احببت العنقاء امل العناني

الفصل الثاني

شكرا لاي حد شجعني وقرالي وفتح الفصل وقراه واهتم يقولي رايه والحمدلله كان الكل مبسوط ..ربنا يحفطكم ويخليكم ويوفقكم
ياريت اي حد يعجبه الفصل منشن لحد تاني بيحب القرايه زيه واللي معدي ومبيحبش يقرا وعارف حد تاني بيحب يقرا يمنشنله 😂
ممنوع الاقتباس او النسخ الا باذني لو سمحتم  وندخل بقي في الجديد
الفصل الثاني
ردت سالي بتحدي_انت اللي مين وبتعمل ايه في بيتي
كان باين انه بيحاول يفوق وبصلها بنص عين
_قولي الاول انت راجل ولا ست
حست باهانه متعرفش ليه علي الرغم عمرها ما اهتمت براي اي حد فيها طبعا قصت شعرها وخست اوي اوبمعني اصح اختفت
ردت بنفس التحدي _ والله راجل ولا ست دا ميخصكش مردتش علي سؤالي بتعمل ايه في بيتي وعلي سريري والا هاطلب البوليس واساسااا في حد في الطريق لهنا دلوقتي يعني متفكرش تستفرد بيا
مردش ونام علي السرير وخد المخده في حضنه شكله مبيعرفش ينام الا وهو حاضن حاجه جماد انسان بقي متفرقش
هزته بالقلايه تاني ولا اهتم استجمعت قوتها وضربته علي دراعه قام من علي السرير بسرعه استغربتها وزقها علي الحيطه وكان وشه إجرامي معرفتش تتكلم وقال
_انتي عارفه لو مكنتيش ست انا كنت عملت فيكي ايه بس حظك حلو لاني مبضربش ستات علي العموم اما انام ساعتين هبقي اقولك انا مين ممكن تطلعي او تبلغي الشرطه او تعملي كل اللي نفسك فيه بس انا هنام برده امممممممم او لو حابه ترجعي  السرير تاني في الحاله  دي بس مش همانع.
سابها وراح نام تاني وهي جريت من الاوضه مش فاهمه حاجه نزلت دورت علي حاجه تاكلها ملقتش خدت عربيتها وخرجت جابت قهوه وسكر وبيض وعيش وشويه مستلزمات للمطبخ ورجعت كان المفروض تهرب بس كان جواها احساس انه مالوف علي الرغم من انه غريب
لقت السمسار سبقها علي الفيلا وشكله كان متعصب وقبل متتكلم قالها  علي اللي حصل وهي بتقلي بيض عشان تفطر
_بصي مش عارف اجبهالك ازاي بس اصحاب البيت هيرجعوا ومش هياجروه والمفروض تمشي بقي لانه بيتهم وانا بعتذرلك واوعدك هلاقي طلبك في اقرب وقت
_امممم اعتقد ان كلامك له علاقه بالشخص اللي نايم فوق
_هو فيه حد نايم فوق
_يا صباح الذكاء ايوا زي ما قلتلك وطبعا مش هخرج من هنا انا ماضيه عقد وخلاص سبت شقتي ومين هيعوضني عن الخساير دي
_يا ست هانم مينفعش
قاطعته قبل ما يكمل _ سبني وانا هتصرف المهم اعمل حسابك في الفطار ولا لاء
هز دماغه بمعني لاء اكلت وهي دماغها مشغول وشربت قهوتها كان وصل الجنايني اللي كان السمسار قال عليه طلعت معاه ووريته الجنينه والتعديلات اللي عاوزاها بس شكت في قدرته الحقيقه لانه كان عجوز وسالته _حضرتك متاكد انك تقدر تزرعها
الجنايني _ايوا يا بتي انا كبير صحيح بس الحمدلله لساتني بصحتي متقلقيش هخليهالك فله باذن واحد احد
ابتسمتله ودخلت جوا تاني قعدت مع السمسار اللي كان بيحاول يقنعها بشتي الطرق بانها لازم تخرج من البيت وقالها _اعتبري اننا ممضناش العقد ..اصلا انتي حظك كان حلو بشكل ..في يوم كان خلص كل حاجة بسهوله عمري ما شوفتها قبل كدا .
سالي بسخرية _كويس اني محظوظة في حاجة .
سابها وطلع يحاول يصحي الدخيل معرفش برده طلعت تتشمس ونامت علي كرسي قديم  بعيد شوية عن اشعه الشمس بس كانت حاسه الحراره مكنتش عايزه تقوم الا اما نادي عليها السمسار فصحيت ودخلتله
كانت عنيها لسه مش شايفه اوي من الشمس بس شافته قاعد وحاطط رجل علي رجل بكل اريحيه وكانه مالك المكان
متعرفش ايه خلاها تقوله بابتسامه _صح النوم
بصلها باستغراب ومعلقش ,السمسار كان في المطبخ بيعمله قهوه
معلقتش علي الموقف وقعدت قباله جه السمسار ومعاه تلات  فنجانين قهوه فكرت كويس بيفهم في الذوق اهوه
خذت فنجانها وطلعت بيه برا اديته للجنايني ورجعت جابت مايه وعصير وحطتهم جنبه في مكان نضيف مش عارفه ازاي راحت عليها نومه ومجبتش له حاجه
استغربوا من تصرفها لكن هي عملت كدا بتلقائية مش بتخطيط والاغرب بقي ان الدخيل ادالها فنجانه بدال اللي اديته للجنايني رفضت و شربوا القهوه والسمسار اتكلم
_يا استاذه سالي دا الاستاذ مازن ابن صاحب الفيلا ولسه راجع من برا كان جاي ينضف الفيلا عشان اهله هيرجعوا مصر تاني
_حمدالله علي سلامتهم بس انا مش هسيب الفيلا
اتكلم مازن ببرود _يعني ايه مش هتسبيها
_يعني الي حضرتك سمعته انا ماضيه عقد مع محاميك اللي انت عامله توكيل ومفيش اي سبب يخليني اسيب بيتي وأخرج
_بيتك ايه انتي اتجننتي دا بيتي انا اباا عن جد
_ايوا بيتي ومش هسيبه مهما حصل
قال السمسار _يجماعه استهدوا بالله الامور متتحلش كدا
ردت سالي  بعصبيه _اومال تتحل ازاي واحد دخل اوضتي ونام علي سريري وفي الاخر يقولي بيتي مادام بيتك كنت سايبه ليه
مازن بعناد _سايبه ولا مش سايبه ميهمكيش في حاجه وبالنسبه للنوم انا جاي من ١٢ ساعه سفر وكنت تعبان جدا لظروف ملكيش علاقه بيها وكمان يا انسه ليه مقومتيش من جنبي طول الليل انا واصل الساعه ١٢ علي فكره
حست بنار طالعه من خدودها وقالت  _مقومتش لاني كنت واخده حبايتين منوم قبلها حضرتك ولا كنت حاسه بحاجه
حاول السمسار يهدي الجو بطرق كتير لكن معرفش
قال مازن بعصبيه _هتطلعي برا بيتي قبل شهرقبل ما ماما واختي ييجوا برضاكي او غصب عنك
لمعت فكره في دماغ السمسار _ طيب متقعدوا الشهر دا سوا في الفيلا لحد ما الاقيلك يا انسه سالي مكان تاني يعجبك ان شاء الله وهعوضك عن كل اللي دفعتيه
قطع ردها عليه اتصال من بواب العماره اللي فيها شقتها _الحقي يا ست سالي والدتك بتنزل عفش شقتك كله برا العماره وعربيات مستنياها تحمله انا قلت اعرفك عشان الامانه
_ماشي اعمل اي حاجه متخليش اي حد يتحرك انا ربع ساعه وجايه
جريت وحمدت ربنا ان شنطتها كانت جنبها خطفتها وراحت ركبت عربيتها وهي علي نار  وصلت في ربع ساعه
لقت فعلا بينزلوا في عفشها اتكلمت مع المشرف اللي واقف علي العمال وهددته بان ممكن يتضر قانوني باشتراكه في السرقه خلي عماله يطلعوا حاجتها تاني وطلبت من البواب يشفلها حد يغيرلها كالون باب شقتها وطلعتلها
لقيتها قاعده باناقه علي الكرسي ومتكلمتش
قالت سالي بعصبية_هي وصلت انك تسرقيني
ردت نبيلة بغضب _اسرقك ايه دا حقي انا مش عارفه ايه جابك بواب الزفت هو اللي بلغك اكيد
سالي_انا بجد مش عارفه اقولك ايه انتي اتخطيتي اي كلام ممكن اقوله ومش هقدر اقوله لأنك امي اطلعي برا وانسى ان ليكي بنت   انا خلاص هقول ان ماليش ام وانك موتي واصلا الكلام دا مش هيبقي كدب لأنك موتي بالنسبالي من زمان
نبيلة بتريقة_هههههههههههههه انتي فاكره كلامك ياثر فيا صدقيني ولا يفرق معايا وانا هخاف يعني انك تقولي اني مت اصلا انا كنت بتكسف اوريكي لاصحابي لانك وحشه زي ابوكي في شكله وفي طباعه هحبك علي ايه كانت غلطه عمري اني اتجوزته وتاني غلطه اني خلفتك بس كنت مستفيده من فلوسه ومادام مبقاش فيه فلوس يبقي باي باي شيري
خرجت من حياتها وحست بانها حره زي الطير
لمت هدومها ودموعها بتنزل مش عارفه توقفها لقتها خدت مجوهراتها يعني سرقتها برده اخدت حاجتها كلها وكان العامل جه غيرلها مفتاح شقتها و كان لاجل الحظ والنصيب عربيه الشحن لسه تحت حصل فيها عطل وكانوا بيصلحوه طلبت منهم ياخدوا شويه حجات
اخدت سراير وطقم البلكونه عشان الجنينه والتلفزيونات والمفارش اخدت كل المستلزمات عشان ام جنة وعيالها
ياه ام جنه كويس انها افتكرتهم
مشيت ورا عربيه الشحن لحد الفيلا وكتر خيرهم حطوا كل حاجه في مكانها كانت لقت اوضتين جنب المطبخ صغيرين كدا اتاكدت انهم للخدم طلبت منهم يحطوا الحاجه فيهم ويطلعوا طقم البلكونه برا في الجنينه
كانوا متعاونين وحست الفيلا بقي فيها روح وحمدت ربها ان مازن كان في اوضته ومسمعتش ليه صوت 
بصت علي الجنايني طلع اسمه عم علي لقته عمل مجهود حلو وقالها _كدا يا ست سالي باقي بكرا وهتبقى فله ناقص بس نشتري شتلات ورود وشجر عشان تبان حلاوتها
ردت بفرحه _تسلم ايدك يا عم علي ومتقوليش يا ست سالي تاني قولي سالي بس
_ميصحش العين متعلاش عن الحاجب
سالي_لا تعلي عادي ههههههه متقلقش انت
طلعت فوق ودخلت الاوضه اللي المفروض اوضه اخت مازن
كانت نضيفه وبتلمع اخدت مفرش وفرشته علي السرير ولسه هتدخل الحمام لقت اوضتها اتفتحت ودخل مازن بدون استئذان
زعقتله بعصبيه _انت ازاي تدخل كدا من غير متخبط يا قليل الذوق
مازن_قليل الذوق ماشي هعديهالك بس ايه اللي انا شايفه دا جبتي حاجتك وعفشك وكانك هتعيشي هنا للابد لا فوقي اذا كنتي فاكره بتصرفاتك دي هتلوي دراعي يبقي بتحلمي انا كنت فاكرك سهله وهبله لكن طلعتي حربايه بصحيح
_انت متاكد انك كنت عايش برا اعتقد ان السوقيه في الكلام دا استحاله تكون تربيه اجانب دي تربيه شوارع سالي
مازن بعصبية _اخرسي
سالي _اتفضل اطلع برا اوضتي بدال ميحصل تطاول في الكلام اكتر من كدا 
وقف يبصلها شويه بعناد سابته ودخلت الحمام وقفلت الباب واستنت بعد ماخرج طلعت قفلت بابها شكل ايام الخصوصيه راحت خلاص
اخدت دوش بطئ استمتعت بيه بكل دقيقه كان يوم صعب جدا لكن حاسه براحه محستهاش قبل كدا دمعت تاني اما افتكرتها لكن قالت : ولا تهمني واعتبرتها فعلا ماتت
لبست فستان  كان ضيق شويه  زمان بس بقي واسع عليها وحطت ميك اب خفيف وندمت لاول مره انها قصيت شعرها اخدت شنطتها ونزلت لقيته بيتفرج علي تلفزيونها ابتسمت وخرجت وقفها  بكلام
مازن_راحة فين متاخر كدا ومتشيكة كدا هتشوفي البوي فريند بتاعك
ضحكت بصوت عالي وقالتله _رايحه اقابل تلاته مش واحد بس
سابته وخرجت )احببت العنقاء امل العناني aghopes)
عند مازن
مش عارف ايه الي حصلي انا عمري ما كلمت بنت كدا بس فيها حاجه بتستفزني باسلوبها وحركاتها وشكلها بس انا لازم ابطل دي مش اخلاقي ابدا لازم اشوفلها حل واطلعها من البيت عشان ارتاح واشيلها من دماغي

راحت لام جنه لقتها قلقانه لتكون خليت بيها طمنتها فرحت اما شافت جنه مسرحه شعرها ولابسه هدوم نضيفه وقاعده بتحل الواجب هي واخوها
ام جنه _والله يا ست سالي كنت فاكراكي عشمتينا وخليتي بينا لانك اتاخرتي علينا
سالي_مالوش لازمه الكلام دا جهزتوا حاجتكم نمشي
بصت لقتها شنطه واحده صغيره سألتها _دي كل حاجتكم
ام جنة _أيوا الباقي كراكيب ملهاش لازمه واهو الغيارين العدلين شويه حطتهم في الشنطه دي
سالي_طيب مش مشكله يالا بينا
خرجوا وقفلت ام جنة الاوضه ووصت جارتها عليها كانها بتوصيها علي بنتها اد ايه في بشر بسيطه لابعد الحدود واستغربت ان ام جنة اصلا وثقت فيها علي طول يعني مخافتش تطلع سالي نصابة مثلا او حاجة ..او تاخدهم تاذيهم سالتها سالي _معلش يا ام جنة ..انتي مخفتيش من طريقتي ..اقصد انا قلتلك علي اللي عايزاه وانتي وافقتي علي طول يعني ممكن اطلع نصابة مثلا ..او ااذيكم .
ردت ام جنة بضحك _وحتي لو اذتينا يا ست سالي هيبقي احسن من الفقر والعيشة دي .هيبقي احسن من اننا نستني  حتة لقمة ناكلها ..ايام ابوهم ما كان عايش كان بيحاول علي قد ما يقدر بس من وقت ما مات وانا كعابي دابت من الهم والغلب .فاول مقولتيلي طبعا وافقت لو هيحصلنا اي حاجة هيبقي احسن من حالتنا دلوقتي .
حاولت سالي تلطف الجو _يعني مش عشان انا وشي سمح كدا وفيا حاجة لله .
ردت ام جنة بجدية _دا معروف من غير ما تقولي علي فكرة .وشك فيه القبول بجد وفيه راحة كدا ودخلتي قلبي علي طول .

اخدتها سالي  والولاد لمحل ملابس خافت ام جنة تدخله او بمعني اصح خافت يطردوها
كم تحكم الحياه علي بعض الاشخاص احيانا ان يضعوا وجوههم في التراب غصبا وقهرا وليس بالاختيار
محبتش تضغط عليها او تدايقها بس اولادها اقنعوها تخرج معاهم جبتلهم لبس  وحست بفرحه محستهاش طول عمرها وكانها بتتولد من جديد فرحتهم باللبس وشنط المدارس والحجات الجديده كانت لا تقدر رسمت الضحكه علي وشوشهم عمر اصغر من عمرهم
ام جنة كانت كل شويه تقلها كفايه بقي يا ست خلاص جابوا كتير لحد ما خلصوا ودخلوا علي القسم النسائي عجبتها حجات جابتها ليها وحجات جابتها لام جنة وطلعواباكياس مليانه هدوم جميله ووشوش ضاحكة مبتسمه
راحوا كلوا في كنتاكي بالعافيه كالعاده مع ام جنة وراحوا السوبر ماركت جابوا طلبات البيت سوا
ام جنه _انا حاسه اني موت ودي الجنه يا ست سالي
سالي_جنة ايه يا شيخه دا حاجه بسيطه اوي خلي طموحك للجنة اعلي بكتتتتتتييييير من كدا ربنا يكتبهالنا يارب
ام جنة_متقلقيش يا ست هتدخليها
سالي_ليه بقي بتشوفي عالم الغيب
ام جنة_لا بس قلب زي قلبك ربنا هيدخله الجنه انا متاكده يا ست
سالي_بقولك ياام جنه بطلي كلمة ست دي ارجوكي اسمي سالي وكمان انتي عندك كم سنه
ام جنة_عندي ٣٨ ي ست يووه اقصد يا سالي
سالي_طيب يعني قريبه مني انا ٣٠ بس ..طب اسمك ايه غير ام جنة
ام جنة _ابتسام بس قوليلي علي طول ام جنة .
روحوا الفيلا والاولاد فرحوا بطريقه مش طبيعيه وكان معاهم اكياس لا حصر لها مش عارفين يطلعوها ازاي
دخلتهم وورتهم اوضهم اللي فرحوا بيها طبعا سبتهم وراحت تدور عليه ملقتهوش في الدور الأول طلعت اوضته وخبطت عليها فتحلها بعد فتره
مازن _نعم عايزه ايه
سالي_مفيش كنت جايبه حجات ممكن تساعدني في شيلها
مازن بسخرية_ليه حد قالك اني شيال مثلا
سالي_اممممم خلاص هخلي العيال هما اللي يشيلوا مادام الكبير متكبر
_عيال مين 
مردتش سبته ونزلت جه وراها بخمس دقايق عرفته عليهم وعرفتهم عليه
راحوا كلهم جابوا الاكياس والحجات من العربيه
ام جنه وعيالها خدوا هدومهم وحاجتهم يرتبوها في اوضهم
وهي وهو كانوا بيرتبوا حجات المطبخ
مازن _مقولتليش بقي حجات المطبخ دي بكام عشان ادفع نصها
سالي _لا متشغلش بالك ابقي هات انت الطلبات المره الجايه
مازن _لا مقدرش اكل من حاجه مش دافع فيها
سالي _امممممم هتقدر منا هاكل برده من حاجتك الي مش هبقي دافعه فيها
رصيوا الحاجه وخلصوا المهمه لقي الفاتوره كبيره جدا واستغرب من الرقم
مازن_ايه كمية البسكوتات والحجات دي
سالي _عشان الاولاد مقدرتش اقولهم لاء علي اي حاجه طلبوها
مازن _هما مين بقي دول
سالي _مفيش ام جنة هتساعدني في الفيلا ومعاها عيالها وبس
مازن _طبعا حاجتهم اللي شيلناها دي انتي اللي جيبهالهم اكيد
سالي _يعني
مازن _انتي عليكي ذنب بتكفري عنه مثلا مش قادر افهمك
سالي _لا ذنب ولا حاجه انا بحب اساعد بس
جاتلهم جنه بيجامتها الجديده _شوفتي يا خالتو   البجامه حلوه ازاي
حضنتها  سالي وباست جبينها _البجامه احلوت بيكي يا جنة يا قمر قوليلي بقي خلصتوا ترتيب
جنة_ايوا بس ماما بتعيط  
ولنا لقاء في فصل اخر
#احببت_العنقاء_امل_العناني