السواح وزي ما ذكرت في الاول وباسعار حلوه جدا ..اتمني حضرتك تفكري .
_انت ايه عرفك بتعاملنا مع مازن السواح .
_من مصادري الخاصه طبعا اللي اكدتلي مدي حب سيادتك وفهمك للمجال بتاعنا وطبعا هتقدري اي كسب مضمون .
متكلمتش سالي لان الباب اتفتح ودخل احمد بعشوائية واتكلم بغيظ _مين دا يا هانم .
وجهت كلامها لامير وقالتله _اتفضل .
مشي امير خطوتين بس رجع تاني ومعاه كارت دعوه _انا اسفه وعارف ان ممكن حضرتك متقبليش بس هيسعدني جدا ان حضرتك تحضري سبوع بنتي نرمين ودا كارت الدعوه .
سابه علي المكتب وخرج .
حطت سالي راسها بين ايديها وفكرت _شكل المشاكل هي اللي بتيجي وراكي يا سالي ..مرزقة طول عمرك .
قاطعها صوت احمد الخشن وهو عمال يشتم ويعلي صوته ..كل اللي عملته سالي رفعت سماعه التلفون وطلبت الامن .
مكنش مصدق كالعاده انها تتصرف كدا لحد ما جه الامن فعلا وشالوه .
اتصلت بعصام وقالتله اللي حصل ..سابلها القرار اذا حابه تروح تواجههم او لاء .
كانت عايشة في دوامة من الاحباط والمشاعر السلبية ..دماغها هينفجر من كتر التفكير ..اخدت شنطتها وراحت لمازن
.
دخلت الشركة لقتها منضبطة علي غير العاده ..راحت تشوف لبني ملقتهاش ..خبطت علي مكتب مازن ولقت واحده شقرا جميلة قريبه منه اوي بتوريه حاجة علي اللاب توب ..كالعاده اتكسفت ووشها احمر .
_انا اسفه مكنتش اعرف ان معاك حد .بس جيت اطمن علي الشغل .
_لا ابدا اتفضلي ..دي الانسه اميليا هارت مساعدتي الجديده زي منتي عارفة بندخل فكر جديد ودم جديد في الشغل .
قالت في عقلها _دم جديد ..دانا عايزة اشرب من دمك اصلا .
قعدت تبصلهم من تحت لتحت لحد ما خرجت اميليا ..كلمها مازن _انتي مش قولتي مش هتيجي تاني .ايه سبب الزياره .
ردت سالي بعنف _انت قليل الذوق يا سواح .
_اممممممم عارف بس مستغربك .
اتنهدت بضيق _مستغرب  ايه .
_وجودك دلوقتي هنا .
سمحت سالي لمشاعرها انها تظهر شوية _انت زعلت اني جيت.خلاص همشي وقامت تمشي .
قالها بهدوء _وهزعل ايه .ولاء متمشيش ..خليكي ..قوليلي بقي ايه مزعلك .
_انت عرفت منين ....(احببت العنقاء امل العناني)
قاطعها _عرفت منين ايه مزعلك صح ..من شكلك وانتي داخله ..حسيت انك هربانه من حاجة .
_لا ابدا بس شفت ناس معرفه قديمه عكرولي مزاجي بس .
_طيب تعالي اعزمك علي عصير فريش يروق دمك .
موبايلها رن ولقتها الداده اللي في البيت كلمتها وبعدين بصتله _خليها يوم تاني بقي ..فرح بتعيط وعايزاني .الداده بتقول سخنه .
كملت كلامها معاه وهي تقريبا بتجري وهو بيجري معاها .
نزلت عند عربيتها لقته ركب جنبها ..فكرها باول مرة ركب معاها ..ساقت بسرعه جدا .وصلت البيت بسرعه واخدت فرح وطارت بيها علي اقرب مستشفي بدون ما تتكلم ..ساق مازن عربيتها لان اعصابها كانت تعبانه وبتحضن بنتها وماسكه نفسها عشان متعيطش .وصلوا المستشفي ودخلوا لدكتور اطفال اللي طمنهم ان السبب التهاب في الزور .
الدكتور _المفروض تخلوا بالكم منها بقي .بلاش تشرب حاجة ساقعه من التلاجة علي طول ..واول ما تصحي الصبح شربيها مايه دافية وطبعا مع المضاد الحيوي هتبقي تمام واي جديد كلموني .
خرجوا وروحت ..ادت بنتها الدوا ونيمتها ..كان مازن تحت..نزلتله وطمنته ففهم انه لازم يمشي .بس قالها
_انتي ليه كنتي قلقانه اوي كدا المفروض تكوني مريتي بالحجات دي كتير لان الاطفال بتتعب كتير اول سنتين في حياتهم .
ردت ببرود _وانت ايه عرفك بقي ..عندك اولاد مثلا وانا معرفش .
رد عليها بنفس البرود _ايوا يوسف ابن اختي ..متربي معانا وقت اما كنا في كندا .
_امممممممم ...انا اسفه .بس مبحبهاش تعيا ..انا عندي اعيا انا ويحصلي اي حاجة وهي لاء .
شافها وهي قاعده وحاطه راسها بين ايديها ..كانت ضعيفه اوي ومحتاجاه ..ميعرفش ليه حس كدا بس كانت وكانها بتناديه .
قعد جنبها وكلمها بهدوء _متقلقيش هتبقي كويسه .عادي التهاب الزور حاجة عاديه يومين وهتخف باذن الله .
رفعت نظرها ليه وبص في عنيها ..غريبه ازاي ملاحظش قبل كدا ..نفس عيون مراته ..كانها هي بلمعتها ولونها ونظرتها ..واحساس الدفا اللي دايما كان يطلع من عنيها ..للحظة نسي شكلها اللي قدامه وعقله وراه صورة مراته ..للحظة نسي كل حاجة  ومكانه والعالم حواليه ..لمس وشها بايده كالعاده وقالها _وحشتيني .
____
قطع الهاله اللي كانوا فيها دخول عصام اللي وقف ثواني يتفرج عليهم وبعدين دخل بهدوء .
وقال _مازن بيه ..اهلا بيك .
خرج مازن وسالي من شرودهم علي كلامه .ارتبكت سالي ووشها احمر لكن مازن اتصرف عادي ..سلم علي عصام واستاذن عشان يمشي ..
حكت سالي لعصام اللي حصل فقالها _طيب وحاله الحب اللي كنتوا فيها دي ايه .بلاش تخليه يحس انك سهله .
اتنرفزت سالي _سهله ......سهله ايه ..انت ازاي تقولي كدا ..انا مراته وليا حق في كل شبر فيه ..ليا حق في احساسه وفي حبه وفي مشاعره ..ايوا انا بخدع نفسي لان انا مش هي دلوقتي بس انا هي .
عصام_اولا اهدي انا مقصدش حاجة وزي ما قلتلك انتي مش هي حاليا ..انتي سهي ولازم تتصرفي كانك سهي او علي الاقل ميبقاش مرتاح معاكي اوي كدا .
_انت ليه محسسني انك قفشتني في اوضه النوم وحتي لو حصل مش هيبقي حرام .
_يووه معاكي يا سالي ..شكل مشاعرك دلوقتي عاميه فهمك للامور ..ولاء انتي مش مراته ..انتي واحده تانيه ..ومتقلقيش مادام ظهر امير يبقي هتشوفي باقي التعابين هيظهروا واحد ورا التاني ..اتعاملي معاهم واكسري سمهم وروحي لجوزك انا مش همنعك ابدا ولا عمري هقف عائق في طريق سعادتك .عن اذنك .
سابها وراح اوضته وهي كمان طلعت اوضتها ..ادت بنتها دوا السخونيه ونامت جنبها ..كانت حاسه انها تايهه في عالم جميل من الاحلام الورديه اللي صحاها فيها مازن بلمسته ليها ..بس فعلا ازاي يتعامل معاها كدا وهو عارف انها غريبه عليه لانها دلوقتي سهي ..وعصام معاه حق فعلا ممكن يظن مازن فيها انها سهله .وفي نفس الوقت غرور الانثي اللي جواها حصله اشباع لما شافت السواح بذات نفسه مش قادر يقاومها ..فضل تسال نفسها _ياتري احساسه بيها ك سالي طاغي علي شكلها ك سهي ..ولا هو فعلا كدا فلاتي وبيخونها مع نفسها .الحاله اللي فيها هتجبلها الجنان ..بتغير من نفسها علي نفسها .
صحيت بنتها عايزة حضنها ..حضنتها سالي وراحوا هما الاتنين في نوم عميق .
____
فضل مازن طول الطريق لبيته يفكر ويأنب نفسه جدا لانه متجوز ..حس انه خاين بجد ..ازاي بيضعف قدام سهي للدرجه دي من وقت ما سالي سابته وهو عمره ما ضعف ابدا قدام اي ست ولا فكر فيها كان حاسس انه مشتت ..ومش لاقي لنفسه اي عذر ..فتح الراديو في عربيته وحاول يلهي نفسه بس مقدرش ..ممكن صوتها.. لو غمض عنيه بس وسمع صوتها هيحس ان سالي جنبه ..ممكن عنيها ..مش معقوله ازاي عنيها تشبه عيون سالي للدرجه دي ..وشكل جسمها ولون شعرها .
كلم نفسه بصوت عالي _بس بس بقي يا مازن عيب كدا .
دخل الفيلا وهو متوتر وقرفان جدا ..فجاة لقي طفل صغير جري عليه _خالو خالو .
شاله مازن وحضنه ولف بيه شويه ..شوية وجت اخته فاطيما ..قبلها من خدها وحضنها وهو مستغرب وجودهم لكن مامته ضحكت وقالتله _مقدروش يتحملوا بعدنا يا سيدي وجم بقي يقعدوا هنا .
فاطيما _والله يا ماما انا ما صدقت عديت اول تلات شهور في حملي وركبت اول طيارة وجيت ..وحشتوني ووحشني البيت .
رد عليها مازن _امممم يبقي البيت هيبقي زن من هنا ورايح وانا اللي كنت مرتاح .
ضربته بالبوكس في كتفه مثل انها وجعته وجه يردهالها شاورت علي بطنها وقالت _لا ء لاء حاسب بقي اصل انا معبيه ههههههههه .
حضنها تاني بمحبه وقعدوا في الصالون ..سال علي مصطفي قالتله _هيحاول ييجي هو كمان ما انت عارف مش هيقدر يستغني عننا ابدا .
ضحك مازن _ربنا ميحرمكوش من بعض .
استاذن وطلع اوضته يرتاح ..كان هيتجنن محتاج يتكلم مع حد ..سمع مامته طالعه اوضتها ندالها .
ثريا _ايه يا حبيبي ..عايز حاجة .
حضنها مازن وقالها _عايز اتكلم معاكي يا ماما .
قعدت علي السرير قدامه وسندت ضهرها علي المخدات واستعدت تسمعه .
مازن _اممم انا مش عارف ابدا منين اصلا .
ثريا _ابدا باسم سهي .
_هههههههه يا ماما انتي ازاي فاهماني كدا .
_مش موضوع فاهماك بس انا من اول مشوفتها واتكملت معاها عرفت انها هتشغلك .
_طيب انا هبقي خاين كدا يا ماما .انا كل ما اشوفها بتجنن ببقي عاوز اخدها في حضني ..بتجنن اني نفسي المسها وبمنع نفسي ..بحب كلامها .بحب هزارها .بحب بنتها كانها فرح بنتي .عيونها بتشدني وكسوفها بيموتني ..انا هتجنن يا ماما .
_حبيتها .
_مش عارف ..انتي وانا عارفين هي بتجذبني ليه .مسك صورة سالي وكمل كلامه _لانها شبهها يا ماما ..نفس العيون ونفس الشكل ولون الشعر والجسم .واوقات بحس انها قدامي بس بوش مختلف واسم مختلف .
_انا مش هقول انك بتحبها قد ما هقول انك مشتاق لمراتك ودا طبيعي ..وان حبك الاساسي لمراتك ..بس وجود سهي وكمية التشابه بينها وبين سالي حتي اسم بنتها برده دا عامل جذب ليك وبس ..فانا هقول ابعد لو عايز تفضل تكمل علي ذكري سالي ..او قرب وحطها مكان سالي وانسي سالي بس صارحها الاول باحساسك وانك مهتم بيها عشان واحده تانيه ..لو حبتك بجد هترضي وهتخليك تحبها هي ..لو مرضيتش يبقي خلاص .
_انسي سالي وبنتي .ازاي .
_هما فين دول بس يا مازن ..احنا جينا علي مكالمة تلفون وصوت شبيه بصوتها .ومن وقتها وهي مظهرتش ..مش يمكن يكونوا ....
_ارجوكي متقوليهاش يا ماما .
_مش هقدر اقولها بس خلينا في الواقع يا مازن .
_لا مش ممكن انا هستني مراتي .
سابته وخرجت من اوضته قام اتوضي وصلي ودعي ربه يبعد قلبه ومشاعره عن سهي الشناوي .
____
اخدت سالي فرح علشان تجيبلها لبس ..وهي بتحب محل معين دايما بتجبلها منه ..كانت دايما تعدي عليه مع مازن وقت ما كانت بتجهزها وهي في بطنها ..تلاقي الحاجة لسه هناك في دولابها في الفيلا .دخلت المحل ورحبت بيها صاحبته..كالعاده عملت فرح جو للمكان .كل شوية سالي تنادي عليها _فرح خليكي جنبي .
جت فرح ومعاها ولد تقريبا بنفس عمرها ..كان وشه جميل ومالوف بالنسبالها ..حاولت تفتكر بيشبه مين معرفتش تجمع ممكن لانها كانت مشتته التفكير شوية .
سالته _اسمك ايه يا جميل .
رد عليها _يوثف .
جات مامته تنادي عليه _يوسف يوسف .
_انا هنا يا ماما .
راحت علي الصوت مامته ومسكته وقالتله _مش انا قلتلك تخليك جنبي ..بعد كدا هعاقبك لو مسمعتش كلامي .
_اثف ماما .
وقفت سالي في مكانها وكانها اتخشبت وقالت في سرها _فاطيما .
ولنا لقاء في الفصل الجاي

شجعوني يا جدعان باي كلمه،، دا الكلمه الطيبه صدقه اقسم بالله 🤲💞💞💞💞🌹🌹